| Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya |
21. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச – ‘‘ஸந்தி, பி⁴க்க²வே, ஏகே ஸமணப்³ராஹ்மணா அபரந்தகப்பிகா அபரந்தானுதி³ட்டி²னோ அபரந்தங் ஆரப்³ப⁴ அனேகவிஹிதானி அதி⁴வுத்திபதா³னி 3 அபி⁴வத³ந்தி. ‘ஸஞ்ஞீ அத்தா ஹோதி அரோகோ³ பரங் மரணா’தி – இத்தே²கே அபி⁴வத³ந்தி; ‘அஸஞ்ஞீ அத்தா ஹோதி அரோகோ³ பரங் மரணா’தி – இத்தே²கே அபி⁴வத³ந்தி; ‘நேவஸஞ்ஞீனாஸஞ்ஞீ அத்தா ஹோதி அரோகோ³ பரங் மரணா’தி – இத்தே²கே அபி⁴வத³ந்தி; ஸதோ வா பன ஸத்தஸ்ஸ உச்சே²த³ங் வினாஸங் விப⁴வங் பஞ்ஞபெந்தி 4, தி³ட்ட²த⁴ம்மனிப்³பா³னங் வா பனேகே அபி⁴வத³ந்தி. இதி ஸந்தங் வா அத்தானங் பஞ்ஞபெந்தி அரோக³ங் 5 பரங் மரணா, ஸதோ வா பன ஸத்தஸ்ஸ உச்சே²த³ங் வினாஸங் விப⁴வங் பஞ்ஞபெந்தி, தி³ட்ட²த⁴ம்மனிப்³பா³னங் வா பனேகே அபி⁴வத³ந்தி. இதி இமானி பஞ்ச 6 ஹுத்வா தீணி ஹொந்தி, தீணி ஹுத்வா பஞ்ச ஹொந்தி – அயமுத்³தே³ஸோ பஞ்சத்தயஸ்ஸ.
21. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘santi, bhikkhave, eke samaṇabrāhmaṇā aparantakappikā aparantānudiṭṭhino aparantaṃ ārabbha anekavihitāni adhivuttipadāni 7 abhivadanti. ‘Saññī attā hoti arogo paraṃ maraṇā’ti – ittheke abhivadanti; ‘asaññī attā hoti arogo paraṃ maraṇā’ti – ittheke abhivadanti; ‘nevasaññīnāsaññī attā hoti arogo paraṃ maraṇā’ti – ittheke abhivadanti; sato vā pana sattassa ucchedaṃ vināsaṃ vibhavaṃ paññapenti 8, diṭṭhadhammanibbānaṃ vā paneke abhivadanti. Iti santaṃ vā attānaṃ paññapenti arogaṃ 9 paraṃ maraṇā, sato vā pana sattassa ucchedaṃ vināsaṃ vibhavaṃ paññapenti, diṭṭhadhammanibbānaṃ vā paneke abhivadanti. Iti imāni pañca 10 hutvā tīṇi honti, tīṇi hutvā pañca honti – ayamuddeso pañcattayassa.
22. ‘‘தத்ர, பி⁴க்க²வே, யே தே ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, ரூபிங் வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, அரூபிங் வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, ரூபிஞ்ச அரூபிஞ்ச வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, நேவரூபிங் நாரூபிங் வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, ஏகத்தஸஞ்ஞிங் வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, நானத்தஸஞ்ஞிங் வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, பரித்தஸஞ்ஞிங் வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, அப்பமாணஸஞ்ஞிங் வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, ஏதங் 11 வா பனேகேஸங் 12 உபாதிவத்ததங் விஞ்ஞாணகஸிணமேகே அபி⁴வத³ந்தி அப்பமாணங் ஆனேஞ்ஜங் . தயித³ங், பி⁴க்க²வே, ததா²க³தோ அபி⁴ஜானாதி 13. யே கோ² தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, ரூபிங் வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, அரூபிங் வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, ரூபிஞ்ச அரூபிஞ்ச வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, நேவரூபிங் நாரூபிங் வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, ஏகத்தஸஞ்ஞிங் வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, நானத்தஸஞ்ஞிங் வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, பரித்தஸஞ்ஞிங் வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, அப்பமாணஸஞ்ஞிங் வா தே பொ⁴ந்தோ ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா 14, யா வா பனேதாஸங் ஸஞ்ஞானங் பரிஸுத்³தா⁴ பரமா அக்³கா³ அனுத்தரியா அக்கா²யதி – யதி³ ரூபஸஞ்ஞானங் யதி³ அரூபஸஞ்ஞானங் யதி³ ஏகத்தஸஞ்ஞானங் யதி³ நானத்தஸஞ்ஞானங். ‘நத்தி² கிஞ்சீ’தி ஆகிஞ்சஞ்ஞாயதனமேகே அபி⁴வத³ந்தி அப்பமாணங் ஆனேஞ்ஜங். ‘தயித³ங் ஸங்க²தங் ஓளாரிகங் அத்தி² கோ² பன ஸங்கா²ரானங் நிரோதோ⁴ அத்தே²த’ந்தி – இதி விதி³த்வா தஸ்ஸ நிஸ்ஸரணத³ஸ்ஸாவீ ததா²க³தோ தது³பாதிவத்தோ.
