| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
10. பது³ட்ட²சித்தஸுத்தவண்ணனா
10. Paduṭṭhacittasuttavaṇṇanā
20. த³ஸமஸ்ஸ கா உப்பத்தி? அட்டு²ப்பத்தியேவ. ஏகதி³வஸங் கிர பி⁴க்கூ² த⁴ம்மஸபா⁴யங் ஸன்னிஸின்னா கத²ங் ஸமுட்டா²பேஸுங் – ‘‘ஆவுஸோ, இதே⁴கச்சோ ப³ஹுங் புஞ்ஞகம்மங் கரோதி, ஏகச்சோ ப³ஹுங் பாபகம்மங், ஏகச்சோ உப⁴யவோமிஸ்ஸகங் கரோதி. தத்த² வோமிஸ்ஸகாரினோ கீதி³ஸோ அபி⁴ஸம்பராயோ’’தி? அத² ஸத்தா² த⁴ம்மஸப⁴ங் உபக³ன்வா பஞ்ஞத்தவரபு³த்³தா⁴ஸனே நிஸின்னோ தங் கத²ங் ஸுத்வா ‘‘பி⁴க்க²வே, மரணாஸன்னகாலே ஸங்கிலிட்ட²சித்தஸ்ஸ து³க்³க³தி பாடிகங்கா²’’தி த³ஸ்ஸெந்தோ இமாய அட்டு²ப்பத்தியா இத³ங் ஸுத்தங் தே³ஸேஸி.
20. Dasamassa kā uppatti? Aṭṭhuppattiyeva. Ekadivasaṃ kira bhikkhū dhammasabhāyaṃ sannisinnā kathaṃ samuṭṭhāpesuṃ – ‘‘āvuso, idhekacco bahuṃ puññakammaṃ karoti, ekacco bahuṃ pāpakammaṃ, ekacco ubhayavomissakaṃ karoti. Tattha vomissakārino kīdiso abhisamparāyo’’ti? Atha satthā dhammasabhaṃ upaganvā paññattavarabuddhāsane nisinno taṃ kathaṃ sutvā ‘‘bhikkhave, maraṇāsannakāle saṃkiliṭṭhacittassa duggati pāṭikaṅkhā’’ti dassento imāya aṭṭhuppattiyā idaṃ suttaṃ desesi.
தத்த² இதா⁴தி தே³ஸாபதே³ஸே நிபாதோ. ஸ்வாயங் கத்த²சி பதே³ஸங் உபாதா³ய வுச்சதி ‘‘இதே⁴வ திட்ட²மானஸ்ஸ, தே³வபூ⁴தஸ்ஸ மே ஸதோ’’திஆதீ³ஸு (தீ³॰ நி॰ 2.369). கத்த²சி ஸாஸனங் உபாதா³ய ‘‘இதே⁴வ, பி⁴க்க²வே, ஸமணோ இத⁴ து³தியோ ஸமணோ’’திஆதீ³ஸு (ம॰ நி॰ 1.139; அ॰ நி॰ 4.241). கத்த²சி பத³பூரணமத்தே ‘‘இதா⁴ஹங், பி⁴க்க²வே, பு⁴த்தாவீ அஸ்ஸங் பவாரிதோ’’திஆதீ³ஸு (ம॰ நி॰ 1.30). கத்த²சி லோகங் உபாதா³ய வுச்சதி ‘‘இத⁴ ததா²க³தோ லோகே உப்பஜ்ஜதீ’’திஆதீ³ஸு (அ॰ நி॰ 3.61). இதா⁴பி லோகே ஏவ த³ட்ட²ப்³போ³. ஏகச்சந்தி ஏகங், அஞ்ஞதரந்தி அத்தோ². புக்³க³லந்தி ஸத்தங். ஸோ ஹி யதா²பச்சயங் குஸலாகுஸலானங் தப்³பி³பாகானஞ்ச பூரணதோ மரணவஸேன க³லனதோ ச புக்³க³லோதி வுச்சதி. பது³ட்ட²சித்தந்தி பதோ³ஸேன ஆகா⁴தேன து³ட்ட²சித்தங். அத² வா பது³ட்ட²சித்தந்தி தோ³ஸேன ராகா³தி³னா பதூ³ஸிதசித்தங். எத்த² ச ஏகச்சந்தி இத³ங் பது³ட்ட²சித்தஸ்ஸ புக்³க³லஸ்ஸ விஸேஸனங். யஸ்ஸ ஹி படிஸந்தி⁴தா³யககம்மங் ஓகாஸமகாஸி, ஸோ ததா² வுத்தோ. யஸ்ஸ ச அகுஸலப்பவத்திதோ சித்தங் நிவத்தெத்வா குஸலவஸேன ஓதாரேதுங் ந ஸக்கா, ஏவங் ஆஸன்னமரணோ. ஏவந்தி இதா³னி வத்தப்³பா³காரங் த³ஸ்ஸேதி. சேதஸாதி அத்தனோ சித்தேன சேதோபரியஞாணேன. சேதோதி தஸ்ஸ புக்³க³லஸ்ஸ சித்தங். பரிச்சாதி பரிச்சி²ந்தி³த்வா பஜானாமி . நனு ச யதா²கம்முபக³ஞாணஸ்ஸாயங் விஸயோதி? ஸச்சமேதங், ததா³ பவத்தமானஅகுஸலசித்தவஸேன பனேதங் வுத்தங்.
Tattha idhāti desāpadese nipāto. Svāyaṃ katthaci padesaṃ upādāya vuccati ‘‘idheva tiṭṭhamānassa, devabhūtassa me sato’’tiādīsu (dī. ni. 2.369). Katthaci sāsanaṃ upādāya ‘‘idheva, bhikkhave, samaṇo idha dutiyo samaṇo’’tiādīsu (ma. ni. 1.139; a. ni. 4.241). Katthaci padapūraṇamatte ‘‘idhāhaṃ, bhikkhave, bhuttāvī assaṃ pavārito’’tiādīsu (ma. ni. 1.30). Katthaci lokaṃ upādāya vuccati ‘‘idha tathāgato loke uppajjatī’’tiādīsu (a. ni. 3.61). Idhāpi loke eva daṭṭhabbo. Ekaccanti ekaṃ, aññataranti attho. Puggalanti sattaṃ. So hi yathāpaccayaṃ kusalākusalānaṃ tabbipākānañca pūraṇato maraṇavasena galanato ca puggaloti vuccati. Paduṭṭhacittanti padosena āghātena duṭṭhacittaṃ. Atha vā paduṭṭhacittanti dosena rāgādinā padūsitacittaṃ. Ettha ca ekaccanti idaṃ paduṭṭhacittassa puggalassa visesanaṃ. Yassa hi paṭisandhidāyakakammaṃ okāsamakāsi, so tathā vutto. Yassa ca akusalappavattito cittaṃ nivattetvā kusalavasena otāretuṃ na sakkā, evaṃ āsannamaraṇo. Evanti idāni vattabbākāraṃ dasseti. Cetasāti attano cittena cetopariyañāṇena. Cetoti tassa puggalassa cittaṃ. Pariccāti paricchinditvā pajānāmi. Nanu ca yathākammupagañāṇassāyaṃ visayoti? Saccametaṃ, tadā pavattamānaakusalacittavasena panetaṃ vuttaṃ.
இமம்ஹி சாயங் ஸமயேதி இமஸ்மிங் காலே, இமாயங் வா பச்சயஸாமக்³கி³யங், அயங் புக்³க³லோ ஜவனவீதி²யா அபரபா⁴கே³ காலங் கரெய்ய சேதி அத்தோ². ந ஹி ஜவனக்க²ணே காலங்கிரியா அத்தி². யதா²ப⁴தங் நிக்கி²த்தோ ஏவங் நிரயேதி யதா² ஆப⁴தங் கிஞ்சி ஆஹரித்வா ட²பிதங், ஏவங் அத்தனோ கம்முனா நிக்கி²த்தோ நிரயே ட²பிதோ ஏவாதி அத்தோ². காயஸ்ஸ பே⁴தா³தி உபாதி³ன்னக்க²ந்த⁴பரிச்சாகா³. பரங் மரணாதி தத³னந்தரங் அபி⁴னிப்³ப³த்தக்க²ந்த⁴க்³க³ஹணே. அத² வா காயஸ்ஸ பே⁴தா³தி ஜீவிதிந்த்³ரியஸ்ஸ உபச்சே²தா³. பரங் மரணாதி சுதிதோ உத்³த⁴ங்.
Imamhicāyaṃ samayeti imasmiṃ kāle, imāyaṃ vā paccayasāmaggiyaṃ, ayaṃ puggalo javanavīthiyā aparabhāge kālaṃ kareyya ceti attho. Na hi javanakkhaṇe kālaṃkiriyā atthi. Yathābhataṃ nikkhitto evaṃ nirayeti yathā ābhataṃ kiñci āharitvā ṭhapitaṃ, evaṃ attano kammunā nikkhitto niraye ṭhapito evāti attho. Kāyassa bhedāti upādinnakkhandhapariccāgā. Paraṃ maraṇāti tadanantaraṃ abhinibbattakkhandhaggahaṇe. Atha vā kāyassa bhedāti jīvitindriyassa upacchedā. Paraṃ maraṇāti cutito uddhaṃ.
