| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
7. நதும்ஹஸுத்தவண்ணனா
7. Natumhasuttavaṇṇanā
37. ந தும்ஹாகந்தி காயஸ்ஸ அனத்தனியபா⁴வத³ஸ்ஸனமேவ பனேதந்தி யா தஸ்ஸ அனத்தனியதா, தங் த³ஸ்ஸேதுங் ‘‘அத்தனி ஹீ’’திஆதி³ வுத்தங். யதி³ ந அத்தனியங், பரகியங் நாம ஸியாதி, தம்பி நத்தீ²தி த³ஸ்ஸெந்தோ ‘‘நாபி அஞ்ஞேஸ’’ந்தி ஆஹ. நயித³ங் புராணகம்மமேவாதி ‘‘இத³ங் காயோ’’தி வுத்தஸரீரங் புராணகம்மமேவ ந ஹோதி. ந ஹி காயோ வேத³னாஸபா⁴வோ. பச்சயவோஹாரேனாதி காரணோபசாரேன. அபி⁴ஸங்க²தந்திஆதி³ நபுங்ஸகலிங்க³வசனங். புரிமலிங்க³ஸபா⁴க³தாயாதி ‘‘புராணமித³ங் கம்ம’’ந்தி ஏவங் வுத்தபுரிமனபுங்ஸகலிங்க³ஸபா⁴க³தாய. அஞ்ஞமஞ்ஞாபி⁴முகே²ஹி ஸமேச்ச பச்சயேஹி கதோ அபி⁴ஸங்க²தோதி ஆஹ ‘‘பச்சயேஹி கதோதி த³ட்ட²ப்³போ³’’தி. அபி⁴ஸஞ்சேதயிதந்தி ததா² அபி⁴ஸங்க²தத்தஸங்கா²தேன அபி⁴முக²பா⁴வேன சேதயிதங் பகப்பிதங், பவத்திதந்தி அத்தோ². சேதனாவத்து²கோதி சேதனாஹேதுகோ. வேத³னியந்தி வேத³னாய ஹிதங் வத்தா²ரம்மணபா⁴வேன வேத³னாய பச்சயபா⁴வதோ. தேனாஹ ‘‘வேத³னியவத்தூ²’’தி.
37.Natumhākanti kāyassa anattaniyabhāvadassanameva panetanti yā tassa anattaniyatā, taṃ dassetuṃ ‘‘attani hī’’tiādi vuttaṃ. Yadi na attaniyaṃ, parakiyaṃ nāma siyāti, tampi natthīti dassento ‘‘nāpi aññesa’’nti āha. Nayidaṃ purāṇakammamevāti ‘‘idaṃ kāyo’’ti vuttasarīraṃ purāṇakammameva na hoti. Na hi kāyo vedanāsabhāvo. Paccayavohārenāti kāraṇopacārena. Abhisaṅkhatantiādi napuṃsakaliṅgavacanaṃ. Purimaliṅgasabhāgatāyāti ‘‘purāṇamidaṃ kamma’’nti evaṃ vuttapurimanapuṃsakaliṅgasabhāgatāya. Aññamaññābhimukhehi samecca paccayehi kato abhisaṅkhatoti āha ‘‘paccayehi katoti daṭṭhabbo’’ti. Abhisañcetayitanti tathā abhisaṅkhatattasaṅkhātena abhimukhabhāvena cetayitaṃ pakappitaṃ, pavattitanti attho. Cetanāvatthukoti cetanāhetuko. Vedaniyanti vedanāya hitaṃ vatthārammaṇabhāvena vedanāya paccayabhāvato. Tenāha ‘‘vedaniyavatthū’’ti.
நதும்ஹஸுத்தவண்ணனா நிட்டி²தா.
Natumhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. நதும்ஹஸுத்தங் • 7. Natumhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. நதும்ஹஸுத்தவண்ணனா • 7. Natumhasuttavaṇṇanā
