| Library / Tipiṭaka / તિપિટક • Tipiṭaka / મહાવિભઙ્ગ • Mahāvibhaṅga |
૫. નિસીદનસન્થતસિક્ખાપદં
5. Nisīdanasanthatasikkhāpadaṃ
૫૬૫. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. અથ ખો ભગવા ભિક્ખૂ આમન્તેસિ – ‘‘ઇચ્છામહં, ભિક્ખવે, તેમાસં પટિસલ્લીયિતું. નમ્હિ કેનચિ ઉપસઙ્કમિતબ્બો, અઞ્ઞત્ર એકેન પિણ્ડપાતનીહારકેના’’તિ. ‘‘એવં, ભન્તે,’’તિ ખો તે ભિક્ખૂ ભગવતો પટિસ્સુણિત્વા નાસ્સુધ કોચિ ભગવન્તં ઉપસઙ્કમતિ, અઞ્ઞત્ર એકેન પિણ્ડપાતનીહારકેન. તેન ખો પન સમયેન સાવત્થિયા સઙ્ઘેન કતિકા કતા હોતિ – ‘‘ઇચ્છતાવુસો, ભગવા તેમાસં પટિસલ્લીયિતું. ન ભગવા કેનચિ ઉપસઙ્કમિતબ્બો , અઞ્ઞત્ર એકેન પિણ્ડપાતનીહારકેન. યો ભગવન્તં ઉપસઙ્કમતિ સો પાચિત્તિયં દેસાપેતબ્બો’’તિ. અથ ખો આયસ્મા ઉપસેનો વઙ્ગન્તપુત્તો, સપરિસો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. આચિણ્ણં ખો પનેતં બુદ્ધાનં ભગવન્તાનં આગન્તુકેહિ ભિક્ખૂહિ સદ્ધિં પટિસમ્મોદિતું. અથ ખો ભગવા આયસ્મન્તં ઉપસેનં વઙ્ગન્તપુત્તં એતદવોચ – ‘‘કચ્ચિ વો, ઉપસેન, ખમનીયં કચ્ચિ યાપનીયં, કચ્ચિત્થ અપ્પકિલમથેન અદ્ધાનં આગતા’’તિ? ‘‘ખમનીયં , ભગવા, યાપનીયં, ભગવા. અપ્પકિલમથેન ચ મયં, ભન્તે, અદ્ધાનં આગતા’’તિ.
565. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Atha kho bhagavā bhikkhū āmantesi – ‘‘icchāmahaṃ, bhikkhave, temāsaṃ paṭisallīyituṃ. Namhi kenaci upasaṅkamitabbo, aññatra ekena piṇḍapātanīhārakenā’’ti. ‘‘Evaṃ, bhante,’’ti kho te bhikkhū bhagavato paṭissuṇitvā nāssudha koci bhagavantaṃ upasaṅkamati, aññatra ekena piṇḍapātanīhārakena. Tena kho pana samayena sāvatthiyā saṅghena katikā katā hoti – ‘‘icchatāvuso, bhagavā temāsaṃ paṭisallīyituṃ. Na bhagavā kenaci upasaṅkamitabbo , aññatra ekena piṇḍapātanīhārakena. Yo bhagavantaṃ upasaṅkamati so pācittiyaṃ desāpetabbo’’ti. Atha kho āyasmā upaseno vaṅgantaputto, sapariso yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. Atha kho bhagavā āyasmantaṃ upasenaṃ vaṅgantaputtaṃ etadavoca – ‘‘kacci vo, upasena, khamanīyaṃ kacci yāpanīyaṃ, kaccittha appakilamathena addhānaṃ āgatā’’ti? ‘‘Khamanīyaṃ , bhagavā, yāpanīyaṃ, bhagavā. Appakilamathena ca mayaṃ, bhante, addhānaṃ āgatā’’ti.
