| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3-5. பஞ்சஸிக்கா²பத³ஸுத்தாதி³வண்ணனா
3-5. Pañcasikkhāpadasuttādivaṇṇanā
109-111. ஸுராமேரயஸங்கா²தந்தி பிட்ட²ஸுராதி³ஸுராஸங்கா²தங் புப்பா²ஸவாதி³மேரயஸங்கா²தஞ்ச. மஜ்ஜனட்டே²ன மஜ்ஜங். ஸுராமேரயமஜ்ஜப்பமாதோ³தி வுச்சதி ‘‘மஜ்ஜதி தேனா’’தி கத்வா. தஸ்மிங் திட்ட²ந்தீதி தஸ்மிங் பமாதே³ பமஜ்ஜனவஸேன திட்ட²ந்தீதி அத்தோ². ஸேஸங் ததியசதுத்தே²ஸு ஸுவிஞ்ஞெய்யமேவாதி.
109-111.Surāmerayasaṅkhātanti piṭṭhasurādisurāsaṅkhātaṃ pupphāsavādimerayasaṅkhātañca. Majjanaṭṭhena majjaṃ. Surāmerayamajjappamādoti vuccati ‘‘majjati tenā’’ti katvā. Tasmiṃ tiṭṭhantīti tasmiṃ pamāde pamajjanavasena tiṭṭhantīti attho. Sesaṃ tatiyacatutthesu suviññeyyamevāti.
பஞ்சமே தானி பதா³னி ஸங்வண்ணேதுங் ‘‘பஞ்சமே’’திஆதி³ ஆரத்³த⁴ங். தத்த² பாணோ நாம வோஹாரதோ ஸத்தோ, பரமத்த²தோ ஜீவிதிந்த்³ரியங், தங் பாணங் அதிபாதெந்தி அதிச்ச அந்தரேயேவ, அதிக்கம்ம வா ஸத்தா²தீ³ஹி அபி⁴ப⁴வித்வா பாதெந்தி ஸணிகங் பதிதுங் அத³த்வா ஸீக⁴ங் பாதெந்தீதி அத்தோ². காயேன வாசாய வா அதி³ன்னங் பரஸந்தகங். ஆதி³யந்தீதி க³ண்ஹந்தி. மிச்சா²தி ந ஸம்மா, கா³ரய்ஹவஸேன. முஸாதி அதத²ங் வத்து². வத³ந்தீதி விஸங்வாத³னவஸேன வத³ந்தி. பியஸுஞ்ஞகரணதோ பிஸுணா, பிஸதி வா பரே ஸத்தே, ஹிங்ஸதீதி அத்தோ². மம்மச்சே²தி³காதி ஏதேன பரஸ்ஸ மம்மச்சே²த³வஸேன ஏகந்தப²ருஸஸஞ்சேதனா ப²ருஸவாசா நாமாதி த³ஸ்ஸேதி. அபி⁴ஜ்ஜா²ஸத்³தோ³ லுப்³ப⁴னே நிருள்ஹோதி ஆஹ ‘‘பரப⁴ண்டே³ லுப்³ப⁴னஸீலாதி அத்தோ²’’தி. ப்³யாபன்னந்தி தோ³ஸவஸேன விபன்னங். பகதிவிஜஹனேன பூதிபூ⁴தங். ஸாதூ⁴ஹி க³ரஹிதப்³ப³தங் பத்தா ‘‘நத்தி² தி³ன்ன’’ந்திஆதி³னயப்பவத்தா நத்தி²காஹேதுகஅகிரியதி³ட்டி² கம்மபத²பரியாபன்னா நாம. மிச்ச²த்தபரியாபன்னா ஸப்³பா³பி லோகுத்தரமக்³க³படிபக்கா² விபரீததி³ட்டி².
Pañcame tāni padāni saṃvaṇṇetuṃ ‘‘pañcame’’tiādi āraddhaṃ. Tattha pāṇo nāma vohārato satto, paramatthato jīvitindriyaṃ, taṃ pāṇaṃ atipātenti aticca antareyeva, atikkamma vā satthādīhi abhibhavitvā pātenti saṇikaṃ patituṃ adatvā sīghaṃ pātentīti attho. Kāyena vācāya vā adinnaṃ parasantakaṃ. Ādiyantīti gaṇhanti. Micchāti na sammā, gārayhavasena. Musāti atathaṃ vatthu. Vadantīti visaṃvādanavasena vadanti. Piyasuññakaraṇato pisuṇā, pisati vā pare satte, hiṃsatīti attho. Mammacchedikāti etena parassa mammacchedavasena ekantapharusasañcetanā pharusavācā nāmāti dasseti. Abhijjhāsaddo lubbhane niruḷhoti āha ‘‘parabhaṇḍe lubbhanasīlāti attho’’ti. Byāpannanti dosavasena vipannaṃ. Pakativijahanena pūtibhūtaṃ. Sādhūhi garahitabbataṃ pattā ‘‘natthi dinna’’ntiādinayappavattā natthikāhetukaakiriyadiṭṭhi kammapathapariyāpannā nāma. Micchattapariyāpannā sabbāpi lokuttaramaggapaṭipakkhā viparītadiṭṭhi.
