| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
5. நிவாபஸுத்தவண்ணனா
5. Nivāpasuttavaṇṇanā
261. ஏவங் மே ஸுதந்தி நிவாபஸுத்தங். தத்த² நேவாபிகோதி யோ மிகா³னங் க³ஹணத்தா²ய அரஞ்ஞே திணபீ³ஜானி வபதி ‘‘இத³ங் திணங் கா²தி³துங் ஆக³தே மிகே³ ஸுக²ங் க³ண்ஹிஸ்ஸாமீ’’தி. நிவாபந்தி வப்பங். நிவுத்தந்தி வபிதங். மிக³ஜாதாதி மிக³க⁴டா. அனுபக²ஜ்ஜாதி அனுபவிஸித்வா. முச்சி²தாதி தண்ஹாமுச்ச²னாய முச்சி²தா, தண்ஹாய ஹத³யங் பவிஸித்வா முச்ச²னாகாரங் பாபிதாதி அத்தோ². மத³ங் ஆபஜ்ஜிஸ்ஸந்தீதி மானமத³ங் ஆபஜ்ஜிஸ்ஸந்தி. பமாத³ந்தி விஸ்ஸட்ட²ஸதிபா⁴வங். யதா²காமகரணீயா ப⁴விஸ்ஸந்தீதி யதா² இச்சி²ஸ்ஸாம, ததா² காதப்³பா³ ப⁴விஸ்ஸந்தி. இமஸ்மிங் நிவாபேதி இமஸ்மிங் நிவாபட்டா²னே. ஏகங் கிர நிவாபதிணங் நாம அத்தி² நிதா³க⁴ப⁴த்³த³கங், தங் யதா² யதா² நிதா³கோ⁴ ஹோதி, ததா² ததா² நீவாரவனங் விய மேக⁴மாலா விய ச ஏகக்³க⁴னங் ஹோதி, தங் லுத்³த³கா ஏகஸ்மிங் உத³கபா²ஸுகட்டா²னே கஸித்வா வபித்வா வதிங் கத்வா த்³வாரங் யோஜெத்வா ரக்க²ந்தி. அத² யதா³ மஹானிதா³கே⁴ ஸப்³ப³திணானி ஸுக்கா²னி ஹொந்தி, ஜிவ்ஹாதேமனமத்தம்பி உத³கங் து³ல்லப⁴ங் ஹோதி, ததா³ மிக³ஜாதா ஸுக்க²திணானி சேவ புராணபண்ணானி ச கா²த³ந்தா கம்பமானா விய விசரந்தா நிவாபதிணஸ்ஸ க³ந்த⁴ங் கா⁴யித்வா வத⁴ப³ந்த⁴னாதீ³னி அக³ணயித்வா வதிங் அஜ்ஜொ²த்த²ரந்தா பவிஸந்தி. தேஸஞ்ஹி நிவாபதிணங் அதிவிய பியங் ஹோதி மனாபங். நேவாபிகோ தே தி³ஸ்வா த்³வே தீணி தி³வஸானி பமத்தோ விய ஹோதி, த்³வாரங் விவரித்வா திட்ட²தி. அந்தோனிவாபட்டா²னே தஹிங் தஹிங் உத³கஆவாடகாபி ஹொந்தி, மிகா³ விவடத்³வாரேன பவிஸித்வா கா²தி³தமத்தகங் பிவிதமத்தகமேவ கத்வா பக்கமந்தி, புனதி³வஸே கிஞ்சி ந கரொந்தீதி கண்ணே சாலயமானா கா²தி³த்வா பிவித்வா அதரமானா க³ச்ச²ந்தி, புனதி³வஸே கோசி கிஞ்சி கத்தா நத்தீ²தி யாவத³த்த²ங் கா²தி³த்வா பிவித்வா மண்ட³லகு³ம்ப³ங் பவிஸித்வா நிபஜ்ஜந்தி. லுத்³த³கா தேஸங் பமத்தபா⁴வங் ஜானித்வா த்³வாரங் பிதா⁴ய ஸம்பரிவாரெத்வா கோடிதோ பட்டா²ய கொட்டெத்வா க³ச்ச²ந்தி, ஏவங் தே தஸ்மிங் நிவாபே நேவாபிகஸ்ஸ யதா²காமகரணீயா ப⁴வந்தி.