તેન ખો પન સમયેન આયસ્મતો ઉપસેનસ્સ વઙ્ગન્તપુત્તસ્સ સદ્ધિવિહારિકો ભિક્ખુ ભગવતો અવિદૂરે નિસિન્નો હોતિ. અથ ખો ભગવા તં ભિક્ખું એતદવોચ – ‘‘મનાપાનિ તે, ભિક્ખુ, પંસુકૂલાની’’તિ? ‘‘ન ખો મે, ભન્તે, મનાપાનિ પંસુકૂલાની’’તિ. ‘‘કિસ્સ પન ત્વં, ભિક્ખુ, પંસુકૂલિકો’’તિ? ‘‘ઉપજ્ઝાયો મે, ભન્તે, પંસુકૂલિકો. એવં અહમ્પિ પંસુકૂલિકો’’તિ. અથ ખો ભગવા આયસ્મન્તં ઉપસેનં વઙ્ગન્તપુત્તં એતદવોચ – ‘‘પાસાદિકા ખો ત્યાયં, ઉપસેન, પરિસા. કથં ત્વં, ઉપસેન, પરિસં વિનેસી’’તિ? ‘‘યો મં, ભન્તે, ઉપસમ્પદં યાચતિ તમહં 1 એવં વદામિ – ‘અહં ખો, આવુસો, આરઞ્ઞિકો પિણ્ડપાતિકો પંસુકૂલિકો. સચે ત્વમ્પિ આરઞ્ઞિકો ભવિસ્સસિ પિણ્ડપાતિકો પંસુકૂલિકો, એવાહં તં ઉપસમ્પાદેસ્સામી’તિ. સચે મે પટિસ્સુણાતિ ઉપસમ્પાદેમિ, નો ચે મે પટિસ્સુણાતિ ન ઉપસમ્પાદેમિ. યો મં નિસ્સયં યાચતિ તમહં 2 એવં વદામિ – ‘અહં ખો, આવુસો, આરઞ્ઞિકો પિણ્ડપાતિકો પંસુકૂલિકો. સચે ત્વમ્પિ આરઞ્ઞિકો ભવિસ્સસિ પિણ્ડપાતિકો પંસુકૂલિકો, એવાહં તે નિસ્સયં દસ્સામી’તિ. સચે મે પટિસ્સુણાતિ નિસ્સયં દેમિ, નો ચે મે પટિસ્સુણાતિ ન નિસ્સયં દેમિ. એવં ખો અહં, ભન્તે, પરિસં વિનેમી’’તિ.
Tena kho pana samayena āyasmato upasenassa vaṅgantaputtassa saddhivihāriko bhikkhu bhagavato avidūre nisinno hoti. Atha kho bhagavā taṃ bhikkhuṃ etadavoca – ‘‘manāpāni te, bhikkhu, paṃsukūlānī’’ti? ‘‘Na kho me, bhante, manāpāni paṃsukūlānī’’ti. ‘‘Kissa pana tvaṃ, bhikkhu, paṃsukūliko’’ti? ‘‘Upajjhāyo me, bhante, paṃsukūliko. Evaṃ ahampi paṃsukūliko’’ti. Atha kho bhagavā āyasmantaṃ upasenaṃ vaṅgantaputtaṃ etadavoca – ‘‘pāsādikā kho tyāyaṃ, upasena, parisā. Kathaṃ tvaṃ, upasena, parisaṃ vinesī’’ti? ‘‘Yo maṃ, bhante, upasampadaṃ yācati tamahaṃ 3 evaṃ vadāmi – ‘ahaṃ kho, āvuso, āraññiko piṇḍapātiko paṃsukūliko. Sace tvampi āraññiko bhavissasi piṇḍapātiko paṃsukūliko, evāhaṃ taṃ upasampādessāmī’ti. Sace me paṭissuṇāti upasampādemi, no ce me paṭissuṇāti na upasampādemi. Yo maṃ nissayaṃ yācati tamahaṃ 4 evaṃ vadāmi – ‘ahaṃ kho, āvuso, āraññiko piṇḍapātiko paṃsukūliko. Sace tvampi āraññiko bhavissasi piṇḍapātiko paṃsukūliko, evāhaṃ te nissayaṃ dassāmī’ti. Sace me paṭissuṇāti nissayaṃ demi, no ce me paṭissuṇāti na nissayaṃ demi. Evaṃ kho ahaṃ, bhante, parisaṃ vinemī’’ti.
