| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
10. பங்ஸுதோ⁴வகஸுத்தங்
10. Paṃsudhovakasuttaṃ
102. ‘‘ஸந்தி , பி⁴க்க²வே, ஜாதரூபஸ்ஸ ஓளாரிகா உபக்கிலேஸா பங்ஸுவாலுகா 1 ஸக்க²ரகட²லா. தமேனங் பங்ஸுதோ⁴வகோ வா பங்ஸுதோ⁴வகந்தேவாஸீ வா தோ³ணியங் ஆகிரித்வா தோ⁴வதி ஸந்தோ⁴வதி நித்³தோ⁴வதி. தஸ்மிங் பஹீனே தஸ்மிங் ப்³யந்தீகதே ஸந்தி ஜாதரூபஸ்ஸ மஜ்ஜி²மஸஹக³தா உபக்கிலேஸா ஸுகு²மஸக்க²ரா தூ²லவாலுகா 2. தமேனங் பங்ஸுதோ⁴வகோ வா பங்ஸுதோ⁴வகந்தேவாஸீ வா தோ⁴வதி ஸந்தோ⁴வதி நித்³தோ⁴வதி. தஸ்மிங் பஹீனே தஸ்மிங் ப்³யந்தீகதே ஸந்தி ஜாதரூபஸ்ஸ ஸுகு²மஸஹக³தா உபக்கிலேஸா ஸுகு²மவாலுகா காளஜல்லிகா. தமேனங் பங்ஸுதோ⁴வகோ வா பங்ஸுதோ⁴வகந்தேவாஸீ வா தோ⁴வதி ஸந்தோ⁴வதி நித்³தோ⁴வதி. தஸ்மிங் பஹீனே தஸ்மிங் ப்³யந்தீகதே அதா²பரங் ஸுவண்ணஸிகதாவஸிஸ்ஸந்தி 3. தமேனங் ஸுவண்ணகாரோ வா ஸுவண்ணகாரந்தேவாஸீ வா ஜாதரூபங் மூஸாயங் பக்கி²பித்வா த⁴மதி ஸந்த⁴மதி நித்³த⁴மதி . தங் ஹோதி ஜாதரூபங் த⁴ந்தங் ஸந்த⁴ந்தங் 4 நித்³த⁴ந்தங் அனித்³த⁴ந்தகஸாவங் 5, ந சேவ முது³ ஹோதி ந ச கம்மனியங், ந ச பப⁴ஸ்ஸரங் பப⁴ங்கு³ ச, ந ச ஸம்மா உபேதி கம்மாய. ஹோதி ஸோ, பி⁴க்க²வே, ஸமயோ யங் ஸுவண்ணகாரோ வா ஸுவண்ணகாரந்தேவாஸீ வா தங் ஜாதரூபங் த⁴மதி ஸந்த⁴மதி நித்³த⁴மதி. தங் ஹோதி ஜாதரூபங் த⁴ந்தங் ஸந்த⁴ந்தங் நித்³த⁴ந்தங் நித்³த⁴ந்தகஸாவங் 6, முது³ ச ஹோதி கம்மனியஞ்ச பப⁴ஸ்ஸரஞ்ச, ந ச பப⁴ங்கு³, ஸம்மா உபேதி கம்மாய. யஸ்ஸா யஸ்ஸா ச பிலந்த⁴னவிகதியா ஆகங்க²தி – யதி³ பட்டிகாய 7, யதி³ குண்ட³லாய, யதி³ கீ³வெய்யகே 8, யதி³ ஸுவண்ணமாலாய – தஞ்சஸ்ஸ அத்த²ங் அனுபோ⁴தி.
