| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. பஜ்ஜோதஸுத்தவண்ணனா
6. Pajjotasuttavaṇṇanā
26. தி³வாரத்திந்தி ந ஆதி³ச்சோ விய தி³வா ஏவ, ந சந்தி³மா விய ரத்திங் ஏவ, அத² கோ² தி³வா ச ரத்திஞ்ச. தத்த² தத்தா²தி யத்த² யத்த² ஸம்பஜ்ஜலிதோ, தத்த² தத்தே²வ பதே³ஸே, ந ஆதி³ச்சோ விய சந்தி³மா விய ஸகலங் மஹாதி³ஸங் தி³ஸந்தராளஞ்ச. ஞாணானுபா⁴வேன உப்பன்னாலோகோ ஞாணாலோகோதி வத³ந்தி. ‘‘இத³ங் து³க்க²ங் அரியஸச்சந்தி புப்³பே³ மே, பி⁴க்க²வே, அனநுஸ்ஸுதேஸு த⁴ம்மேஸு சக்கு²ங் உத³பாதி³ ஞாணங் உத³பாதி³ பஞ்ஞா உத³பாதி³ விஜ்ஜா உத³பாதி³ ஆலோகோ உத³பாதீ³’’தி (ஸங்॰ நி॰ 5.1081; மஹாவ॰ 15; படி॰ ம॰ 2.30) பன வசனதோ மக்³கோ³ ஞாணாலோகோ. ‘‘தமோ விஹதோ, ஆலோகோ உப்பன்னோ’’தி (ம॰ நி॰ 1.386; பாரா॰ 12) வா வசனதோ விஜ்ஜத்தயாலோகோ ஞாணாலோகோ. பட²மாபி⁴ஸம்போ³தி⁴யங் விய ஸஞ்ஜாதபீதிவிப்பா²ரோ, விஸேஸதோ ரதனக⁴ரே ஸமந்தபட்டா²னவிசினநே ஸஞ்ஜாதபீதிவஸேன உப்பன்னஸரீரோபா⁴ஸோ வா பீதிஆலோகோ. தத்தே²வ உப்பன்னபஸாத³வஸேன ஸஞ்ஜாதஆலோகோவ பஸாதா³லோகோ. த⁴ம்மசக்கபவத்தனே ‘‘அஞ்ஞாஸி வத, போ⁴, கொண்ட³ஞ்ஞோ’’தி உப்பன்னபஸாதா³லோகோதி ச வத³ந்தி. ஸப்³ப³த்தே²வ ஸத்து² த⁴ம்மதே³ஸனா ஸத்தானங் ஹத³யதமங் வித⁴மந்தீ த⁴ம்மகதா²ஆலோகோ. ஸப்³போ³பி பு³த்³தா⁴னங் பாதுபா⁴வா உப்பன்னோ ஆலோகோதி இமினா ஸாவகானங் தே³ஸனாய ஸஞ்ஜாதத⁴ம்மாலோகோபி பு³த்³தா⁴னுபா⁴வோதி த³ஸ்ஸேதி.
26.Divārattinti na ādicco viya divā eva, na candimā viya rattiṃ eva, atha kho divā ca rattiñca. Tattha tatthāti yattha yattha sampajjalito, tattha tattheva padese, na ādicco viya candimā viya sakalaṃ mahādisaṃ disantarāḷañca. Ñāṇānubhāvena uppannāloko ñāṇālokoti vadanti. ‘‘Idaṃ dukkhaṃ ariyasaccanti pubbe me, bhikkhave, ananussutesu dhammesu cakkhuṃ udapādi ñāṇaṃ udapādi paññā udapādi vijjā udapādi āloko udapādī’’ti (saṃ. ni. 5.1081; mahāva. 15; paṭi. ma. 2.30) pana vacanato maggo ñāṇāloko. ‘‘Tamo vihato, āloko uppanno’’ti (ma. ni. 1.386; pārā. 12) vā vacanato vijjattayāloko ñāṇāloko. Paṭhamābhisambodhiyaṃ viya sañjātapītivipphāro, visesato ratanaghare samantapaṭṭhānavicinane sañjātapītivasena uppannasarīrobhāso vā pītiāloko. Tattheva uppannapasādavasena sañjātaālokova pasādāloko. Dhammacakkapavattane ‘‘aññāsi vata, bho, koṇḍañño’’ti uppannapasādālokoti ca vadanti. Sabbattheva satthu dhammadesanā sattānaṃ hadayatamaṃ vidhamantī dhammakathāāloko. Sabbopi buddhānaṃ pātubhāvā uppanno ālokoti iminā sāvakānaṃ desanāya sañjātadhammālokopi buddhānubhāvoti dasseti.
பஜ்ஜோதஸுத்தவண்ணனா நிட்டி²தா.
Pajjotasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. பஜ்ஜோதஸுத்தங் • 6. Pajjotasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. பஜ்ஜோதஸுத்தவண்ணனா • 6. Pajjotasuttavaṇṇanā