‘‘સાધુ સાધુ, ઉપસેન. સાધુ ખો ત્વં, ઉપસેન, પરિસં વિનેસિ . જાનાસિ પન ત્વં, ઉપસેન, સાવત્થિયા સઙ્ઘસ્સ કતિક’’ન્તિ? ‘‘ન ખો અહં, ભન્તે, જાનામિ સાવત્થિયા સઙ્ઘસ્સ કતિક’’ન્તિ. ‘‘સાવત્થિયા ખો, ઉપસેન, સઙ્ઘેન કતિકા કતા – ‘ઇચ્છતાવુસો, ભગવા તેમાસં પટિસલ્લીયિતું. ન ભગવા કેનચિ ઉપસઙ્કમિતબ્બો, અઞ્ઞત્ર એકેન પિણ્ડપાતનીહારકેન. યો ભગવન્તં ઉપસઙ્કમતિ સો પાચિત્તિયં દેસાપેતબ્બો’તિ. ‘‘પઞ્ઞાયિસ્સતિ, ભન્તે, સાવત્થિયા સઙ્ઘો સકાય કતિકાય, ન મયં અપઞ્ઞત્તં પઞ્ઞપેસ્સામ પઞ્ઞત્તં વા ન સમુચ્છિન્દિસ્સામ, યથાપઞ્ઞત્તેસુ સિક્ખાપદેસુ સમાદાય વત્તિસ્સામા’’તિ. ‘‘સાધુ સાધુ, ઉપસેન, અપઞ્ઞત્તં ન પઞ્ઞપેતબ્બં, પઞ્ઞત્તં વા ન સમુચ્છિન્દિતબ્બં, યથાપઞ્ઞત્તેસુ સિક્ખાપદેસુ સમાદાય વત્તિતબ્બં. અનુજાનામિ, ઉપસેન, યે તે ભિક્ખૂ આરઞ્ઞિકા પિણ્ડપાતિકા પંસુકૂલિકા યથાસુખં મં દસ્સનાય ઉપસઙ્કમન્તૂ’’તિ.
‘‘Sādhu sādhu, upasena. Sādhu kho tvaṃ, upasena, parisaṃ vinesi . Jānāsi pana tvaṃ, upasena, sāvatthiyā saṅghassa katika’’nti? ‘‘Na kho ahaṃ, bhante, jānāmi sāvatthiyā saṅghassa katika’’nti. ‘‘Sāvatthiyā kho, upasena, saṅghena katikā katā – ‘icchatāvuso, bhagavā temāsaṃ paṭisallīyituṃ. Na bhagavā kenaci upasaṅkamitabbo, aññatra ekena piṇḍapātanīhārakena. Yo bhagavantaṃ upasaṅkamati so pācittiyaṃ desāpetabbo’ti. ‘‘Paññāyissati, bhante, sāvatthiyā saṅgho sakāya katikāya, na mayaṃ apaññattaṃ paññapessāma paññattaṃ vā na samucchindissāma, yathāpaññattesu sikkhāpadesu samādāya vattissāmā’’ti. ‘‘Sādhu sādhu, upasena, apaññattaṃ na paññapetabbaṃ, paññattaṃ vā na samucchinditabbaṃ, yathāpaññattesu sikkhāpadesu samādāya vattitabbaṃ. Anujānāmi, upasena, ye te bhikkhū āraññikā piṇḍapātikā paṃsukūlikā yathāsukhaṃ maṃ dassanāya upasaṅkamantū’’ti.
૫૬૬. તેન ખો પન સમયેન સમ્બહુલા ભિક્ખૂ બહિદ્વારકોટ્ઠકે ઠિતા હોન્તિ – ‘‘મયં આયસ્મન્તં ઉપસેનં વઙ્ગન્તપુત્તં પાચિત્તિયં દેસાપેસ્સામા’’તિ . અથ ખો આયસ્મા ઉપસેનો વઙ્ગન્તપુત્તો સપરિસો ઉટ્ઠાયાસના ભગવન્તં અભિવાદેત્વા પદક્ખિણં કત્વા પક્કામિ. અથ ખો તે ભિક્ખૂ આયસ્મન્તં ઉપસેનં વઙ્ગન્તપુત્તં એતદવોચું – ‘‘જાનાસિ ત્વં, આવુસો ઉપસેન, સાવત્થિયા સઙ્ઘસ્સ કતિક’’ન્તિ. ‘‘ભગવાપિ મં, આવુસો, એવમાહ – ‘જાનાસિ પન ત્વં, ઉપસેન, સાવત્થિયા સઙ્ઘસ્સ કતિક’ન્તિ? ન ખો અહં, ભન્તે, જાનામિ સાવત્થિયા સઙ્ઘસ્સ કતિક’’ન્તિ. ‘‘સાવત્થિયા ખો, ઉપસેન, સઙ્ઘેન કતિકા કતા – ઇચ્છતાવુસો, ભગવા તેમાસં પટિસલ્લીયિતું. ન ભગવા કેનચિ ઉપસઙ્કમિતબ્બો, અઞ્ઞત્ર એકેન પિણ્ડપાતનીહારકેન. યો ભગવન્તં ઉપસઙ્કમતિ સો પાચિત્તિયં દેસાપેતબ્બો’’તિ. ‘‘પઞ્ઞાયિસ્સતિ, ભન્તે, સાવત્થિયા સઙ્ઘો સકાય કતિકાય, ન મયં અપઞ્ઞત્તં પઞ્ઞપેસ્સામ પઞ્ઞત્તં વા ન સમુચ્છિન્દિસ્સામ, યથાપઞ્ઞત્તેસુ સિક્ખાપદેસુ સમાદાય વત્તિસ્સામાતિ. અનુઞ્ઞાતાવુસો, ભગવતા – ‘યે તે ભિક્ખૂ આરઞ્ઞિકા પિણ્ડપાતિકા પંસુકૂલિકા યથાસુખં મં દસ્સનાય ઉપસઙ્કમન્તૂ’’’તિ.