22. ‘‘Tatra, bhikkhave, ye te samaṇabrāhmaṇā saññiṃ attānaṃ paññapenti arogaṃ paraṃ maraṇā, rūpiṃ vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, arūpiṃ vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, rūpiñca arūpiñca vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, nevarūpiṃ nārūpiṃ vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, ekattasaññiṃ vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, nānattasaññiṃ vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, parittasaññiṃ vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, appamāṇasaññiṃ vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, etaṃ 15 vā panekesaṃ 16 upātivattataṃ viññāṇakasiṇameke abhivadanti appamāṇaṃ āneñjaṃ . Tayidaṃ, bhikkhave, tathāgato abhijānāti 17. Ye kho te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, rūpiṃ vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, arūpiṃ vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, rūpiñca arūpiñca vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, nevarūpiṃ nārūpiṃ vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, ekattasaññiṃ vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, nānattasaññiṃ vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, parittasaññiṃ vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā, appamāṇasaññiṃ vā te bhonto samaṇabrāhmaṇā saññiṃ attānaṃ paññapenti arogaṃ paraṃ maraṇā 18, yā vā panetāsaṃ saññānaṃ parisuddhā paramā aggā anuttariyā akkhāyati – yadi rūpasaññānaṃ yadi arūpasaññānaṃ yadi ekattasaññānaṃ yadi nānattasaññānaṃ. ‘Natthi kiñcī’ti ākiñcaññāyatanameke abhivadanti appamāṇaṃ āneñjaṃ. ‘Tayidaṃ saṅkhataṃ oḷārikaṃ atthi kho pana saṅkhārānaṃ nirodho attheta’nti – iti viditvā tassa nissaraṇadassāvī tathāgato tadupātivatto.
23. ‘‘தத்ர, பி⁴க்க²வே, யே தே ஸமணப்³ராஹ்மணா அஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, ரூபிங் வா தே பொ⁴ந்தோ ஸமணப்³ராஹ்மணா அஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, அரூபிங் வா தே பொ⁴ந்தோ ஸமணப்³ராஹ்மணா அஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, ரூபிஞ்ச அரூபிஞ்ச வா தே பொ⁴ந்தோ ஸமணப்³ராஹ்மணா அஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, நேவரூபிங் நாரூபிங் வா தே பொ⁴ந்தோ ஸமணப்³ராஹ்மணா அஸஞ்ஞிங் அத்தானங் பஞ்ஞபெந்தி அரோக³ங் பரங் மரணா. தத்ர, பி⁴க்க²வே, யே தே ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா தேஸமேதே படிக்கோஸந்தி. தங் கிஸ்ஸ ஹேது? ஸஞ்ஞா ரோகோ³ ஸஞ்ஞா க³ண்டோ³ ஸஞ்ஞா ஸல்லங், ஏதங் ஸந்தங் ஏதங் பணீதங் யதி³த³ங் – ‘அஸஞ்ஞ’ந்தி. தயித³ங், பி⁴க்க²வே, ததா²க³தோ அபி⁴ஜானாதி யே கோ² தே பொ⁴ந்தோ ஸமணப்³ராஹ்மணா அஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, ரூபிங் வா தே பொ⁴ந்தோ ஸமணப்³ராஹ்மணா அஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, அரூபிங் வா தே பொ⁴ந்தோ ஸமணப்³ராஹ்மணா அஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, ரூபிஞ்ச அரூபிஞ்ச வா தே பொ⁴ந்தோ ஸமணப்³ராஹ்மணா அஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, நேவரூபிங் நாரூபிங் வா தே பொ⁴ந்தோ ஸமணப்³ராஹ்மணா அஸஞ்ஞிங் அத்தானங் பஞ்ஞபெந்தி அரோக³ங் பரங் மரணா. யோ ஹி கோசி, பி⁴க்க²வே, ஸமணோ வா ப்³ராஹ்மணோ வா ஏவங் வதெ³ய்ய – ‘அஹமஞ்ஞத்ர ரூபா, அஞ்ஞத்ர வேத³னாய, அஞ்ஞத்ர ஸஞ்ஞாய, அஞ்ஞத்ர ஸங்கா²ரேஹி, விஞ்ஞாணஸ்ஸ 19 ஆக³திங் வா க³திங் வா சுதிங் வா உபபத்திங் வா வுத்³தி⁴ங் வா விரூள்ஹிங் வா வேபுல்லங் வா பஞ்ஞபெஸ்ஸாமீ’தி – நேதங் டா²னங் விஜ்ஜதி. ‘தயித³ங் ஸங்க²தங் ஓளாரிகங் அத்தி² கோ² பன ஸங்கா²ரானங் நிரோதோ⁴ அத்தே²த’ந்தி – இதி விதி³த்வா தஸ்ஸ நிஸ்ஸரணத³ஸ்ஸாவீ ததா²க³தோ தது³பாதிவத்தோ.