தேஸந்தி கம்மபதா²னங். வோஹாரதோதி இந்த்³ரியப³த்³த⁴ங் உபாதா³ய பஞ்ஞத்திமத்ததோ. திரச்சா²னக³தாதீ³ஸூதி ஆதி³-ஸத்³தே³ன பேதானங் ஸங்க³ஹோ. பயோக³வத்து²மஹந்ததாதீ³ஹி மஹாஸாவஜ்ஜதா தேஹி பச்சயேஹி உப்பஜ்ஜமானாய சேதனாய ப³லவபா⁴வதோ. யதா²வுத்தபச்சயவிபரியாயேபி தங்தங்பச்சயேஹி சேதனாய ப³லவபா⁴வவஸேன அப்பஸாவஜ்ஜமஹாஸாவஜ்ஜதா வா வேதி³தப்³பா³. இத்³தி⁴மயோதி கம்மவிபாகித்³தி⁴மயோ தா³டா²கோடனாதீ³னங் விய.
Tesanti kammapathānaṃ. Vohāratoti indriyabaddhaṃ upādāya paññattimattato. Tiracchānagatādīsūti ādi-saddena petānaṃ saṅgaho. Payogavatthumahantatādīhi mahāsāvajjatā tehi paccayehi uppajjamānāya cetanāya balavabhāvato. Yathāvuttapaccayavipariyāyepi taṃtaṃpaccayehi cetanāya balavabhāvavasena appasāvajjamahāsāvajjatā vā veditabbā. Iddhimayoti kammavipākiddhimayo dāṭhākoṭanādīnaṃ viya.
மேது²னஸமாசாரேஸூதி ஸதா³ரபரதா³ரக³மனவஸேன து³விதே⁴ஸு மேது²னஸமாசாரேஸு. தேபி ஹீனாதி⁴முத்திகேஹி கத்தப்³ப³தோ காமா நாம. மிச்சா²சாரோதி கா³ரய்ஹாசாரோ. கா³ரய்ஹதா சஸ்ஸ ஏகந்தனிஹீனதாயாதி ஆஹ ‘‘ஏகந்தனிந்தி³தோ லாமகாசாரோ’’தி அஸத்³த⁴ம்மாதி⁴ப்பாயேனாதி அஸத்³த⁴ம்மஸேவனாதி⁴ப்பாயேன. கொ³த்தரக்கி²தாதி ஸகொ³த்தேஹி ரக்கி²தா. த⁴ம்மரக்கி²தாதி ஸஹத⁴ம்மேஹி ரக்கி²தா. ஸஸ்ஸாமிகா நாம ஸாரக்கா². யஸ்ஸா க³மனே த³ண்டோ³ ட²பிதோ, ஸா ஸபரித³ண்டா³. ப⁴ரியபா⁴வாய த⁴னேன கீதா த⁴னக்கீதா. ச²ந்தே³ன வஸதீதி ச²ந்த³வாஸினீ. போ⁴க³த்த²ங் வஸதீதி போ⁴க³வாஸினீ. படத்த²ங் வஸதீதி படவாஸினீ. உத³கபத்தங் ஆமஸித்வா க³ஹிதா ஓத³பத்தகினீ. சும்ப³டங் அபனெத்வா க³ஹிதா ஓப⁴டசும்ப³டா. கரமரானீதா த⁴ஜாஹடா. தங்க²ணிகங் க³ஹிதா முஹுத்திகா. அபி⁴ப⁴வித்வா வீதிக்கமோ மிச்சா²சாரோ மஹாஸாவஜ்ஜோ, ந ததா² த்³வின்னங் ஸமானச்ச²ந்த³தாய. அபி⁴ப⁴வித்வா வீதிக்கமனே ஸதிபி மக்³கே³னமக்³க³படிபத்திஅதி⁴வாஸனே புரிமுப்பன்னஸேவனாபி⁴ஸந்தி⁴பயோகா³பா⁴வதோ மிச்சா²சாரோ ந ஹோதி அபி⁴பு⁴ய்யமானஸ்ஸாதி வத³ந்தி. ஸேவனாசித்தே ஸதி பயோகா³பா⁴வோ அப்பமாணங் யேபு⁴ய்யேன இத்தி²யா ஸேவனாபயோக³ஸ்ஸ அபா⁴வதோ. ததா² ஸதி புரேதரங் ஸேவனாசித்தஸ்ஸ உபட்டா²னேபி தஸ்ஸா மிச்சா²சாரோ ந ஸியா, ததா² புரிஸஸ்ஸபி ஸேவனாபயோகா³பா⁴வே. தஸ்மா அத்தனோ ருசியா பவத்திதஸ்ஸ வஸேன தயோ, ப³லக்காரேன பவத்திதஸ்ஸ வஸேன தயோதி ஸப்³பே³பி அக்³க³ஹிதக்³க³ஹணேன ‘‘சத்தாரோ ஸம்பா⁴ரா’’தி வுத்தங்.
