| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૯-૧૦. પઞ્ચકઙ્ગસુત્તાદિવણ્ણના
9-10. Pañcakaṅgasuttādivaṇṇanā
૨૬૭-૨૬૮. દણ્ડમુગ્ગરં અગ્ગસોણ્ડમુગ્ગરં. કાળસુત્તપક્ખિપનં કાળસુત્તનાળિ. વાસિઆદીનિ પઞ્ચ અઙ્ગાનિ અસ્સાતિ પઞ્ચકઙ્ગો. વત્થુવિજ્જાય વુત્તવિધિના કત્તબ્બનિસ્સયાનિ ઠપેતીતિ થપતિ. પણ્ડિતઉદાયિત્થેરો, ન લાળુદાયિત્થેરો. દ્વેપાનન્દાતિ અટ્ઠકથાય પદુદ્ધારો કતો – ‘‘દ્વેપિ મયા આનન્દા’’તિ પન પાળિયં. પસાદકાયસન્નિસ્સિતા કાયિકા, ચેતોસન્નિસ્સિતા ચેતસિકા. આધિપચ્ચટ્ઠેન સુખમેવ ઇન્દ્રિયન્તિ સુખિન્દ્રિયં. ઉપવિચારવસેનાતિ રૂપાદીનિ ઉપેચ્ચ વિચરણવસેન. અતીતે આરમ્મણે. પચ્ચુપ્પન્નેતિ અદ્ધાપચ્ચુપ્પન્ને. એવં અટ્ઠાધિકં સતં અટ્ઠસતં.
267-268.Daṇḍamuggaraṃ aggasoṇḍamuggaraṃ. Kāḷasuttapakkhipanaṃ kāḷasuttanāḷi. Vāsiādīni pañca aṅgāni assāti pañcakaṅgo. Vatthuvijjāya vuttavidhinā kattabbanissayāni ṭhapetīti thapati. Paṇḍitaudāyitthero, na lāḷudāyitthero. Dvepānandāti aṭṭhakathāya paduddhāro kato – ‘‘dvepi mayā ānandā’’ti pana pāḷiyaṃ. Pasādakāyasannissitā kāyikā, cetosannissitā cetasikā. Ādhipaccaṭṭhena sukhameva indriyanti sukhindriyaṃ. Upavicāravasenāti rūpādīni upecca vicaraṇavasena. Atīte ārammaṇe. Paccuppanneti addhāpaccuppanne. Evaṃ aṭṭhādhikaṃ sataṃ aṭṭhasataṃ.
પાટિયેક્કો અનુસન્ધીતિ પુચ્છાનુસન્ધિઆદીહિ વિસું તેહિ અસમ્મિસ્સો એકો અનુસન્ધિ. એકાપિ વેદના કથિતા ‘‘તત્ર, ભિક્ખવે, સુતવા અરિયસાવકો’’તિ આહરિત્વા ‘‘ફસ્સપચ્ચયા વેદના’’તિ. યસ્મા ભગવા ચતુત્થજ્ઝાનુપેક્ખાવેદનં વત્વા – ‘‘અત્થાનન્દ, એતસ્મા સુખા અઞ્ઞં સુખ’’ન્તિઆદિં વદન્તો થપતિનો વાદં ઉપત્થમ્ભેતિ નામ. તેન હિ ઉપેક્ખાવેદના ‘‘સુખ’’ન્તેવ વુત્તા સન્તસભાવત્તા. અભિક્કન્તતરન્તિ અતિવિય કન્તતરં મનોરમતરં. તેનાહ ‘‘સુન્દરતર’’ન્તિ. પણીતતરન્તિ પધાનભાવં નીતતાય ઉળારતરં. તેનાહ ‘‘અતપ્પકતર’’ન્તિ. સુખન્તિ વુત્તા પટિપક્ખસ્સ સુટ્ઠુ ખાદનેન, સુકરં ઓકાસદાનમસ્સાતિ વા. નિરોધો સુખં નામ સબ્બસો ઉદયબ્બયાભાવતો. તેનાહ ‘‘નિદ્દુક્ખભાવસઙ્ખાતેન સુખટ્ઠેના’’તિ.
Pāṭiyekko anusandhīti pucchānusandhiādīhi visuṃ tehi asammisso eko anusandhi. Ekāpi vedanā kathitā ‘‘tatra, bhikkhave, sutavā ariyasāvako’’ti āharitvā ‘‘phassapaccayā vedanā’’ti. Yasmā bhagavā catutthajjhānupekkhāvedanaṃ vatvā – ‘‘atthānanda, etasmā sukhā aññaṃ sukha’’ntiādiṃ vadanto thapatino vādaṃ upatthambheti nāma. Tena hi upekkhāvedanā ‘‘sukha’’nteva vuttā santasabhāvattā. Abhikkantataranti ativiya kantataraṃ manoramataraṃ. Tenāha ‘‘sundaratara’’nti. Paṇītataranti padhānabhāvaṃ nītatāya uḷārataraṃ. Tenāha ‘‘atappakatara’’nti. Sukhanti vuttā paṭipakkhassa suṭṭhu khādanena, sukaraṃ okāsadānamassāti vā. Nirodho sukhaṃ nāma sabbaso udayabbayābhāvato. Tenāha ‘‘niddukkhabhāvasaṅkhātena sukhaṭṭhenā’’ti.
સુખસ્મિંયેવાતિ સુખમિચ્ચેવ પઞ્ઞપેતિ. નિરોધસમાપત્તિં સીસં કત્વાતિ નિરોધસમાપત્તિદેસનાય સીસં ઉત્તમં કત્વા. દેસનાય ઉદ્દેસાધિમુત્તે ઉટ્ઠાપેત્વા વિત્થારિતત્તા ‘‘નેય્યપુગ્ગલસ્સ વસેના’’તિ વુત્તં. દસમં અનન્તરસુત્તે વુત્તનયત્તા ઉત્તાનત્થમેવ.
Sukhasmiṃyevāti sukhamicceva paññapeti. Nirodhasamāpattiṃ sīsaṃ katvāti nirodhasamāpattidesanāya sīsaṃ uttamaṃ katvā. Desanāya uddesādhimutte uṭṭhāpetvā vitthāritattā ‘‘neyyapuggalassa vasenā’’ti vuttaṃ. Dasamaṃ anantarasutte vuttanayattā uttānatthameva.
પઞ્ચકઙ્ગસુત્તાદિવણ્ણના નિટ્ઠિતા.
Pañcakaṅgasuttādivaṇṇanā niṭṭhitā.
રહોગતવગ્ગવણ્ણના નિટ્ઠિતા.
Rahogatavaggavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya
૯. પઞ્ચકઙ્ગસુત્તં • 9. Pañcakaṅgasuttaṃ
૧૦. ભિક્ખુસુત્તં • 10. Bhikkhusuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૯-૧૦. પઞ્ચકઙ્ગસુત્તાદિવણ્ણના • 9-10. Pañcakaṅgasuttādivaṇṇanā