23. ‘‘Tatra, bhikkhave, ye te samaṇabrāhmaṇā asaññiṃ attānaṃ paññapenti arogaṃ paraṃ maraṇā, rūpiṃ vā te bhonto samaṇabrāhmaṇā asaññiṃ attānaṃ paññapenti arogaṃ paraṃ maraṇā, arūpiṃ vā te bhonto samaṇabrāhmaṇā asaññiṃ attānaṃ paññapenti arogaṃ paraṃ maraṇā, rūpiñca arūpiñca vā te bhonto samaṇabrāhmaṇā asaññiṃ attānaṃ paññapenti arogaṃ paraṃ maraṇā, nevarūpiṃ nārūpiṃ vā te bhonto samaṇabrāhmaṇā asaññiṃ attānaṃ paññapenti arogaṃ paraṃ maraṇā. Tatra, bhikkhave, ye te samaṇabrāhmaṇā saññiṃ attānaṃ paññapenti arogaṃ paraṃ maraṇā tesamete paṭikkosanti. Taṃ kissa hetu? Saññā rogo saññā gaṇḍo saññā sallaṃ, etaṃ santaṃ etaṃ paṇītaṃ yadidaṃ – ‘asañña’nti. Tayidaṃ, bhikkhave, tathāgato abhijānāti ye kho te bhonto samaṇabrāhmaṇā asaññiṃ attānaṃ paññapenti arogaṃ paraṃ maraṇā, rūpiṃ vā te bhonto samaṇabrāhmaṇā asaññiṃ attānaṃ paññapenti arogaṃ paraṃ maraṇā, arūpiṃ vā te bhonto samaṇabrāhmaṇā asaññiṃ attānaṃ paññapenti arogaṃ paraṃ maraṇā, rūpiñca arūpiñca vā te bhonto samaṇabrāhmaṇā asaññiṃ attānaṃ paññapenti arogaṃ paraṃ maraṇā, nevarūpiṃ nārūpiṃ vā te bhonto samaṇabrāhmaṇā asaññiṃ attānaṃ paññapenti arogaṃ paraṃ maraṇā. Yo hi koci, bhikkhave, samaṇo vā brāhmaṇo vā evaṃ vadeyya – ‘ahamaññatra rūpā, aññatra vedanāya, aññatra saññāya, aññatra saṅkhārehi, viññāṇassa 20 āgatiṃ vā gatiṃ vā cutiṃ vā upapattiṃ vā vuddhiṃ vā virūḷhiṃ vā vepullaṃ vā paññapessāmī’ti – netaṃ ṭhānaṃ vijjati. ‘Tayidaṃ saṅkhataṃ oḷārikaṃ atthi kho pana saṅkhārānaṃ nirodho attheta’nti – iti viditvā tassa nissaraṇadassāvī tathāgato tadupātivatto.
