| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. நத்தி²புத்தஸமஸுத்தவண்ணனா
3. Natthiputtasamasuttavaṇṇanā
13. புத்தபேமங் புத்தக்³க³ஹணேன க³ஹிதங் உத்தரபத³லோபேனாதி ஆஹ ‘‘புத்தபேமஸம’’ந்தி. கோ³ஸமிதந்தி கோ³ஹி ஸமங் கதங். தேனாஹ ‘‘கோ³ஹி ஸம’’ந்தி. ஸூரியஸ்ஸ ஸமாதி ஸூரியஸமா. அவயவஸம்ப³ந்தே⁴ சேதங் ஸாமிவசனங். அவயவோ செத்த² ஆபா⁴ ஏவாதி விஞ்ஞாயதி ‘‘அனந்தரங் ஆபா⁴’’தி வுச்சமானத்தாதி ஆஹ ‘‘ஸூரியாபா⁴ய ஸமா’’திஆதி³. மஹோக⁴பா⁴வேன ஸரந்தி ஸவந்தீதி ஸரா, மஹந்தா ஜலாஸயா. ஸப்³பே³ தே ஸமுத்³த³பரமா ஓரிமஜனேஹி அதி³ட்ட²பரதீரத்தா தஸ்ஸ.
13. Puttapemaṃ puttaggahaṇena gahitaṃ uttarapadalopenāti āha ‘‘puttapemasama’’nti. Gosamitanti gohi samaṃ kataṃ. Tenāha ‘‘gohi sama’’nti. Sūriyassa samāti sūriyasamā. Avayavasambandhe cetaṃ sāmivacanaṃ. Avayavo cettha ābhā evāti viññāyati ‘‘anantaraṃ ābhā’’ti vuccamānattāti āha ‘‘sūriyābhāya samā’’tiādi. Mahoghabhāvena saranti savantīti sarā, mahantā jalāsayā. Sabbe te samuddaparamā orimajanehi adiṭṭhaparatīrattā tassa.
நத்தி² அத்தஸமங் பேமந்தி கா³தா²ய பட²மகா³தா²யங் வுத்தனயேன அத்தோ² வேதி³தப்³போ³. அத்தபேமேன ஸமங் பேமங் நாம நத்தீ²தி அயமத்தோ². அனுத³ககந்தாரே க⁴ம்மஸந்தாபங் அஸஹந்தியா அங்கே ட²பிதபுத்தகங் கந்த³ந்தங் பூ⁴மியங் நிபஜ்ஜாபெத்வா தஸ்ஸ உபரி ட²த்வா மதஇத்தி²வத்து²னா தீ³பேதப்³ப³ங். தேனாஹ – ‘‘மாதாபிதாத³யோ ஹி ச²ட்³டெ³த்வாபி புத்ததீ⁴தாத³யோ’’தி. ததா² சாஹ –
Natthi attasamaṃ pemanti gāthāya paṭhamagāthāyaṃ vuttanayena attho veditabbo. Attapemena samaṃ pemaṃ nāma natthīti ayamattho. Anudakakantāre ghammasantāpaṃ asahantiyā aṅke ṭhapitaputtakaṃ kandantaṃ bhūmiyaṃ nipajjāpetvā tassa upari ṭhatvā mataitthivatthunā dīpetabbaṃ. Tenāha – ‘‘mātāpitādayo hi chaḍḍetvāpi puttadhītādayo’’ti. Tathā cāha –
‘‘ஸப்³பா³ தி³ஸா அனுபரிக³ம்ம சேதஸா,
‘‘Sabbā disā anuparigamma cetasā,
நேவஜ்ஜ²கா³ பியதரமத்தனா க்வசி;
Nevajjhagā piyataramattanā kvaci;
ஏவங் பியோ புது² அத்தா பரேஸங்,
Evaṃ piyo puthu attā paresaṃ,
தஸ்மா ந ஹிங்ஸே பரமத்தகாமோ’’தி. (ஸங்॰ நி॰ 1.119; உதா³॰ 41; நெத்தி॰ 113);
Tasmā na hiṃse paramattakāmo’’ti. (saṃ. ni. 1.119; udā. 41; netti. 113);
த⁴ஞ்ஞேன ஸமங் த⁴னங் நாம நத்தி², யஸ்மா தப்படிப³த்³தா⁴ ஆஹாரூபஜீவீனங் ஸத்தானங் ஜீவிதவுத்தி. ததா²ரூபே காலேதி து³ப்³பி⁴க்க²காலே. ஏகதே³ஸங்யேவ ஓபா⁴ஸந்தீதி ஏகஸ்மிங் க²ணே சதூஸு மஹாதீ³பேஸு ஓபா⁴ஸங் ப²ரிதுங் அஸமத்த²த்தா ஸூரியஸ்ஸபி, பகே³வ இதரேஸங். போ³தி⁴ஸத்தஸ்ஸ உத³யப்³ப³யஸ்ஸ ஞாணானுபா⁴வேன ஸகலஜாதிகெ²த்தங் ஏகாலோகங் அஹோஸீதி ஆஹ ‘‘பஞ்ஞா…பே॰… ஸக்கோதீ’’தி. தமங் வித⁴மதீதி புப்³பே³னிவாஸஞாணாத³யோ பஞ்ஞா யத்த² பவத்தந்தி, தமனவஸேஸங் ப்³யாபெத்வா ஏகப்பஹாரேன பவத்தனதோ. ‘‘வுட்டி²யா பன பவத்தமானாய யாவ ஆப⁴ஸ்ஸரப⁴வனா’’தி பசுரவஸேன வுத்தங்.
Dhaññena samaṃ dhanaṃ nāma natthi, yasmā tappaṭibaddhā āhārūpajīvīnaṃ sattānaṃ jīvitavutti. Tathārūpe kāleti dubbhikkhakāle. Ekadesaṃyeva obhāsantīti ekasmiṃ khaṇe catūsu mahādīpesu obhāsaṃ pharituṃ asamatthattā sūriyassapi, pageva itaresaṃ. Bodhisattassa udayabbayassa ñāṇānubhāvena sakalajātikhettaṃ ekālokaṃ ahosīti āha ‘‘paññā…pe… sakkotī’’ti. Tamaṃ vidhamatīti pubbenivāsañāṇādayo paññā yattha pavattanti, tamanavasesaṃ byāpetvā ekappahārena pavattanato. ‘‘Vuṭṭhiyā pana pavattamānāya yāva ābhassarabhavanā’’ti pacuravasena vuttaṃ.
நத்தி²புத்தஸமஸுத்தவண்ணனா நிட்டி²தா.
Natthiputtasamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. நத்தி²புத்தஸமஸுத்தங் • 3. Natthiputtasamasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. நத்தி²புத்தஸமஸுத்தவண்ணனா • 3. Natthiputtasamasuttavaṇṇanā
