| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. ஜம்பு³கா²த³கஸங்யுத்தங்
4. Jambukhādakasaṃyuttaṃ
1. நிப்³பா³னபஞ்ஹஸுத்தவண்ணனா
1. Nibbānapañhasuttavaṇṇanā
314. நிப்³பா³னங் ஆக³ம்மாதி எத்த² ஆக³ம்மாதி ஸப்³ப³ஸங்கா²ரேஹி நிப்³பி³ன்னஸ்ஸ விஸங்கா²ரனின்னஸ்ஸ கொ³த்ரபு⁴னா விவட்டிதமானஸஸ்ஸ மக்³கே³ன ஸச்சி²கரணேனாதி அத்தோ². ஸச்சி²கிரியமானஞ்ஹி தங் அதி⁴க³ந்த்வா ஆரம்மணபச்சயபூ⁴தஞ்ச படிச்ச அதி⁴பதிபச்சயபூ⁴தே ச தஸ்மிங் பரமஸ்ஸாஸபா⁴வேன விமுத்தஸங்கா²ரஸ்ஸ பரமக³திபா⁴வேன ச பதிட்டா²னபூ⁴தே பதிட்டா²ய க²யஸங்கா²தோ மக்³கோ³ ராகா³தி³கே கே²பேதீதி தங்ஸச்சி²கரணாபா⁴வே ராகா³தீ³னங் அனுப்பத்தினிரோத⁴க³மனாபா⁴வதோ ‘‘நிப்³பா³னங் ஆக³ம்ம ராகோ³ கீ²யதீ’’தி வுத்தங்.
314.Nibbānaṃāgammāti ettha āgammāti sabbasaṅkhārehi nibbinnassa visaṅkhāraninnassa gotrabhunā vivaṭṭitamānasassa maggena sacchikaraṇenāti attho. Sacchikiriyamānañhi taṃ adhigantvā ārammaṇapaccayabhūtañca paṭicca adhipatipaccayabhūte ca tasmiṃ paramassāsabhāvena vimuttasaṅkhārassa paramagatibhāvena ca patiṭṭhānabhūte patiṭṭhāya khayasaṅkhāto maggo rāgādike khepetīti taṃsacchikaraṇābhāve rāgādīnaṃ anuppattinirodhagamanābhāvato ‘‘nibbānaṃ āgamma rāgo khīyatī’’ti vuttaṃ.
இமினாவ ஸுத்தேனாதி இமினாவ ஜம்பு³கா²த³கஸுத்தேன. கிலேஸக்க²யமத்தங் நிப்³பா³னந்தி வதெ³ய்ய ‘‘ராக³க்க²யோ’’திஆதி³னா ஸுத்தே ஆக³தத்தா. ‘‘கிலேஸக்க²யமத்த’’ந்தி அவிஸேஸேன வுத்தத்தா ஆஹ ‘‘கஸ்ஸா’’திஆதி³. அத்³தா⁴ அத்தனோதி வக்க²தி ‘‘பரஸ்ஸ கிலேஸக்க²யேன பரஸ்ஸ நிப்³பா³னஸம்பத்தி ந யுத்தா’’தி. நிப்³பா³னாரம்மணகரணேன கொ³த்ரபு⁴க்க²ணே கிலேஸக்க²யப்பத்திதா ச ஆபன்னாதி ஆஹ – ‘‘கிங் பன தேஸு அகீ²ணேஸுயேவா’’திஆதி³. நனு ஆரம்மணகரணமத்தேன கிலேஸக்க²யோ அனுப்பத்தோதி ந ஸக்கா வத்துங். சித்தஞ்ஹி அதீதானாக³தாதி³ஸப்³ப³ங் ஆலம்ப³னங் கரோதி, ந நிப்ப²ன்னமேவாதி. கொ³த்ரபூ⁴பி மக்³கே³ன யா கிலேஸானங் அனுப்பத்தித⁴ம்மதா காதப்³பா³, தங் ஆரப்³ப⁴ பவத்திஸ்ஸதீதி? ந, அப்பத்தனிப்³பா³னஸ்ஸ நிப்³பா³னாரம்மணஞாணாபா⁴வதோ. ந ஹி அஞ்ஞே த⁴ம்மா விய நிப்³பா³னங், தங் பன அதிக³ம்பீ⁴ரத்தா அப்பத்தேன ஆலம்பி³துங் ந ஸக்கா, தஸ்மா தேன கொ³த்ரபு⁴னா பத்தப்³பே³ன திகாலிகஸபா⁴வாதிக்கந்தக³ம்பீ⁴ரபா⁴வேன ப⁴விதப்³ப³ங், கிலேஸக்க²யமத்ததங் வா இச்ச²தோ கொ³த்ரபு⁴தோ புரேதரங் நிப்ப²ன்னேன கிலேஸக்க²யேன ப⁴விதப்³ப³ங். அப்பத்தகிலேஸக்க²யாரம்மணகரணே ஹி ஸதி கொ³த்ரபு⁴தோ புரேதரசித்தானிபி ஆலம்பெ³ய்யுந்தி.
