| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
10. நிருத்திபத²ஸுத்தவண்ணனா
10. Niruttipathasuttavaṇṇanā
62. நிருத்தியோவ நிருத்திபதா²தி பத²-ஸத்³தே³ன பத³வட்³ட⁴னமாஹ யதா² ‘‘பீ³ஜானியேவ பீ³ஜஜாதானீ’’தி. நிருத்திவஸேனாதி நிப்³ப³சனவஸேன. பதா² ச அத்தா²னுரூபபா⁴வதோ . தீணிபீதி நிருத்திஅதி⁴வசனபஞ்ஞத்திபத²பதா³னி. ததா² ஹி ‘‘பு²ஸதீதி ப²ஸ்ஸோ’’திஆதி³னா நீஹரித்வா வசனங் நிருத்தி, ‘‘ஸிரீவட்³ட⁴கோ த⁴னவட்³ட⁴கோ’’திஆதி³னா வசனமத்தமேவ அதி⁴காரங் கத்வா பவத்தங் அதி⁴வசனங், ‘‘தக்கோ விதக்கோ’’திஆதி³னா தங்தங்பகாரேன ஞாபனதோ பஞ்ஞத்தி. அத² வா தங்தங்அத்த²ப்பகாஸனேன நிச்சி²தங், நியதங் வா வசனங் நிருத்தி. அதி⁴-ஸத்³தோ³ உபரிபா⁴கே³, உபரி வசனங் அதி⁴வசனங். கஸ்ஸ உபரி? பகாஸேதப்³ப³ஸ்ஸ அத்த²ஸ்ஸாதி பாகடோயமத்தோ². அதீ⁴னங் வசனங் அதி⁴வசனங். கேன அதீ⁴னங்? அத்தே²ன. அத்த²ஸ்ஸ பஞ்ஞாபனத்தே²ன பஞ்ஞத்தீதி ஏவங் நிருத்திஆதி³பதா³னங் ஸப்³ப³வசனேஸு பவத்தி வேதி³தப்³பா³. அஞ்ஞதா² ‘‘பு²ஸதீதி ப²ஸ்ஸோ’’திஆதி³ப்பகாரேன நித்³தா⁴ரணவசனானங்யேவ நிருத்திதா, ஸிரிவட்³ட⁴கத⁴னவட்³ட⁴கபகாரானமேவ அபி⁴லாபனங் அதி⁴வசனதா. ‘‘தக்கோ விதக்கோ’’தி ஏவங்பகாரானமேவ ஏகமேவ அத்த²ங் தேன தேன பகாரேன ஞாபெந்தானங் வசனானங் பஞ்ஞத்திதா ச ஆபஜ்ஜெய்ய. அஸங்கிண்ணாதி ந ஸங்கிண்ணா. தேனாஹ ‘‘அவிஜஹிதா…பே॰… அச²ட்³டி³தா’’தி. ந ஸங்கீயந்தீதி ந ஸங்கிரீயந்தி, ந ஸங்கீயிஸ்ஸந்தி ந ஸங்கிரீயிஸ்ஸந்தீதி அத்தோ². அப்படிகுட்டா²தி ந படிக்கி²த்தா. யஸ்மா ப⁴ங்க³ங் அதிக்கந்தங் உப்பாதா³தி³ அதிக்கந்தமேவ ஹோதி, தஸ்மா வுத்தங் ‘‘ப⁴ங்க³மேவா’’தி. யஸ்மா தே³ஸந்தரங் ஸங்கந்தோபி அதிக்கந்தந்தி வுச்சதி, தஸ்மா ததா³பா⁴வங் த³ஸ்ஸேதுங் ‘‘தே³ஸந்தரங் அஸங்கமித்வா’’தி வுத்தங். யத்த² யத்த² ஹி ஸங்கா²ரா உப்பஜ்ஜந்தி, தத்த² தத்தே²வ பி⁴ஜ்ஜந்தி நிருஜ்ஜ²ந்தி விபரிணமந்தி வினாஸங் ஆபஜ்ஜந்தி. தேனாஹ ‘‘விபரிணதந்தி…பே॰… நட்ட²’’ந்தி. அபாகடீபூ⁴தங் அஜாதத்தா ஏவ.