24. ‘‘தத்ர, பி⁴க்க²வே, யே தே ஸமணப்³ராஹ்மணா நேவஸஞ்ஞீனாஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, ரூபிங் வா தே பொ⁴ந்தோ ஸமணப்³ராஹ்மணா நேவஸஞ்ஞீனாஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, அரூபிங் வா தே பொ⁴ந்தோ ஸமணப்³ராஹ்மணா நேவஸஞ்ஞீனாஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, ரூபிஞ்ச அரூபிஞ்ச வா தே பொ⁴ந்தோ ஸமணப்³ராஹ்மணா நேவஸஞ்ஞீனாஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, நேவரூபிங் நாரூபிங் வா தே பொ⁴ந்தோ ஸமணப்³ராஹ்மணா நேவஸஞ்ஞீனாஸஞ்ஞிங் அத்தானங் பஞ்ஞபெந்தி அரோக³ங் பரங் மரணா. தத்ர, பி⁴க்க²வே, யே தே ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா தேஸமேதே படிக்கோஸந்தி, யேபி தே பொ⁴ந்தோ ஸமணப்³ராஹ்மணா அஸஞ்ஞிங் அத்தானங் பஞ்ஞபெந்தி அரோக³ங் பரங் மரணா தேஸமேதே படிக்கோஸந்தி. தங் கிஸ்ஸ ஹேது? ஸஞ்ஞா ரோகோ³ ஸஞ்ஞா க³ண்டோ³ ஸஞ்ஞா ஸல்லங், அஸஞ்ஞா ஸம்மோஹோ, ஏதங் ஸந்தங் ஏதங் பணீதங் யதி³த³ங் – ‘நேவஸஞ்ஞானாஸஞ்ஞ’ந்தி. 21 தயித³ங், பி⁴க்க²வே, ததா²க³தோ அபி⁴ஜானாதி. யே கோ² தே பொ⁴ந்தோ ஸமணப்³ராஹ்மணா நேவஸஞ்ஞீனாஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, ரூபிங் வா தே பொ⁴ந்தோ ஸமணப்³ராஹ்மணா நேவஸஞ்ஞீனாஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, அரூபிங் வா தே பொ⁴ந்தோ ஸமணப்³ராஹ்மணா நேவஸஞ்ஞீனாஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, ரூபிஞ்ச அரூபிஞ்ச வா தே பொ⁴ந்தோ ஸமணப்³ராஹ்மணா நேவஸஞ்ஞீனாஸஞ்ஞிங் அத்தானங் பஞ்ஞபெந்தி அரோக³ங் பரங் மரணா, நேவரூபிங் நாரூபிங் வா தே பொ⁴ந்தோ ஸமணப்³ராஹ்மணா நேவஸஞ்ஞீனாஸஞ்ஞிங் அத்தானங் பஞ்ஞபெந்தி அரோக³ங் பரங் மரணா. யே ஹி கேசி, பி⁴க்க²வே, ஸமணா வா ப்³ராஹ்மணா வா 22 தி³ட்ட²ஸுதமுதவிஞ்ஞாதப்³ப³ஸங்கா²ரமத்தேன ஏதஸ்ஸ ஆயதனஸ்ஸ உபஸம்பத³ங் பஞ்ஞபெந்தி, ப்³யஸனஞ்ஹேதங், பி⁴க்க²வே, அக்கா²யதி 23 ஏதஸ்ஸ ஆயதனஸ்ஸ உபஸம்பதா³ய . ந ஹேதங், பி⁴க்க²வே, ஆயதனங் ஸங்கா²ரஸமாபத்திபத்தப்³ப³மக்கா²யதி; ஸங்கா²ராவஸேஸஸமாபத்திபத்தப்³ப³மேதங், பி⁴க்க²வே, ஆயதனமக்கா²யதி. ‘தயித³ங் ஸங்க²தங் ஓளாரிகங் அத்தி² கோ² பன ஸங்கா²ரானங் நிரோதோ⁴ அத்தே²த’ந்தி – இதி விதி³த்வா தஸ்ஸ நிஸ்ஸரணத³ஸ்ஸாவீ ததா²க³தோ தது³பாதிவத்தோ.
