| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. நிமொக்க²ஸுத்தவண்ணனா
2. Nimokkhasuttavaṇṇanā
2. பட²மமாக³தந்தி ஸங்வண்ணனாவஸேன பட²மஸுத்தாதீ³ஸு பட²மங் ஆக³தபத³ங். உத்தானத்த²ந்தி பாகடத்த²ங். அபுப்³ப³ங்யேவ ஹி து³விஞ்ஞெய்யத்த²ஞ்ச பத³ங் ஸங்வண்ணேதப்³ப³ங். நோதி புச்சா²யங் நு-ஸத்³தே³ன ஸமானத்தோ² நிபாதோதி ஆஹ ‘‘ஜானாஸி நோதி ஜானாஸி நூ’’தி. வட்டதோ நிமுச்சந்தி தேன ஸத்தாதி நிமொக்கோ², மக்³கோ³. ஸோ ச பமுச்சந்தி தேனாதி பமொக்கோ², பமுச்சனந்தே பன அதி⁴க³ந்தப்³ப³த்தாப²லங் ‘‘பமொக்கோ²’’தி வுத்தங், யதா² அரஹத்தங் ‘‘ராக³க்க²யோ தோ³ஸக்க²யோ மோஹக்க²யோ’’தி வுத்தங். தேதி ஸத்தா. விவிச்சதீதி விஸுங் அஸம்மிஸ்ஸோ ஹோதி, விக³ச்ச²தீதி அத்தோ². விவிச்சதி து³க்க²ங் ஏதஸ்மாதி விவேகோ. து³தியவிகப்பே பன ஸகலவட்டது³க்க²தோ ஸத்தா நிமுச்சந்தி எத்த² பமுச்சந்தி விவிச்சந்தி சாதி நிமொக்கோ² பமொக்கோ² விவேகோ, நிப்³பா³னந்தி அத்தோ² வேதி³தப்³போ³. எத்தா²தி ச நிமித்தத்தே² பு⁴ம்மவசனங் த³ட்ட²ப்³ப³ங். அவதா⁴ரணத்தோ² கோ²-காரோ ‘‘அஸ்ஸோஸி கோ²’’திஆதீ³ஸு விய.
2.Paṭhamamāgatanti saṃvaṇṇanāvasena paṭhamasuttādīsu paṭhamaṃ āgatapadaṃ. Uttānatthanti pākaṭatthaṃ. Apubbaṃyeva hi duviññeyyatthañca padaṃ saṃvaṇṇetabbaṃ. Noti pucchāyaṃ nu-saddena samānattho nipātoti āha ‘‘jānāsi noti jānāsi nū’’ti. Vaṭṭato nimuccanti tena sattāti nimokkho, maggo. So ca pamuccanti tenāti pamokkho, pamuccanante pana adhigantabbattāphalaṃ ‘‘pamokkho’’ti vuttaṃ, yathā arahattaṃ ‘‘rāgakkhayo dosakkhayo mohakkhayo’’ti vuttaṃ. Teti sattā. Viviccatīti visuṃ asammisso hoti, vigacchatīti attho. Viviccati dukkhaṃ etasmāti viveko. Dutiyavikappe pana sakalavaṭṭadukkhato sattā nimuccanti ettha pamuccanti viviccanti cāti nimokkho pamokkho viveko, nibbānanti attho veditabbo. Etthāti ca nimittatthe bhummavacanaṃ daṭṭhabbaṃ. Avadhāraṇattho kho-kāro ‘‘assosi kho’’tiādīsu viya.
