| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૯. પચ્ચુપટ્ઠાનસઞ્ઞકત્થેરઅપદાનવણ્ણના
9. Paccupaṭṭhānasaññakattheraapadānavaṇṇanā
અત્થદસ્સિમ્હિ સુગતેતિઆદિકં આયસ્મતો પચ્ચુપટ્ઠાનસઞ્ઞકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો અત્થદસ્સિસ્સ ભગવતો કાલે યક્ખયોનિયં નિબ્બત્તો ભગવતિ ધરમાને દસ્સનસ્સ અલદ્ધત્તા પચ્છા પરિનિબ્બુતે મહાસોકપ્પત્તો વિહાસિ. તદા હિસ્સ ભગવતો સાગતો નામ અગ્ગસાવકો અનુસાસન્તો ભગવતો સારીરિકધાતુપૂજા ભગવતિ ધરમાને કતપૂજા વિય ચિત્તપ્પસાદવસા મહપ્ફલં ભવતી’’તિ વત્વા ‘‘થૂપં કરોહી’’તિ નિયોજિતો થૂપં કારેસિ, તં પૂજેત્વા તતો ચુતો દેવમનુસ્સેસુ સક્કચક્કવત્તિસમ્પત્તિમનુભવિત્વા ઇમસ્મિં બુદ્ધુપ્પાદે સાવત્થિયં એકસ્મિં કુલગેહે નિબ્બત્તો વિઞ્ઞુતં પત્તો સત્થરિ પસીદિત્વા પબ્બજિત્વા નચિરસ્સેવ અરહા અહોસિ.
Atthadassimhi sugatetiādikaṃ āyasmato paccupaṭṭhānasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle yakkhayoniyaṃ nibbatto bhagavati dharamāne dassanassa aladdhattā pacchā parinibbute mahāsokappatto vihāsi. Tadā hissa bhagavato sāgato nāma aggasāvako anusāsanto bhagavato sārīrikadhātupūjā bhagavati dharamāne katapūjā viya cittappasādavasā mahapphalaṃ bhavatī’’ti vatvā ‘‘thūpaṃ karohī’’ti niyojito thūpaṃ kāresi, taṃ pūjetvā tato cuto devamanussesu sakkacakkavattisampattimanubhavitvā imasmiṃ buddhuppāde sāvatthiyaṃ ekasmiṃ kulagehe nibbatto viññutaṃ patto satthari pasīditvā pabbajitvā nacirasseva arahā ahosi.
૭૨. સો અપરભાગે અત્તનો પુઞ્ઞકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો અત્થદસ્સિમ્હિ સુગતેતિઆદિમાહ. તં હેટ્ઠા વુત્તમેવ. યક્ખયોનિં ઉપપજ્જિન્તિ એત્થ પન અત્તનો સકાસં સમ્પત્તસમ્પત્તે ખાદન્તા યન્તિ ગચ્છન્તીતિ યક્ખા, યક્ખાનં યોનિ જાતીતિ યક્ખયોનિ, યક્ખયોનિયં નિબ્બત્તોતિ અત્થો.
72. So aparabhāge attano puññakammaṃ saritvā somanassajāto pubbacaritāpadānaṃ pakāsento atthadassimhi sugatetiādimāha. Taṃ heṭṭhā vuttameva. Yakkhayoniṃ upapajjinti ettha pana attano sakāsaṃ sampattasampatte khādantā yanti gacchantīti yakkhā, yakkhānaṃ yoni jātīti yakkhayoni, yakkhayoniyaṃ nibbattoti attho.
૭૩. દુલ્લદ્ધં વત મે આસીતિ મે મયા લદ્ધયસં દુલ્લદ્ધં, બુદ્ધભૂતસ્સ સત્થુનો સક્કારં અકતત્તા વિરાધેત્વા લદ્ધન્તિ અત્થો. દુપ્પભાતન્તિ દુટ્ઠુ પભાતં રત્તિયા પભાતકરણં, મય્હં ન સુટ્ઠું પભાતન્તિ અત્થો. દુરુટ્ઠિતન્તિ દુઉટ્ઠિતં, સૂરિયસ્સ ઉગ્ગમનં મય્હં દુઉગ્ગમનન્તિ અત્થો. સેસં સબ્બત્થ ઉત્તાનમેવાતિ.
73.Dulladdhaṃvata me āsīti me mayā laddhayasaṃ dulladdhaṃ, buddhabhūtassa satthuno sakkāraṃ akatattā virādhetvā laddhanti attho. Duppabhātanti duṭṭhu pabhātaṃ rattiyā pabhātakaraṇaṃ, mayhaṃ na suṭṭhuṃ pabhātanti attho. Duruṭṭhitanti duuṭṭhitaṃ, sūriyassa uggamanaṃ mayhaṃ duuggamananti attho. Sesaṃ sabbattha uttānamevāti.
પચ્ચુપટ્ઠાનસઞ્ઞકત્થેરઅપદાનવણ્ણના સમત્તા.
Paccupaṭṭhānasaññakattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૯. પચ્ચુપટ્ઠાનસઞ્ઞકત્થેરઅપદાનં • 9. Paccupaṭṭhānasaññakattheraapadānaṃ
