| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
நிக³மனகதா²வண்ணனா
Nigamanakathāvaṇṇanā
ஸகலரூபாரூபஸம்மஸனே ஸண்ஹஸுகு²மவிஸயஞாணதாய விபஸ்ஸனாசாரனிபுணபு³த்³தீ⁴னங் ஸுஸங்யதகாயவசீஸமாசாரதாய ஸமத²விபஸ்ஸனாஸு ஸம்மதே³வ யதனதோ ச யதீனங் பி⁴க்கூ²னங் க²ந்தா⁴யதனதா⁴துஸச்சிந்த்³ரியபடிச்சஸமுப்பாத³பே⁴தே³ பரமத்த²த⁴ம்மே நானானயேஹி ஞாணவிபா⁴க³ஸ்ஸ ஸன்னிஸ்ஸயேன ப³ஹுகாரஸ்ஸ ஸங்யுத்தாக³மவரஸ்ஸ அத்த²ஸங்வண்ணனங் காதுங் ஸாரத்த²ப்பகாஸனதோ ஏவ நிபுணா யா மயா அட்ட²கதா² ஆரத்³தா⁴தி ஸம்ப³ந்தோ⁴. ஸவிஸேஸங் பஞ்ஞாவஹகு³ணத்தா ஏவ ஹிஸ்ஸ க³ந்தா²ரம்பே⁴ ஆதி³தோபி ‘‘பஞ்ஞாபபே⁴த³ஜனநஸ்ஸா’’தி வுத்தங். மஹாஅட்ட²கதா²ய ஸாரந்தி ஸங்யுத்தமஹாஅட்ட²கதா²ய ஸாரங். ஏகூனஸட்டி²மத்தோதி தோ²கங் ஊனபா⁴வதோ மத்த-ஸத்³த³க்³க³ஹணங்.
Sakalarūpārūpasammasane saṇhasukhumavisayañāṇatāya vipassanācāranipuṇabuddhīnaṃ susaṃyatakāyavacīsamācāratāya samathavipassanāsu sammadeva yatanato ca yatīnaṃ bhikkhūnaṃ khandhāyatanadhātusaccindriyapaṭiccasamuppādabhede paramatthadhamme nānānayehi ñāṇavibhāgassa sannissayena bahukārassa saṃyuttāgamavarassa atthasaṃvaṇṇanaṃ kātuṃ sāratthappakāsanato eva nipuṇā yā mayā aṭṭhakathā āraddhāti sambandho. Savisesaṃ paññāvahaguṇattā eva hissa ganthārambhe āditopi ‘‘paññāpabhedajananassā’’ti vuttaṃ. Mahāaṭṭhakathāya sāranti saṃyuttamahāaṭṭhakathāya sāraṃ. Ekūnasaṭṭhimattoti thokaṃ ūnabhāvato matta-saddaggahaṇaṃ.
மூலட்ட²கதா²ய ஸாரந்தி புப்³பே³ வுத்தஸங்யுத்தமஹாஅட்ட²கதா²ய ஸாரமேவ புன நிக³மனவஸேன வுத்தந்தி. அத² வா மூலட்ட²கதா²ய ஸாரந்தி போராணட்ட²கதா²ஸு அத்த²ஸாரங். தேன ஏதங் த³ஸ்ஸேதி ‘‘ஸங்யுத்தமஹாஅட்ட²கதா²ய அத்த²ஸாரங் ஆதா³ய இமங் ஸாரத்த²ப்பகாஸினிங் கரொந்தேன ஸேஸமஹானிகாயானம்பி மூலட்ட²கதா²ஸு இத⁴ வியோக³க்க²மங் அத்த²ஸாரங் ஆதா³ய அகாஸி’’ந்தி. ‘‘மஹாவிஹாராதி⁴வாஸீன’’ந்தி ச இத³ங் புரிமபச்சி²மபதே³ஹி ஸத்³தி⁴ங் ஸம்ப³ந்தி⁴தப்³ப³ங் ‘‘மஹாவிஹாராதி⁴வாஸீனங் ஸமயங் பகாஸயந்திங் மஹாவிஹாராதி⁴வாஸீனங் மூலட்ட²கதா²ய ஸாரங் ஆதா³யா’’தி ச. தேன புஞ்ஞேன. ஹோது ஸப்³போ³ ஸுகீ² லோகோதி காமாவசராதி³விபா⁴கோ³ ஸப்³போ³ ஸத்தலோகோ யதா²ரஹங் போ³தி⁴த்தயாதி⁴க³மவஸேன ஸம்பயுத்தேன நிப்³பா³னஸுகே²ன ஸுகி²தோ ஹோதூதி ஸதே³வகஸ்ஸ லோகஸ்ஸ அச்சந்தங் ஸுகா²தி⁴க³மாய அத்தனோ புஞ்ஞங் பரிணாமேதி.
Mūlaṭṭhakathāya sāranti pubbe vuttasaṃyuttamahāaṭṭhakathāya sārameva puna nigamanavasena vuttanti. Atha vā mūlaṭṭhakathāya sāranti porāṇaṭṭhakathāsu atthasāraṃ. Tena etaṃ dasseti ‘‘saṃyuttamahāaṭṭhakathāya atthasāraṃ ādāya imaṃ sāratthappakāsiniṃ karontena sesamahānikāyānampi mūlaṭṭhakathāsu idha viyogakkhamaṃ atthasāraṃ ādāya akāsi’’nti. ‘‘Mahāvihārādhivāsīna’’nti ca idaṃ purimapacchimapadehi saddhiṃ sambandhitabbaṃ ‘‘mahāvihārādhivāsīnaṃ samayaṃ pakāsayantiṃ mahāvihārādhivāsīnaṃ mūlaṭṭhakathāya sāraṃ ādāyā’’ti ca. Tena puññena. Hotu sabbo sukhī lokoti kāmāvacarādivibhāgo sabbo sattaloko yathārahaṃ bodhittayādhigamavasena sampayuttena nibbānasukhena sukhito hotūti sadevakassa lokassa accantaṃ sukhādhigamāya attano puññaṃ pariṇāmeti.
எத்தாவதா ஸாரத்த²ப்பகாஸினியா
Ettāvatā sāratthappakāsiniyā
ஸங்யுத்தனிகாய-அட்ட²கதா²ய லீனத்த²ப்பகாஸனா நிட்டி²தா.
Saṃyuttanikāya-aṭṭhakathāya līnatthappakāsanā niṭṭhitā.
ஸங்யுத்தடீகா ஸமத்தா.
Saṃyuttaṭīkā samattā.