Methunasamācāresūti sadāraparadāragamanavasena duvidhesu methunasamācāresu. Tepi hīnādhimuttikehi kattabbato kāmā nāma. Micchācāroti gārayhācāro. Gārayhatā cassa ekantanihīnatāyāti āha ‘‘ekantanindito lāmakācāro’’ti asaddhammādhippāyenāti asaddhammasevanādhippāyena. Gottarakkhitāti sagottehi rakkhitā. Dhammarakkhitāti sahadhammehi rakkhitā. Sassāmikā nāma sārakkhā. Yassā gamane daṇḍo ṭhapito, sā saparidaṇḍā. Bhariyabhāvāya dhanena kītā dhanakkītā. Chandena vasatīti chandavāsinī. Bhogatthaṃ vasatīti bhogavāsinī. Paṭatthaṃ vasatīti paṭavāsinī. Udakapattaṃ āmasitvā gahitā odapattakinī. Cumbaṭaṃ apanetvā gahitā obhaṭacumbaṭā. Karamarānītā dhajāhaṭā. Taṅkhaṇikaṃ gahitā muhuttikā. Abhibhavitvā vītikkamo micchācāro mahāsāvajjo, na tathā dvinnaṃ samānacchandatāya. Abhibhavitvā vītikkamane satipi maggenamaggapaṭipattiadhivāsane purimuppannasevanābhisandhipayogābhāvato micchācāro na hoti abhibhuyyamānassāti vadanti. Sevanācitte sati payogābhāvo appamāṇaṃ yebhuyyena itthiyā sevanāpayogassa abhāvato. Tathā sati puretaraṃ sevanācittassa upaṭṭhānepi tassā micchācāro na siyā, tathā purisassapi sevanāpayogābhāve. Tasmā attano ruciyā pavattitassa vasena tayo, balakkārena pavattitassa vasena tayoti sabbepi aggahitaggahaṇena ‘‘cattāro sambhārā’’ti vuttaṃ.
ஆஸேவனமந்த³தாயாதி யாய அகுஸலசேதனாய ஸம்ப²ங் பலபதி, தஸ்ஸா இத்தரகாலதாய பவத்தியா அனாஸேவனாதி பரிது³ப்³ப³லா ஹோதி சேதனா.
Āsevanamandatāyāti yāya akusalacetanāya samphaṃ palapati, tassā ittarakālatāya pavattiyā anāsevanāti paridubbalā hoti cetanā.
உபஸக்³க³வஸேன அத்த²விஸேஸவாசினோ தா⁴துஸத்³தா³தி அபி⁴ஜ்ஜா²யதீதி பத³ஸ்ஸ பரப⁴ண்டா³பி⁴முகீ²திஆதி³அத்தோ² வுத்தோ. தன்னின்னதாயாதி தஸ்மிங் பரப⁴ண்டே³ லுப்³ப⁴னவஸேன நின்னதாய. அபி⁴புப்³போ³ ஜே²-ஸத்³தோ³ லுப்³ப⁴னே நிருள்ஹோதி த³ட்ட²ப்³போ³. யஸ்ஸ ப⁴ண்ட³ங் அபி⁴ஜ்ஜா²யதி, தஸ்ஸ அப்பகு³ணதாய அப்பஸாவஜ்ஜா, மஹாகு³ணதாய மஹாஸாவஜ்ஜாதிஆதி³னா நயேன தத்த² அப்பஸாவஜ்ஜமஹாஸாவஜ்ஜவிபா⁴கோ³ வேதி³தப்³போ³. தேனாஹ ‘‘அதி³ன்னாதா³னங் வியா’’திஆதி³. அத்தனோ பரிணாமனங் சித்தேனேவாதி த³ட்ட²ப்³ப³ங்.
