| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. பப்³ப³ஜிதஅபி⁴ண்ஹஸுத்தங்
8. Pabbajitaabhiṇhasuttaṃ
48. ‘‘த³ஸயிமே, பி⁴க்க²வே, த⁴ம்மா பப்³ப³ஜிதேன அபி⁴ண்ஹங் பச்சவெக்கி²தப்³பா³ . கதமே த³ஸ? ‘வேவண்ணியம்ஹி அஜ்ஜு²பக³தோ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘பரபடிப³த்³தா⁴ மே ஜீவிகா’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘அஞ்ஞோ மே ஆகப்போ கரணீயோ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘கச்சி நு கோ² மே அத்தா ஸீலதோ ந உபவத³தீ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘கச்சி நு கோ² மங் அனுவிச்ச விஞ்ஞூ ஸப்³ரஹ்மசாரீ ஸீலதோ ந உபவத³ந்தீ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘ஸப்³பே³ஹி மே பியேஹி மனாபேஹி நானாபா⁴வோ வினாபா⁴வோ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘கம்மஸ்ஸகொம்ஹி கம்மதா³யாதோ³ கம்மயோனி கம்மப³ந்து⁴ கம்மபடிஸரணோ, யங் கம்மங் கரிஸ்ஸாமி கல்யாணங் வா பாபகங் வா தஸ்ஸ தா³யாதோ³ ப⁴விஸ்ஸாமீ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘கத²ங்பூ⁴தஸ்ஸ மே ரத்திந்தி³வா வீதிவத்தந்தீ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘கச்சி நு கோ² அஹங் ஸுஞ்ஞாகா³ரே அபி⁴ரமாமீ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங்; ‘அத்தி² நு கோ² மே உத்தரி மனுஸ்ஸத⁴ம்மோ அலமரியஞாணத³ஸ்ஸனவிஸேஸோ அதி⁴க³தோ, யேனாஹங் 1 பச்சி²மே காலே ஸப்³ரஹ்மசாரீஹி புட்டோ² ந மங்கு ப⁴விஸ்ஸாமீ’தி பப்³ப³ஜிதேன அபி⁴ண்ஹங் பச்சவெக்கி²தப்³ப³ங். இமே கோ², பி⁴க்க²வே, த³ஸ த⁴ம்மா பப்³ப³ஜிதேன அபி⁴ண்ஹங் பச்சவெக்கி²தப்³பா³’’தி. அட்ட²மங்.
48. ‘‘Dasayime, bhikkhave, dhammā pabbajitena abhiṇhaṃ paccavekkhitabbā . Katame dasa? ‘Vevaṇṇiyamhi ajjhupagato’ti pabbajitena abhiṇhaṃ paccavekkhitabbaṃ; ‘parapaṭibaddhā me jīvikā’ti pabbajitena abhiṇhaṃ paccavekkhitabbaṃ; ‘añño me ākappo karaṇīyo’ti pabbajitena abhiṇhaṃ paccavekkhitabbaṃ; ‘kacci nu kho me attā sīlato na upavadatī’ti pabbajitena abhiṇhaṃ paccavekkhitabbaṃ; ‘kacci nu kho maṃ anuvicca viññū sabrahmacārī sīlato na upavadantī’ti pabbajitena abhiṇhaṃ paccavekkhitabbaṃ; ‘sabbehi me piyehi manāpehi nānābhāvo vinābhāvo’ti pabbajitena abhiṇhaṃ paccavekkhitabbaṃ; ‘kammassakomhi kammadāyādo kammayoni kammabandhu kammapaṭisaraṇo, yaṃ kammaṃ karissāmi kalyāṇaṃ vā pāpakaṃ vā tassa dāyādo bhavissāmī’ti pabbajitena abhiṇhaṃ paccavekkhitabbaṃ; ‘kathaṃbhūtassa me rattindivā vītivattantī’ti pabbajitena abhiṇhaṃ paccavekkhitabbaṃ; ‘kacci nu kho ahaṃ suññāgāre abhiramāmī’ti pabbajitena abhiṇhaṃ paccavekkhitabbaṃ; ‘atthi nu kho me uttari manussadhammo alamariyañāṇadassanaviseso adhigato, yenāhaṃ 2 pacchime kāle sabrahmacārīhi puṭṭho na maṅku bhavissāmī’ti pabbajitena abhiṇhaṃ paccavekkhitabbaṃ. Ime kho, bhikkhave, dasa dhammā pabbajitena abhiṇhaṃ paccavekkhitabbā’’ti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. பப்³ப³ஜிதஅபி⁴ண்ஹஸுத்தவண்ணனா • 8. Pabbajitaabhiṇhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-8. விவாத³ஸுத்தாதி³வண்ணனா • 1-8. Vivādasuttādivaṇṇanā