24. ‘‘Tatra, bhikkhave, ye te samaṇabrāhmaṇā nevasaññīnāsaññiṃ attānaṃ paññapenti arogaṃ paraṃ maraṇā, rūpiṃ vā te bhonto samaṇabrāhmaṇā nevasaññīnāsaññiṃ attānaṃ paññapenti arogaṃ paraṃ maraṇā, arūpiṃ vā te bhonto samaṇabrāhmaṇā nevasaññīnāsaññiṃ attānaṃ paññapenti arogaṃ paraṃ maraṇā, rūpiñca arūpiñca vā te bhonto samaṇabrāhmaṇā nevasaññīnāsaññiṃ attānaṃ paññapenti arogaṃ paraṃ maraṇā, nevarūpiṃ nārūpiṃ vā te bhonto samaṇabrāhmaṇā nevasaññīnāsaññiṃ attānaṃ paññapenti arogaṃ paraṃ maraṇā. Tatra, bhikkhave, ye te samaṇabrāhmaṇā saññiṃ attānaṃ paññapenti arogaṃ paraṃ maraṇā tesamete paṭikkosanti, yepi te bhonto samaṇabrāhmaṇā asaññiṃ attānaṃ paññapenti arogaṃ paraṃ maraṇā tesamete paṭikkosanti. Taṃ kissa hetu? Saññā rogo saññā gaṇḍo saññā sallaṃ, asaññā sammoho, etaṃ santaṃ etaṃ paṇītaṃ yadidaṃ – ‘nevasaññānāsañña’nti. 24 Tayidaṃ, bhikkhave, tathāgato abhijānāti. Ye kho te bhonto samaṇabrāhmaṇā nevasaññīnāsaññiṃ attānaṃ paññapenti arogaṃ paraṃ maraṇā, rūpiṃ vā te bhonto samaṇabrāhmaṇā nevasaññīnāsaññiṃ attānaṃ paññapenti arogaṃ paraṃ maraṇā, arūpiṃ vā te bhonto samaṇabrāhmaṇā nevasaññīnāsaññiṃ attānaṃ paññapenti arogaṃ paraṃ maraṇā, rūpiñca arūpiñca vā te bhonto samaṇabrāhmaṇā nevasaññīnāsaññiṃ attānaṃ paññapenti arogaṃ paraṃ maraṇā, nevarūpiṃ nārūpiṃ vā te bhonto samaṇabrāhmaṇā nevasaññīnāsaññiṃ attānaṃ paññapenti arogaṃ paraṃ maraṇā. Ye hi keci, bhikkhave, samaṇā vā brāhmaṇā vā 25 diṭṭhasutamutaviññātabbasaṅkhāramattena etassa āyatanassa upasampadaṃ paññapenti, byasanañhetaṃ, bhikkhave, akkhāyati 26 etassa āyatanassa upasampadāya . Na hetaṃ, bhikkhave, āyatanaṃ saṅkhārasamāpattipattabbamakkhāyati; saṅkhārāvasesasamāpattipattabbametaṃ, bhikkhave, āyatanamakkhāyati. ‘Tayidaṃ saṅkhataṃ oḷārikaṃ atthi kho pana saṅkhārānaṃ nirodho attheta’nti – iti viditvā tassa nissaraṇadassāvī tathāgato tadupātivatto.
25. ‘‘தத்ர, பி⁴க்க²வே, யே தே ஸமணப்³ராஹ்மணா ஸதோ ஸத்தஸ்ஸ உச்சே²த³ங் வினாஸங் விப⁴வங் பஞ்ஞபெந்தி , தத்ர, பி⁴க்க²வே, யே தே ஸமணப்³ராஹ்மணா ஸஞ்ஞிங் அத்தானங் பஞ்ஞபெந்தி அரோக³ங் பரங் மரணா தேஸமேதே படிக்கோஸந்தி, யேபி தே பொ⁴ந்தோ ஸமணப்³ராஹ்மணா அஸஞ்ஞிங் அத்தானங் பஞ்ஞபெந்தி அரோக³ங் பரங் மரணா தேஸமேதே படிக்கோஸந்தி, யேபி தே பொ⁴ந்தோ ஸமணப்³ராஹ்மணா நேவஸஞ்ஞீனாஸஞ்ஞிங் அத்தானங் பஞ்ஞபெந்தி அரோக³ங் பரங் மரணா தேஸமேதே படிக்கோஸந்தி. தங் கிஸ்ஸ ஹேது? ஸப்³பே³பிமே பொ⁴ந்தோ ஸமணப்³ராஹ்மணா உத்³த⁴ங் ஸரங் 27 ஆஸத்திங்யேவ அபி⁴வத³ந்தி – ‘இதி பேச்ச ப⁴விஸ்ஸாம, இதி பேச்ச