| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૭. પઞ્ચદીપકત્થેરઅપદાનવણ્ણના
7. Pañcadīpakattheraapadānavaṇṇanā
પદુમુત્તરબુદ્ધસ્સાતિઆદિકં આયસ્મતો પઞ્ચદીપકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો ઉપ્પન્નુપ્પન્નભવેસુ વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે કુલગેહે નિબ્બત્તો વુદ્ધિમન્વાય ઘરાવાસે વસન્તો ભગવતો ધમ્મં સુત્વા સમ્માદિટ્ઠિયં પતિટ્ઠિતો સદ્ધો પસન્નો મહાજનેહિ બોધિપૂજં કયિરમાનં દિસ્વા સયમ્પિ બોધિં પરિવારેત્વા દીપં જાલેત્વા પૂજેસિ. સો તેન પુઞ્ઞકમ્મેન દેવમનુસ્સેસુ સંસરન્તો ચક્કવત્તિસમ્પત્તિઆદયો અનુભવિત્વા સબ્બત્થેવ ઉપ્પન્નભવે જલમાનો જોતિસમ્પન્નવિમાનાદીસુ વસિત્વા ઇમસ્મિં બુદ્ધુપ્પાદે એકસ્મિં વિભવસમ્પન્ને કુલગેહે નિબ્બત્તો વુદ્ધિપ્પત્તો સદ્ધાજાતો પબ્બજિત્વા નચિરસ્સેવ અરહા અહોસિ, દીપપૂજાનિસ્સન્દેન દીપકત્થેરોતિ પાકટો.
Padumuttarabuddhassātiādikaṃ āyasmato pañcadīpakattherassa apadānaṃ. Ayampi purimabuddhesu katādhikāro uppannuppannabhavesu vivaṭṭūpanissayāni puññāni upacinanto padumuttarassa bhagavato kāle kulagehe nibbatto vuddhimanvāya gharāvāse vasanto bhagavato dhammaṃ sutvā sammādiṭṭhiyaṃ patiṭṭhito saddho pasanno mahājanehi bodhipūjaṃ kayiramānaṃ disvā sayampi bodhiṃ parivāretvā dīpaṃ jāletvā pūjesi. So tena puññakammena devamanussesu saṃsaranto cakkavattisampattiādayo anubhavitvā sabbattheva uppannabhave jalamāno jotisampannavimānādīsu vasitvā imasmiṃ buddhuppāde ekasmiṃ vibhavasampanne kulagehe nibbatto vuddhippatto saddhājāto pabbajitvā nacirasseva arahā ahosi, dīpapūjānissandena dīpakattheroti pākaṭo.
૫૦. સો એકદિવસં અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પદુમુત્તરબુદ્ધસ્સાતિઆદિમાહ. તં વુત્તત્થમેવ. ઉજુદિટ્ઠિ અહોસહન્તિ વઙ્કં મિચ્છાદિટ્ઠિં છડ્ડેત્વા ઉજુ અવઙ્કં નિબ્બાનાભિમુખં પાપુણનસમ્માદિટ્ઠિ અહોસિન્તિ અત્થો.
50. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Taṃ vuttatthameva. Ujudiṭṭhi ahosahanti vaṅkaṃ micchādiṭṭhiṃ chaḍḍetvā uju avaṅkaṃ nibbānābhimukhaṃ pāpuṇanasammādiṭṭhi ahosinti attho.
૫૧. પદીપદાનં પાદાસિન્તિ એત્થ પકારેન દિબ્બતિ જોતતીતિ પદીપો, તસ્સ દાનં પદીપદાનં, તં અદાસિં પદીપપૂજં અકાસિન્તિ અત્થો. સેસં સબ્બત્થ ઉત્તાનત્થમેવાતિ.
51.Padīpadānaṃ pādāsinti ettha pakārena dibbati jotatīti padīpo, tassa dānaṃ padīpadānaṃ, taṃ adāsiṃ padīpapūjaṃ akāsinti attho. Sesaṃ sabbattha uttānatthamevāti.
પઞ્ચદીપકત્થેરઅપદાનવણ્ણના સમત્તા.
Pañcadīpakattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૭. પઞ્ચદીપકત્થેરઅપદાનં • 7. Pañcadīpakattheraapadānaṃ