261.Evaṃme sutanti nivāpasuttaṃ. Tattha nevāpikoti yo migānaṃ gahaṇatthāya araññe tiṇabījāni vapati ‘‘idaṃ tiṇaṃ khādituṃ āgate mige sukhaṃ gaṇhissāmī’’ti. Nivāpanti vappaṃ. Nivuttanti vapitaṃ. Migajātāti migaghaṭā. Anupakhajjāti anupavisitvā. Mucchitāti taṇhāmucchanāya mucchitā, taṇhāya hadayaṃ pavisitvā mucchanākāraṃ pāpitāti attho. Madaṃ āpajjissantīti mānamadaṃ āpajjissanti. Pamādanti vissaṭṭhasatibhāvaṃ. Yathākāmakaraṇīyā bhavissantīti yathā icchissāma, tathā kātabbā bhavissanti. Imasmiṃ nivāpeti imasmiṃ nivāpaṭṭhāne. Ekaṃ kira nivāpatiṇaṃ nāma atthi nidāghabhaddakaṃ, taṃ yathā yathā nidāgho hoti, tathā tathā nīvāravanaṃ viya meghamālā viya ca ekagghanaṃ hoti, taṃ luddakā ekasmiṃ udakaphāsukaṭṭhāne kasitvā vapitvā vatiṃ katvā dvāraṃ yojetvā rakkhanti. Atha yadā mahānidāghe sabbatiṇāni sukkhāni honti, jivhātemanamattampi udakaṃ dullabhaṃ hoti, tadā migajātā sukkhatiṇāni ceva purāṇapaṇṇāni ca khādantā kampamānā viya vicarantā nivāpatiṇassa gandhaṃ ghāyitvā vadhabandhanādīni agaṇayitvā vatiṃ ajjhottharantā pavisanti. Tesañhi nivāpatiṇaṃ ativiya piyaṃ hoti manāpaṃ. Nevāpiko te disvā dve tīṇi divasāni pamatto viya hoti, dvāraṃ vivaritvā tiṭṭhati. Antonivāpaṭṭhāne tahiṃ tahiṃ udakaāvāṭakāpi honti, migā vivaṭadvārena pavisitvā khāditamattakaṃ pivitamattakameva katvā pakkamanti, punadivase kiñci na karontīti kaṇṇe cālayamānā khāditvā pivitvā ataramānā gacchanti, punadivase koci kiñci kattā natthīti yāvadatthaṃ khāditvā pivitvā maṇḍalagumbaṃ pavisitvā nipajjanti. Luddakā tesaṃ pamattabhāvaṃ jānitvā dvāraṃ pidhāya samparivāretvā koṭito paṭṭhāya koṭṭetvā gacchanti, evaṃ te tasmiṃ nivāpe nevāpikassa yathākāmakaraṇīyā bhavanti.
262. தத்ர, பி⁴க்க²வேதி, பி⁴க்க²வே, தேஸு மிக³ஜாதேஸு. பட²மா மிக³ஜாதாதி, மிக³ஜாதா பட²மது³தியா நாம நத்தி². ப⁴க³வா பன ஆக³தபடிபாடிவஸேன கப்பெத்வா பட²மா, து³தியா, ததியா , சதுத்தா²தி நாமங் ஆரோபெத்வா த³ஸ்ஸேஸி. இத்³தா⁴னுபா⁴வாதி யதா²காமங் கத்தப்³ப³பா⁴வதோ; வஸீபா⁴வோயேவ ஹி எத்த² இத்³தீ⁴தி ச ஆனுபா⁴வோதி ச அதி⁴ப்பேதோ.
262.Tatra, bhikkhaveti, bhikkhave, tesu migajātesu. Paṭhamā migajātāti, migajātā paṭhamadutiyā nāma natthi. Bhagavā pana āgatapaṭipāṭivasena kappetvā paṭhamā, dutiyā, tatiyā , catutthāti nāmaṃ āropetvā dassesi. Iddhānubhāvāti yathākāmaṃ kattabbabhāvato; vasībhāvoyeva hi ettha iddhīti ca ānubhāvoti ca adhippeto.