102. ‘‘Santi , bhikkhave, jātarūpassa oḷārikā upakkilesā paṃsuvālukā 9 sakkharakaṭhalā. Tamenaṃ paṃsudhovako vā paṃsudhovakantevāsī vā doṇiyaṃ ākiritvā dhovati sandhovati niddhovati. Tasmiṃ pahīne tasmiṃ byantīkate santi jātarūpassa majjhimasahagatā upakkilesā sukhumasakkharā thūlavālukā 10. Tamenaṃ paṃsudhovako vā paṃsudhovakantevāsī vā dhovati sandhovati niddhovati. Tasmiṃ pahīne tasmiṃ byantīkate santi jātarūpassa sukhumasahagatā upakkilesā sukhumavālukā kāḷajallikā. Tamenaṃ paṃsudhovako vā paṃsudhovakantevāsī vā dhovati sandhovati niddhovati. Tasmiṃ pahīne tasmiṃ byantīkate athāparaṃ suvaṇṇasikatāvasissanti 11. Tamenaṃ suvaṇṇakāro vā suvaṇṇakārantevāsī vā jātarūpaṃ mūsāyaṃ pakkhipitvā dhamati sandhamati niddhamati . Taṃ hoti jātarūpaṃ dhantaṃ sandhantaṃ 12 niddhantaṃ aniddhantakasāvaṃ 13, na ceva mudu hoti na ca kammaniyaṃ, na ca pabhassaraṃ pabhaṅgu ca, na ca sammā upeti kammāya. Hoti so, bhikkhave, samayo yaṃ suvaṇṇakāro vā suvaṇṇakārantevāsī vā taṃ jātarūpaṃ dhamati sandhamati niddhamati. Taṃ hoti jātarūpaṃ dhantaṃ sandhantaṃ niddhantaṃ niddhantakasāvaṃ 14, mudu ca hoti kammaniyañca pabhassarañca, na ca pabhaṅgu, sammā upeti kammāya. Yassā yassā ca pilandhanavikatiyā ākaṅkhati – yadi paṭṭikāya 15, yadi kuṇḍalāya, yadi gīveyyake 16, yadi suvaṇṇamālāya – tañcassa atthaṃ anubhoti.
‘‘ஏவமேவங் கோ², பி⁴க்க²வே, ஸந்தி அதி⁴சித்தமனுயுத்தஸ்ஸ பி⁴க்கு²னோ ஓளாரிகா உபக்கிலேஸா காயது³ச்சரிதங் வசீது³ச்சரிதங் மனோது³ச்சரிதங், தமேனங் ஸசேதஸோ பி⁴க்கு² த³ப்³ப³ஜாதிகோ பஜஹதி வினோதே³தி ப்³யந்தீகரோதி அனபா⁴வங் க³மேதி. தஸ்மிங் பஹீனே தஸ்மிங் ப்³யந்தீகதே ஸந்தி அதி⁴சித்தமனுயுத்தஸ்ஸ பி⁴க்கு²னோ மஜ்ஜி²மஸஹக³தா உபக்கிலேஸா காமவிதக்கோ ப்³யாபாத³விதக்கோ விஹிங்ஸாவிதக்கோ, தமேனங் ஸசேதஸோ பி⁴க்கு² த³ப்³ப³ஜாதிகோ பஜஹதி வினோதே³தி ப்³யந்தீகரோதி அனபா⁴வங் க³மேதி. தஸ்மிங் பஹீனே தஸ்மிங் ப்³யந்தீகதே ஸந்தி அதி⁴சித்தமனுயுத்தஸ்ஸ பி⁴க்கு²னோ ஸுகு²மஸஹக³தா உபக்கிலேஸா ஞாதிவிதக்கோ ஜனபத³விதக்கோ அனவஞ்ஞத்திபடிஸங்யுத்தோ விதக்கோ, தமேனங் ஸசேதஸோ பி⁴க்கு² த³ப்³ப³ஜாதிகோ பஜஹதி வினோதே³தி ப்³யந்தீகரோதி அனபா⁴வங் க³மேதி. தஸ்மிங் பஹீனே தஸ்மிங் ப்³யந்தீகதே அதா²பரங் த⁴ம்மவிதக்காவஸிஸ்ஸதி 17. ஸோ ஹோதி ஸமாதி⁴ ந சேவ ஸந்தோ ந ச பணீதோ நப்படிப்பஸ்ஸத்³த⁴லத்³தோ⁴ ந ஏகோதி³பா⁴வாதி⁴க³தோ ஸஸங்கா²ரனிக்³க³ய்ஹவாரிதக³தோ 18 ஹோதி. ஸோ, பி⁴க்க²வே, ஸமயோ யங் தங் சித்தங் அஜ்ஜ²த்தங்யேவ ஸந்திட்ட²தி ஸன்னிஸீத³தி ஏகோதி³ ஹோதி 19 ஸமாதி⁴யதி. ஸோ ஹோதி ஸமாதி⁴ ஸந்தோ பணீதோ படிப்பஸ்ஸத்³தி⁴லத்³தோ⁴ ஏகோதி³பா⁴வாதி⁴க³தோ ந ஸஸங்கா²ரனிக்³க³ய்ஹவாரிதக³தோ. யஸ்ஸ யஸ்ஸ ச அபி⁴ஞ்ஞா ஸச்சி²கரணீயஸ்ஸ த⁴ம்மஸ்ஸ சித்தங் அபி⁴னின்னாமேதி அபி⁴ஞ்ஞா ஸச்சி²கிரியாய தத்ர தத்ரேவ ஸக்கி²ப⁴ப்³ப³தங் பாபுணாதி ஸதி ஸதிஆயதனே.
‘‘Evamevaṃ kho, bhikkhave, santi adhicittamanuyuttassa bhikkhuno oḷārikā upakkilesā kāyaduccaritaṃ vacīduccaritaṃ manoduccaritaṃ, tamenaṃ sacetaso bhikkhu dabbajātiko pajahati vinodeti byantīkaroti anabhāvaṃ gameti. Tasmiṃ pahīne tasmiṃ byantīkate santi adhicittamanuyuttassa bhikkhuno majjhimasahagatā upakkilesā kāmavitakko byāpādavitakko vihiṃsāvitakko, tamenaṃ sacetaso bhikkhu dabbajātiko pajahati vinodeti byantīkaroti anabhāvaṃ gameti. Tasmiṃ pahīne tasmiṃ byantīkate santi adhicittamanuyuttassa bhikkhuno sukhumasahagatā upakkilesā ñātivitakko janapadavitakko anavaññattipaṭisaṃyutto vitakko, tamenaṃ sacetaso bhikkhu dabbajātiko pajahati vinodeti byantīkaroti anabhāvaṃ gameti. Tasmiṃ pahīne tasmiṃ byantīkate athāparaṃ dhammavitakkāvasissati 20. So hoti samādhi na ceva santo na ca paṇīto nappaṭippassaddhaladdho na ekodibhāvādhigato sasaṅkhāraniggayhavāritagato 21 hoti. So, bhikkhave, samayo yaṃ taṃ cittaṃ ajjhattaṃyeva santiṭṭhati sannisīdati ekodi hoti 22 samādhiyati. So hoti samādhi santo paṇīto paṭippassaddhiladdho ekodibhāvādhigato na sasaṅkhāraniggayhavāritagato. Yassa yassa ca abhiññā sacchikaraṇīyassa dhammassa cittaṃ abhininnāmeti abhiññā sacchikiriyāya tatra tatreva sakkhibhabbataṃ pāpuṇāti sati satiāyatane.
