| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
9-10. பஞ்சகங்க³ஸுத்தாதி³வண்ணனா
9-10. Pañcakaṅgasuttādivaṇṇanā
267-268. த³ண்ட³முக்³க³ரங் அக்³க³ஸொண்ட³முக்³க³ரங். காளஸுத்தபக்கி²பனங் காளஸுத்தனாளி. வாஸிஆதீ³னி பஞ்ச அங்கா³னி அஸ்ஸாதி பஞ்சகங்கோ³. வத்து²விஜ்ஜாய வுத்தவிதி⁴னா கத்தப்³ப³னிஸ்ஸயானி ட²பேதீதி த²பதி. பண்டி³தஉதா³யித்தே²ரோ, ந லாளுதா³யித்தே²ரோ. த்³வேபானந்தா³தி அட்ட²கதா²ய பது³த்³தா⁴ரோ கதோ – ‘‘த்³வேபி மயா ஆனந்தா³’’தி பன பாளியங். பஸாத³காயஸன்னிஸ்ஸிதா காயிகா, சேதோஸன்னிஸ்ஸிதா சேதஸிகா. ஆதி⁴பச்சட்டே²ன ஸுக²மேவ இந்த்³ரியந்தி ஸுகி²ந்த்³ரியங். உபவிசாரவஸேனாதி ரூபாதீ³னி உபேச்ச விசரணவஸேன. அதீதே ஆரம்மணே. பச்சுப்பன்னேதி அத்³தா⁴பச்சுப்பன்னே. ஏவங் அட்டா²தி⁴கங் ஸதங் அட்ட²ஸதங்.
267-268.Daṇḍamuggaraṃ aggasoṇḍamuggaraṃ. Kāḷasuttapakkhipanaṃ kāḷasuttanāḷi. Vāsiādīni pañca aṅgāni assāti pañcakaṅgo. Vatthuvijjāya vuttavidhinā kattabbanissayāni ṭhapetīti thapati. Paṇḍitaudāyitthero, na lāḷudāyitthero. Dvepānandāti aṭṭhakathāya paduddhāro kato – ‘‘dvepi mayā ānandā’’ti pana pāḷiyaṃ. Pasādakāyasannissitā kāyikā, cetosannissitā cetasikā. Ādhipaccaṭṭhena sukhameva indriyanti sukhindriyaṃ. Upavicāravasenāti rūpādīni upecca vicaraṇavasena. Atīte ārammaṇe. Paccuppanneti addhāpaccuppanne. Evaṃ aṭṭhādhikaṃ sataṃ aṭṭhasataṃ.
பாடியேக்கோ அனுஸந்தீ⁴தி புச்சா²னுஸந்தி⁴ஆதீ³ஹி விஸுங் தேஹி அஸம்மிஸ்ஸோ ஏகோ அனுஸந்தி⁴. ஏகாபி வேத³னா கதி²தா ‘‘தத்ர, பி⁴க்க²வே, ஸுதவா அரியஸாவகோ’’தி ஆஹரித்வா ‘‘ப²ஸ்ஸபச்சயா வேத³னா’’தி. யஸ்மா ப⁴க³வா சதுத்த²ஜ்ஜா²னுபெக்கா²வேத³னங் வத்வா – ‘‘அத்தா²னந்த³, ஏதஸ்மா ஸுகா² அஞ்ஞங் ஸுக²’’ந்திஆதி³ங் வத³ந்தோ த²பதினோ வாத³ங் உபத்த²ம்பே⁴தி நாம. தேன ஹி உபெக்கா²வேத³னா ‘‘ஸுக²’’ந்தேவ வுத்தா ஸந்தஸபா⁴வத்தா. அபி⁴க்கந்ததரந்தி அதிவிய கந்ததரங் மனோரமதரங். தேனாஹ ‘‘ஸுந்த³ரதர’’ந்தி. பணீததரந்தி பதா⁴னபா⁴வங் நீததாய உளாரதரங். தேனாஹ ‘‘அதப்பகதர’’ந்தி. ஸுக²ந்தி வுத்தா படிபக்க²ஸ்ஸ ஸுட்டு² கா²த³னேன, ஸுகரங் ஓகாஸதா³னமஸ்ஸாதி வா. நிரோதோ⁴ ஸுக²ங் நாம ஸப்³ப³ஸோ உத³யப்³ப³யாபா⁴வதோ. தேனாஹ ‘‘நித்³து³க்க²பா⁴வஸங்கா²தேன ஸுக²ட்டே²னா’’தி.
Pāṭiyekko anusandhīti pucchānusandhiādīhi visuṃ tehi asammisso eko anusandhi. Ekāpi vedanā kathitā ‘‘tatra, bhikkhave, sutavā ariyasāvako’’ti āharitvā ‘‘phassapaccayā vedanā’’ti. Yasmā bhagavā catutthajjhānupekkhāvedanaṃ vatvā – ‘‘atthānanda, etasmā sukhā aññaṃ sukha’’ntiādiṃ vadanto thapatino vādaṃ upatthambheti nāma. Tena hi upekkhāvedanā ‘‘sukha’’nteva vuttā santasabhāvattā. Abhikkantataranti ativiya kantataraṃ manoramataraṃ. Tenāha ‘‘sundaratara’’nti. Paṇītataranti padhānabhāvaṃ nītatāya uḷārataraṃ. Tenāha ‘‘atappakatara’’nti. Sukhanti vuttā paṭipakkhassa suṭṭhu khādanena, sukaraṃ okāsadānamassāti vā. Nirodho sukhaṃ nāma sabbaso udayabbayābhāvato. Tenāha ‘‘niddukkhabhāvasaṅkhātena sukhaṭṭhenā’’ti.
ஸுக²ஸ்மிங்யேவாதி ஸுக²மிச்சேவ பஞ்ஞபேதி. நிரோத⁴ஸமாபத்திங் ஸீஸங் கத்வாதி நிரோத⁴ஸமாபத்திதே³ஸனாய ஸீஸங் உத்தமங் கத்வா. தே³ஸனாய உத்³தே³ஸாதி⁴முத்தே உட்டா²பெத்வா வித்தா²ரிதத்தா ‘‘நெய்யபுக்³க³லஸ்ஸ வஸேனா’’தி வுத்தங். த³ஸமங் அனந்தரஸுத்தே வுத்தனயத்தா உத்தானத்த²மேவ.
Sukhasmiṃyevāti sukhamicceva paññapeti. Nirodhasamāpattiṃ sīsaṃ katvāti nirodhasamāpattidesanāya sīsaṃ uttamaṃ katvā. Desanāya uddesādhimutte uṭṭhāpetvā vitthāritattā ‘‘neyyapuggalassa vasenā’’ti vuttaṃ. Dasamaṃ anantarasutte vuttanayattā uttānatthameva.
பஞ்சகங்க³ஸுத்தாதி³வண்ணனா நிட்டி²தா.
Pañcakaṅgasuttādivaṇṇanā niṭṭhitā.
ரஹோக³தவக்³க³வண்ணனா நிட்டி²தா.
Rahogatavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
9. பஞ்சகங்க³ஸுத்தங் • 9. Pañcakaṅgasuttaṃ
10. பி⁴க்கு²ஸுத்தங் • 10. Bhikkhusuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9-10. பஞ்சகங்க³ஸுத்தாதி³வண்ணனா • 9-10. Pañcakaṅgasuttādivaṇṇanā