263. ப⁴யபோ⁴கா³தி ப⁴யேன போ⁴க³தோ. ப³லவீரியந்தி அபராபரங் ஸஞ்சரணவாயோதா⁴து, ஸா பரிஹாயீதி அத்தோ².
263.Bhayabhogāti bhayena bhogato. Balavīriyanti aparāparaṃ sañcaraṇavāyodhātu, sā parihāyīti attho.
264. உபனிஸ்ஸாய ஆஸயங் கப்பெய்யாமாதி அந்தோ நிபஜ்ஜித்வா கா²த³ந்தானம்பி ப⁴யமேவ, பா³ஹிரதோ ஆக³ந்த்வா கா²த³ந்தானம்பி ப⁴யமேவ, மயங் பன அமுங் நிவாபட்டா²னங் நிஸ்ஸாய ஏகமந்தே ஆஸயங் கப்பெய்யாமாதி சிந்தயிங்ஸு. உபனிஸ்ஸாய ஆஸயங் கப்பயிங்ஸூதி லுத்³த³கா நாம ந ஸப்³ப³காலங் அப்பமத்தா ஹொந்தி. மயங் தத்த² தத்த² மண்ட³லகு³ம்பே³ஸு சேவ வதிபாதே³ஸு ச நிபஜ்ஜித்வா ஏதேஸு முக²தோ⁴வனத்த²ங் வா ஆஹாரகிச்சகரணத்த²ங் வா பக்கந்தேஸு நிவாபவத்து²ங் பவிஸித்வா கா²தி³தமத்தங் கத்வா அம்ஹாகங் வஸனட்டா²னங் பவிஸிஸ்ஸாமாதி நிவாபவத்து²ங் உபனிஸ்ஸாய க³ஹனேஸு கு³ம்ப³வதிபாதா³தீ³ஸு ஆஸயங் கப்பயிங்ஸு. பு⁴ஞ்ஜிங்ஸூதி வுத்தனயேன லுத்³த³கானங் பமாத³காலங் ஞத்வா ஸீக⁴ங் ஸீக⁴ங் பவிஸித்வா பு⁴ஞ்ஜிங்ஸு. கேதபி³னோதி ஸிக்கி²தகேராடிகா. இத்³தி⁴மந்தாதி இத்³தி⁴மந்தோ விய. பரஜனாதி யக்கா². இமே ந மிக³ஜாதாதி. ஆக³திங் வா க³திங் வாதி இமினா நாம டா²னேன ஆக³ச்ச²ந்தி, அமுத்ர க³ச்ச²ந்தீதி இத³ங் நேஸங் ந ஜானாம. த³ண்ட³வாகராஹீதி த³ண்ட³வாகரஜாலேஹி. ஸமந்தா ஸப்பதே³ஸங் அனுபரிவாரேஸுந்தி அதிமாயாவினோ ஏதே, ந தூ³ரங் க³மிஸ்ஸந்தி, ஸந்திகேயேவ நிபன்னா ப⁴விஸ்ஸந்தீதி நிவாபக்கெ²த்தஸ்ஸ ஸமந்தா ஸப்பதே³ஸங் மஹந்தங் ஓகாஸங் அனுபரிவாரேஸுங். அத்³த³ஸங்ஸூதி ஏவங் பரிவாரெத்வா வாகரஜாலங் ஸமந்ததோ சாலெத்வா ஓலோகெந்தா அத்³த³ஸங்ஸு. யத்த² தேதி யஸ்மிங் டா²னே தே கா³ஹங் அக³மங்ஸு, தங் டா²னங் அத்³த³ஸங்ஸூதி அத்தோ².