‘‘ஸோ ஸசே ஆகங்க²தி – ‘அனேகவிஹிதங் இத்³தி⁴வித⁴ங் பச்சனுப⁴வெய்யங் – ஏகோபி ஹுத்வா ப³ஹுதா⁴ அஸ்ஸங், ப³ஹுதா⁴பி ஹுத்வா ஏகோ அஸ்ஸங்; ஆவிபா⁴வங், திரோபா⁴வங்; திரோகுட்டங் திரோபாகாரங் திரோபப்³ப³தங் அஸஜ்ஜமானோ க³ச்செ²ய்யங், ஸெய்யதா²பி ஆகாஸே; பத²வியாபி உம்முஜ்ஜனிமுஜ்ஜங் கரெய்யங், ஸெய்யதா²பி உத³கே; உத³கேபி அபி⁴ஜ்ஜமானே 23 க³ச்செ²ய்யங், ஸெய்யதா²பி பத²வியங்; ஆகாஸேபி பல்லங்கேன கமெய்யங் , ஸெய்யதா²பி பக்கீ² ஸகுணோ; இமேபி சந்தி³மஸூரியே ஏவங்மஹித்³தி⁴கே ஏவங்மஹானுபா⁴வே பாணினா பரிமஸெய்யங் பரிமஜ்ஜெய்யங்; யாவ ப்³ரஹ்மலோகாபி காயேன வஸங் வத்தெய்ய’ந்தி, தத்ர தத்ரேவ ஸக்கி²ப⁴ப்³ப³தங் பாபுணாதி ஸதி ஸதிஆயதனே.
‘‘So sace ākaṅkhati – ‘anekavihitaṃ iddhividhaṃ paccanubhaveyyaṃ – ekopi hutvā bahudhā assaṃ, bahudhāpi hutvā eko assaṃ; āvibhāvaṃ, tirobhāvaṃ; tirokuṭṭaṃ tiropākāraṃ tiropabbataṃ asajjamāno gaccheyyaṃ, seyyathāpi ākāse; pathaviyāpi ummujjanimujjaṃ kareyyaṃ, seyyathāpi udake; udakepi abhijjamāne 24 gaccheyyaṃ, seyyathāpi pathaviyaṃ; ākāsepi pallaṅkena kameyyaṃ , seyyathāpi pakkhī sakuṇo; imepi candimasūriye evaṃmahiddhike evaṃmahānubhāve pāṇinā parimaseyyaṃ parimajjeyyaṃ; yāva brahmalokāpi kāyena vasaṃ vatteyya’nti, tatra tatreva sakkhibhabbataṃ pāpuṇāti sati satiāyatane.
‘‘ஸோ ஸசே ஆகங்க²தி – ‘தி³ப்³பா³ய ஸோததா⁴துயா விஸுத்³தா⁴ய அதிக்கந்தமானுஸிகாய உபோ⁴ ஸத்³தே³ ஸுணெய்யங் தி³ப்³பே³ ச மானுஸே ச யே தூ³ரே ஸந்திகே சா’தி, தத்ர தத்ரேவ ஸக்கி²ப⁴ப்³ப³தங் பாபுணாதி ஸதி ஸதிஆயதனே.
‘‘So sace ākaṅkhati – ‘dibbāya sotadhātuyā visuddhāya atikkantamānusikāya ubho sadde suṇeyyaṃ dibbe ca mānuse ca ye dūre santike cā’ti, tatra tatreva sakkhibhabbataṃ pāpuṇāti sati satiāyatane.
