| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૧૦. પલ્લઙ્કદાયકત્થેરઅપદાનવણ્ણના
10. Pallaṅkadāyakattheraapadānavaṇṇanā
સુમેધસ્સ ભગવતોતિઆદિકં આયસ્મતો પલ્લઙ્કદાયકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો અનેકેસુ ભવેસુ નિબ્બાનાધિગમત્થાય કતપુઞ્ઞૂપચયો સુમેધસ્સ ભગવતો કાલે ગહપતિકુલે નિબ્બત્તો વુદ્ધિમન્વાય મહાભોગસમ્પન્નો સત્થરિ પસીદિત્વા ધમ્મં સુત્વા તસ્સ સત્થુનો સત્તરતનમયં પલ્લઙ્કં કારેત્વા મહન્તં પૂજં અકાસિ. સો તેન પુઞ્ઞેન દેવમનુસ્સેસુ સંસરન્તો સબ્બત્થ પૂજિતો અહોસિ. સો અનુક્કમેન ઇમસ્મિં બુદ્ધુપ્પાદે વિભવસમ્પન્ને એકસ્મિં કુલે નિબ્બત્તો વિઞ્ઞુતં પત્તો ઘરાવાસં સણ્ઠપેત્વા સત્થુ ધમ્મદેસનં સુત્વા પસન્નો પબ્બજિત્વા નચિરસ્સેવ અરહત્તં પત્વા પુબ્બે કતપુઞ્ઞનામેન પલ્લઙ્કદાયકત્થેરોતિ પાકટો અહોસિ. હેટ્ઠા વિય ઉપરિપિ પુબ્બે કતપુઞ્ઞનામેન થેરાનં નામાનિ એવમેવ વેદિતબ્બાનિ.
Sumedhassabhagavatotiādikaṃ āyasmato pallaṅkadāyakattherassa apadānaṃ. Ayampi purimabuddhesu katādhikāro anekesu bhavesu nibbānādhigamatthāya katapuññūpacayo sumedhassa bhagavato kāle gahapatikule nibbatto vuddhimanvāya mahābhogasampanno satthari pasīditvā dhammaṃ sutvā tassa satthuno sattaratanamayaṃ pallaṅkaṃ kāretvā mahantaṃ pūjaṃ akāsi. So tena puññena devamanussesu saṃsaranto sabbattha pūjito ahosi. So anukkamena imasmiṃ buddhuppāde vibhavasampanne ekasmiṃ kule nibbatto viññutaṃ patto gharāvāsaṃ saṇṭhapetvā satthu dhammadesanaṃ sutvā pasanno pabbajitvā nacirasseva arahattaṃ patvā pubbe katapuññanāmena pallaṅkadāyakattheroti pākaṭo ahosi. Heṭṭhā viya uparipi pubbe katapuññanāmena therānaṃ nāmāni evameva veditabbāni.
૪૭. સો એકદિવસં અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો સુમેધસ્સ ભગવતોતિઆદિમાહ. પલ્લઙ્કો હિ મયા દિન્નોતિ પલ્લઙ્કં ઊરુબદ્ધાસનં કત્વા યત્થ ઉપવીસન્તિ નિસીદન્તિ, સો પલ્લઙ્કોતિ વુચ્ચતિ, સો પલ્લઙ્કો સત્તરતનમયો મયા દિન્નો પૂજિતોતિ અત્થો. સઉત્તરસપચ્છદોતિ સહ ઉત્તરચ્છદેન સહ પચ્છદેન સઉત્તરસપચ્છદો, ઉપરિવિતાનં બન્ધિત્વા આસનં ઉત્તમવત્થેહિ અચ્છાદેત્વાતિ અત્થો. સેસં પાકટમેવાતિ.
47. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento sumedhassa bhagavatotiādimāha. Pallaṅko hi mayā dinnoti pallaṅkaṃ ūrubaddhāsanaṃ katvā yattha upavīsanti nisīdanti, so pallaṅkoti vuccati, so pallaṅko sattaratanamayo mayā dinno pūjitoti attho. Sauttarasapacchadoti saha uttaracchadena saha pacchadena sauttarasapacchado, uparivitānaṃ bandhitvā āsanaṃ uttamavatthehi acchādetvāti attho. Sesaṃ pākaṭamevāti.
પલ્લઙ્કદાયકત્થેરઅપદાનવણ્ણના સમત્તા.
Pallaṅkadāyakattheraapadānavaṇṇanā samattā.
પન્નરસમવગ્ગવણ્ણના સમત્તા.
Pannarasamavaggavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૯. વટંસકિયત્થેરઅપદાનં • 9. Vaṭaṃsakiyattheraapadānaṃ
