| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. பப்³ப³தூபமஸுத்தவண்ணனா
5. Pabbatūpamasuttavaṇṇanā
136. க²த்தியாதி அபி⁴ஸேகப்பத்தா. இஸ்ஸரியமதோ³ காமகே³தோ⁴. பத²விமண்ட³லஸ்ஸ மஹந்ததா தங்னிவாஸினங் அனுயந்ததாதி ஸப்³ப³மித³ங் யதி²ச்சி²தஸ்ஸ ராஜகிச்சஸ்ஸ ஸுகே²ன ஸமிஜ்ஜ²னஸ்ஸ காரணகித்தனங். யாதி³ஸே ராஜகிச்சே உஸ்ஸுக்கங் ஆபன்னோ, தங் வித்தா²ரதோ த³ஸ்ஸேதுங் ‘‘ஏஸ கிரா’’திஆதி³ வுத்தங். அந்தரக³மனானீதி திண்ணங் நிரந்தரக³மனானங் அந்தரந்தரா க³மனானி. சோரா சிந்தயிங்ஸூதி ஏகோ அந்தரபோ⁴கி³கோ ராஜாபராதி⁴கோ பஞ்சஸதமனுஸ்ஸபரிவாரோ சோரியங் கரொந்தோ விசரதி, தே ஸந்தா⁴ய வுத்தங்.
136.Khattiyāti abhisekappattā. Issariyamado kāmagedho. Pathavimaṇḍalassa mahantatā taṃnivāsinaṃ anuyantatāti sabbamidaṃ yathicchitassa rājakiccassa sukhena samijjhanassa kāraṇakittanaṃ. Yādise rājakicce ussukkaṃ āpanno, taṃ vitthārato dassetuṃ ‘‘esa kirā’’tiādi vuttaṃ. Antaragamanānīti tiṇṇaṃ nirantaragamanānaṃ antarantarā gamanāni. Corā cintayiṃsūti eko antarabhogiko rājāparādhiko pañcasatamanussaparivāro coriyaṃ karonto vicarati, te sandhāya vuttaṃ.
‘‘அயுத்தங் தே கத’’ந்தி ஸசாஹங் வக்கா²மீதி யோஜனா. து⁴ரவிஹாரேதி ரத²ஸ்ஸ து⁴ரங் விய நக³ரஸ்ஸ து⁴ரபூ⁴தே விஹாரே. ஸந்த²ம்பி⁴துந்தி விஸ்ஸாஸபா⁴வேன உபட்டா²துங். ஸத்³தா⁴யிகோதி ஸத்³தா⁴ய அயிதப்³போ³, ஸத்³தெ⁴ய்யோதி அத்தோ². தேனாஹ ‘‘ஸத்³தா⁴தப்³போ³’’தி. பச்சயிகோதி பத்தியாயிதப்³போ³. அப்³ப⁴ஸமங் புது²லபா⁴வேன. நிப்போதெ²ந்தோதி நிம்மத்³தெ³ந்தோ. ஸண்ஹகரணீயங் அதிஸண்ஹங் பிஸந்தோ நிஸத³போதோ விய பிஸந்தோ.
‘‘Ayuttaṃ te kata’’nti sacāhaṃ vakkhāmīti yojanā. Dhuravihāreti rathassa dhuraṃ viya nagarassa dhurabhūte vihāre. Santhambhitunti vissāsabhāvena upaṭṭhātuṃ. Saddhāyikoti saddhāya ayitabbo, saddheyyoti attho. Tenāha ‘‘saddhātabbo’’ti. Paccayikoti pattiyāyitabbo. Abbhasamaṃ puthulabhāvena. Nippothentoti nimmaddento. Saṇhakaraṇīyaṃ atisaṇhaṃ pisanto nisadapoto viya pisanto.