‘‘ஸோ ஸசே ஆகங்க²தி – ‘பரஸத்தானங் பரபுக்³க³லானங் சேதஸா சேதோ பரிச்ச பஜானெய்யங் – ஸராக³ங் வா சித்தங் ஸராக³ங் சித்தந்தி பஜானெய்யங், வீதராக³ங் வா சித்தங் வீதராக³ங் சித்தந்தி பஜானெய்யங்; ஸதோ³ஸங் வா சித்தங் ஸதோ³ஸங் சித்தந்தி பஜானெய்யங், வீததோ³ஸங் வா சித்தங் வீததோ³ஸங் சித்தந்தி பஜானெய்யங்; ஸமோஹங் வா சித்தங் ஸமோஹங் சித்தந்தி பஜானெய்யங், வீதமோஹங் வா சித்தங் வீதமோஹங் சித்தந்தி பஜானெய்யங்; ஸங்கி²த்தங் வா சித்தங் ஸங்கி²த்தங் சித்தந்தி பஜானெய்யங், விக்கி²த்தங் வா சித்தங் விக்கி²த்தங் சித்தந்தி பஜானெய்யங்; மஹக்³க³தங் வா சித்தங் மஹக்³க³தங் சித்தந்தி பஜானெய்யங், அமஹக்³க³தங் வா சித்தங் அமஹக்³க³தங் சித்தந்தி பஜானெய்யங்; ஸஉத்தரங் வா சித்தங் ஸஉத்தரங் சித்தந்தி பஜானெய்யங், அனுத்தரங் வா சித்தங் அனுத்தரங் சித்தந்தி பஜானெய்யங்; ஸமாஹிதங் வா சித்தங் ஸமாஹிதங் சித்தந்தி பஜானெய்யங், அஸமாஹிதங் வா சித்தங் அஸமாஹிதங் சித்தந்தி பஜானெய்யங்; விமுத்தங் வா சித்தங் விமுத்தங் சித்தந்தி பஜானெய்யங், அவிமுத்தங் வா சித்தங் அவிமுத்தங் சித்தந்தி பஜானெய்ய’ந்தி, தத்ர தத்ரேவ ஸக்கி²ப⁴ப்³ப³தங் பாபுணாதி ஸதி ஸதிஆயதனே.
‘‘So sace ākaṅkhati – ‘parasattānaṃ parapuggalānaṃ cetasā ceto paricca pajāneyyaṃ – sarāgaṃ vā cittaṃ sarāgaṃ cittanti pajāneyyaṃ, vītarāgaṃ vā cittaṃ vītarāgaṃ cittanti pajāneyyaṃ; sadosaṃ vā cittaṃ sadosaṃ cittanti pajāneyyaṃ, vītadosaṃ vā cittaṃ vītadosaṃ cittanti pajāneyyaṃ; samohaṃ vā cittaṃ samohaṃ cittanti pajāneyyaṃ, vītamohaṃ vā cittaṃ vītamohaṃ cittanti pajāneyyaṃ; saṃkhittaṃ vā cittaṃ saṃkhittaṃ cittanti pajāneyyaṃ, vikkhittaṃ vā cittaṃ vikkhittaṃ cittanti pajāneyyaṃ; mahaggataṃ vā cittaṃ mahaggataṃ cittanti pajāneyyaṃ, amahaggataṃ vā cittaṃ amahaggataṃ cittanti pajāneyyaṃ; sauttaraṃ vā cittaṃ sauttaraṃ cittanti pajāneyyaṃ, anuttaraṃ vā cittaṃ anuttaraṃ cittanti pajāneyyaṃ; samāhitaṃ vā cittaṃ samāhitaṃ cittanti pajāneyyaṃ, asamāhitaṃ vā cittaṃ asamāhitaṃ cittanti pajāneyyaṃ; vimuttaṃ vā cittaṃ vimuttaṃ cittanti pajāneyyaṃ, avimuttaṃ vā cittaṃ avimuttaṃ cittanti pajāneyya’nti, tatra tatreva sakkhibhabbataṃ pāpuṇāti sati satiāyatane.
‘‘ஸோ ஸசே ஆகங்க²தி – ‘அனேகவிஹிதங் புப்³பே³னிவாஸங் அனுஸ்ஸரெய்யங், ஸெய்யதி²த³ங் – ஏகம்பி ஜாதிங் த்³வேபி ஜாதியோ திஸ்ஸோபி ஜாதியோ சதஸ்ஸோபி ஜாதியோ பஞ்சபி ஜாதியோ த³ஸபி ஜாதியோ வீஸம்பி ஜாதியோ திங்ஸம்பி ஜாதியோ சத்தாலீஸம்பி ஜாதியோ பஞ்ஞாஸம்பி ஜாதியோ ஜாதிஸதம்பி ஜாதிஸஹஸ்ஸம்பி ஜாதிஸதஸஹஸ்ஸம்பி அனேகேபி ஸங்வட்டகப்பே அனேகேபி விவட்டகப்பே அனேகேபி ஸங்வட்டவிவட்டகப்பே – அமுத்ராஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ அமுத்ர உத³பாதி³ங்; தத்ராபாஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ இதூ⁴பபன்னோதி, இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரெய்ய’ந்தி, தத்ர தத்ரேவ ஸக்கி²ப⁴ப்³ப³தங் பாபுணாதி ஸதி ஸதிஆயதனே.