62.Niruttiyova niruttipathāti patha-saddena padavaḍḍhanamāha yathā ‘‘bījāniyeva bījajātānī’’ti. Niruttivasenāti nibbacanavasena. Pathā ca atthānurūpabhāvato . Tīṇipīti niruttiadhivacanapaññattipathapadāni. Tathā hi ‘‘phusatīti phasso’’tiādinā nīharitvā vacanaṃ nirutti, ‘‘sirīvaḍḍhako dhanavaḍḍhako’’tiādinā vacanamattameva adhikāraṃ katvā pavattaṃ adhivacanaṃ, ‘‘takko vitakko’’tiādinā taṃtaṃpakārena ñāpanato paññatti. Atha vā taṃtaṃatthappakāsanena nicchitaṃ, niyataṃ vā vacanaṃ nirutti. Adhi-saddo uparibhāge, upari vacanaṃ adhivacanaṃ. Kassa upari? Pakāsetabbassa atthassāti pākaṭoyamattho. Adhīnaṃ vacanaṃ adhivacanaṃ. Kena adhīnaṃ? Atthena. Atthassa paññāpanatthena paññattīti evaṃ niruttiādipadānaṃ sabbavacanesu pavatti veditabbā. Aññathā ‘‘phusatīti phasso’’tiādippakārena niddhāraṇavacanānaṃyeva niruttitā, sirivaḍḍhakadhanavaḍḍhakapakārānameva abhilāpanaṃ adhivacanatā. ‘‘Takko vitakko’’ti evaṃpakārānameva ekameva atthaṃ tena tena pakārena ñāpentānaṃ vacanānaṃ paññattitā ca āpajjeyya. Asaṃkiṇṇāti na saṃkiṇṇā. Tenāha ‘‘avijahitā…pe… achaḍḍitā’’ti. Na saṃkīyantīti na saṃkirīyanti, na saṃkīyissanti na saṃkirīyissantīti attho. Appaṭikuṭṭhāti na paṭikkhittā. Yasmā bhaṅgaṃ atikkantaṃ uppādādi atikkantameva hoti, tasmā vuttaṃ ‘‘bhaṅgamevā’’ti. Yasmā desantaraṃ saṅkantopi atikkantanti vuccati, tasmā tadābhāvaṃ dassetuṃ ‘‘desantaraṃ asaṅkamitvā’’ti vuttaṃ. Yattha yattha hi saṅkhārā uppajjanti, tattha tattheva bhijjanti nirujjhanti vipariṇamanti vināsaṃ āpajjanti. Tenāha ‘‘vipariṇatanti…pe… naṭṭha’’nti. Apākaṭībhūtaṃ ajātattā eva.
வஸப⁴ணகொ³த்ததாய வஸ்ஸப⁴ஞ்ஞா. மூலதி³ட்டி²க³திகாதி மூலபூ⁴தா தி³ட்டி²க³திகா, இமஸ்மிங் கப்பே ஸப்³ப³பட²மங் தாதி³ஸதி³ட்டி²ஸமுப்பாத³கா. புனப்புனங் ஆவஜ்ஜெந்தஸ்ஸாதி அஹேதுவாத³படிஸங்யுத்தக³ந்த²ங் உக்³க³ஹெத்வா பரியாபுணித்வா தத³த்த²ங் வீமங்ஸந்தஸ்ஸ ‘‘நத்தி² ஹேது, நத்தி² பச்சயோ ஸத்தானங் ஸங்கிலேஸாயா’’திஆதி³னயப்பவத்தாய லத்³தி⁴யா ஆரம்மணே மிச்சா²ஸதி ஸந்திட்ட²தி, ‘‘நத்தி² ஹேதூ’’திஆதி³வஸேன அனுஸ்ஸவூபலத்³தே⁴ அத்தே² ததா³காரபரிவிதக்கனேஹி ஸவிக்³க³ஹே விய ஸரூபதோ சித்தஸ்ஸ பச்சுபட்டி²தே சிரகாலபரிசயேன ‘‘ஏவமேத’’ந்தி நிஜ்ஜா²னக்க²மபா⁴வூபக³மனேன நிஜ்ஜா²னக்க²ந்தியா ததா²க³ஹிதே புனப்புனங் ததே²வ ஆஸேவந்தஸ்ஸ ப³ஹுலீகரொந்தஸ்ஸ மிச்சா²விதக்கேன ஸமாதி³யமானா மிச்சா²வாயாமூபத்த²ம்பி⁴தா அதங்ஸபா⁴வங் ‘‘தங்ஸபா⁴வ’’ந்தி க³ண்ஹந்தீ மிச்சா²ஸதீதி லத்³த⁴னாமா தங்லத்³தி⁴ஸஹக³தா தண்ஹா ஸந்திட்ட²தி. யதா²ஸகங் விதக்காதி³பச்சயலாபே⁴ன தஸ்மிங் ஆரம்மணே அதி⁴ட்டி²ததாய அனேகக்³க³தங் பஹாய சித்தங் ஏகக்³க³தங் அப்பிதங் விய ஹோதி மிச்சா²ஸமாதி⁴னா. ஸோபி ஹி பச்சயவிஸேஸேஹி லத்³த⁴பா⁴வனாப³லோ ஈதி³ஸே டா²னே ஸமாதா⁴னபதிரூபகிச்சகரோ ஹோதியேவ வாலவிஜ்ஜ²னாதீ³ஸு வியாதி த³ட்ட²ப்³ப³ங். ததா² ஹி அனேகக்க²த்துங் தேனாகாரேன புப்³ப³பா⁴கி³யேஸு ஜவனவாரேஸு பவத்தேஸு ஸப்³ப³பச்சி²மே ஜவனவாரே ஸத்த ஜவனானி ஜவந்தி. தத்த² பட²மே ஸதேகிச்சோ² ஹோதி, ததா² து³தியாதீ³ஸு. ஸத்தமே பன ஜவனே ஸம்பத்தே அதேகிச்சோ² ஹோதி. தேனாஹ ‘‘அஸ்ஸாதெ³ந்தஸ்ஸா’’திஆதி³. இமேஸுபீதி த்³வீஸுபி டா²னேஸு.
