| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. நீவரணஸுத்தங்
2. Nīvaraṇasuttaṃ
64. ‘‘பஞ்சிமானி, பி⁴க்க²வே, நீவரணானி. கதமானி பஞ்ச? காமச்ச²ந்த³னீவரணங், ப்³யாபாத³னீவரணங், தி²னமித்³த⁴னீவரணங் , உத்³த⁴ச்சகுக்குச்சனீவரணங், விசிகிச்சா²னீவரணங் – இமானி கோ², பி⁴க்க²வே, பஞ்ச நீவரணானி.
64. ‘‘Pañcimāni, bhikkhave, nīvaraṇāni. Katamāni pañca? Kāmacchandanīvaraṇaṃ, byāpādanīvaraṇaṃ, thinamiddhanīvaraṇaṃ , uddhaccakukkuccanīvaraṇaṃ, vicikicchānīvaraṇaṃ – imāni kho, bhikkhave, pañca nīvaraṇāni.
‘‘இமேஸங் கோ², பி⁴க்க²வே, பஞ்சன்னங் நீவரணானங் பஹானாய சத்தாரோ ஸதிபட்டா²னா பா⁴வேதப்³பா³. கதமே சத்தாரோ? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா வினெய்ய லோகே அபி⁴ஜ்ஜா²தோ³மனஸ்ஸங்; வேத³னாஸு…பே॰… சித்தே…பே॰… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா வினெய்ய லோகே அபி⁴ஜ்ஜா²தோ³மனஸ்ஸங். இமேஸங் கோ², பி⁴க்க²வே, பஞ்சன்னங் நீவரணானங் பஹானாய இமே சத்தாரோ ஸதிபட்டா²னா பா⁴வேதப்³பா³’’தி. து³தியங்.
‘‘Imesaṃ kho, bhikkhave, pañcannaṃ nīvaraṇānaṃ pahānāya cattāro satipaṭṭhānā bhāvetabbā. Katame cattāro? Idha, bhikkhave, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharati ātāpī sampajāno satimā vineyya loke abhijjhādomanassaṃ. Imesaṃ kho, bhikkhave, pañcannaṃ nīvaraṇānaṃ pahānāya ime cattāro satipaṭṭhānā bhāvetabbā’’ti. Dutiyaṃ.
