| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
7. பஞ்சாலசண்ட³ஸுத்தவண்ணனா
7. Pañcālacaṇḍasuttavaṇṇanā
88. ஸம்பா³தே⁴தி ஸம்பீளிததண்ஹாகிலேஸாதி³னா ஸஉப்பீளதாய பரமஸம்பா³தே⁴. அதிவிய ஸங்காரட்டா²னபூ⁴தோ ஹி நீவரணஸம்பா³தோ⁴ அதி⁴ப்பேதோ. ஸோ ஹி து³க்³க³ஹனோ தஸ்மிங் அஸதி காமகு³ணஸம்பா³தோ⁴ அனவஸரோ ஏவ ஸெய்யதா²பி மஹாகஸ்ஸபாதீ³னங். ஓகாஸந்தி ஜா²னஸ்ஸேதங் நாமங் நீவரணஸம்பா³தா⁴பா⁴வதோ. அஸம்பா³த⁴பா⁴வேன ஹி ஜா²னங் இத⁴ ‘‘ஓகாஸோ’’தி வுத்தங், தஞ்ச கோ² அச்சந்தாஸம்பா³த⁴ட்டா²னதாய விபஸ்ஸனாபாத³கதாய . ததா² ஹி பாளியங் ‘‘அவிந்தீ³’’திஆதி³ வுத்தங். தத்த² அவிந்தீ³தி விந்தி³ படிலபி⁴. பூ⁴ரிமேத⁴ஸோதி மஹாபஞ்ஞோ, ஸபஞ்ஞோதி அத்தோ². அபு³ஜ்ஜீ²தி பு³ஜ்ஜி² படிவிஜ்ஜி². படிலீனோ ஹுத்வா ஸெட்டோ², படிலீனானங் வா ஸெட்டோ²தி படிலீனஸெட்டோ². மானுஸ்ஸயவஸேன உன்னதபா⁴வதோ படிலீனோ நாம பஹீனமானோ. படிலபி⁴ங்ஸூதி காமகு³ணஸம்பா³தே⁴பி ‘‘இமே காமகு³ணா மாதி³ஸானங் கிங் கரிஸ்ஸந்தீ’’தி? தே அபி⁴பு⁴ய்ய நிப்³பா³னப்பத்தியா ஸம்மாஸதிங் படிலபி⁴ங்ஸு. தேன ஸம்பயுத்தேன லோகுத்தரஸமாதி⁴னாபி ஸுட்டு² ஸமாஹிதா.
88.Sambādheti sampīḷitataṇhākilesādinā sauppīḷatāya paramasambādhe. Ativiya saṅkāraṭṭhānabhūto hi nīvaraṇasambādho adhippeto. So hi duggahano tasmiṃ asati kāmaguṇasambādho anavasaro eva seyyathāpi mahākassapādīnaṃ. Okāsanti jhānassetaṃ nāmaṃ nīvaraṇasambādhābhāvato. Asambādhabhāvena hi jhānaṃ idha ‘‘okāso’’ti vuttaṃ, tañca kho accantāsambādhaṭṭhānatāya vipassanāpādakatāya . Tathā hi pāḷiyaṃ ‘‘avindī’’tiādi vuttaṃ. Tattha avindīti vindi paṭilabhi. Bhūrimedhasoti mahāpañño, sapaññoti attho. Abujjhīti bujjhi paṭivijjhi. Paṭilīno hutvā seṭṭho, paṭilīnānaṃ vā seṭṭhoti paṭilīnaseṭṭho. Mānussayavasena unnatabhāvato paṭilīno nāma pahīnamāno. Paṭilabhiṃsūti kāmaguṇasambādhepi ‘‘ime kāmaguṇā mādisānaṃ kiṃ karissantī’’ti? Te abhibhuyya nibbānappattiyā sammāsatiṃ paṭilabhiṃsu. Tena sampayuttena lokuttarasamādhināpi suṭṭhu samāhitā.