264.Upanissāya āsayaṃ kappeyyāmāti anto nipajjitvā khādantānampi bhayameva, bāhirato āgantvā khādantānampi bhayameva, mayaṃ pana amuṃ nivāpaṭṭhānaṃ nissāya ekamante āsayaṃ kappeyyāmāti cintayiṃsu. Upanissāyaāsayaṃ kappayiṃsūti luddakā nāma na sabbakālaṃ appamattā honti. Mayaṃ tattha tattha maṇḍalagumbesu ceva vatipādesu ca nipajjitvā etesu mukhadhovanatthaṃ vā āhārakiccakaraṇatthaṃ vā pakkantesu nivāpavatthuṃ pavisitvā khāditamattaṃ katvā amhākaṃ vasanaṭṭhānaṃ pavisissāmāti nivāpavatthuṃ upanissāya gahanesu gumbavatipādādīsu āsayaṃ kappayiṃsu. Bhuñjiṃsūti vuttanayena luddakānaṃ pamādakālaṃ ñatvā sīghaṃ sīghaṃ pavisitvā bhuñjiṃsu. Ketabinoti sikkhitakerāṭikā. Iddhimantāti iddhimanto viya. Parajanāti yakkhā. Ime na migajātāti. Āgatiṃ vā gatiṃ vāti iminā nāma ṭhānena āgacchanti, amutra gacchantīti idaṃ nesaṃ na jānāma. Daṇḍavākarāhīti daṇḍavākarajālehi. Samantā sappadesaṃ anuparivāresunti atimāyāvino ete, na dūraṃ gamissanti, santikeyeva nipannā bhavissantīti nivāpakkhettassa samantā sappadesaṃ mahantaṃ okāsaṃ anuparivāresuṃ. Addasaṃsūti evaṃ parivāretvā vākarajālaṃ samantato cāletvā olokentā addasaṃsu. Yattha teti yasmiṃ ṭhāne te gāhaṃ agamaṃsu, taṃ ṭhānaṃ addasaṃsūti attho.
265. யங்னூன மயங் யத்த² அக³தீதி தே கிர ஏவங் சிந்தயிங்ஸு – ‘‘அந்தோ நிபஜ்ஜித்வா அந்தோ கா²த³ந்தானம்பி ப⁴யமேவ, பா³ஹிரதோ ஆக³ந்த்வா கா²த³ந்தானம்பி ஸந்திகே வஸித்வா கா²த³ந்தானம்பி ப⁴யமேவ, தேபி ஹி வாகரஜாலேன பரிக்கி²பித்வா க³ஹிதாயேவா’’தி, தேன தேஸங் ஏதத³ஹோஸி – ‘‘யங்னூன மயங் யத்த² நேவாபிகஸ்ஸ ச நேவாபிகபரிஸாய ச அக³தி அவிஸயோ, தத்த² தத்த² ஸெய்யங் கப்பெய்யாமா’’தி. அஞ்ஞே க⁴ட்டெஸ்ஸந்தீதி ததோ ததோ தூ³ரதரவாஸினோ அஞ்ஞே க⁴ட்டெஸ்ஸந்தி. தே க⁴ட்டிதா அஞ்ஞேதி தேபி க⁴ட்டிதா அஞ்ஞே ததோ தூ³ரதரவாஸினோ க⁴ட்டெஸ்ஸந்தி. ஏவங் இமங் நிவாபங் நிவுத்தங் ஸப்³ப³ஸோ மிக³ஜாதா பரிமுச்சிஸ்ஸந்தீதி ஏவங் இமங் அம்ஹேஹி நிவுத்தங் நிவாபங் ஸப்³பே³ மிக³க⁴டா மிக³ஸங்கா⁴ விஸ்ஸஜ்ஜெஸ்ஸந்தி பரிச்சஜிஸ்ஸந்தி. அஜ்ஜு²பெக்கெ²ய்யாமாதி தேஸங் க³ஹணே அப்³யாவடா ப⁴வெய்யாமாதி; யதா² ததா² ஆக³ச்ச²ந்தேஸு ஹி தருணபோதகோ வா மஹல்லகோ வா து³ப்³ப³லோ வா யூத²பரிஹீனோ வா ஸக்கா ஹொந்தி லத்³து⁴ங், அனாக³ச்ச²ந்தேஸு கிஞ்சி நத்தி². அஜ்ஜு²பெக்கி²ங்ஸு கோ², பி⁴க்க²வேதி ஏவங் சிந்தெத்வா அப்³யாவடாவ அஹேஸுங்.
