| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. பதீ³போபமஸுத்தவண்ணனா
8. Padīpopamasuttavaṇṇanā
984. ‘‘நேவ காயோபி கிலமதி ந சக்கூ²னீ’’தி அட்ட²கதா²யங் பது³த்³தா⁴ரோ கதோ. ‘‘காயோபி கிலமதி, சக்கூ²னிபி விஹஞ்ஞந்தீ’’தி வத்வா யத்த² யதா² ஹோதி, தானி த³ஸ்ஸேதுங் ‘‘தா⁴துகம்மட்டா²னஸ்மிங் ஹீ’’திஆதி³ வுத்தங். சக்கூ²னி ப²ந்த³ந்தி கிலமந்தீதிஆதி³ அதிவேலங் உபனிஜ்ஜா²யனே ஹோதீதி கத்வா வுத்தங். இமஸ்மிங் பன கம்மட்டா²னேதி ஆனாபானகம்மட்டா²னே. ஏவமாஹாதி ‘‘பி⁴க்கு² சேபி ஆகங்கெ²ய்ய, நேவ காயோ கிலமெய்யா’’தி ஏவமாஹ.
984. ‘‘Neva kāyopi kilamati na cakkhūnī’’ti aṭṭhakathāyaṃ paduddhāro kato. ‘‘Kāyopi kilamati, cakkhūnipi vihaññantī’’ti vatvā yattha yathā hoti, tāni dassetuṃ ‘‘dhātukammaṭṭhānasmiṃ hī’’tiādi vuttaṃ. Cakkhūni phandanti kilamantītiādi ativelaṃ upanijjhāyane hotīti katvā vuttaṃ. Imasmiṃ pana kammaṭṭhāneti ānāpānakammaṭṭhāne. Evamāhāti ‘‘bhikkhu cepi ākaṅkheyya, neva kāyo kilameyyā’’ti evamāha.
லப்³ப⁴தீதி அட்ட²கதா²தி⁴ப்பாயே ட²த்வா வுத்தங், பரதோ ஆக³தேன தே²ரவாதே³ன ஸோ அனிச்சி²தோ. ந ஹி தாரகரூபமுத்தாவளிகாதி³ஸதி³ஸங் நிமித்தூபட்டா²னாகாரமத்தங் க²ணமத்தட்டா²யினங் கஸிணனிமித்தேஸு விய உக்³கா⁴டனங் காதுங் ஸக்கோதி. தேனாஹ ‘‘ந லப்³ப⁴தேவா’’தி. ஆனிஸங்ஸத³ஸ்ஸனத்த²ங் க³ஹிதோ, ஆனாபானஸ்ஸதிஸமாதி⁴ஸ்மிங் ஸித்³தே⁴ அயங் கு³ணோ ஸுகே²னேவ இஜ்ஜ²தீதி. யஸ்மா பி⁴க்கூ²தி இமஸ்மிங் வாரே நாக³தந்தி யதா² புரிமவாரே ‘‘பி⁴க்கு² சேபி ஆகங்கெ²ய்யா’’தி ஆக³தங், ஏவங் இத⁴ ‘‘பா⁴விதே கோ², பி⁴க்க²வே, ஆனாபானஸ்ஸதிஸமாதி⁴ம்ஹீ’’தி ஆக³தவாரே பி⁴க்கு²க்³க³ஹணமகதங், தஸ்மா ‘‘ஸோ’’தி ந வுத்தங்.
Labbhatīti aṭṭhakathādhippāye ṭhatvā vuttaṃ, parato āgatena theravādena so anicchito. Na hi tārakarūpamuttāvaḷikādisadisaṃ nimittūpaṭṭhānākāramattaṃ khaṇamattaṭṭhāyinaṃ kasiṇanimittesu viya ugghāṭanaṃ kātuṃ sakkoti. Tenāha ‘‘na labbhatevā’’ti. Ānisaṃsadassanatthaṃ gahito, ānāpānassatisamādhismiṃ siddhe ayaṃ guṇo sukheneva ijjhatīti. Yasmā bhikkhūti imasmiṃ vāre nāgatanti yathā purimavāre ‘‘bhikkhu cepi ākaṅkheyyā’’ti āgataṃ, evaṃ idha ‘‘bhāvite kho, bhikkhave, ānāpānassatisamādhimhī’’ti āgatavāre bhikkhuggahaṇamakataṃ, tasmā ‘‘so’’ti na vuttaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. பதீ³போபமஸுத்தங் • 8. Padīpopamasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. பதீ³போபமஸுத்தவண்ணனா • 8. Padīpopamasuttavaṇṇanā
