| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. நிக³ண்ட²னாடபுத்தஸுத்தவண்ணனா
8. Nigaṇṭhanāṭaputtasuttavaṇṇanā
350. ஆக³தாக³மோதி வாசுக்³க³தபரியத்தித⁴ம்மோ. விஞ்ஞாதஸாஸனோதி படிவித்³த⁴ஸத்து²ஸாஸனோ. தேனாஹ ‘‘அனாகா³மீ’’திஆதி³. நக்³க³பொ⁴க்³க³ந்தி அவஸனபா⁴வேன நக்³க³ங், குடிலஜ்ஜா²ஸயதாய பொ⁴க்³க³ங், ததோ ஏவ நிஸ்ஸிரிகங். நக்³க³தாய ஹி ஸோ ரூபேன நிஸ்ஸிரிகோ, பொ⁴க்³க³தாய சித்தேன. ப⁴க³வதோ ஸத்³தா⁴யாதி ப⁴க³வதி ஸத்³தா⁴ய. தஸ்மிங் ஸத்³த³ஹனா ஓகப்பனா தஸ்ஸ ஸத்³தா⁴திபி வத்தப்³ப³தங் லப⁴தி. க³ச்சா²மீதி ஆக³ச்சா²மி, பு³ஜ்ஜா²மீதி அத்தோ². ஏதங் நிக³ண்டே²ன புச்சி²தமத்த²மாஹ.
350.Āgatāgamoti vācuggatapariyattidhammo. Viññātasāsanoti paṭividdhasatthusāsano. Tenāha ‘‘anāgāmī’’tiādi. Naggabhogganti avasanabhāvena naggaṃ, kuṭilajjhāsayatāya bhoggaṃ, tato eva nissirikaṃ. Naggatāya hi so rūpena nissiriko, bhoggatāya cittena. Bhagavato saddhāyāti bhagavati saddhāya. Tasmiṃ saddahanā okappanā tassa saddhātipi vattabbataṃ labhati. Gacchāmīti āgacchāmi, bujjhāmīti attho. Etaṃ nigaṇṭhena pucchitamatthamāha.
காயங் உன்னாமெத்வாதி காயங் அப்³பு⁴ன்னாமெத்வா. குச்சி²ங் நீஹரித்வாதி பிட்டி²யா நின்னமனேன குச்சி²ங் புரதோ நீஹரித்வா. கீ³வங் பஸாரணவஸேன பக்³க³ய்ஹ பக்³க³ஹெத்வா ஸப்³ப³ங் தி³ஸங் பெக்க²மானோ. ஸப்³ப³மித³ங் நிக³ண்ட²ஸ்ஸ பஹட்டா²காரத³ஸ்ஸனத்த²ங் ‘‘இதா³னி ஸமணஸ்ஸ கோ³தமஸ்ஸ உபரி வாத³ங் ஆரோபேதுங் லப்³ப⁴தீ’’தி. தேனாஹ ‘‘வாதங் வா ஸோ’’திஆதி³. ஸகாரணாதி யுத்திஸஹிதா. பஞ்ஹமக்³கோ³தி பஞ்ஹஸங்கா²தோ வீமங்ஸா, ஏவங் ப⁴விதப்³ப³ந்தி சித்தேனேவ பரிவீமங்ஸா பஞ்ஹா. ஏகோ உத்³தே³ஸோதி ஏகங் உத்³தி³ஸனங் அத்த²ஸ்ஸ ஸங்கி²த்தவசனங். வெய்யாகரணந்தி நித்³தி³ஸனங் அத்த²ஸ்ஸ விசாரெத்வா கத²னங். ஏவந்தி இமினா நயேன. ஸப்³ப³த்தா²தி ஸப்³பே³ஸு பஞ்ஹுத்³தே³ஸவெய்யாகரணேஸு அத்தோ² வித்தா²ரதோ வேதி³தப்³போ³.
Kāyaṃunnāmetvāti kāyaṃ abbhunnāmetvā. Kucchiṃ nīharitvāti piṭṭhiyā ninnamanena kucchiṃ purato nīharitvā. Gīvaṃ pasāraṇavasena paggayha paggahetvā sabbaṃ disaṃ pekkhamāno. Sabbamidaṃ nigaṇṭhassa pahaṭṭhākāradassanatthaṃ ‘‘idāni samaṇassa gotamassa upari vādaṃ āropetuṃ labbhatī’’ti. Tenāha ‘‘vātaṃ vā so’’tiādi. Sakāraṇāti yuttisahitā. Pañhamaggoti pañhasaṅkhāto vīmaṃsā, evaṃ bhavitabbanti citteneva parivīmaṃsā pañhā. Eko uddesoti ekaṃ uddisanaṃ atthassa saṃkhittavacanaṃ. Veyyākaraṇanti niddisanaṃ atthassa vicāretvā kathanaṃ. Evanti iminā nayena. Sabbatthāti sabbesu pañhuddesaveyyākaraṇesu attho vitthārato veditabbo.
நிக³ண்ட²னாடபுத்தஸுத்தவண்ணனா நிட்டி²தா.
Nigaṇṭhanāṭaputtasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. நிக³ண்ட²னாடபுத்தஸுத்தங் • 8. Nigaṇṭhanāṭaputtasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. நிக³ண்ட²னாடபுத்தஸுத்தவண்ணனா • 8. Nigaṇṭhanāṭaputtasuttavaṇṇanā