265.Yaṃnūna mayaṃ yattha agatīti te kira evaṃ cintayiṃsu – ‘‘anto nipajjitvā anto khādantānampi bhayameva, bāhirato āgantvā khādantānampi santike vasitvā khādantānampi bhayameva, tepi hi vākarajālena parikkhipitvā gahitāyevā’’ti, tena tesaṃ etadahosi – ‘‘yaṃnūna mayaṃ yattha nevāpikassa ca nevāpikaparisāya ca agati avisayo, tattha tattha seyyaṃ kappeyyāmā’’ti. Aññe ghaṭṭessantīti tato tato dūrataravāsino aññe ghaṭṭessanti. Te ghaṭṭitā aññeti tepi ghaṭṭitā aññe tato dūrataravāsino ghaṭṭessanti. Evaṃ imaṃnivāpaṃ nivuttaṃ sabbaso migajātā parimuccissantīti evaṃ imaṃ amhehi nivuttaṃ nivāpaṃ sabbe migaghaṭā migasaṅghā vissajjessanti pariccajissanti. Ajjhupekkheyyāmāti tesaṃ gahaṇe abyāvaṭā bhaveyyāmāti; yathā tathā āgacchantesu hi taruṇapotako vā mahallako vā dubbalo vā yūthaparihīno vā sakkā honti laddhuṃ, anāgacchantesu kiñci natthi. Ajjhupekkhiṃsu kho, bhikkhaveti evaṃ cintetvā abyāvaṭāva ahesuṃ.
267. அமுங் நிவாபங் நிவுத்தங் மாரஸ்ஸ அமூனி ச லோகாமிஸானீதி எத்த² நிவாபோதி வா லோகாமிஸானீதி வா வட்டாமிஸபூ⁴தானங் பஞ்சன்னங் காமகு³ணானமேதங் அதி⁴வசனங். மாரோ ந ச பீ³ஜானி விய காமகு³ணே வபெந்தோ ஆஹிண்ட³தி, காமகு³ணகி³த்³தா⁴னங் பன உபரி வஸங் வத்தேதி, தஸ்மா காமகு³ணா மாரஸ்ஸ நிவாபா நாம ஹொந்தி. தேன வுத்தங் – ‘‘அமுங் நிவாபங் நிவுத்தங் மாரஸ்ஸா’’தி. ந பரிமுச்சிங்ஸு மாரஸ்ஸ இத்³தா⁴னுபா⁴வாதி மாரஸ்ஸ வஸங் க³தா அஹேஸுங், யதா²காமகரணீயா. அயங் ஸபுத்தப⁴ரியபப்³ப³ஜ்ஜாய ஆக³தஉபமா.
267.Amuṃnivāpaṃ nivuttaṃ mārassa amūni ca lokāmisānīti ettha nivāpoti vā lokāmisānīti vā vaṭṭāmisabhūtānaṃ pañcannaṃ kāmaguṇānametaṃ adhivacanaṃ. Māro na ca bījāni viya kāmaguṇe vapento āhiṇḍati, kāmaguṇagiddhānaṃ pana upari vasaṃ vatteti, tasmā kāmaguṇā mārassa nivāpā nāma honti. Tena vuttaṃ – ‘‘amuṃ nivāpaṃ nivuttaṃ mārassā’’ti. Na parimucciṃsu mārassa iddhānubhāvāti mārassa vasaṃ gatā ahesuṃ, yathākāmakaraṇīyā. Ayaṃ saputtabhariyapabbajjāya āgataupamā.
268. சேதோவிமுத்தி பரிஹாயீதி எத்த² சேதோவிமுத்தி நாம அரஞ்ஞே வஸிஸ்ஸாமாதி உப்பன்னஅஜ்ஜா²ஸயோ; ஸோ பரிஹாயீதி அத்தோ². ததூ²பமே அஹங் இமே து³தியேதி அயங் ப்³ராஹ்மணத⁴ம்மிகபப்³ப³ஜ்ஜாய உபமா. ப்³ராஹ்மணா ஹி அட்ட²சத்தாலீஸவஸ்ஸானி கோமாரப்³ரஹ்மசரியங் சரித்வா வட்டுபச்சே²த³ப⁴யேன பவேணிங் க⁴டயிஸ்ஸாமாதி த⁴னங் பரியேஸித்வா ப⁴ரியங் க³ஹெத்வா அகா³ரமஜ்ஜே² வஸந்தா ஏகஸ்மிங் புத்தே ஜாதே ‘‘அம்ஹாகங் புத்தோ ஜாதோ வட்டங் ந உச்சி²ன்னங் பவேணி க⁴டிதா’’தி புன நிக்க²மித்வா பப்³ப³ஜந்தி வா தமேவ வா ஸ’கலத்தவாஸங் வஸந்தி.
