| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. பப்³ப³ஜ்ஜாஸுத்தங்
9. Pabbajjāsuttaṃ
59. ‘‘தஸ்மாதிஹ, பி⁴க்க²வே, ஏவங் ஸிக்கி²தப்³ப³ங் – ‘யதா²பப்³ப³ஜ்ஜாபரிசிதஞ்ச நோ சித்தங் ப⁴விஸ்ஸதி, ந சுப்பன்னா பாபகா அகுஸலா த⁴ம்மா சித்தங் பரியாதா³ய ட²ஸ்ஸந்தி; அனிச்சஸஞ்ஞாபரிசிதஞ்ச நோ சித்தங் ப⁴விஸ்ஸதி, அனத்தஸஞ்ஞாபரிசிதஞ்ச நோ சித்தங் ப⁴விஸ்ஸதி, அஸுப⁴ஸஞ்ஞாபரிசிதஞ்ச நோ சித்தங் ப⁴விஸ்ஸதி, ஆதீ³னவஸஞ்ஞாபரிசிதஞ்ச நோ சித்தங் ப⁴விஸ்ஸதி, லோகஸ்ஸ ஸமஞ்ச விஸமஞ்ச ஞத்வா தங்ஸஞ்ஞாபரிசிதஞ்ச நோ சித்தங் ப⁴விஸ்ஸதி, லோகஸ்ஸ ப⁴வஞ்ச 1 விப⁴வஞ்ச ஞத்வா தங்ஸஞ்ஞாபரிசிதஞ்ச நோ சித்தங் ப⁴விஸ்ஸதி, லோகஸ்ஸ ஸமுத³யஞ்ச அத்த²ங்க³மஞ்ச ஞத்வா தங்ஸஞ்ஞாபரிசிதஞ்ச நோ சித்தங் ப⁴விஸ்ஸதி, பஹானஸஞ்ஞாபரிசிதஞ்ச நோ சித்தங் ப⁴விஸ்ஸதி, விராக³ஸஞ்ஞாபரிசிதஞ்ச நோ சித்தங் ப⁴விஸ்ஸதி, நிரோத⁴ஸஞ்ஞாபரிசிதஞ்ச நோ சித்தங் ப⁴விஸ்ஸதீ’தி – ஏவஞ்ஹி வோ, பி⁴க்க²வே, ஸிக்கி²தப்³ப³ங்.
59. ‘‘Tasmātiha, bhikkhave, evaṃ sikkhitabbaṃ – ‘yathāpabbajjāparicitañca no cittaṃ bhavissati, na cuppannā pāpakā akusalā dhammā cittaṃ pariyādāya ṭhassanti; aniccasaññāparicitañca no cittaṃ bhavissati, anattasaññāparicitañca no cittaṃ bhavissati, asubhasaññāparicitañca no cittaṃ bhavissati, ādīnavasaññāparicitañca no cittaṃ bhavissati, lokassa samañca visamañca ñatvā taṃsaññāparicitañca no cittaṃ bhavissati, lokassa bhavañca 2 vibhavañca ñatvā taṃsaññāparicitañca no cittaṃ bhavissati, lokassa samudayañca atthaṅgamañca ñatvā taṃsaññāparicitañca no cittaṃ bhavissati, pahānasaññāparicitañca no cittaṃ bhavissati, virāgasaññāparicitañca no cittaṃ bhavissati, nirodhasaññāparicitañca no cittaṃ bhavissatī’ti – evañhi vo, bhikkhave, sikkhitabbaṃ.
‘‘யதோ கோ², பி⁴க்க²வே, பி⁴க்கு²னோ யதா²பப்³ப³ஜ்ஜாபரிசிதஞ்ச சித்தங் ஹோதி ந சுப்பன்னா பாபகா அகுஸலா த⁴ம்மா சித்தங் பரியாதா³ய திட்ட²ந்தி, அனிச்சஸஞ்ஞாபரிசிதஞ்ச சித்தங் ஹோதி, அனத்தஸஞ்ஞாபரிசிதஞ்ச சித்தங் ஹோதி, அஸுப⁴ஸஞ்ஞாபரிசிதஞ்ச சித்தங் ஹோதி, ஆதீ³னவஸஞ்ஞாபரிசிதஞ்ச சித்தங் ஹோதி, லோகஸ்ஸ ஸமஞ்ச விஸமஞ்ச ஞத்வா தங்ஸஞ்ஞாபரிசிதஞ்ச சித்தங் ஹோதி, லோகஸ்ஸ ப⁴வஞ்ச விப⁴வஞ்ச ஞத்வா தங்ஸஞ்ஞாபரிசிதஞ்ச சித்தங் ஹோதி, லோகஸ்ஸ ஸமுத³யஞ்ச அத்த²ங்க³மஞ்ச ஞத்வா தங்ஸஞ்ஞாபரிசிதஞ்ச சித்தங் ஹோதி, பஹானஸஞ்ஞாபரிசிதஞ்ச சித்தங் ஹோதி, விராக³ஸஞ்ஞாபரிசிதஞ்ச சித்தங் ஹோதி, நிரோத⁴ஸஞ்ஞாபரிசிதஞ்ச சித்தங் ஹோதி, தஸ்ஸ த்³வின்னங் ப²லானங் அஞ்ஞதரங் ப²லங் பாடிகங்க²ங் – தி³ட்டே²வ த⁴ம்மே அஞ்ஞா, ஸதி வா உபாதி³ஸேஸே அனாகா³மிதா’’தி. நவமங்.
‘‘Yato kho, bhikkhave, bhikkhuno yathāpabbajjāparicitañca cittaṃ hoti na cuppannā pāpakā akusalā dhammā cittaṃ pariyādāya tiṭṭhanti, aniccasaññāparicitañca cittaṃ hoti, anattasaññāparicitañca cittaṃ hoti, asubhasaññāparicitañca cittaṃ hoti, ādīnavasaññāparicitañca cittaṃ hoti, lokassa samañca visamañca ñatvā taṃsaññāparicitañca cittaṃ hoti, lokassa bhavañca vibhavañca ñatvā taṃsaññāparicitañca cittaṃ hoti, lokassa samudayañca atthaṅgamañca ñatvā taṃsaññāparicitañca cittaṃ hoti, pahānasaññāparicitañca cittaṃ hoti, virāgasaññāparicitañca cittaṃ hoti, nirodhasaññāparicitañca cittaṃ hoti, tassa dvinnaṃ phalānaṃ aññataraṃ phalaṃ pāṭikaṅkhaṃ – diṭṭheva dhamme aññā, sati vā upādisese anāgāmitā’’ti. Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. பப்³ப³ஜ்ஜாஸுத்தவண்ணனா • 9. Pabbajjāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-10. ஸசித்தஸுத்தாதி³வண்ணனா • 1-10. Sacittasuttādivaṇṇanā