Upasaggavasena atthavisesavācino dhātusaddāti abhijjhāyatīti padassa parabhaṇḍābhimukhītiādiattho vutto. Tanninnatāyāti tasmiṃ parabhaṇḍe lubbhanavasena ninnatāya. Abhipubbo jhe-saddo lubbhane niruḷhoti daṭṭhabbo. Yassa bhaṇḍaṃ abhijjhāyati, tassa appaguṇatāya appasāvajjā, mahāguṇatāya mahāsāvajjātiādinā nayena tattha appasāvajjamahāsāvajjavibhāgo veditabbo. Tenāha ‘‘adinnādānaṃ viyā’’tiādi. Attano pariṇāmanaṃ cittenevāti daṭṭhabbaṃ.
ஹிதஸுக²ங் ப்³யாபாத³யதீதி யோ நங் உப்பாதே³தி, யஸ்ஸ உப்பாதே³தி, தஸ்ஸ ஸதி ஸமவாயே ஹிதஸுக²ங் வினாஸேதி. அஹோ வதாதி இமினா யதா² அபி⁴ஜ்ஜா²னே வத்து²னோ ஏகந்ததோ அத்தனோ பரிணாமனங் த³ஸ்ஸிதங் , ஏவமிதா⁴பி வத்து²னோ ‘‘அஹோ வதா’’தி இமினா பரஸ்ஸ வினாஸசிந்தாய ஏகந்ததோ நியமிதபா⁴வங் த³ஸ்ஸேதி. ஏவஞ்ஹி நேஸங் தா³ருணப்பவத்தியா கம்மபத²ப்பவத்தி.
Hitasukhaṃ byāpādayatīti yo naṃ uppādeti, yassa uppādeti, tassa sati samavāye hitasukhaṃ vināseti. Aho vatāti iminā yathā abhijjhāne vatthuno ekantato attano pariṇāmanaṃ dassitaṃ , evamidhāpi vatthuno ‘‘aho vatā’’ti iminā parassa vināsacintāya ekantato niyamitabhāvaṃ dasseti. Evañhi nesaṃ dāruṇappavattiyā kammapathappavatti.
யதா²பு⁴ச்சக³ஹணாபா⁴வேனாதி யதா²தச்ச²க³ஹணஸ்ஸ அபா⁴வேன அனிச்சாதி³ஸபா⁴வஸ்ஸ நிச்சாதி³தோ க³ஹணேன. மிச்சா² பஸ்ஸதீதி விதத²ங் பஸ்ஸதி. ஸம்ப²ப்பலாபோ வியாதி இமினா ஆஸேவனஸ்ஸ அப்பமஹந்ததாஹி மிச்சா²தி³ட்டி²யா அப்பஸாவஜ்ஜமஹாஸாவஜ்ஜதா. வத்து²னோதி க³ஹிதவத்து²னோ. க³ஹிதாகாரவிபரீததாதி மிச்சா²தி³ட்டி²யா க³ஹிதாகாரஸ்ஸ விபரீததா. ததா²பா⁴வேனாதி அத்தனோ க³ஹிதாகாரேனேவ தஸ்ஸா தி³ட்டி²யா, க³ஹிதஸ்ஸ வா வத்து²னோ உபட்டா²னங் ‘‘ஏவமேதங், ந இதோ அஞ்ஞதா²’’தி.
Yathābhuccagahaṇābhāvenāti yathātacchagahaṇassa abhāvena aniccādisabhāvassa niccādito gahaṇena. Micchā passatīti vitathaṃ passati. Samphappalāpo viyāti iminā āsevanassa appamahantatāhi micchādiṭṭhiyā appasāvajjamahāsāvajjatā. Vatthunoti gahitavatthuno. Gahitākāraviparītatāti micchādiṭṭhiyā gahitākārassa viparītatā. Tathābhāvenāti attano gahitākāreneva tassā diṭṭhiyā, gahitassa vā vatthuno upaṭṭhānaṃ ‘‘evametaṃ, na ito aññathā’’ti.