ப⁴விஸ்ஸாமா’தி. ஸெய்யதா²பி நாம வாணிஜஸ்ஸ வாணிஜ்ஜாய க³ச்ச²தோ ஏவங் ஹோதி – ‘இதோ மே இத³ங் ப⁴விஸ்ஸதி, இமினா இத³ங் லச்சா²மீ’தி, ஏவமேவிமே பொ⁴ந்தோ ஸமணப்³ராஹ்மணா வாணிஜூபமா மஞ்ஞே படிப⁴ந்தி – ‘இதி பேச்ச ப⁴விஸ்ஸாம, இதி பேச்ச ப⁴விஸ்ஸாமா’தி. தயித³ங், பி⁴க்க²வே, ததா²க³தோ அபி⁴ஜானாதி. யே கோ² தே பொ⁴ந்தோ ஸமணப்³ராஹ்மணா ஸதோ ஸத்தஸ்ஸ உச்சே²த³ங் வினாஸங் விப⁴வங் பஞ்ஞபெந்தி தே ஸக்காயப⁴யா ஸக்காயபரிஜேகு³ச்சா² ஸக்காயஞ்ஞேவ அனுபரிதா⁴வந்தி அனுபரிவத்தந்தி. ஸெய்யதா²பி நாம ஸா க³த்³து³லப³த்³தோ⁴ த³ள்ஹே த²ம்பே⁴ வா கி²லே 28 வா உபனிப³த்³தோ⁴ , தமேவ த²ம்ப⁴ங் வா கி²லங் வா அனுபரிதா⁴வதி அனுபரிவத்ததி ; ஏவமேவிமே பொ⁴ந்தோ ஸமணப்³ராஹ்மணா ஸக்காயப⁴யா ஸக்காயபரிஜேகு³ச்சா² ஸக்காயஞ்ஞேவ அனுபரிதா⁴வந்தி அனுபரிவத்தந்தி. ‘தயித³ங் ஸங்க²தங் ஓளாரிகங் அத்தி² கோ² பன ஸங்கா²ரானங் நிரோதோ⁴ அத்தே²த’ந்தி – இதி விதி³த்வா தஸ்ஸ நிஸ்ஸரணத³ஸ்ஸாவீ ததா²க³தோ தது³பாதிவத்தோ.
25. ‘‘Tatra, bhikkhave, ye te samaṇabrāhmaṇā sato sattassa ucchedaṃ vināsaṃ vibhavaṃ paññapenti , tatra, bhikkhave, ye te samaṇabrāhmaṇā saññiṃ attānaṃ paññapenti arogaṃ paraṃ maraṇā tesamete paṭikkosanti, yepi te bhonto samaṇabrāhmaṇā asaññiṃ attānaṃ paññapenti arogaṃ paraṃ maraṇā tesamete paṭikkosanti, yepi te bhonto samaṇabrāhmaṇā nevasaññīnāsaññiṃ attānaṃ paññapenti arogaṃ paraṃ maraṇā tesamete paṭikkosanti. Taṃ kissa hetu? Sabbepime bhonto samaṇabrāhmaṇā uddhaṃ saraṃ 29 āsattiṃyeva abhivadanti – ‘iti pecca bhavissāma, iti pecca bhavissāmā’ti. Seyyathāpi nāma vāṇijassa vāṇijjāya gacchato evaṃ hoti – ‘ito me idaṃ bhavissati, iminā idaṃ lacchāmī’ti, evamevime bhonto samaṇabrāhmaṇā vāṇijūpamā maññe paṭibhanti – ‘iti pecca bhavissāma, iti pecca bhavissāmā’ti. Tayidaṃ, bhikkhave, tathāgato abhijānāti. Ye kho te bhonto samaṇabrāhmaṇā sato sattassa ucchedaṃ vināsaṃ vibhavaṃ paññapenti te sakkāyabhayā sakkāyaparijegucchā sakkāyaññeva anuparidhāvanti anuparivattanti. Seyyathāpi nāma sā gaddulabaddho daḷhe thambhe vā khile 30 vā upanibaddho , tameva thambhaṃ vā khilaṃ vā anuparidhāvati anuparivattati ; evamevime bhonto samaṇabrāhmaṇā sakkāyabhayā sakkāyaparijegucchā sakkāyaññeva anuparidhāvanti anuparivattanti. ‘Tayidaṃ saṅkhataṃ oḷārikaṃ atthi kho pana saṅkhārānaṃ nirodho attheta’nti – iti viditvā tassa nissaraṇadassāvī tathāgato tadupātivatto.
26. ‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா அபரந்தகப்பிகா அபரந்தானுதி³ட்டி²னோ அபரந்தங் ஆரப்³ப⁴ அனேகவிஹிதானி அதி⁴வுத்திபதா³னி அபி⁴வத³ந்தி, ஸப்³பே³ தே இமானேவ பஞ்சாயதனானி அபி⁴வத³ந்தி ஏதேஸங் வா அஞ்ஞதரங்.