நந்தீ³மூலகோ ப⁴வோ நந்தீ³ப⁴வோ புரிமபதே³ உத்தரபத³லோபேன ‘‘ஸாகப⁴க்கோ² பத்த²வோ ஸாகபத்த²வோ’’தி யதா². பட²மங் கம்மவட்டபதா⁴னங் அத்த²ங் வத்வா புன கிலேஸகம்மானங் வஸேன உப⁴யப்பதா⁴னங் அத்த²ங் வத³ந்தோ ‘‘நந்தி³யா சா’’திஆதி³மாஹ. புரிமனயேதி நந்தீ³மூலகோ கம்மப⁴வோ நந்தீ³ப⁴வோதி ஏதஸ்மிங் பக்கே². நந்தீ³ப⁴வேனாதி நந்தீ³ப⁴வபதே³ன. திவித⁴கம்மாபி⁴ஸங்கா²ரவஸேனாதி புஞ்ஞாபி⁴ஸங்கா²ராதி³வஸேன காயஸங்கா²ராதி³வஸேன ச திப்பகாரஸ்ஸ கம்மாபி⁴ஸங்கா²ரஸ்ஸ வஸேன. ஸங்கா²ரக்க²ந்தோ⁴ க³ஹிதோ சேதனாபதா⁴னத்தா ஸங்கா²ரக்க²ந்த⁴ஸ்ஸ. ஸஞ்ஞாவிஞ்ஞாணேஹீதி ‘‘ஸஞ்ஞாவிஞ்ஞாணஸங்க²யா’’தி ஏவங் வுத்தஸஞ்ஞாவிஞ்ஞாணபதே³ஹி. தங்ஸம்பயுத்தா சாதி தேன யதா²வுத்தஸங்கா²ரக்க²ந்தே⁴ன ஸமங் யுத்தா ஏவ. த்³வே க²ந்தா⁴தி ஸஞ்ஞாவிஞ்ஞாணக்க²ந்தா⁴.
Nandīmūlako bhavo nandībhavo purimapade uttarapadalopena ‘‘sākabhakkho patthavo sākapatthavo’’ti yathā. Paṭhamaṃ kammavaṭṭapadhānaṃ atthaṃ vatvā puna kilesakammānaṃ vasena ubhayappadhānaṃ atthaṃ vadanto ‘‘nandiyā cā’’tiādimāha. Purimanayeti nandīmūlako kammabhavo nandībhavoti etasmiṃ pakkhe. Nandībhavenāti nandībhavapadena. Tividhakammābhisaṅkhāravasenāti puññābhisaṅkhārādivasena kāyasaṅkhārādivasena ca tippakārassa kammābhisaṅkhārassa vasena. Saṅkhārakkhandho gahito cetanāpadhānattā saṅkhārakkhandhassa. Saññāviññāṇehīti ‘‘saññāviññāṇasaṅkhayā’’ti evaṃ vuttasaññāviññāṇapadehi. Taṃsampayuttā cāti tena yathāvuttasaṅkhārakkhandhena samaṃ yuttā eva. Dve khandhāti saññāviññāṇakkhandhā.
நனு எத்த² வேத³னாக்க²ந்தோ⁴ ந க³ஹிதோதி? நோ ந க³ஹிதோதி த³ஸ்ஸெந்தோ ‘‘தேஹி பனா’’திஆதி³மாஹ. தீஹி க²ந்தே⁴ஹீதி ஸஞ்ஞாஸங்கா²ரவிஞ்ஞாணக்க²ந்தே⁴ஹி. க³ஹிதாவ அவினாபா⁴வதோ. ந ஹி வேத³னாரஹிதோ கோசி சித்துப்பாதோ³ அத்தி². அனுபாதி³ண்ணகானந்தி குஸலாகுஸலானங். ந ஹெத்த² கிரியாக²ந்தா⁴னங் அப்பவத்தி அதி⁴ப்பேதா. அப்பவத்திவஸேனாதி