| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. நிஸ்ஸயஸுத்தங்
2. Nissayasuttaṃ
2. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தங்…பே॰… ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘‘நிஸ்ஸயஸம்பன்னோ நிஸ்ஸயஸம்பன்னோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, பி⁴க்கு² நிஸ்ஸயஸம்பன்னோ ஹோதீ’’தி? ‘‘ஸத்³த⁴ங் சே, பி⁴க்கு², பி⁴க்கு² நிஸ்ஸாய அகுஸலங் பஜஹதி குஸலங் பா⁴வேதி, பஹீனமேவஸ்ஸ தங் அகுஸலங் ஹோதி. ஹிரிங் சே, பி⁴க்கு², பி⁴க்கு² நிஸ்ஸாய…பே॰… ஒத்தப்பங் சே, பி⁴க்கு², பி⁴க்கு² நிஸ்ஸாய…பே॰… வீரியங் சே, பி⁴க்கு², பி⁴க்கு² நிஸ்ஸாய…பே॰… பஞ்ஞங் சே, பி⁴க்கு², பி⁴க்கு² நிஸ்ஸாய அகுஸலங் பஜஹதி குஸலங் பா⁴வேதி, பஹீனமேவஸ்ஸ தங் அகுஸலங் ஹோதி . தங் ஹிஸ்ஸ பி⁴க்கு²னோ அகுஸலங் பஹீனங் ஹோதி ஸுப்பஹீனங், யங்ஸ அரியாய பஞ்ஞாய தி³ஸ்வா பஹீனங்’’.
2. Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ…pe… ekamantaṃ nisinno kho so bhikkhu bhagavantaṃ etadavoca – ‘‘‘nissayasampanno nissayasampanno’ti, bhante, vuccati. Kittāvatā nu kho, bhante, bhikkhu nissayasampanno hotī’’ti? ‘‘Saddhaṃ ce, bhikkhu, bhikkhu nissāya akusalaṃ pajahati kusalaṃ bhāveti, pahīnamevassa taṃ akusalaṃ hoti. Hiriṃ ce, bhikkhu, bhikkhu nissāya…pe… ottappaṃ ce, bhikkhu, bhikkhu nissāya…pe… vīriyaṃ ce, bhikkhu, bhikkhu nissāya…pe… paññaṃ ce, bhikkhu, bhikkhu nissāya akusalaṃ pajahati kusalaṃ bhāveti, pahīnamevassa taṃ akusalaṃ hoti . Taṃ hissa bhikkhuno akusalaṃ pahīnaṃ hoti suppahīnaṃ, yaṃsa ariyāya paññāya disvā pahīnaṃ’’.
‘‘தேன ச பன, பி⁴க்கு², பி⁴க்கு²னா இமேஸு பஞ்சஸு த⁴ம்மேஸு பதிட்டா²ய சத்தாரோ உபனிஸ்ஸாய விஹாதப்³பா³. கதமே சத்தாரோ? இத⁴, பி⁴க்கு², பி⁴க்கு² ஸங்கா²யேகங் படிஸேவதி, ஸங்கா²யேகங் அதி⁴வாஸேதி, ஸங்கா²யேகங் பரிவஜ்ஜேதி, ஸங்கா²யேகங் வினோதே³தி. ஏவங் கோ², பி⁴க்கு², பி⁴க்கு² நிஸ்ஸயஸம்பன்னோ ஹோதீ’’தி. து³தியங்.
‘‘Tena ca pana, bhikkhu, bhikkhunā imesu pañcasu dhammesu patiṭṭhāya cattāro upanissāya vihātabbā. Katame cattāro? Idha, bhikkhu, bhikkhu saṅkhāyekaṃ paṭisevati, saṅkhāyekaṃ adhivāseti, saṅkhāyekaṃ parivajjeti, saṅkhāyekaṃ vinodeti. Evaṃ kho, bhikkhu, bhikkhu nissayasampanno hotī’’ti. Dutiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. நிஸ்ஸயஸுத்தவண்ணனா • 2. Nissayasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-2. ஸம்போ³தி⁴ஸுத்தாதி³வண்ணனா • 1-2. Sambodhisuttādivaṇṇanā
