| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૯. પદુમત્થેરઅપદાનવણ્ણના
9. Padumattheraapadānavaṇṇanā
ચતુસચ્ચં પકાસેન્તોતિઆદિકં આયસ્મતો પદુમત્થેરસ્સ અપદાનં. અયમ્પિ પુરિમબુદ્ધેસુ કતકુસલસમ્ભારો પદુમુત્તરમુનિના ધમ્મપજ્જોતે જોતમાને એકસ્મિં કુલગેહે નિબ્બત્તો ઘરાવાસં સણ્ઠપેત્વા ભોગસમ્પન્નોતિ પાકટો. સો સત્થરિ પસીદિત્વા મહાજનેન સદ્ધિં ધમ્મં સુણન્તો ધજેન સહ પદુમકલાપં ગહેત્વા અટ્ઠાસિ, સધજં તં પદુમકલાપં આકાસમુક્ખિપિં, તં અચ્છરિયં દિસ્વા અતિવિય સોમનસ્સજાતો અહોસિ. સો યાવજીવં કુસલં કત્વા જીવિતપરિયોસાને સગ્ગે નિબ્બત્તો ધજમિવ છકામાવચરે પાકટો પૂજિતો ચ દિબ્બસમ્પત્તિમનુભવિત્વા મનુસ્સેસુ ચ ચક્કવત્તિસમ્પત્તિમનુભવિત્વા ઇમસ્મિં બુદ્ધુપ્પાદે વિભવસમ્પન્ને સદ્ધાસમ્પન્ને એકસ્મિં કુલગેહે નિબ્બત્તો વુદ્ધિમન્વાય સદ્ધાજાતો પઞ્ચવસ્સિકોવ પબ્બજિત્વા નચિરસ્સેવ અરહા હુત્વા કતપુઞ્ઞનામેન પદુમત્થેરોતિ પાકટો.
Catusaccaṃ pakāsentotiādikaṃ āyasmato padumattherassa apadānaṃ. Ayampi purimabuddhesu katakusalasambhāro padumuttaramuninā dhammapajjote jotamāne ekasmiṃ kulagehe nibbatto gharāvāsaṃ saṇṭhapetvā bhogasampannoti pākaṭo. So satthari pasīditvā mahājanena saddhiṃ dhammaṃ suṇanto dhajena saha padumakalāpaṃ gahetvā aṭṭhāsi, sadhajaṃ taṃ padumakalāpaṃ ākāsamukkhipiṃ, taṃ acchariyaṃ disvā ativiya somanassajāto ahosi. So yāvajīvaṃ kusalaṃ katvā jīvitapariyosāne sagge nibbatto dhajamiva chakāmāvacare pākaṭo pūjito ca dibbasampattimanubhavitvā manussesu ca cakkavattisampattimanubhavitvā imasmiṃ buddhuppāde vibhavasampanne saddhāsampanne ekasmiṃ kulagehe nibbatto vuddhimanvāya saddhājāto pañcavassikova pabbajitvā nacirasseva arahā hutvā katapuññanāmena padumattheroti pākaṭo.
૬૭. અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો ચતુસચ્ચં પકાસેન્તોતિઆદિમાહ. તત્થ સચ્ચન્તિ તથં અવિતથં અવિપરીતં સચ્ચં, દુક્ખસમુદયનિરોધમગ્ગવસેન ચત્તારિ સચ્ચાનિ સમાહટાનીતિ ચતુસચ્ચં, તં ચતુસચ્ચં પકાસેન્તો લોકે પાકટં કરોન્તોતિ અત્થો. વરધમ્મપ્પવત્તકોતિ ઉત્તમધમ્મપ્પવત્તકો પકાસકોતિ અત્થો. અમતં વુટ્ઠિન્તિ અમતમહાનિબ્બાનવુટ્ઠિધારં પવસ્સન્તો પગ્ઘરન્તો સદેવકં લોકં તેમેન્તો સબ્બકિલેસપરિળાહં નિબ્બાપેન્તો ધમ્મવસ્સં વસ્સતીતિ અત્થો.
67. Attano pubbakammaṃ saritvā somanassajāto pubbacaritāpadānaṃ pakāsento catusaccaṃ pakāsentotiādimāha. Tattha saccanti tathaṃ avitathaṃ aviparītaṃ saccaṃ, dukkhasamudayanirodhamaggavasena cattāri saccāni samāhaṭānīti catusaccaṃ, taṃ catusaccaṃ pakāsento loke pākaṭaṃ karontoti attho. Varadhammappavattakoti uttamadhammappavattako pakāsakoti attho. Amataṃ vuṭṭhinti amatamahānibbānavuṭṭhidhāraṃ pavassanto paggharanto sadevakaṃ lokaṃ temento sabbakilesapariḷāhaṃ nibbāpento dhammavassaṃ vassatīti attho.
૬૮. સધજં પદુમં ગય્હાતિ ધજેન સહ એકતો કત્વા પદુમં પદુમકલાપં ગહેત્વાતિ અત્થો. અડ્ઢકોસે ઠિતો અહન્તિ ઉભો ઉક્ખિપિત્વા ઠિતો અહન્તિ અત્થો. સેસં સબ્બત્થ ઉત્તાનત્થમેવાતિ.
68.Sadhajaṃ padumaṃ gayhāti dhajena saha ekato katvā padumaṃ padumakalāpaṃ gahetvāti attho. Aḍḍhakose ṭhito ahanti ubho ukkhipitvā ṭhito ahanti attho. Sesaṃ sabbattha uttānatthamevāti.
પદુમત્થેરઅપદાનવણ્ણના સમત્તા.
Padumattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૯. પદુમત્થેરઅપદાનં • 9. Padumattheraapadānaṃ
