| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. ஓவாத³ஸுத்தங்
2. Ovādasuttaṃ
52. ஏகங் ஸமயங் ப⁴க³வா வேஸாலியங் விஹரதி மஹாவனே கூடாகா³ரஸாலாயங். அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஆனந்தோ³ ப⁴க³வந்தங் ஏதத³வோச – ‘‘கதிஹி நு கோ², ப⁴ந்தே, த⁴ம்மேஹி ஸமன்னாக³தோ பி⁴க்கு² பி⁴க்கு²னோவாத³கோ ஸம்மன்னிதப்³போ³’’தி?
52. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘katihi nu kho, bhante, dhammehi samannāgato bhikkhu bhikkhunovādako sammannitabbo’’ti?
1 ‘‘அட்ட²ஹி கோ², ஆனந்த³, த⁴ம்மேஹி ஸமன்னாக³தோ பி⁴க்கு² பி⁴க்கு²னோவாத³கோ ஸம்மன்னிதப்³போ³. கதமேஹி அட்ட²ஹி? இதா⁴னந்த³, பி⁴க்கு² ஸீலவா ஹோதி…பே॰… ஸமாதா³ய ஸிக்க²தி ஸிக்கா²பதே³ஸு; ப³ஹுஸ்ஸுதோ ஹோதி…பே॰… தி³ட்டி²யா ஸுப்படிவித்³தா⁴; உப⁴யானி கோ² பனஸ்ஸ பாதிமொக்கா²னி வித்தா²ரேன ஸ்வாக³தானி ஹொந்தி ஸுவிப⁴த்தானி ஸுப்பவத்தீனி ஸுவினிச்சி²தானி ஸுத்தஸோ அனுப்³யஞ்ஜனஸோ; கல்யாணவாசோ ஹோதி கல்யாணவாக்கரணோ, போரியா வாசாய ஸமன்னாக³தோ விஸ்ஸட்டா²ய 2 அனேலக³ளாய 3 அத்த²ஸ்ஸ விஞ்ஞாபனியா; படிப³லோ ஹோதி பி⁴க்கு²னிஸங்க⁴ஸ்ஸ த⁴ம்மியா கதா²ய ஸந்த³ஸ்ஸேதுங் ஸமாத³பேதுங் ஸமுத்தேஜேதுங் ஸம்பஹங்ஸேதுங்; யேபு⁴ய்யேன பி⁴க்கு²னீனங் பியோ ஹோதி மனாபோ; ந கோ² பனேதங் ப⁴க³வந்தங் உத்³தி³ஸ்ஸ பப்³ப³ஜிதாய காஸாயவத்த²னிவஸனாய க³ருத⁴ம்மங் அஜ்ஜா²பன்னபுப்³போ³ ஹோதி; வீஸதிவஸ்ஸோ வா ஹோதி அதிரேகவீஸதிவஸ்ஸோ வா. இமேஹி கோ², ஆனந்த³, அட்ட²ஹி த⁴ம்மேஹி ஸமன்னாக³தோ பி⁴க்கு² பி⁴க்கு²னோவாத³கோ ஸம்மன்னிதப்³போ³’’தி. து³தியங்.
4 ‘‘Aṭṭhahi kho, ānanda, dhammehi samannāgato bhikkhu bhikkhunovādako sammannitabbo. Katamehi aṭṭhahi? Idhānanda, bhikkhu sīlavā hoti…pe… samādāya sikkhati sikkhāpadesu; bahussuto hoti…pe… diṭṭhiyā suppaṭividdhā; ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso; kalyāṇavāco hoti kalyāṇavākkaraṇo, poriyā vācāya samannāgato vissaṭṭhāya 5 anelagaḷāya 6 atthassa viññāpaniyā; paṭibalo hoti bhikkhunisaṅghassa dhammiyā kathāya sandassetuṃ samādapetuṃ samuttejetuṃ sampahaṃsetuṃ; yebhuyyena bhikkhunīnaṃ piyo hoti manāpo; na kho panetaṃ bhagavantaṃ uddissa pabbajitāya kāsāyavatthanivasanāya garudhammaṃ ajjhāpannapubbo hoti; vīsativasso vā hoti atirekavīsativasso vā. Imehi kho, ānanda, aṭṭhahi dhammehi samannāgato bhikkhu bhikkhunovādako sammannitabbo’’ti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. ஓவாத³ஸுத்தவண்ணனா • 2. Ovādasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-3. கோ³தமீஸுத்தாதி³வண்ணனா • 1-3. Gotamīsuttādivaṇṇanā