268.Cetovimutti parihāyīti ettha cetovimutti nāma araññe vasissāmāti uppannaajjhāsayo; so parihāyīti attho. Tathūpame ahaṃ ime dutiyeti ayaṃ brāhmaṇadhammikapabbajjāya upamā. Brāhmaṇā hi aṭṭhacattālīsavassāni komārabrahmacariyaṃ caritvā vaṭṭupacchedabhayena paveṇiṃ ghaṭayissāmāti dhanaṃ pariyesitvā bhariyaṃ gahetvā agāramajjhe vasantā ekasmiṃ putte jāte ‘‘amhākaṃ putto jāto vaṭṭaṃ na ucchinnaṃ paveṇi ghaṭitā’’ti puna nikkhamitvā pabbajanti vā tameva vā sa’kalattavāsaṃ vasanti.
269. ஏவஞ்ஹி தே, பி⁴க்க²வே, ததியாபி ஸமணப்³ராஹ்மணா ந பரிமுச்சிங்ஸூதி புரிமா விய தேபி மாரஸ்ஸ இத்³தா⁴னுபா⁴வா ந முச்சிங்ஸு; யதா²காமகரணீயாவ அஹேஸுங். கிங் பன தே அகங்ஸூதி? கா³மனிக³மராஜதா⁴னியோ ஓஸரித்வா தேஸு தேஸு ஆராமஉய்யானட்டா²னேஸு அஸ்ஸமங் மாபெத்வா நிவஸந்தா குலதா³ரகே ஹத்தி²அஸ்ஸரத²ஸிப்பாதீ³னி நானப்பகாரானி ஸிப்பானி ஸிக்கா²பேஸுங். இதி தே வாகரஜாலேன ததியா மிக³ஜாதா விய மாரஸ்ஸ பாபிமதோ தி³ட்டி²ஜாலேன பரிக்கி²பித்வா யதா²காமகரணீயா அஹேஸுங்.
269.Evañhi te, bhikkhave, tatiyāpi samaṇabrāhmaṇā na parimucciṃsūti purimā viya tepi mārassa iddhānubhāvā na mucciṃsu; yathākāmakaraṇīyāva ahesuṃ. Kiṃ pana te akaṃsūti? Gāmanigamarājadhāniyo osaritvā tesu tesu ārāmauyyānaṭṭhānesu assamaṃ māpetvā nivasantā kuladārake hatthiassarathasippādīni nānappakārāni sippāni sikkhāpesuṃ. Iti te vākarajālena tatiyā migajātā viya mārassa pāpimato diṭṭhijālena parikkhipitvā yathākāmakaraṇīyā ahesuṃ.
270. ததூ²பமே அஹங் இமே சதுத்தே²தி அயங் இமஸ்ஸ ஸாஸனஸ்ஸ உபமா ஆஹடா.
270.Tathūpameahaṃ ime catuttheti ayaṃ imassa sāsanassa upamā āhaṭā.