‘‘So sace ākaṅkhati – ‘anekavihitaṃ pubbenivāsaṃ anussareyyaṃ, seyyathidaṃ – ekampi jātiṃ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṃsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṃvaṭṭakappe anekepi vivaṭṭakappe anekepi saṃvaṭṭavivaṭṭakappe – amutrāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto amutra udapādiṃ; tatrāpāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto idhūpapannoti, iti sākāraṃ sauddesaṃ anekavihitaṃ pubbenivāsaṃ anussareyya’nti, tatra tatreva sakkhibhabbataṃ pāpuṇāti sati satiāyatane.
‘‘ஸோ ஸசே ஆகங்க²தி – ‘தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸெய்யங் சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே, ஸுக³தே து³க்³க³தே யதா²கம்மூபகே³ ஸத்தே பஜானெய்யங் – இமே வத பொ⁴ந்தோ ஸத்தா காயது³ச்சரிதேன ஸமன்னாக³தா வசீது³ச்சரிதேன ஸமன்னாக³தா மனோது³ச்சரிதேன ஸமன்னாக³தா அரியானங் உபவாத³கா மிச்சா²தி³ட்டி²கா மிச்சா²தி³ட்டி²கம்மஸமாதா³னா , தே காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபன்னா; இமே வா பன பொ⁴ந்தோ ஸத்தா காயஸுசரிதேன ஸமன்னாக³தா வசீஸுசரிதேன ஸமன்னாக³தா மனோஸுசரிதேன ஸமன்னாக³தா அரியானங் அனுபவாத³கா ஸம்மாதி³ட்டி²கா ஸம்மாதி³ட்டி²கம்மஸமாதா³னா, தே காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபன்னாதி, இதி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸெய்யங் சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே, ஸுக³தே து³க்³க³தே யதா²கம்மூபகே³ ஸத்தே பஜானெய்ய’ந்தி, தத்ர தத்ரேவ ஸக்கி²ப⁴ப்³ப³தங் பாபுணாதி ஸதி ஸதிஆயதனே.
‘‘So sace ākaṅkhati – ‘dibbena cakkhunā visuddhena atikkantamānusakena satte passeyyaṃ cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajāneyyaṃ – ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṃ upavādakā micchādiṭṭhikā micchādiṭṭhikammasamādānā , te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā; ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṃ anupavādakā sammādiṭṭhikā sammādiṭṭhikammasamādānā, te kāyassa bhedā paraṃ maraṇā sugatiṃ saggaṃ lokaṃ upapannāti, iti dibbena cakkhunā visuddhena atikkantamānusakena satte passeyyaṃ cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajāneyya’nti, tatra tatreva sakkhibhabbataṃ pāpuṇāti sati satiāyatane.
‘‘ஸோ ஸசே ஆகங்க²தி – ‘ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்ய’ந்தி, தத்ர தத்ரேவ ஸக்கி²ப⁴ப்³ப³தங் பாபுணாதி ஸதி ஸதிஆயதனே’’தி. த³ஸமங்.
‘‘So sace ākaṅkhati – ‘āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja vihareyya’nti, tatra tatreva sakkhibhabbataṃ pāpuṇāti sati satiāyatane’’ti. Dasamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. பங்ஸுதோ⁴வகஸுத்தவண்ணனா • 10. Paṃsudhovakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. பங்ஸுதோ⁴வகஸுத்தவண்ணனா • 10. Paṃsudhovakasuttavaṇṇanā