த⁴ம்மதோதி ஸபா⁴வதோ. கொட்டா²ஸதோதி சித்தங்க³கொட்டா²ஸதோ, யங்கொட்டா²ஸா ஹொந்தி, ததோதி அத்தோ². சேதனாத⁴ம்மாவாதி சேதனாஸபா⁴வா ஏவ. படிபாடியா ஸத்தாதி எத்த² நனு சேதனா அபி⁴த⁴ம்மே கம்மபதே²ஸு ந வுத்தாதி படிபாடியா ஸத்தன்னங் கம்மபத²பா⁴வோ ந யுத்தோதி? ந, அவசனஸ்ஸ அஞ்ஞஹேதுகத்தா. ந ஹி தத்த² சேதனாய அகம்மபத²த்தா கம்மபத²ராஸிம்ஹி அவசனங், கதா³சி பன கம்மபதோ² ஹோதி, ந ஸப்³ப³தா³தி கம்மபத²பா⁴வஸ்ஸ அனியதத்தா அவசனங். யதா³, பனஸ்ஸ கம்மபத²பா⁴வோ ஹோதி, ததா³ கம்மபத²ராஸிஸங்க³ஹோ ந நிவாரிதோ. எத்தா²ஹ – யதி³ சேதனாய ஸப்³ப³தா³ கம்மபத²பா⁴வாபா⁴வதோ அனியதோ கம்மபத²பா⁴வோதி கம்மபத²ராஸிம்ஹி அவசனங், நனு அபி⁴ஜ்ஜா²தீ³னம்பி கம்மபத²பா⁴வங் அப்பத்தானங் அத்தி²தாய அனியதோ கம்மபத²பா⁴வோதி தேஸம்பி கம்மபத²ராஸிம்ஹி அவசனங் ஆபஜ்ஜதீதி? நாபஜ்ஜதி, கம்மபத²தாதங்ஸபா⁴க³தாஹி தேஸங் தத்த² வுத்தத்தா. யதி³ ஏவங் சேதனாபி தத்த² வத்தப்³பா³ ஸியா? ஸச்சமேதங். ஸா பன பாணாதிபாதாதி³காதி பாகடோ தஸ்ஸா கம்மபத²பா⁴வோதி ந வுத்தா ஸியா. சேதனாய ஹி ‘‘சேதனாஹங், பி⁴க்க²வே, கம்மங் வதா³மி (அ॰ நி॰ 6.63; கதா²॰ 539) திவிதா⁴, பி⁴க்க²வே, காயஸஞ்சேதனா அகுஸலங் காயகம்ம’’ந்திஆதி³வசனதோ (கதா²॰ 539) கம்மபா⁴வோ பாகடோ. கம்மங்யேவ ச ஸுக³திது³க்³க³தீனங் தத்து²ப்பஜ்ஜனகஸுக²து³க்கா²னஞ்ச பத²பா⁴வேன பவத்தங் கம்மபதோ²தி வுச்சதீதி பாகடோ, தஸ்ஸா கம்மபத²பா⁴வோ. அபி⁴ஜ்ஜா²தீ³னங் பன சேதனாஸமீஹனபா⁴வேன ஸுசரிதது³ச்சரிதபா⁴வோ, சேதனாஜனிதபிட்டி²வட்டகபா⁴வேன ஸுக³திது³க்³க³திதது³ப்பஜ்ஜனகஸுக²து³க்கா²னங் பத²பா⁴வோ சாதி, ந ததா² பாகடோ கம்மபத²பா⁴வோதி, தே ஏவ தேன ஸபா⁴வேன த³ஸ்ஸேதுங் அபி⁴த⁴ம்மே கம்மபத²ராஸிபா⁴வேன வுத்தா. அததா²ஜாதியகத்தா வா சேதனா தேஹி ஸத்³தி⁴ங் ந வுத்தாதி த³ட்ட²ப்³ப³ங். மூலங் பத்வாதி மூலதே³ஸனங் பத்வா, மூலஸபா⁴வேஸு த⁴ம்மேஸு தே³ஸியமானேஸூதி அத்தோ².
