| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. நித்³தா³தந்தீ³ஸுத்தவண்ணனா
6. Niddātandīsuttavaṇṇanā
16. பச்சி²மே மாஸே பச்சா²ப⁴த்தங் பிண்ட³பாதப்படிக்கந்தோ சதுக்³கு³ணங் ஸங்கா⁴டிங் பஞ்ஞபெத்வா த³க்கி²ணேன பஸ்ஸேன ஸதோ ஸம்பஜானோதி எத்தகங் பாட²ங் ஸங்கி²பித்வா ‘‘நித்³த³ங் ஓக்கமிதா’’தி வுத்தங். கிரியாமயசித்தேஹி அவோமிஸ்ஸோ ப⁴வங்க³ஸோதோ அப்³யாகதனித்³தா³. ஸா ஹி கீ²ணாஸவானங் உப்பஜ்ஜனாரஹா, தஸ்ஸா புப்³ப³பா⁴கா³பரபா⁴கே³ஸு…பே॰… உப்பன்னங் தி²னமித்³த⁴ங் இதா⁴தி⁴ப்பேதா நித்³தா³, ஸா அகீ²ணாஸவானங் யேபு⁴ய்யேன அனியதகாலா, தப்³பி³து⁴ரனியதஸப்³பா⁴வங் த³ஸ்ஸெந்தோ ‘‘அதிச்சா²த…பே॰… ஆக³ந்துகங் ஆலஸிய’’ந்தி ஆஹ. காயாலஸியபச்சயா வீரியஸ்ஸ படிபக்க²பூ⁴தா சத்தாரோ அகுஸலக்க²ந்தா⁴ தந்தீ³ நாம. தந்தீ³தி ஸபா⁴வனித்³தே³ஸோ. தந்தி³யனாதி ஆகாரனிங்த்³தே³ஸோ. தந்தீ³மனதாதி தந்தீ³பூ⁴தசித்ததா. ஆலஸ்யந்தி அலஸபா⁴வாஹரணங். ஆலஸ்யாயிதத்தந்தி அலஸபா⁴வப்பத்தி. காயவிஜம்ப⁴னாதி காயஸ்ஸ வினாமனா. அகுஸலபக்கா² உக்கண்டி²ததாதி அகுஸலபக்கி²யா அனபி⁴ரதி. ப⁴த்தகிலமதோ²தி யதா²வுத்தஸ்ஸ ப⁴த்தவத்து²கஸ்ஸ ஆஹாரஸ்ஸ வஸேன ஸரீரே உப்பஜ்ஜனககே²தோ³. உபக்கிலிட்டோ²தி பஞ்ஞாய து³ப்³ப³லீகரணேன உபக்கிலிட்ட²சித்தோ. சித்தஸ்ஸ அஸமாஹிதத்தா நிவாரிதபாதுபா⁴வோ. அரியமக்³க³ஸ்ஸ ஜோதனங் நாம உப்பஜ்ஜனமேவாதி ஆஹ ‘‘ந ஜோததி , ந பாதுப⁴வதீதி அத்தோ²’’தி. ந ஹி அரியமக்³கோ³ ஜோதிஅஜோதினாமோ பவத்ததி.
16. Pacchime māse pacchābhattaṃ piṇḍapātappaṭikkanto catugguṇaṃ saṅghāṭiṃ paññapetvā dakkhiṇena passena sato sampajānoti ettakaṃ pāṭhaṃ saṅkhipitvā ‘‘niddaṃ okkamitā’’ti vuttaṃ. Kiriyāmayacittehi avomisso bhavaṅgasoto abyākataniddā. Sā hi khīṇāsavānaṃ uppajjanārahā, tassā pubbabhāgāparabhāgesu…pe… uppannaṃ thinamiddhaṃ idhādhippetā niddā, sā akhīṇāsavānaṃ yebhuyyena aniyatakālā, tabbidhuraniyatasabbhāvaṃ dassento ‘‘aticchāta…pe… āgantukaṃ ālasiya’’nti āha. Kāyālasiyapaccayā vīriyassa paṭipakkhabhūtā cattāro akusalakkhandhā tandī nāma. Tandīti sabhāvaniddeso. Tandiyanāti ākāraniṃddeso. Tandīmanatāti tandībhūtacittatā. Ālasyanti alasabhāvāharaṇaṃ. Ālasyāyitattanti alasabhāvappatti. Kāyavijambhanāti kāyassa vināmanā. Akusalapakkhā ukkaṇṭhitatāti akusalapakkhiyā anabhirati. Bhattakilamathoti yathāvuttassa bhattavatthukassa āhārassa vasena sarīre uppajjanakakhedo. Upakkiliṭṭhoti paññāya dubbalīkaraṇena upakkiliṭṭhacitto. Cittassa asamāhitattā nivāritapātubhāvo. Ariyamaggassa jotanaṃ nāma uppajjanamevāti āha ‘‘na jotati, na pātubhavatīti attho’’ti. Na hi ariyamaggo jotiajotināmo pavattati.
மக்³க³ஸஹஜாதவீரியேனாதி லோகியலோகுத்தரமக்³க³ஸஹஜாதவீரியேன. மிஸ்ஸகமக்³கோ³ ஹி இத⁴ அதி⁴ப்பேதோ. நீஹரித்வாதி நீஹரணஹேது. ஹேதுஅத்தோ² ஹி அயங் த்வா-ஸத்³தோ³ ‘‘பஞ்ஞாய சஸ்ஸ தி³ஸ்வா’’திஆதீ³ஸு (ம॰ நி॰ 1.271) விய. தேன ‘‘மக்³கோ³ விஸுஜ்ஜ²தீ’’தி வசனங் ஸமத்தி²தங் ஹோதி. ‘‘அரியமக்³க³ங் விஸுஜ்ஜ²தீ’’தி கேசி பட²ந்தி.
Maggasahajātavīriyenāti lokiyalokuttaramaggasahajātavīriyena. Missakamaggo hi idha adhippeto. Nīharitvāti nīharaṇahetu. Hetuattho hi ayaṃ tvā-saddo ‘‘paññāya cassa disvā’’tiādīsu (ma. ni. 1.271) viya. Tena ‘‘maggo visujjhatī’’ti vacanaṃ samatthitaṃ hoti. ‘‘Ariyamaggaṃ visujjhatī’’ti keci paṭhanti.
நித்³தா³தந்தீ³ஸுத்தவண்ணனா நிட்டி²தா.
Niddātandīsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. நித்³தா³தந்தீ³ஸுத்தங் • 6. Niddātandīsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. நித்³தா³தந்தீ³ஸுத்தவண்ணனா • 6. Niddātandīsuttavaṇṇanā