Imināva suttenāti imināva jambukhādakasuttena. Kilesakkhayamattaṃ nibbānanti vadeyya ‘‘rāgakkhayo’’tiādinā sutte āgatattā. ‘‘Kilesakkhayamatta’’nti avisesena vuttattā āha ‘‘kassā’’tiādi. Addhā attanoti vakkhati ‘‘parassa kilesakkhayena parassa nibbānasampatti na yuttā’’ti. Nibbānārammaṇakaraṇena gotrabhukkhaṇe kilesakkhayappattitā ca āpannāti āha – ‘‘kiṃ pana tesu akhīṇesuyevā’’tiādi. Nanu ārammaṇakaraṇamattena kilesakkhayo anuppattoti na sakkā vattuṃ. Cittañhi atītānāgatādisabbaṃ ālambanaṃ karoti, na nipphannamevāti. Gotrabhūpi maggena yā kilesānaṃ anuppattidhammatā kātabbā, taṃ ārabbha pavattissatīti? Na, appattanibbānassa nibbānārammaṇañāṇābhāvato. Na hi aññe dhammā viya nibbānaṃ, taṃ pana atigambhīrattā appattena ālambituṃ na sakkā, tasmā tena gotrabhunā pattabbena tikālikasabhāvātikkantagambhīrabhāvena bhavitabbaṃ, kilesakkhayamattataṃ vā icchato gotrabhuto puretaraṃ nipphannena kilesakkhayena bhavitabbaṃ. Appattakilesakkhayārammaṇakaraṇe hi sati gotrabhuto puretaracittānipi ālambeyyunti.
தஸ்மாதிஆதி³ வுத்தஸ்ஸேவ அத்த²ஸ்ஸ நிக³மனங். தங் பனேதங் நிப்³பா³னங். ரூபினோ த⁴ம்மா அரூபினோ த⁴ம்மாதிஆதீ³ஸூதி ஆதி³ஸத்³தே³ன லோகுத்தரஅனாஸவாதீ³னங் ஸங்க³ஹோ த³ட்ட²ப்³போ³. அரூபத⁴ம்மாதி³பா⁴வக்³க³ஹணேன சஸ்ஸ பரினிப்ப²ன்னதா தீ³பிதா. தேனாஹ ‘‘ந கிலேஸக்க²யமத்தமேவா’’தி. கிலேஸக்க²யமத்ததாய ஹி ஸதி நிப்³பா³னஸ்ஸ ப³ஹுதா ஆபஜ்ஜதி ‘‘யத்தகா கிலேஸா கீ²யந்தி, தத்தகானி நிப்³பா³னானீ’’தி. அபா⁴வஸ்ஸபா⁴வதோ க³ம்பீ⁴ராதி³பா⁴வோ அஸங்க²தாதி³பா⁴வோ ச ந ஸியா, வுத்தோ ச ஸோ நிப்³பா³னஸ்ஸ, தஸ்மாஸ்ஸ பச்சேதப்³போ³ பரினிப்ப²ன்னபா⁴வோ. யஸ்மா ச ஸம்முதிஸச்சாரம்மணங் ஸங்க²தத⁴ம்மாரம்மணங் வா ஸமுச்சே²த³வஸேன கிலேஸே பஜஹிதுங் ந ஸக்கோதி, யதோ மஹக்³க³தஞாணங் விபஸ்ஸனாஞாணங் வா கிலேஸவிக்க²ம்ப⁴னவஸேன தத³ங்க³வஸேன வா பஜஹதி, தஸ்மா அரியமக்³க³ஞாணஸ்ஸ ஸம்முதிஸச்சஸங்க²தத⁴ம்மாரம்மணேஹி விபரீதஸபா⁴வேன ஆரம்மணேன ப⁴விதப்³ப³ங். ததா² ஹி தங் ஸமுச்சே²த³வஸேன கிலேஸே பஜஹீதி ஏவங் பரினிப்ப²ன்னாஸங்க²தஸபா⁴வங் நிப்³பா³னந்தி நிட்ட²மெத்த² க³ந்தப்³ப³ந்தி.
Tasmātiādi vuttasseva atthassa nigamanaṃ. Taṃ panetaṃ nibbānaṃ. Rūpino dhammā arūpino dhammātiādīsūti ādisaddena lokuttaraanāsavādīnaṃ saṅgaho daṭṭhabbo. Arūpadhammādibhāvaggahaṇena cassa parinipphannatā dīpitā. Tenāha ‘‘na kilesakkhayamattamevā’’ti. Kilesakkhayamattatāya hi sati nibbānassa bahutā āpajjati ‘‘yattakā kilesā khīyanti, tattakāni nibbānānī’’ti. Abhāvassabhāvato gambhīrādibhāvo asaṅkhatādibhāvo ca na siyā, vutto ca so nibbānassa, tasmāssa paccetabbo parinipphannabhāvo. Yasmā ca sammutisaccārammaṇaṃ saṅkhatadhammārammaṇaṃ vā samucchedavasena kilese pajahituṃ na sakkoti, yato mahaggatañāṇaṃ vipassanāñāṇaṃ vā kilesavikkhambhanavasena tadaṅgavasena vā pajahati, tasmā ariyamaggañāṇassa sammutisaccasaṅkhatadhammārammaṇehi viparītasabhāvena ārammaṇena bhavitabbaṃ. Tathā hi taṃ samucchedavasena kilese pajahīti evaṃ parinipphannāsaṅkhatasabhāvaṃ nibbānanti niṭṭhamettha gantabbanti.
நிப்³பா³னபஞ்ஹஸுத்தவண்ணனா நிட்டி²தா.
Nibbānapañhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. நிப்³பா³னபஞ்ஹாஸுத்தங் • 1. Nibbānapañhāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. நிப்³பா³னபஞ்ஹாஸுத்தவண்ணனா • 1. Nibbānapañhāsuttavaṇṇanā