அனுப்பத்தித⁴ம்மதாபத்திவஸேன. நிப்³ப³த்தனவஸேன கம்மகிலேஸேஹி உபாதீ³யதீதி உபாதி³, பஞ்சக்க²ந்தா⁴. உபாதி³னோ ஸேஸோ உபாதி³ஸேஸோ, ஸஹ உபாதி³ஸேஸேனாதி ஸஉபாதி³ஸேஸங். நிப்³பா³னங் கதி²தங் ஸகலகம்மகிலேஸவூபஸமத்த²ஸ்ஸ ஜோதிதத்தா. ஹெட்டா² த்³வீஹி பதே³ஹி அனுபாதி³ண்ணகக்க²ந்தா⁴ க³ஹிதாதி ‘‘வேத³னான’’ந்தி எத்த² உபாதி³ண்ணகக்³க³ஹணங் யுத்தந்தி ஆஹ ‘‘உபாதி³ண்ணகவேத³னான’’ந்தி. நிரோதே⁴னாதி தப்படிப³த்³த⁴ச²ந்த³ராக³னிரோத⁴வஸேன நிருஜ்ஜ²னேன. உபஸமேனாதி அச்சந்தூபஸமேன அப்பவத்தனேன. ஏவஞ்ச கத்வா ச-ஸத்³த³க்³க³ஹணங் ஸமத்தி²தங் ஹோதி. தேஸந்தி தஸ்ஸா வேத³னாய தங்ஸம்பயுத்தானஞ்ச திண்ணங் க²ந்தா⁴னங். வத்தா²ரம்மணவஸேனாதி வத்து²பூ⁴தானங் ச²ன்னங் ஆரம்மணபூ⁴தானஞ்ச ஸப்³பே³ஸம்பி உபாதி³ண்ணகரூபத⁴ம்மானங் வஸேன.
Nanu ettha vedanākkhandho na gahitoti? No na gahitoti dassento ‘‘tehi panā’’tiādimāha. Tīhi khandhehīti saññāsaṅkhāraviññāṇakkhandhehi. Gahitāva avinābhāvato. Na hi vedanārahito koci cittuppādo atthi. Anupādiṇṇakānanti kusalākusalānaṃ. Na hettha kiriyākhandhānaṃ appavatti adhippetā. Appavattivasenāti anuppattidhammatāpattivasena. Nibbattanavasena kammakilesehi upādīyatīti upādi, pañcakkhandhā. Upādino seso upādiseso, saha upādisesenāti saupādisesaṃ. Nibbānaṃ kathitaṃ sakalakammakilesavūpasamatthassa jotitattā. Heṭṭhā dvīhi padehi anupādiṇṇakakkhandhā gahitāti ‘‘vedanāna’’nti ettha upādiṇṇakaggahaṇaṃ yuttanti āha ‘‘upādiṇṇakavedanāna’’nti. Nirodhenāti tappaṭibaddhachandarāganirodhavasena nirujjhanena. Upasamenāti accantūpasamena appavattanena. Evañca katvā ca-saddaggahaṇaṃ samatthitaṃ hoti. Tesanti tassā vedanāya taṃsampayuttānañca tiṇṇaṃ khandhānaṃ. Vatthārammaṇavasenāti vatthubhūtānaṃ channaṃ ārammaṇabhūtānañca sabbesampi upādiṇṇakarūpadhammānaṃ vasena.
