| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. வங்கீ³ஸஸங்யுத்தங்
8. Vaṅgīsasaṃyuttaṃ
1. நிக்க²ந்தஸுத்தவண்ணனா
1. Nikkhantasuttavaṇṇanā
209. ஆளவியந்தி ஆளவினக³ரஸமீபே. அக்³க³சேதியேதி கோ³தமகசேதியாதீ³ஹி உத்தமசேதியே. தங் கிர பூ⁴மிராமணெய்யகபா⁴வேன மனுஞ்ஞதாய பதா⁴னயுத்ததாதி³ஸம்பத்தியா ச இதரசேதியேஹி ஸெட்ட²ஸம்மதங். கப்பத்தே²ரேனாதி ‘‘கப்போ’’தி கொ³த்ததோ ஆக³தனாமோ தே²ரோ, ஸஹஸ்ஸபுராணஜடிலானங் அப்³ப⁴ந்தரே அயங் மஹாதே²ரோ. ஓஹீனகோதி தே²ரேஸு கா³மங் பிண்டா³ய பவிட்டே²ஸு விஹாரே ஏவ அவஹீனகோ டி²தோ. தத்த² காரணமாஹ ‘‘விஹாரபாலோ’’திஆதி³. ஸமலங்கரித்வாதி ஸமங் அலங்காரேன அலங்கரித்வா. குஸலசித்தங் வித்³த⁴ங்ஸேதி பவத்திதுங் அப்பதா³னவஸேன. ஏதஸ்மிந்தி ஏதஸ்மிங் ராகே³ உப்பன்னே. ‘‘ஏகஸ்மி’’ந்தி வா பாடோ², ஏகஸ்மிங் விஸபா⁴க³வத்து²கே ராகே³ உப்பன்னே. த⁴ம்மோ வாதி மம சித்தே உப்பஜ்ஜனகதோ அஞ்ஞோ த⁴ம்மோ வா. யேன காரணேன பரோ அனபி⁴ரதிங் வினோதெ³த்வா இதா³னேவ அபி⁴ரதிங் உப்பாதெ³ய்ய, தங் காரணங் குதோ லப்³பா⁴தி யோஜனா, தங் காரணங் நத்தீ²தி அத்தோ², தஸ்ஸ அபா⁴வகாரணவசனங்.
209.Āḷaviyanti āḷavinagarasamīpe. Aggacetiyeti gotamakacetiyādīhi uttamacetiye. Taṃ kira bhūmirāmaṇeyyakabhāvena manuññatāya padhānayuttatādisampattiyā ca itaracetiyehi seṭṭhasammataṃ. Kappattherenāti ‘‘kappo’’ti gottato āgatanāmo thero, sahassapurāṇajaṭilānaṃ abbhantare ayaṃ mahāthero. Ohīnakoti theresu gāmaṃ piṇḍāya paviṭṭhesu vihāre eva avahīnako ṭhito. Tattha kāraṇamāha ‘‘vihārapālo’’tiādi. Samalaṅkaritvāti samaṃ alaṅkārena alaṅkaritvā. Kusalacittaṃ viddhaṃseti pavattituṃ appadānavasena. Etasminti etasmiṃ rāge uppanne. ‘‘Ekasmi’’nti vā pāṭho, ekasmiṃ visabhāgavatthuke rāge uppanne. Dhammo vāti mama citte uppajjanakato añño dhammo vā. Yena kāraṇena paro anabhiratiṃ vinodetvā idāneva abhiratiṃ uppādeyya, taṃ kāraṇaṃ kuto labbhāti yojanā, taṃ kāraṇaṃ natthīti attho, tassa abhāvakāraṇavacanaṃ.
அனகா³ரியந்தி அகா³ரவிரஹதோ அனகா³ரங் பப்³ப³ஜ்ஜா. தத்த² நியுத்தத்தா அனகா³ரியங் க-காரஸ்ஸ ய-காரங் கத்வா, பப்³ப³ஜிதந்தி அத்தோ². ஆதா⁴வந்தீதி ஹத³யங் அபி⁴ப⁴வித்வா தா⁴வந்தி. உக்³க³தானந்தி உளாரானங் புத்தா. தேனாஹ ‘‘மஹேஸக்கா² ராஜஞ்ஞபூ⁴தா’’தி. உத்தமப்பமாணந்தி ஸஹஸ்ஸபலங் ஸமந்தாதி ஸமந்ததோ. பரிகிரெய்யுந்தி விஜ்ஜெ²ய்யுங். ஏதஸ்மா ஸஹஸ்ஸாதி யதா²வுத்தா த⁴னுக்³க³ஹஸஹஸ்ஸதோ. அதிரேகதரா அனேகஸஹஸ்ஸா. இத்தி²யோ ஓலோகனஸிதலபிதரோதி³தஸரே கி²பந்தியோ. நேவ மங் ப்³யாத⁴யிஸ்ஸந்தி நேவ மங் நிஜ்ஜா²யிஸ்ஸந்தி. ‘‘ப்³யாத⁴யிஸ்ஸதீ’’தி பாடோ²தி வுத்தங் ‘‘சாலேதுங் ந ஸக்கி²ஸ்ஸதீதி அத்தோ²’’தி. த⁴ம்மே ஸம்ஹீதி ஸகே ஸந்திகே பதிட்டி²தே ஸாஸனத⁴ம்மே. தேனாஹ ‘‘அனபி⁴ரதிங் வினோதெ³த்வா’’திஆதி³.
Anagāriyanti agāravirahato anagāraṃ pabbajjā. Tattha niyuttattā anagāriyaṃ ka-kārassa ya-kāraṃ katvā, pabbajitanti attho. Ādhāvantīti hadayaṃ abhibhavitvā dhāvanti. Uggatānanti uḷārānaṃ puttā. Tenāha ‘‘mahesakkhā rājaññabhūtā’’ti. Uttamappamāṇanti sahassapalaṃ samantāti samantato. Parikireyyunti vijjheyyuṃ. Etasmā sahassāti yathāvuttā dhanuggahasahassato. Atirekatarā anekasahassā. Itthiyo olokanasitalapitaroditasare khipantiyo. Neva maṃ byādhayissanti neva maṃ nijjhāyissanti. ‘‘Byādhayissatī’’ti pāṭhoti vuttaṃ ‘‘cāletuṃ na sakkhissatīti attho’’ti. Dhamme samhīti sake santike patiṭṭhite sāsanadhamme. Tenāha ‘‘anabhiratiṃvinodetvā’’tiādi.
மக்³க³ந்தி ‘‘மக்³கோ³’’தி வத்தப்³பே³ லிங்க³விபல்லாஸேன வுத்தங். தேனாஹ ‘‘ஸோ ஹி நிப்³பா³னஸ்ஸ புப்³ப³பா⁴க³மக்³க்³கோ³’’தி.
Magganti ‘‘maggo’’ti vattabbe liṅgavipallāsena vuttaṃ. Tenāha ‘‘so hi nibbānassa pubbabhāgamagggo’’ti.
நிக்க²ந்தஸுத்தவண்ணனா நிட்டி²தா.
Nikkhantasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. நிக்க²ந்தஸுத்தங் • 1. Nikkhantasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. நிக்க²ந்தஸுத்தவண்ணனா • 1. Nikkhantasuttavaṇṇanā
