| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૨. પદસઞ્ઞકત્થેરઅપદાનવણ્ણના
2. Padasaññakattheraapadānavaṇṇanā
અક્કન્તઞ્ચ પદં દિસ્વાતિઆદિકં આયસ્મતો પદસઞ્ઞકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો ઉપ્પન્નુપ્પન્નભવે વિવટ્ટૂપનિસ્સયાનિ પુઞ્ઞાનિ ઉપચિનન્તો તિસ્સસ્સ ભગવતો કાલે એકસ્મિં સદ્ધાસમ્પન્ને ઉપાસકગેહે નિબ્બત્તો વિઞ્ઞુતં પત્તો રતનત્તયે પસન્નો ભગવતા તસ્સ અનુકમ્પાય દસ્સિતં પદચેતિયં દિસ્વા પસન્નો લોમહટ્ઠજાતો વન્દનપૂજનાદિબહુમાનમકાસિ. સો તેનેવ સુખેત્તે સુકતેન પુઞ્ઞેન તતો ચુતો સગ્ગે નિબ્બત્તો તત્થ દિબ્બસુખમનુભવિત્વા અપરભાગે મનુસ્સેસુ જાતો મનુસ્સસમ્પત્તિં સબ્બમનુભવિત્વા ઇમસ્મિં બુદ્ધુપ્પાદે વિભવસમ્પન્નકુલે નિબ્બત્તો વુદ્ધિમન્વાય સદ્ધાજાતો પબ્બજિત્વા નચિરસ્સેવ અરહા અહોસિ, પુરાકતપુઞ્ઞનામેન પદસઞ્ઞકત્થેરોતિ પાકટો.
Akkantañca padaṃ disvātiādikaṃ āyasmato padasaññakattherassa apadānaṃ. Ayampi purimabuddhesu katādhikāro uppannuppannabhave vivaṭṭūpanissayāni puññāni upacinanto tissassa bhagavato kāle ekasmiṃ saddhāsampanne upāsakagehe nibbatto viññutaṃ patto ratanattaye pasanno bhagavatā tassa anukampāya dassitaṃ padacetiyaṃ disvā pasanno lomahaṭṭhajāto vandanapūjanādibahumānamakāsi. So teneva sukhette sukatena puññena tato cuto sagge nibbatto tattha dibbasukhamanubhavitvā aparabhāge manussesu jāto manussasampattiṃ sabbamanubhavitvā imasmiṃ buddhuppāde vibhavasampannakule nibbatto vuddhimanvāya saddhājāto pabbajitvā nacirasseva arahā ahosi, purākatapuññanāmena padasaññakattheroti pākaṭo.
૫. સો એકદિવસં અત્તનો પુબ્બકમ્મં સરિત્વા પુબ્બચરિતાપદાનં પકાસેન્તો અક્કન્તઞ્ચ પદં દિસ્વાતિઆદિમાહ. તત્થ અક્કન્તન્તિ અક્કમિતં દસ્સિતં. સબ્બબુદ્ધાનં સબ્બદા ચતુરઙ્ગુલોપરિયેવ ગમનં, અયં પન તસ્સ સદ્ધાસમ્પન્નતં ઞત્વા ‘‘એસો ઇમં પસ્સતૂ’’તિ પદચેતિયં દસ્સેસિ, તસ્મા સો તસ્મિં પસીદિત્વા વન્દનપૂજનાદિસક્કારમકાસીતિ અત્થો. સેસં સબ્બત્થ ઉત્તાનત્થમેવાતિ.
5. So ekadivasaṃ attano pubbakammaṃ saritvā pubbacaritāpadānaṃ pakāsento akkantañca padaṃ disvātiādimāha. Tattha akkantanti akkamitaṃ dassitaṃ. Sabbabuddhānaṃ sabbadā caturaṅgulopariyeva gamanaṃ, ayaṃ pana tassa saddhāsampannataṃ ñatvā ‘‘eso imaṃ passatū’’ti padacetiyaṃ dassesi, tasmā so tasmiṃ pasīditvā vandanapūjanādisakkāramakāsīti attho. Sesaṃ sabbattha uttānatthamevāti.
પદસઞ્ઞકત્થેરઅપદાનવણ્ણના સમત્તા.
Padasaññakattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૨. પદસઞ્ઞકત્થેરઅપદાનં • 2. Padasaññakattheraapadānaṃ