கஸ்மா பன ஹெட்டா² சத்தாரோ அரூபக்க²ந்தா⁴யேவ வுத்தா, ரூபக்க²ந்தோ⁴ ந க³ஹிதோதி? விஸேஸபா⁴வதோ. ஸஉபாதி³ஸேஸனிப்³பா³னப்பத்தியஞ்ஹி உபாதி³ண்ணகரூபத⁴ம்மானங் விய அனுபாதி³ண்ணகரூபத⁴ம்மானங் அப்பவத்தியேவ நத்தி². து³தியனயேதி நந்தி³யா ச ப⁴வஸ்ஸ சாதி ஏதம்ஹி பக்கே². நந்தி³க்³க³ஹணேன ஸங்கா²ரக்க²ந்தோ⁴ க³ஹிதோ தங்ஸஹசரணதோ. உபபத்திப⁴வஸங்கா²தோ ரூபக்க²ந்தோ⁴தி உபாதி³ண்ணகரூபத⁴ம்மமேவ வத³தி. தக்³க³ஹணேனேவ ச தன்னிமித்தகானி உதுஆஹாரஜானி, விஞ்ஞாணக்³க³ஹணேன சித்தஜானீதி சதுஸந்ததிரூபஸ்ஸபெத்த² க³ஹிததா வேதி³தப்³பா³. ஸஞ்ஞாதீ³ஹீதி ஸஞ்ஞாவிஞ்ஞாணவேத³னாக³ஹணேஹி தயோ க²ந்தா⁴ க³ஹிதா, தஞ்ச கோ² உபாதி³ண்ணா அனுபாதி³ண்ணாதி விபா⁴க³ங் அகத்வா அவிஸேஸதோ. அவிஸேஸேன ஹி பஞ்சன்னங் க²ந்தா⁴னங் அப்பவத்தி நிப்³பா³னங். தேனாஹ ‘‘ஏவங்…பே॰… நிப்³பா³னங் கதி²தங் ஹோதீ’’தி. ‘‘நிப்³பா³ன’’ந்தி ஹி இத⁴ அமதமஹானிப்³பா³னங் அதி⁴ப்பேதங். இமமேவ ச நயந்தி இத³ங் யதா²வுத்தங் து³தியமேவ. சத்தாரோ மஹானிகாயே தா⁴ரேதீதி சதுனிகாயிகோ. ப⁴ண்டி³கனாமகோ தே²ரோ ப⁴ண்டி³கத்தே²ரோ. இதீதி வுத்தப்பகாரபராமஸனங். நிப்³பா³னவஸேனேவாதி பட²மனயே ஸஉபாதி³ஸேஸனிப்³பா³னஸ்ஸ அனுபாதி³ஸேஸனிப்³பா³னஸ்ஸ ச, து³தியே பன ‘‘அமதமஹானிப்³பா³னஸ்ஸா’’தி ஸப்³ப³தா²பி நிப்³பா³னஸ்ஸேவ வஸேன ப⁴க³வா தே³ஸனங் நிட்ட²பேஸி ஸமாபேஸீதி.
Kasmā pana heṭṭhā cattāro arūpakkhandhāyeva vuttā, rūpakkhandho na gahitoti? Visesabhāvato. Saupādisesanibbānappattiyañhi upādiṇṇakarūpadhammānaṃ viya anupādiṇṇakarūpadhammānaṃ appavattiyeva natthi. Dutiyanayeti nandiyā ca bhavassa cāti etamhi pakkhe. Nandiggahaṇena saṅkhārakkhandho gahito taṃsahacaraṇato. Upapattibhavasaṅkhāto rūpakkhandhoti upādiṇṇakarūpadhammameva vadati. Taggahaṇeneva ca tannimittakāni utuāhārajāni, viññāṇaggahaṇena cittajānīti catusantatirūpassapettha gahitatā veditabbā. Saññādīhīti saññāviññāṇavedanāgahaṇehi tayo khandhā gahitā, tañca kho upādiṇṇā anupādiṇṇāti vibhāgaṃ akatvā avisesato. Avisesena hi pañcannaṃ khandhānaṃ appavatti nibbānaṃ. Tenāha ‘‘evaṃ…pe… nibbānaṃ kathitaṃ hotī’’ti. ‘‘Nibbāna’’nti hi idha amatamahānibbānaṃ adhippetaṃ. Imameva ca nayanti idaṃ yathāvuttaṃ dutiyameva. Cattāro mahānikāye dhāretīti catunikāyiko. Bhaṇḍikanāmako thero bhaṇḍikatthero. Itīti vuttappakāraparāmasanaṃ. Nibbānavasenevāti paṭhamanaye saupādisesanibbānassa anupādisesanibbānassa ca, dutiye pana ‘‘amatamahānibbānassā’’ti sabbathāpi nibbānasseva vasena bhagavā desanaṃ niṭṭhapesi samāpesīti.
நிமொக்க²ஸுத்தவண்ணனா நிட்டி²தா.
Nimokkhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. நிமொக்க²ஸுத்தங் • 2. Nimokkhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. நிமொக்க²ஸுத்தவண்ணனா • 2. Nimokkhasuttavaṇṇanā