566. Tena kho pana samayena sambahulā bhikkhū bahidvārakoṭṭhake ṭhitā honti – ‘‘mayaṃ āyasmantaṃ upasenaṃ vaṅgantaputtaṃ pācittiyaṃ desāpessāmā’’ti . Atha kho āyasmā upaseno vaṅgantaputto sapariso uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho te bhikkhū āyasmantaṃ upasenaṃ vaṅgantaputtaṃ etadavocuṃ – ‘‘jānāsi tvaṃ, āvuso upasena, sāvatthiyā saṅghassa katika’’nti. ‘‘Bhagavāpi maṃ, āvuso, evamāha – ‘jānāsi pana tvaṃ, upasena, sāvatthiyā saṅghassa katika’nti? Na kho ahaṃ, bhante, jānāmi sāvatthiyā saṅghassa katika’’nti. ‘‘Sāvatthiyā kho, upasena, saṅghena katikā katā – icchatāvuso, bhagavā temāsaṃ paṭisallīyituṃ. Na bhagavā kenaci upasaṅkamitabbo, aññatra ekena piṇḍapātanīhārakena. Yo bhagavantaṃ upasaṅkamati so pācittiyaṃ desāpetabbo’’ti. ‘‘Paññāyissati, bhante, sāvatthiyā saṅgho sakāya katikāya, na mayaṃ apaññattaṃ paññapessāma paññattaṃ vā na samucchindissāma, yathāpaññattesu sikkhāpadesu samādāya vattissāmāti. Anuññātāvuso, bhagavatā – ‘ye te bhikkhū āraññikā piṇḍapātikā paṃsukūlikā yathāsukhaṃ maṃ dassanāya upasaṅkamantū’’’ti.
અથ ખો તે ભિક્ખૂ – ‘‘સચ્ચં ખો આયસ્મા ઉપસેનો આહ – ‘ન અપઞ્ઞત્તં પઞ્ઞપેતબ્બં, પઞ્ઞત્તં વા ન સમુચ્છિન્દિતબ્બં, યથાપઞ્ઞત્તેસુ સિક્ખાપદેસુ સમાદાય વત્તિતબ્બ’’’ન્તિ. અસ્સોસું ખો ભિક્ખૂ – ‘‘અનુઞ્ઞાતા કિર ભગવતા – ‘યે તે ભિક્ખૂ આરઞ્ઞિકા પિણ્ડપાતિકા પંસુકૂલિકા યથાસુખં મં દસ્સનાય ઉપસઙ્કમન્તૂ’’’તિ. તે ભગવન્તં દસ્સનં પિહેન્તા 5 સન્થતાનિ ઉજ્ઝિત્વા આરઞ્ઞિકઙ્ગં પિણ્ડપાતિકઙ્ગં પંસુકૂલિકઙ્ગં સમાદિયિંસુ. અથ ખો ભગવા સમ્બહુલેહિ ભિક્ખૂહિ સદ્ધિં સેનાસનચારિકં આહિણ્ડન્તો અદ્દસ સન્થતાનિ તહં તહં ઉજ્ઝિતાનિ. પસ્સિત્વા ભિક્ખૂ આમન્તેસિ – ‘‘કસ્સિમાનિ, ભિક્ખવે, સન્થતાનિ તહં તહં ઉજ્ઝિતાની’’તિ? અથ ખો તે ભિક્ખૂ ભગવતો એતમત્થં આરોચેસું. અથ ખો ભગવા એતસ્મિં નિદાને એતસ્મિં પકરણે ધમ્મિં કથં કત્વા ભિક્ખૂ આમન્તેસિ – ‘‘તેન હિ, ભિક્ખવે, ભિક્ખૂનં સિક્ખાપદં પઞ્ઞપેસ્સામિ દસ અત્થવસે પટિચ્ચ – સઙ્ઘસુટ્ઠુતાય, સઙ્ઘફાસુતાય,…પે॰… એવઞ્ચ પન, ભિક્ખવે, ઇમં સિક્ખાપદં ઉદ્દિસેય્યાથ –