அயங் கிர தே³வபுத்தோ இதோ புரிமவாரே அத்தபா⁴வே பட²மஜ்ஜா²னலாபீ⁴ ஹுத்வா ததோ சவித்வா ப்³ரஹ்மகாயிகாஸு நிப்³ப³த்தித்வா தத்த² ஜா²னஸுக²ங் அனுப⁴வித்வா ததோ சுதோ இதா³னி காமப⁴வே நிப்³ப³த்தோ, தஸ்மா தங் ஜா²னங் ஸம்பா⁴வெந்தோ ‘‘தாதி³ஸஸ்ஸ நாம ஜா²னஸுக²ஸ்ஸ லாபீ⁴ ப⁴க³வா’’தி தேன கு³ணேன ப⁴க³வந்தங் அபி⁴த்த²வந்தோ ‘‘ஸம்பா³தே⁴ வதா’’தி கா³த²ங் அபா⁴ஸி. அத²ஸ்ஸ ப⁴க³வா யதா² நாம அட்ட²ஸட்டி²யோஜனஸதஸஹஸ்ஸுப்³பே³த⁴ஸினேருபப்³ப³தராஜங் உபாதா³ய ஸாஸபோ ந கிஞ்சி ஹோதி, ஏவங் அனந்தாபரிமெய்யபு³த்³த⁴கு³ணே உபாதா³ய ரூபாவசரபட²மஜ்ஜா²னங் ந கிஞ்சி ஹோதீதி த³ஸ்ஸெந்தோ ‘‘யே ஸதி’’ந்திஆதி³னா அனுத்தரகு³ணாதி⁴க³மங் பவேதே³ஸி. தத்த² ஸதிந்தி விபஸ்ஸனாஸதியா ஸத்³தி⁴ங் அரியமக்³க³ஸதிங். ஸுஸமாஹிதாதி லோகியஸமாதி⁴னா சேவ லோகுத்தரஸமாதி⁴னா ச ஸுட்டு² ஸமாஹிதா. தே ஹி அச்சந்தங் ஸுஸமாஹிதா, ந ஜா²னமத்தலாபி⁴னோ அகுப்பத⁴ம்மத்தா. கேசி ‘‘கம்மந்தே ஸுஸமாஹிதா’’தி பாட²ங் வத்வா ‘‘மக்³க³ஸமாஹிதா’’தி அத்த²ங் வத³ந்தி.
Ayaṃ kira devaputto ito purimavāre attabhāve paṭhamajjhānalābhī hutvā tato cavitvā brahmakāyikāsu nibbattitvā tattha jhānasukhaṃ anubhavitvā tato cuto idāni kāmabhave nibbatto, tasmā taṃ jhānaṃ sambhāvento ‘‘tādisassa nāma jhānasukhassa lābhī bhagavā’’ti tena guṇena bhagavantaṃ abhitthavanto ‘‘sambādhe vatā’’ti gāthaṃ abhāsi. Athassa bhagavā yathā nāma aṭṭhasaṭṭhiyojanasatasahassubbedhasinerupabbatarājaṃ upādāya sāsapo na kiñci hoti, evaṃ anantāparimeyyabuddhaguṇe upādāya rūpāvacarapaṭhamajjhānaṃ na kiñci hotīti dassento ‘‘ye sati’’ntiādinā anuttaraguṇādhigamaṃ pavedesi. Tattha satinti vipassanāsatiyā saddhiṃ ariyamaggasatiṃ. Susamāhitāti lokiyasamādhinā ceva lokuttarasamādhinā ca suṭṭhu samāhitā. Te hi accantaṃ susamāhitā, na jhānamattalābhino akuppadhammattā. Keci ‘‘kammante susamāhitā’’ti pāṭhaṃ vatvā ‘‘maggasamāhitā’’ti atthaṃ vadanti.
பஞ்சாலசண்ட³ஸுத்தவண்ணனா நிட்டி²தா.
Pañcālacaṇḍasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. பஞ்சாலசண்ட³ஸுத்தங் • 7. Pañcālacaṇḍasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. பஞ்சாலசண்ட³ஸுத்தவண்ணனா • 7. Pañcālacaṇḍasuttavaṇṇanā