Dhammatoti sabhāvato. Koṭṭhāsatoti cittaṅgakoṭṭhāsato, yaṃkoṭṭhāsā honti, tatoti attho. Cetanādhammāvāti cetanāsabhāvā eva. Paṭipāṭiyā sattāti ettha nanu cetanā abhidhamme kammapathesu na vuttāti paṭipāṭiyā sattannaṃ kammapathabhāvo na yuttoti? Na, avacanassa aññahetukattā. Na hi tattha cetanāya akammapathattā kammapatharāsimhi avacanaṃ, kadāci pana kammapatho hoti, na sabbadāti kammapathabhāvassa aniyatattā avacanaṃ. Yadā, panassa kammapathabhāvo hoti, tadā kammapatharāsisaṅgaho na nivārito. Etthāha – yadi cetanāya sabbadā kammapathabhāvābhāvato aniyato kammapathabhāvoti kammapatharāsimhi avacanaṃ, nanu abhijjhādīnampi kammapathabhāvaṃ appattānaṃ atthitāya aniyato kammapathabhāvoti tesampi kammapatharāsimhi avacanaṃ āpajjatīti? Nāpajjati, kammapathatātaṃsabhāgatāhi tesaṃ tattha vuttattā. Yadi evaṃ cetanāpi tattha vattabbā siyā? Saccametaṃ. Sā pana pāṇātipātādikāti pākaṭo tassā kammapathabhāvoti na vuttā siyā. Cetanāya hi ‘‘cetanāhaṃ, bhikkhave, kammaṃ vadāmi (a. ni. 6.63; kathā. 539) tividhā, bhikkhave, kāyasañcetanā akusalaṃ kāyakamma’’ntiādivacanato (kathā. 539) kammabhāvo pākaṭo. Kammaṃyeva ca sugatiduggatīnaṃ tatthuppajjanakasukhadukkhānañca pathabhāvena pavattaṃ kammapathoti vuccatīti pākaṭo, tassā kammapathabhāvo. Abhijjhādīnaṃ pana cetanāsamīhanabhāvena sucaritaduccaritabhāvo, cetanājanitapiṭṭhivaṭṭakabhāvena sugatiduggatitaduppajjanakasukhadukkhānaṃ pathabhāvo cāti, na tathā pākaṭo kammapathabhāvoti, te eva tena sabhāvena dassetuṃ abhidhamme kammapatharāsibhāvena vuttā. Atathājātiyakattā vā cetanā tehi saddhiṃ na vuttāti daṭṭhabbaṃ. Mūlaṃ patvāti mūladesanaṃ patvā, mūlasabhāvesu dhammesu desiyamānesūti attho.
அதி³ன்னாதா³னங் ஸத்தாரம்மணந்தி இத³ங் ‘‘பஞ்ச ஸிக்கா²பதா³ பரித்தாரம்மணா ஏவா’’தி இமாய பாளியா விருஜ்ஜ²தி. யஞ்ஹி பாணாதிபாதாதி³து³ஸ்ஸீல்யஸ்ஸ ஆரம்மணங், ததே³வ தங் வேரமணியா ஆரம்மணங். வீதிக்கமிதப்³ப³வத்து²தோ ஏவ ஹி விரதீதி. ‘‘ஸத்தாரம்மண’’ந்தி வா ஸத்தஸங்கா²தங் ஸங்கா²ராரம்மணமேவ உபாதா³ய வுத்தத்தா ந கோசி விரோதோ⁴. ததா² ஹி வுத்தங் ஸம்மோஹவினோத³னியங் (விப⁴॰ அட்ட²॰ 714) ‘‘யானி ஸிக்கா²பதா³னி எத்த² ‘ஸத்தாரம்மணானீ’தி வுத்தானி, தானி யஸ்மா ‘ஸத்தோதி’தி ஸங்க²ங் க³தே ஸங்கா²ரேயேவ ஆரம்மணங் கரொந்தீ’’தி. இதோ பரேஸுபி ஏஸேவ நயோ. விஸபா⁴க³வத்து²னோ ‘‘இத்தி²புரிஸா’’தி க³ஹேதப்³ப³தோ ஸத்தாரம்மணோதிபி ஏகே. ‘‘ஏகோ தி³ட்டோ², த்³வே ஸுதா’’திஆதி³னா ஸம்ப²ப்பலபனே தி³ட்ட²ஸுதமுதவிஞ்ஞாதவஸேன. ததா² அபி⁴ஜ்ஜா²தி எத்த² ததா²-ஸத்³தோ³ ‘‘தி³ட்ட²ஸுதமுதவிஞ்ஞாதவஸேனா’’தி இத³ம்பி உபஸங்ஹரதி, ந ஸத்தஸங்கா²ராரம்மணதங் ஏவ த³ஸ்ஸனாதி³வஸேன அபி⁴ஜ்ஜா²யனதோ. ‘‘நத்தி² ஸத்தா ஓபபாதிகா’’தி பவத்தமானாபி மிச்சா²தி³ட்டி² தேபூ⁴மகத⁴ம்மாரம்மணா ஏவாதி அதி⁴ப்பாயேன தஸ்ஸா ஸங்கா²ராரம்மணதா வுத்தா. கத²ங் பன மிச்சா²தி³ட்டி²யா மஹக்³க³தப்பத்தா த⁴ம்மா ஆரம்மணங் ஹொந்தீதி? ஸாதா⁴ரணதோ. நத்தி² ஸுகடது³க்கடானங் கம்மானங் ப²லங் விபாகோதி ஹி பவத்தமானாய அத்த²தோ ரூபாரூபாவசரத⁴ம்மாபி க³ஹிதாவ ஹொந்தீதி.