26. ‘‘Ye hi keci, bhikkhave, samaṇā vā brāhmaṇā vā aparantakappikā aparantānudiṭṭhino aparantaṃ ārabbha anekavihitāni adhivuttipadāni abhivadanti, sabbe te imāneva pañcāyatanāni abhivadanti etesaṃ vā aññataraṃ.
27. ‘‘ஸந்தி, பி⁴க்க²வே, ஏகே ஸமணப்³ராஹ்மணா புப்³ப³ந்தகப்பிகா புப்³ப³ந்தானுதி³ட்டி²னோ புப்³ப³ந்தங் ஆரப்³ப⁴ அனேகவிஹிதானி அதி⁴வுத்திபதா³னி அபி⁴வத³ந்தி. ‘ஸஸ்ஸதோ அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி, ‘அஸஸ்ஸதோ அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி, ‘ஸஸ்ஸதோ ச அஸஸ்ஸதோ ச அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி, ‘நேவஸஸ்ஸதோ நாஸஸ்ஸதோ அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி, ‘அந்தவா அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி, ‘அனந்தவா அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி, ‘அந்தவா ச அனந்தவா ச அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி, ‘நேவந்தவா நானந்தவா அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி, ‘ஏகத்தஸஞ்ஞீ அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி, ‘நானத்தஸஞ்ஞீ அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி, ‘பரித்தஸஞ்ஞீ அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி, ‘அப்பமாணஸஞ்ஞீ அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி, ‘ஏகந்தஸுகீ² அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி, ‘ஏகந்தது³க்கீ² அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி, ‘ஸுக²து³க்கீ² அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி, ‘அது³க்க²மஸுகீ² அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி – இத்தே²கே அபி⁴வத³ந்தி.
27. ‘‘Santi, bhikkhave, eke samaṇabrāhmaṇā pubbantakappikā pubbantānudiṭṭhino pubbantaṃ ārabbha anekavihitāni adhivuttipadāni abhivadanti. ‘Sassato attā ca loko ca, idameva saccaṃ moghamañña’nti – ittheke abhivadanti, ‘asassato attā ca loko ca, idameva saccaṃ moghamañña’nti – ittheke abhivadanti, ‘sassato ca asassato ca attā ca loko ca, idameva saccaṃ moghamañña’nti – ittheke abhivadanti, ‘nevasassato nāsassato attā ca loko ca, idameva saccaṃ moghamañña’nti – ittheke abhivadanti, ‘antavā attā ca loko ca, idameva saccaṃ moghamañña’nti – ittheke abhivadanti, ‘anantavā attā ca loko ca, idameva saccaṃ moghamañña’nti – ittheke abhivadanti, ‘antavā ca anantavā ca attā ca loko ca, idameva saccaṃ moghamañña’nti – ittheke abhivadanti, ‘nevantavā nānantavā attā ca loko ca, idameva saccaṃ moghamañña’nti – ittheke abhivadanti, ‘ekattasaññī attā ca loko ca, idameva saccaṃ moghamañña’nti – ittheke abhivadanti, ‘nānattasaññī attā ca loko ca, idameva saccaṃ moghamañña’nti – ittheke abhivadanti, ‘parittasaññī attā ca loko ca, idameva saccaṃ moghamañña’nti – ittheke abhivadanti, ‘appamāṇasaññī attā ca loko ca, idameva saccaṃ moghamañña’nti – ittheke abhivadanti, ‘ekantasukhī attā ca loko ca, idameva saccaṃ moghamañña’nti – ittheke abhivadanti, ‘ekantadukkhī attā ca loko ca, idameva saccaṃ moghamañña’nti – ittheke abhivadanti, ‘sukhadukkhī attā ca loko ca, idameva saccaṃ moghamañña’nti – ittheke abhivadanti, ‘adukkhamasukhī attā ca loko ca, idameva saccaṃ moghamañña’nti – ittheke abhivadanti.
