| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. நிதா³னஸுத்தங்
9. Nidānasuttaṃ
39. ‘‘தீணிமானி , பி⁴க்க²வே, நிதா³னானி கம்மானங் ஸமுத³யாய. கதமானி தீணி? லோபோ⁴ நிதா³னங் கம்மானங் ஸமுத³யாய, தோ³ஸோ நிதா³னங் கம்மானங் ஸமுத³யாய, மோஹோ நிதா³னங் கம்மானங் ஸமுத³யாய. ந, பி⁴க்க²வே, லோபா⁴ அலோபோ⁴ ஸமுதே³தி; அத² கோ², பி⁴க்க²வே, லோபா⁴ லோபோ⁴வ ஸமுதே³தி. ந, பி⁴க்க²வே, தோ³ஸா அதோ³ஸோ ஸமுதே³தி; அத² கோ², பி⁴க்க²வே, தோ³ஸா தோ³ஸோவ ஸமுதே³தி. ந, பி⁴க்க²வே, மோஹா அமோஹோ ஸமுதே³தி; அத² கோ², பி⁴க்க²வே, மோஹா மோஹோவ ஸமுதே³தி. ந, பி⁴க்க²வே, லோப⁴ஜேன கம்மேன தோ³ஸஜேன கம்மேன மோஹஜேன கம்மேன தே³வா பஞ்ஞாயந்தி, மனுஸ்ஸா பஞ்ஞாயந்தி, யா வா பனஞ்ஞாபி காசி ஸுக³தியோ. அத² கோ², பி⁴க்க²வே, லோப⁴ஜேன கம்மேன தோ³ஸஜேன கம்மேன மோஹஜேன கம்மேன நிரயோ பஞ்ஞாயதி திரச்சா²னயோனி பஞ்ஞாயதி பெத்திவிஸயோ பஞ்ஞாயதி, யா வா பனஞ்ஞாபி காசி து³க்³க³தியோ. இமானி கோ², பி⁴க்க²வே, தீணி நிதா³னானி கம்மானங் ஸமுத³யாய.
39. ‘‘Tīṇimāni , bhikkhave, nidānāni kammānaṃ samudayāya. Katamāni tīṇi? Lobho nidānaṃ kammānaṃ samudayāya, doso nidānaṃ kammānaṃ samudayāya, moho nidānaṃ kammānaṃ samudayāya. Na, bhikkhave, lobhā alobho samudeti; atha kho, bhikkhave, lobhā lobhova samudeti. Na, bhikkhave, dosā adoso samudeti; atha kho, bhikkhave, dosā dosova samudeti. Na, bhikkhave, mohā amoho samudeti; atha kho, bhikkhave, mohā mohova samudeti. Na, bhikkhave, lobhajena kammena dosajena kammena mohajena kammena devā paññāyanti, manussā paññāyanti, yā vā panaññāpi kāci sugatiyo. Atha kho, bhikkhave, lobhajena kammena dosajena kammena mohajena kammena nirayo paññāyati tiracchānayoni paññāyati pettivisayo paññāyati, yā vā panaññāpi kāci duggatiyo. Imāni kho, bhikkhave, tīṇi nidānāni kammānaṃ samudayāya.
‘‘தீணிமானி, பி⁴க்க²வே, நிதா³னானி கம்மானங் ஸமுத³யாய. கதமானி தீணி? அலோபோ⁴ நிதா³னங் கம்மானங் ஸமுத³யாய, அதோ³ஸோ நிதா³னங் கம்மானங் ஸமுத³யாய, அமோஹோ நிதா³னங் கம்மானங் ஸமுத³யாய. ந, பி⁴க்க²வே, அலோபா⁴ லோபோ⁴ ஸமுதே³தி; அத² கோ², பி⁴க்க²வே, அலோபா⁴ அலோபோ⁴வ ஸமுதே³தி. ந, பி⁴க்க²வே, அதோ³ஸா தோ³ஸோ ஸமுதே³தி; அத² கோ², பி⁴க்க²வே, அதோ³ஸா அதோ³ஸோவ ஸமுதே³தி. ந, பி⁴க்க²வே, அமோஹா மோஹோ ஸமுதே³தி; அத² கோ², பி⁴க்க²வே, அமோஹா அமோஹோவ ஸமுதே³தி. ந, பி⁴க்க²வே, அலோப⁴ஜேன கம்மேன அதோ³ஸஜேன கம்மேன அமோஹஜேன கம்மேன நிரயோ பஞ்ஞாயதி திரச்சா²னயோனி பஞ்ஞாயதி பெத்திவிஸயோ பஞ்ஞாயதி, யா வா பனஞ்ஞாபி காசி து³க்³க³தியோ. அத² கோ², பி⁴க்க²வே, அலோப⁴ஜேன கம்மேன அதோ³ஸஜேன கம்மேன அமோஹஜேன கம்மேன தே³வா பஞ்ஞாயந்தி, மனுஸ்ஸா பஞ்ஞாயந்தி, யா வா பனஞ்ஞாபி காசி ஸுக³தியோ. இமானி கோ², பி⁴க்க²வே, தீணி நிதா³னானி கம்மானங் ஸமுத³யாயா’’தி. நவமங்.
‘‘Tīṇimāni, bhikkhave, nidānāni kammānaṃ samudayāya. Katamāni tīṇi? Alobho nidānaṃ kammānaṃ samudayāya, adoso nidānaṃ kammānaṃ samudayāya, amoho nidānaṃ kammānaṃ samudayāya. Na, bhikkhave, alobhā lobho samudeti; atha kho, bhikkhave, alobhā alobhova samudeti. Na, bhikkhave, adosā doso samudeti; atha kho, bhikkhave, adosā adosova samudeti. Na, bhikkhave, amohā moho samudeti; atha kho, bhikkhave, amohā amohova samudeti. Na, bhikkhave, alobhajena kammena adosajena kammena amohajena kammena nirayo paññāyati tiracchānayoni paññāyati pettivisayo paññāyati, yā vā panaññāpi kāci duggatiyo. Atha kho, bhikkhave, alobhajena kammena adosajena kammena amohajena kammena devā paññāyanti, manussā paññāyanti, yā vā panaññāpi kāci sugatiyo. Imāni kho, bhikkhave, tīṇi nidānāni kammānaṃ samudayāyā’’ti. Navamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9-10. நிதா³னஸுத்தாதி³வண்ணனா • 9-10. Nidānasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8-11. அத்தகாரீஸுத்தாதி³வண்ணனா • 8-11. Attakārīsuttādivaṇṇanā