271. அந்த⁴மகாஸி மாரந்தி ந மாரஸ்ஸ அக்கீ²னி பி⁴ந்தி³. விபஸ்ஸனாபாத³கஜ்ஜா²னங் ஸமாபன்னஸ்ஸ பன பி⁴க்கு²னோ இமங் நாம ஆரம்மணங் நிஸ்ஸாய சித்தங் வத்ததீதி மாரோ பஸ்ஸிதுங் ந ஸக்கோதி. தேன வுத்தங் – ‘‘அந்த⁴மகாஸி மார’’ந்தி. அபத³ங் வதி⁴த்வா மாரசக்கு²ந்தி தேனேவ பரியாயேன யதா² மாரஸ்ஸ சக்கு² அபத³ங் ஹோதி நிப்பத³ங், அப்பதிட்ட²ங், நிராரம்மணங், ஏவங் வதி⁴த்வாதி அத்தோ². அத³ஸ்ஸனங் க³தோ பாபிமதோதி தேனேவ பரியாயேன மாரஸ்ஸ பாபிமதோ அத³ஸ்ஸனங் க³தோ. ந ஹி ஸோ அத்தனோ மங்ஸசக்கு²னா தஸ்ஸ விபஸ்ஸனாபாத³கஜ்ஜா²னங் ஸமாபன்னஸ்ஸ பி⁴க்கு²னோ ஞாணஸரீரங் த³ட்டு²ங் ஸக்கோதி. பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹொந்தீதி மக்³க³பஞ்ஞாய சத்தாரி அரியஸச்சானி தி³ஸ்வா சத்தாரோ ஆஸவா பரிக்கீ²ணா ஹொந்தி. திண்ணோ லோகே விஸத்திகந்தி லோகே ஸத்தவிஸத்தபா⁴வேன விஸத்திகாதி ஏவங் ஸங்க²ங் க³தங். அத² வா ‘‘விஸத்திகாதி கேனட்டே²ன விஸத்திகா? விஸதாதி விஸத்திகா விஸடாதி விஸத்திகா, விபுலாதி விஸத்திகா, விஸாலாதி விஸத்திகா, விஸமாதி விஸத்திகா, விஸக்கதீதி விஸத்திகா, விஸங் ஹரதீதி விஸத்திகா, விஸங்வாதி³காதி விஸத்திகா, விஸமூலாதி விஸத்திகா, விஸப²லாதி விஸத்திகா, விஸபரிபோ⁴கா³தி விஸத்திகா, விஸாலா வா பன ஸா தண்ஹா ரூபே ஸத்³தே³ க³ந்தே⁴ ரஸே பொ²ட்ட²ப்³பே³’’தி (மஹானி॰ 3; சூளனி॰ மெத்தகூ³மாணவபுச்சா²னித்³தே³ஸ 22, க²க்³க³விஸாணஸுத்தனித்³தே³ஸ 124) விஸத்திகா. ஏவங் விஸத்திகாதி ஸங்க²ங் க³தங் தண்ஹங் திண்ணோ நித்திண்ணோ உத்திண்ணோ. தேன வுச்சதி – ‘‘திண்ணோ லோகே விஸத்திக’’ந்தி.
271.Andhamakāsi māranti na mārassa akkhīni bhindi. Vipassanāpādakajjhānaṃ samāpannassa pana bhikkhuno imaṃ nāma ārammaṇaṃ nissāya cittaṃ vattatīti māro passituṃ na sakkoti. Tena vuttaṃ – ‘‘andhamakāsi māra’’nti. Apadaṃ vadhitvā māracakkhunti teneva pariyāyena yathā mārassa cakkhu apadaṃ hoti nippadaṃ, appatiṭṭhaṃ, nirārammaṇaṃ, evaṃ vadhitvāti attho. Adassanaṃ gato pāpimatoti teneva pariyāyena mārassa pāpimato adassanaṃ gato. Na hi so attano maṃsacakkhunā tassa vipassanāpādakajjhānaṃ samāpannassa bhikkhuno ñāṇasarīraṃ daṭṭhuṃ sakkoti. Paññāya cassa disvā āsavā parikkhīṇā hontīti maggapaññāya cattāri ariyasaccāni disvā cattāro āsavā parikkhīṇā honti. Tiṇṇo loke visattikanti loke sattavisattabhāvena visattikāti evaṃ saṅkhaṃ gataṃ. Atha vā ‘‘visattikāti kenaṭṭhena visattikā? Visatāti visattikā visaṭāti visattikā, vipulāti visattikā, visālāti visattikā, visamāti visattikā, visakkatīti visattikā, visaṃ haratīti visattikā, visaṃvādikāti visattikā, visamūlāti visattikā, visaphalāti visattikā, visaparibhogāti visattikā, visālā vā pana sā taṇhā rūpe sadde gandhe rase phoṭṭhabbe’’ti (mahāni. 3; cūḷani. mettagūmāṇavapucchāniddesa 22, khaggavisāṇasuttaniddesa 124) visattikā. Evaṃ visattikāti saṅkhaṃ gataṃ taṇhaṃ tiṇṇo nittiṇṇo uttiṇṇo. Tena vuccati – ‘‘tiṇṇo loke visattika’’nti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
நிவாபஸுத்தவண்ணனா நிட்டி²தா.
Nivāpasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 5. நிவாபஸுத்தங் • 5. Nivāpasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 5. நிவாபஸுத்தவண்ணனா • 5. Nivāpasuttavaṇṇanā