Vasabhaṇagottatāya vassabhaññā. Mūladiṭṭhigatikāti mūlabhūtā diṭṭhigatikā, imasmiṃ kappe sabbapaṭhamaṃ tādisadiṭṭhisamuppādakā. Punappunaṃ āvajjentassāti ahetuvādapaṭisaṃyuttaganthaṃ uggahetvā pariyāpuṇitvā tadatthaṃ vīmaṃsantassa ‘‘natthi hetu, natthi paccayo sattānaṃ saṃkilesāyā’’tiādinayappavattāya laddhiyā ārammaṇe micchāsati santiṭṭhati, ‘‘natthi hetū’’tiādivasena anussavūpaladdhe atthe tadākāraparivitakkanehi saviggahe viya sarūpato cittassa paccupaṭṭhite cirakālaparicayena ‘‘evameta’’nti nijjhānakkhamabhāvūpagamanena nijjhānakkhantiyā tathāgahite punappunaṃ tatheva āsevantassa bahulīkarontassa micchāvitakkena samādiyamānā micchāvāyāmūpatthambhitā ataṃsabhāvaṃ ‘‘taṃsabhāva’’nti gaṇhantī micchāsatīti laddhanāmā taṃladdhisahagatā taṇhā santiṭṭhati. Yathāsakaṃ vitakkādipaccayalābhena tasmiṃ ārammaṇe adhiṭṭhitatāya anekaggataṃ pahāya cittaṃ ekaggataṃ appitaṃ viya hoti micchāsamādhinā. Sopi hi paccayavisesehi laddhabhāvanābalo īdise ṭhāne samādhānapatirūpakiccakaro hotiyeva vālavijjhanādīsu viyāti daṭṭhabbaṃ. Tathā hi anekakkhattuṃ tenākārena pubbabhāgiyesu javanavāresu pavattesu sabbapacchime javanavāre satta javanāni javanti. Tattha paṭhame satekiccho hoti, tathā dutiyādīsu. Sattame pana javane sampatte atekiccho hoti. Tenāha ‘‘assādentassā’’tiādi. Imesupīti dvīsupi ṭhānesu.
பச்சுப்பன்னங் வாதி எத்த² இதி-ஸத்³தோ³ ஆதி³அத்தோ². தேன ‘‘யதே³தங் அனாக³தங் நாம, நயித³ங் அனாக³த’’ந்திஆதி³கங் ஸங்க³ண்ஹாதி. தேபீதி தே வஸ்ஸப⁴ஞ்ஞாபி ந மஞ்ஞிங்ஸு லோகஸமஞ்ஞாய அனதிக்கமனீயதோ. தேனாஹ ‘‘அதீதங் பனா’’திஆதி³. க²ந்தா⁴னங் உபரி நிருள்ஹா பண்ணத்தி.
Paccuppannaṃ vāti ettha iti-saddo ādiattho. Tena ‘‘yadetaṃ anāgataṃ nāma, nayidaṃ anāgata’’ntiādikaṃ saṅgaṇhāti. Tepīti te vassabhaññāpi na maññiṃsu lokasamaññāya anatikkamanīyato. Tenāha ‘‘atītaṃ panā’’tiādi. Khandhānaṃ upari niruḷhā paṇṇatti.
நிருத்திபத²ஸுத்தவண்ணனா நிட்டி²தா.
Niruttipathasuttavaṇṇanā niṭṭhitā.
உபயவக்³க³வண்ணனா நிட்டி²தா.
Upayavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. நிருத்திபத²ஸுத்தங் • 10. Niruttipathasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. நிருத்திபத²ஸுத்தவண்ணனா • 10. Niruttipathasuttavaṇṇanā