அபாயந்திஆதி³ ஸப்³ப³ங் நிரயஸ்ஸேவ வேவசனங். நிரயோ ஹி அயஸங்கா²தா ஸுகா² அபேதோதி அபாயோ; ஸக்³க³மொக்க²ஹேதுபூ⁴தா வா புஞ்ஞஸம்மதா அயா அபேதோதிபி அபாயோ. து³க்க²ஸ்ஸ க³தி படிஸரணந்தி து³க்³க³தி; தோ³ஸப³ஹுலத்தா வா து³ட்டே²ன கம்முனா நிப்³ப³த்தா க³தீதிபி து³க்³க³தி. விவஸா நிபதந்தி எத்த² து³க்கடகம்மகாரினோ, வினஸ்ஸந்தா வா எத்த² நிபதந்தி ஸம்பி⁴ஜ்ஜமானங்க³பச்சங்கா³தி வினிபாதோ. நத்தி² எத்த² அஸ்ஸாத³ஸஞ்ஞிதோ அயோதி நிரஸ்ஸாத³ட்டே²ன நிரயோ. அத² வா அபாயக்³க³ஹணேன திரச்சா²னயோனி வுச்சதி. திரச்சா²னயோனி ஹி அபாயோ ஸுக³திதோ அபேதத்தா, ந து³க்³க³தி மஹேஸக்கா²னங் நாக³ராஜாதீ³னங் ஸம்ப⁴வதோ. து³க்³க³திக்³க³ஹணேன பெத்திவிஸயோ. ஸோ ஹி அபாயோ சேவ து³க்³க³தி ச ஸுக³திதோ அபேதத்தா து³க்க²ஸ்ஸ ச க³திபூ⁴தத்தா, ந வினிபாதோ அஸுரஸதி³ஸங் அவினிபாதத்தா. வினிபாதக்³க³ஹணேன அஸுரகாயோ. ஸோ ஹி யதா²வுத்தேன அத்தே²ன அபாயோ சேவ து³க்³க³தி ச, ஸப்³ப³ஸம்பத்திஸமுஸ்ஸயேஹி வினிபதிதத்தா வினிபாதோதி ச வுச்சதி. நிரயக்³க³ஹணேன அவீசிஆதி³அனேகப்பகாரோ நிரயோவ வுச்சதி. இத⁴ பன ஸப்³ப³பதே³ஹிபி நிரயோவ வுத்தோ. உபபஜ்ஜந்தீதி படிஸந்தி⁴ங் க³ண்ஹந்தி.
Apāyantiādi sabbaṃ nirayasseva vevacanaṃ. Nirayo hi ayasaṅkhātā sukhā apetoti apāyo; saggamokkhahetubhūtā vā puññasammatā ayā apetotipi apāyo. Dukkhassa gati paṭisaraṇanti duggati; dosabahulattā vā duṭṭhena kammunā nibbattā gatītipi duggati. Vivasā nipatanti ettha dukkaṭakammakārino, vinassantā vā ettha nipatanti sambhijjamānaṅgapaccaṅgāti vinipāto. Natthi ettha assādasaññito ayoti nirassādaṭṭhena nirayo. Atha vā apāyaggahaṇena tiracchānayoni vuccati. Tiracchānayoni hi apāyo sugatito apetattā, na duggati mahesakkhānaṃ nāgarājādīnaṃ sambhavato. Duggatiggahaṇena pettivisayo. So hi apāyo ceva duggati ca sugatito apetattā dukkhassa ca gatibhūtattā, na vinipāto asurasadisaṃ avinipātattā. Vinipātaggahaṇena asurakāyo. So hi yathāvuttena atthena apāyo ceva duggati ca, sabbasampattisamussayehi vinipatitattā vinipātoti ca vuccati. Nirayaggahaṇena avīciādianekappakāro nirayova vuccati. Idha pana sabbapadehipi nirayova vutto. Upapajjantīti paṭisandhiṃ gaṇhanti.
கா³தா²ஸு பட²மகா³தா² ஸங்கீ³திகாலே த⁴ம்மஸங்கா³ஹகத்தே²ரேஹி ட²பிதா. ஞத்வானாதி புப்³ப³காலகிரியா. ஞாணபுப்³ப³கஞ்ஹி ப்³யாகரணங். ஹேதுஅத்தோ² வா த்வா-ஸத்³தோ³ யதா² ‘‘ஸீஹங் தி³ஸ்வா ப⁴யங் ஹோதீ’’தி, ஜானநஹேதூதி அத்தோ² . பு³த்³தோ⁴, பி⁴க்கூ²னங் ஸந்திகேதி பு³த்³தோ⁴ ப⁴க³வா அத்தனோ ஸந்திகே பி⁴க்கூ²னங் ஏதங் பரதோ த்³வீஹி கா³தா²ஹி வுச்சமானங் அத்த²ங் ப்³யாகாஸி. ஸேஸங் வுத்தனயமேவ.
Gāthāsu paṭhamagāthā saṅgītikāle dhammasaṅgāhakattherehi ṭhapitā. Ñatvānāti pubbakālakiriyā. Ñāṇapubbakañhi byākaraṇaṃ. Hetuattho vā tvā-saddo yathā ‘‘sīhaṃ disvā bhayaṃ hotī’’ti, jānanahetūti attho . Buddho, bhikkhūnaṃ santiketi buddho bhagavā attano santike bhikkhūnaṃ etaṃ parato dvīhi gāthāhi vuccamānaṃ atthaṃ byākāsi. Sesaṃ vuttanayameva.
த³ஸமஸுத்தவண்ணனா நிட்டி²தா.
Dasamasuttavaṇṇanā niṭṭhitā.
து³தியவக்³க³வண்ணனா நிட்டி²தா.
Dutiyavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 10. பது³ட்ட²சித்தஸுத்தங் • 10. Paduṭṭhacittasuttaṃ
