| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૫. પઞ્ચહત્થિયત્થેરઅપદાનવણ્ણના
5. Pañcahatthiyattheraapadānavaṇṇanā
સુમેધો નામ સમ્બુદ્ધોતિઆદિકં આયસ્મતો પઞ્ચહત્થિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સુમેધસ્સ ભગવતો કાલે એકસ્મિં કુલગેહે નિબ્બત્તો વિઞ્ઞુતં પત્વા રતનત્તયે પસન્નો વિહાસિ. તસ્મિં સમયે પઞ્ચઉપ્પલહત્થાનિ આનેસું. સો તેહિ પઞ્ચઉપ્પલહત્થેહિ વીથિયં ચરમાનં સુમેધં ભગવન્તં પૂજેસિ. તાનિ ગન્ત્વા આકાસે વિતાનં હુત્વા છાયં કુરુમાનાનિ તથાગતેનેવ સદ્ધિં ગચ્છિંસુ. સો તં દિસ્વા સોમનસ્સજાતો પીતિયા ફુટ્ઠસરીરો યાવજીવં તદેવ પુઞ્ઞં અનુસ્સરિત્વા તતો ચુતો દેવલોકે નિબ્બત્તો અપરાપરં સંસરન્તો ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વિઞ્ઞુતં પત્તો સદ્ધાજાતો પબ્બજિત્વા વિપસ્સનં વડ્ઢેત્વા નચિરસ્સેવ અરહા અહોસિ. કતકુસલનામેન પઞ્ચહત્થિયત્થેરોતિ પાકટો.
Sumedhonāma sambuddhotiādikaṃ āyasmato pañcahatthiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sumedhassa bhagavato kāle ekasmiṃ kulagehe nibbatto viññutaṃ patvā ratanattaye pasanno vihāsi. Tasmiṃ samaye pañcauppalahatthāni ānesuṃ. So tehi pañcauppalahatthehi vīthiyaṃ caramānaṃ sumedhaṃ bhagavantaṃ pūjesi. Tāni gantvā ākāse vitānaṃ hutvā chāyaṃ kurumānāni tathāgateneva saddhiṃ gacchiṃsu. So taṃ disvā somanassajāto pītiyā phuṭṭhasarīro yāvajīvaṃ tadeva puññaṃ anussaritvā tato cuto devaloke nibbatto aparāparaṃ saṃsaranto imasmiṃ buddhuppāde ekasmiṃ kulagehe nibbatto viññutaṃ patto saddhājāto pabbajitvā vipassanaṃ vaḍḍhetvā nacirasseva arahā ahosi. Katakusalanāmena pañcahatthiyattheroti pākaṭo.
૭૭. સો અત્તનો પુબ્બકમ્મં સરિત્વા પચ્ચક્ખતો પઞ્ઞાય દિટ્ઠપુબ્બચરિતાપદાનં પકાસેન્તો સુમેધો નામ સમ્બુદ્ધોતિઆદિમાહ. તત્થ સુમેધોતિ સુન્દરા મેધા ચતુસચ્ચપટિવેધપટિસમ્ભિદાદયો પઞ્ઞા યસ્સ સો ભગવા સુમેધો સમ્બુદ્ધો અન્તરાપણે અન્તરવીથિયં ગચ્છતીતિ સમ્બન્ધો. ઓક્ખિત્તચક્ખૂતિ અધોખિત્તચક્ખુ. મિતભાણીતિ પમાણં ઞત્વા ભણનસીલો, પમાણં જાનિત્વા ધમ્મં દેસેસીતિ અત્થો. સેસં સુવિઞ્ઞેય્યમેવાતિ.
77. So attano pubbakammaṃ saritvā paccakkhato paññāya diṭṭhapubbacaritāpadānaṃ pakāsento sumedho nāma sambuddhotiādimāha. Tattha sumedhoti sundarā medhā catusaccapaṭivedhapaṭisambhidādayo paññā yassa so bhagavā sumedho sambuddho antarāpaṇe antaravīthiyaṃ gacchatīti sambandho. Okkhittacakkhūti adhokhittacakkhu. Mitabhāṇīti pamāṇaṃ ñatvā bhaṇanasīlo, pamāṇaṃ jānitvā dhammaṃ desesīti attho. Sesaṃ suviññeyyamevāti.
પઞ્ચહત્થિયત્થેરઅપદાનવણ્ણના સમત્તા.
Pañcahatthiyattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૫. પઞ્ચહત્થિયત્થેરઅપદાનં • 5. Pañcahatthiyattheraapadānaṃ