Adinnādānaṃ sattārammaṇanti idaṃ ‘‘pañca sikkhāpadā parittārammaṇā evā’’ti imāya pāḷiyā virujjhati. Yañhi pāṇātipātādidussīlyassa ārammaṇaṃ, tadeva taṃ veramaṇiyā ārammaṇaṃ. Vītikkamitabbavatthuto eva hi viratīti. ‘‘Sattārammaṇa’’nti vā sattasaṅkhātaṃ saṅkhārārammaṇameva upādāya vuttattā na koci virodho. Tathā hi vuttaṃ sammohavinodaniyaṃ (vibha. aṭṭha. 714) ‘‘yāni sikkhāpadāni ettha ‘sattārammaṇānī’ti vuttāni, tāni yasmā ‘sattoti’ti saṅkhaṃ gate saṅkhāreyeva ārammaṇaṃ karontī’’ti. Ito paresupi eseva nayo. Visabhāgavatthuno ‘‘itthipurisā’’ti gahetabbato sattārammaṇotipi eke. ‘‘Eko diṭṭho, dve sutā’’tiādinā samphappalapane diṭṭhasutamutaviññātavasena. Tathā abhijjhāti ettha tathā-saddo ‘‘diṭṭhasutamutaviññātavasenā’’ti idampi upasaṃharati, na sattasaṅkhārārammaṇataṃ eva dassanādivasena abhijjhāyanato. ‘‘Natthi sattā opapātikā’’ti pavattamānāpi micchādiṭṭhi tebhūmakadhammārammaṇā evāti adhippāyena tassā saṅkhārārammaṇatā vuttā. Kathaṃ pana micchādiṭṭhiyā mahaggatappattā dhammā ārammaṇaṃ hontīti? Sādhāraṇato. Natthi sukaṭadukkaṭānaṃ kammānaṃ phalaṃ vipākoti hi pavattamānāya atthato rūpārūpāvacaradhammāpi gahitāva hontīti.
ஸுக²ப³ஹுலதாய ராஜானோ ஹஸமானாபி ‘‘சோரங் கா⁴தேதா²’’தி வத³ந்தி, ஹாஸோ பன தேஸங் அஞ்ஞவிஸயோதி ஆஹ ‘‘ஸன்னிட்டா²பகசேதனா பன நேஸங் து³க்க²ஸம்பயுத்தாவ ஹோதீ’’தி. மஜ்ஜ²த்தவேத³னோ ந ஹோதி, ஸுக²வேத³னோவ. தத்த² ‘‘காமானங் ஸமுத³யா’’திஆதி³னா வேத³னாபே⁴தோ³ வேதி³தப்³போ³. லோப⁴ஸமுட்டா²னோ முஸாவாதோ³ ஸுக²வேத³னோ வா ஸியா மஜ்ஜ²த்தவேத³னோ வா, தோ³ஸஸமுட்டா²னோ து³க்க²வேத³னோ வாதி முஸாவாதோ³ திவேத³னோ ஸியா. இமினா நயேன ஸேஸேஸுபி யதா²ரஹங் வேத³னானங் ‘‘லோபோ⁴ நிதா³னங் கம்மானங் ஸமுத³யாயா’’திஆதி³னா பே⁴தோ³ வேதி³தப்³போ³.
Sukhabahulatāya rājāno hasamānāpi ‘‘coraṃ ghātethā’’ti vadanti, hāso pana tesaṃ aññavisayoti āha ‘‘sanniṭṭhāpakacetanā pana nesaṃ dukkhasampayuttāva hotī’’ti. Majjhattavedano na hoti, sukhavedanova. Tattha ‘‘kāmānaṃ samudayā’’tiādinā vedanābhedo veditabbo. Lobhasamuṭṭhāno musāvādo sukhavedano vā siyā majjhattavedano vā, dosasamuṭṭhāno dukkhavedano vāti musāvādo tivedano siyā. Iminā nayena sesesupi yathārahaṃ vedanānaṃ ‘‘lobho nidānaṃ kammānaṃ samudayāyā’’tiādinā bhedo veditabbo.
பாணாதிபாதோ தோ³ஸமோஹவஸேன த்³விமூலகோதி ஸம்பயுத்தமூலமேவ ஸந்தா⁴ய வுத்தங். தஸ்ஸ ஹி மூலட்டே²ன உபகாரபா⁴வோ தோ³ஸவிஸேஸோ, நிதா³னமூலே பன க³ய்ஹமானே லோப⁴மோஹவஸேனபி வட்டதி. ஸம்மூள்ஹோ ஆமிஸகிஞ்ஜக்க²காமோபி ஹி பாணங் ஹனதி. தேனேவாஹ ‘‘லோபோ⁴ நிதா³னங் கம்மானங் ஸமுத³யாயா’’திஆதி³ (அ॰ நி॰ 3.34). ஸேஸேஸுபி ஏஸேவ நயோ.