Atha kho te bhikkhū – ‘‘saccaṃ kho āyasmā upaseno āha – ‘na apaññattaṃ paññapetabbaṃ, paññattaṃ vā na samucchinditabbaṃ, yathāpaññattesu sikkhāpadesu samādāya vattitabba’’’nti. Assosuṃ kho bhikkhū – ‘‘anuññātā kira bhagavatā – ‘ye te bhikkhū āraññikā piṇḍapātikā paṃsukūlikā yathāsukhaṃ maṃ dassanāya upasaṅkamantū’’’ti. Te bhagavantaṃ dassanaṃ pihentā 6 santhatāni ujjhitvā āraññikaṅgaṃ piṇḍapātikaṅgaṃ paṃsukūlikaṅgaṃ samādiyiṃsu. Atha kho bhagavā sambahulehi bhikkhūhi saddhiṃ senāsanacārikaṃ āhiṇḍanto addasa santhatāni tahaṃ tahaṃ ujjhitāni. Passitvā bhikkhū āmantesi – ‘‘kassimāni, bhikkhave, santhatāni tahaṃ tahaṃ ujjhitānī’’ti? Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘tena hi, bhikkhave, bhikkhūnaṃ sikkhāpadaṃ paññapessāmi dasa atthavase paṭicca – saṅghasuṭṭhutāya, saṅghaphāsutāya,…pe… evañca pana, bhikkhave, imaṃ sikkhāpadaṃ uddiseyyātha –
૫૬૭. ‘‘નિસીદનસન્થતં પન ભિક્ખુના કારયમાનેન પુરાણસન્થતસ્સ સામન્તા સુગતવિદત્થિ આદાતબ્બા દુબ્બણ્ણકરણાય, અનાદા ચે ભિક્ખુ પુરાણસન્થતસ્સ સામન્તા સુગતવિદત્થિં નવં નિસીદનસન્થતં કારાપેય્ય, નિસ્સગ્ગિયં પાચિત્તિય’’ન્તિ.
567.‘‘Nisīdanasanthataṃpana bhikkhunā kārayamānena purāṇasanthatassa sāmantā sugatavidatthi ādātabbā dubbaṇṇakaraṇāya, anādā ce bhikkhu purāṇasanthatassa sāmantā sugatavidatthiṃ navaṃ nisīdanasanthataṃ kārāpeyya, nissaggiyaṃ pācittiya’’nti.
૫૬૮. નિસીદનં નામ સદસં વુચ્ચતિ.
568.Nisīdanaṃ nāma sadasaṃ vuccati.
સન્થતં નામ સન્થરિત્વા કતં હોતિ અવાયિમં.
Santhataṃ nāma santharitvā kataṃ hoti avāyimaṃ.
કારયમાનેનાતિ કરોન્તો વા કારાપેન્તો વા.
Kārayamānenāti karonto vā kārāpento vā.
પુરાણસન્થતં નામ સકિં નિવત્થમ્પિ સકિં પારુતમ્પિ.
Purāṇasanthataṃ nāma sakiṃ nivatthampi sakiṃ pārutampi.
સામન્તા સુગતવિદત્થિ આદાતબ્બા દુબ્બણ્ણકરણાયાતિ થિરભાવાય વટ્ટં વા ચતુરસ્સં વા છિન્દિત્વા એકદેસે વા સન્થરિતબ્બં વિજટેત્વા વા સન્થરિતબ્બં.
Sāmantā sugatavidatthi ādātabbā dubbaṇṇakaraṇāyāti thirabhāvāya vaṭṭaṃ vā caturassaṃ vā chinditvā ekadese vā santharitabbaṃ vijaṭetvā vā santharitabbaṃ.