த⁴ம்மசரியாதிஆதி³த்தம்பி ஸீஸங் சேலஞ்ச அஜ்ஜு²பெக்கி²த்வா ஸம்மாபடிபத்தி ஏவ காதப்³பா³ தஸ்ஸா ஏவ பரலோகே பதிட்டா²பா⁴வதோ. ஆசிக்கா²மீதி கதே²மி, கதெ²ந்தோ ச யதா² தமத்த²ங் ஸம்மதே³வ ராஜா ஜானாதி, ஏவங் ஜானாபேமீதி . நிப்ப²த்தி யுத்³தே⁴ன காதப்³ப³அத்த²ஸித்³தி⁴. விஸினோதி ப³ந்த⁴தி யதா²தி⁴ப்பேதங் சித்தங் ஏதேனாதி விஸயோ, ஸமத்த²பா⁴வோ. மந்தஸம்பன்னாதி ஸம்பன்னராஜமந்தா. மஹாஅமச்சாதி மஹோஸதா⁴தி³ஸதி³ஸா நீதிஸத்த²சே²கா அமச்சபுரிஸா. உபலாபேதுந்தி பரேஸங் அந்தரே விரோத⁴த்த²ங் ஸங்க³ண்ஹிதுங்.
Dhammacariyātiādittampi sīsaṃ celañca ajjhupekkhitvā sammāpaṭipatti eva kātabbā tassā eva paraloke patiṭṭhābhāvato. Ācikkhāmīti kathemi, kathento ca yathā tamatthaṃ sammadeva rājā jānāti, evaṃ jānāpemīti . Nipphatti yuddhena kātabbaatthasiddhi. Visinoti bandhati yathādhippetaṃ cittaṃ etenāti visayo, samatthabhāvo. Mantasampannāti sampannarājamantā. Mahāamaccāti mahosadhādisadisā nītisatthachekā amaccapurisā. Upalāpetunti paresaṃ antare virodhatthaṃ saṅgaṇhituṃ.
த்³வேயேவ பப்³ப³தாதி பப்³ப³தஸதி³ஸா த்³வேயேவ க³ஹிதா. ராஜோவாதே³தி ராஜோவாத³ஸுத்தே. ஆக³தாவ தத்தந்தியா அனுரூபத்த²ங். விலும்பமானாதி இதி-ஸத்³தோ³ ஆதி³அத்தோ². விபத்தீதி போ⁴க³பரிஹானாதி³வினாஸோ. ஹத்தி²யுத்³தா⁴தீ³ஹி ஜராமரணங் ஜினிதுங் ந ஸக்கா ஸத்தஸ்ஸ அவிஸயபா⁴வதோ. யேன பன ஜினிதுங் ஸக்கா, தங் த³ஸ்ஸெந்தோ ப⁴க³வா ‘‘பு³த்³தே⁴…பே॰… நிவேஸயே’’தி ஆஹ. ரதனத்தயே ஹி ஸத்³தா⁴ நிவிட்டா² மூலஜாதா பதிட்டி²தா ஏகந்ததோ ஜராமரணவிஜயாய ஹோதி. தேனாஹ ‘‘தஸ்மா ஸத்³த⁴’’ந்தி.
Dveyeva pabbatāti pabbatasadisā dveyeva gahitā. Rājovādeti rājovādasutte. Āgatāva tattantiyā anurūpatthaṃ. Vilumpamānāti iti-saddo ādiattho. Vipattīti bhogaparihānādivināso. Hatthiyuddhādīhi jarāmaraṇaṃ jinituṃ na sakkā sattassa avisayabhāvato. Yena pana jinituṃ sakkā, taṃ dassento bhagavā ‘‘buddhe…pe… nivesaye’’ti āha. Ratanattaye hi saddhā niviṭṭhā mūlajātā patiṭṭhitā ekantato jarāmaraṇavijayāya hoti. Tenāha ‘‘tasmā saddha’’nti.
பப்³ப³தூபமஸுத்தவண்ணனா நிட்டி²தா.
Pabbatūpamasuttavaṇṇanā niṭṭhitā.
ததியவக்³க³வண்ணனா நிட்டி²தா.
Tatiyavaggavaṇṇanā niṭṭhitā.
ஸாரத்த²ப்பகாஸினியா ஸங்யுத்தனிகாய-அட்ட²கதா²ய
Sāratthappakāsiniyā saṃyuttanikāya-aṭṭhakathāya
கோஸலஸங்யுத்தவண்ணனாய லீனத்த²ப்பகாஸனா ஸமத்தா.
Kosalasaṃyuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. பப்³ப³தூபமஸுத்தங் • 5. Pabbatūpamasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. பப்³ப³தூபமஸுத்தவண்ணனா • 5. Pabbatūpamasuttavaṇṇanā