Pāṇātipāto dosamohavasena dvimūlakoti sampayuttamūlameva sandhāya vuttaṃ. Tassa hi mūlaṭṭhena upakārabhāvo dosaviseso, nidānamūle pana gayhamāne lobhamohavasenapi vaṭṭati. Sammūḷho āmisakiñjakkhakāmopi hi pāṇaṃ hanati. Tenevāha ‘‘lobho nidānaṃ kammānaṃ samudayāyā’’tiādi (a. ni. 3.34). Sesesupi eseva nayo.
அஸமாதி³ன்னஸீலஸ்ஸ ஸம்பத்ததோ யதா²உபட்டி²தவீதிக்கமிதப்³ப³வத்து²தோ விரதி ஸம்பத்தவிரதி. ஸமாதா³னேன உப்பன்னா விரதி ஸமாதா³னவிரதி. கிலேஸானங் ஸமுச்சி²ந்த³னவஸேன பவத்தா மக்³க³ஸம்பயுத்தா விரதி ஸமுச்சே²த³விரதி. காமஞ்செத்த² பாளியங் விரதியோவ ஆக³தா, ஸிக்கா²பத³விப⁴ங்கே³ பன சேதனாபி ஆஹரித்வா த³ஸ்ஸிதாதி தது³ப⁴யம்பி க³ண்ஹந்தோ ‘‘சேதனாபி வட்டந்தி விரதியோபீ’’தி ஆஹ.
Asamādinnasīlassa sampattato yathāupaṭṭhitavītikkamitabbavatthuto virati sampattavirati. Samādānena uppannā virati samādānavirati. Kilesānaṃ samucchindanavasena pavattā maggasampayuttā virati samucchedavirati. Kāmañcettha pāḷiyaṃ viratiyova āgatā, sikkhāpadavibhaṅge pana cetanāpi āharitvā dassitāti tadubhayampi gaṇhanto ‘‘cetanāpi vaṭṭanti viratiyopī’’ti āha.
அது³ஸ்ஸீல்யாரம்மணா ஜீவிதிந்த்³ரியாதி³ஆரம்மணா கத²ங் து³ஸ்ஸீல்யானி பஜஹந்தீதி த³ஸ்ஸேதுங் ‘‘யதா² பனா’’திஆதி³ வுத்தங். பாணாதிபாதாதீ³ஹி விரமணவஸேன பவத்தனதோ ததா³ரம்மணபா⁴வேனேவ தானி பஜஹந்தி. ந ஹி ததே³வ ஆரப்³ப⁴ தங் பஜஹிதுங் ஸக்கா ததோ அனிஸ்ஸடபா⁴வதோ.
Adussīlyārammaṇā jīvitindriyādiārammaṇā kathaṃ dussīlyāni pajahantīti dassetuṃ ‘‘yathā panā’’tiādi vuttaṃ. Pāṇātipātādīhi viramaṇavasena pavattanato tadārammaṇabhāveneva tāni pajahanti. Na hi tadeva ārabbha taṃ pajahituṃ sakkā tato anissaṭabhāvato.
அனபி⁴ஜ்ஜா²…பே॰… விரமந்தஸ்ஸாதி அபி⁴ஜ்ஜ²ங் பஜஹந்தஸ்ஸாதி அத்தோ². ந ஹி மனோது³ச்சரிததோ விரதி அத்தி² அனபி⁴ஜ்ஜா²தீ³ஹேவ தப்பஹானஸித்³தி⁴தோ.
Anabhijjhā…pe… viramantassāti abhijjhaṃ pajahantassāti attho. Na hi manoduccaritato virati atthi anabhijjhādīheva tappahānasiddhito.
பஞ்சஸிக்கா²பத³ஸுத்தாதி³வண்ணனா நிட்டி²தா.
Pañcasikkhāpadasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
3. பஞ்சஸிக்கா²பத³ஸுத்தங் • 3. Pañcasikkhāpadasuttaṃ
4. ஸத்தகம்மபத²ஸுத்தங் • 4. Sattakammapathasuttaṃ
5. த³ஸகம்மபத²ஸுத்தங் • 5. Dasakammapathasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3-5. பஞ்சஸிக்கா²பத³ஸுத்தாதி³வண்ணனா • 3-5. Pañcasikkhāpadasuttādivaṇṇanā