અનાદા ચે ભિક્ખુ પુરાણસન્થતસ્સ સામન્તા સુગતવિદત્થિન્તિ અનાદિયિત્વા પુરાણસન્થતસ્સ સામન્તા સુગતવિદત્થિં નવં નિસીદનસન્થતં કરોતિ વા કારાપેતિ વા, પયોગે દુક્કટં, પટિલાભેન નિસ્સગ્ગિયં હોતિ. નિસ્સજ્જિતબ્બં સઙ્ઘસ્સ વા ગણસ્સ વા પુગ્ગલસ્સ વા. એવઞ્ચ પન, ભિક્ખવે, નિસ્સજ્જિતબ્બં…પે॰… ઇદં મે, ભન્તે, નિસીદનસન્થતં અનાદિયિત્વા પુરાણસન્થતસ્સ સામન્તા સુગતવિદત્થિં કારાપિતં નિસ્સગ્ગિયં. ઇમાહં સઙ્ઘસ્સ નિસ્સજ્જામીતિ…પે॰… દદેય્યાતિ…પે॰… આયસ્મતો દમ્મીતિ.
Anādā ce bhikkhu purāṇasanthatassa sāmantā sugatavidatthinti anādiyitvā purāṇasanthatassa sāmantā sugatavidatthiṃ navaṃ nisīdanasanthataṃ karoti vā kārāpeti vā, payoge dukkaṭaṃ, paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, nisīdanasanthataṃ anādiyitvā purāṇasanthatassa sāmantā sugatavidatthiṃ kārāpitaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… āyasmato dammīti.
૫૬૯. અત્તના વિપ્પકતં અત્તના પરિયોસાપેતિ, નિસ્સગ્ગિયં પાચિત્તિયં. અત્તના વિપ્પકતં પરેહિ પરિયોસાપેતિ, નિસ્સગ્ગિયં પાચિત્તિયં. પરેહિ વિપ્પકતં અત્તના પરિયોસાપેતિ, નિસ્સગ્ગિયં પાચિત્તિયં. પરેહિ વિપ્પકતં પરેહિ પરિયોસાપેતિ, નિસ્સગ્ગિયં પાચિત્તિયં.
569. Attanā vippakataṃ attanā pariyosāpeti, nissaggiyaṃ pācittiyaṃ. Attanā vippakataṃ parehi pariyosāpeti, nissaggiyaṃ pācittiyaṃ. Parehi vippakataṃ attanā pariyosāpeti, nissaggiyaṃ pācittiyaṃ. Parehi vippakataṃ parehi pariyosāpeti, nissaggiyaṃ pācittiyaṃ.
અઞ્ઞસ્સત્થાય કરોતિ વા કારાપેતિ વા, આપત્તિ દુક્કટસ્સ.
Aññassatthāya karoti vā kārāpeti vā, āpatti dukkaṭassa.
૫૭૦. અનાપત્તિ – પુરાણસન્થતસ્સ સામન્તા સુગતવિદત્થિં આદિયિત્વા કરોતિ, અલભન્તો થોકતરં આદિયિત્વા કરોતિ, અલભન્તો અનાદિયિત્વા કરોતિ, અઞ્ઞેન કતં પટિલભિત્વા પરિભુઞ્જતિ, વિતાનં વા ભૂમત્થરણં વા સાણિપાકારં વા ભિસિં વા બિબ્બોહનં વા કરોતિ, ઉમ્મત્તકસ્સ આદિકમ્મિકસ્સાતિ.
570. Anāpatti – purāṇasanthatassa sāmantā sugatavidatthiṃ ādiyitvā karoti, alabhanto thokataraṃ ādiyitvā karoti, alabhanto anādiyitvā karoti, aññena kataṃ paṭilabhitvā paribhuñjati, vitānaṃ vā bhūmattharaṇaṃ vā sāṇipākāraṃ vā bhisiṃ vā bibbohanaṃ vā karoti, ummattakassa ādikammikassāti.
નિસીદનસન્થતસિક્ખાપદં નિટ્ઠિતં પઞ્ચમં.
Nisīdanasanthatasikkhāpadaṃ niṭṭhitaṃ pañcamaṃ.
Footnotes:
Related texts:
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / મહાવિભઙ્ગ-અટ્ઠકથા • Mahāvibhaṅga-aṭṭhakathā / ૫. નિસીદનસન્થતસિક્ખાપદવણ્ણના • 5. Nisīdanasanthatasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ૫. નિસીદનસન્થતસિક્ખાપદવણ્ણના • 5. Nisīdanasanthatasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / ૫. નિસીદનસન્થતસિક્ખાપદવણ્ણના • 5. Nisīdanasanthatasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૫. નિસીદનસન્થતસિક્ખાપદવણ્ણના • 5. Nisīdanasanthatasikkhāpadavaṇṇanā