28. ‘‘தத்ர , பி⁴க்க²வே, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘ஸஸ்ஸதோ அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி , தேஸங் வத அஞ்ஞத்ரேவ ஸத்³தா⁴ய அஞ்ஞத்ர ருசியா அஞ்ஞத்ர அனுஸ்ஸவா அஞ்ஞத்ர ஆகாரபரிவிதக்கா அஞ்ஞத்ர தி³ட்டி²னிஜ்ஜா²னக்க²ந்தியா பச்சத்தங்யேவ ஞாணங் ப⁴விஸ்ஸதி பரிஸுத்³த⁴ங் பரியோதா³தந்தி – நேதங் டா²னங் விஜ்ஜதி. பச்சத்தங் கோ² பன, பி⁴க்க²வே, ஞாணே அஸதி பரிஸுத்³தே⁴ பரியோதா³தே யத³பி 31 தே பொ⁴ந்தோ ஸமணப்³ராஹ்மணா தத்த² ஞாணபா⁴க³மத்தமேவ பரியோத³பெந்தி தத³பி தேஸங் ப⁴வதங் ஸமணப்³ராஹ்மணானங் உபாதா³னமக்கா²யதி. ‘தயித³ங் ஸங்க²தங் ஓளாரிகங் அத்தி² கோ² பன ஸங்கா²ரானங் நிரோதோ⁴ அத்தே²த’ந்தி – இதி விதி³த்வா தஸ்ஸ நிஸ்ஸரணத³ஸ்ஸாவீ ததா²க³தோ தது³பாதிவத்தோ.
28. ‘‘Tatra , bhikkhave, ye te samaṇabrāhmaṇā evaṃvādino evaṃdiṭṭhino – ‘sassato attā ca loko ca, idameva saccaṃ moghamañña’nti , tesaṃ vata aññatreva saddhāya aññatra ruciyā aññatra anussavā aññatra ākāraparivitakkā aññatra diṭṭhinijjhānakkhantiyā paccattaṃyeva ñāṇaṃ bhavissati parisuddhaṃ pariyodātanti – netaṃ ṭhānaṃ vijjati. Paccattaṃ kho pana, bhikkhave, ñāṇe asati parisuddhe pariyodāte yadapi 32 te bhonto samaṇabrāhmaṇā tattha ñāṇabhāgamattameva pariyodapenti tadapi tesaṃ bhavataṃ samaṇabrāhmaṇānaṃ upādānamakkhāyati. ‘Tayidaṃ saṅkhataṃ oḷārikaṃ atthi kho pana saṅkhārānaṃ nirodho attheta’nti – iti viditvā tassa nissaraṇadassāvī tathāgato tadupātivatto.
29. ‘‘தத்ர, பி⁴க்க²வே, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘அஸஸ்ஸதோ அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி…பே॰… 33 ஸஸ்ஸதோ ச அஸஸ்ஸதோ ச அத்தா ச லோகோ ச… நேவஸஸ்ஸதோ நாஸஸ்ஸதோ அத்தா ச லோகோ ச… அந்தவா அத்தா ச லோகோ ச… அனந்தவா அத்தா ச லோகோ ச… அந்தவா ச அனந்தவா ச அத்தா ச லோகோ ச… நேவந்தவா நானந்தவா அத்தா ச லோகோ ச… ஏகத்தஸஞ்ஞீ அத்தா ச லோகோ ச… நானத்தஸஞ்ஞீ அத்தா ச லோகோ ச… பரித்தஸஞ்ஞீ அத்தா ச லோகோ ச… அப்பமாணஸஞ்ஞீ அத்தா ச லோகோ ச… ஏகந்தஸுகீ² அத்தா ச லோகோ ச… ஏகந்தது³க்கீ² அத்தா ச லோகோ ச… ஸுக²து³க்கீ² அத்தா ச லோகோ ச… அது³க்க²மஸுகீ² அத்தா ச லோகோ ச, இத³மேவ ஸச்சங் மோக⁴மஞ்ஞந்தி, தேஸங் வத அஞ்ஞத்ரேவ ஸத்³தா⁴ய அஞ்ஞத்ர ருசியா அஞ்ஞத்ர அனுஸ்ஸவா அஞ்ஞத்ர ஆகாரபரிவிதக்கா அஞ்ஞத்ர தி³ட்டி²னிஜ்ஜா²னக்க²ந்தியா பச்சத்தங்யேவ ஞாணங் ப⁴விஸ்ஸதி பரிஸுத்³த⁴ங் பரியோதா³தந்தி – நேதங் டா²னங் விஜ்ஜதி. பச்சத்தங் கோ² பன, பி⁴க்க²வே, ஞாணே அஸதி பரிஸுத்³தே⁴ பரியோதா³தே யத³பி தே பொ⁴ந்தோ ஸமணப்³ராஹ்மணா தத்த² ஞாணபா⁴க³மத்தமேவ பரியோத³பெந்தி தத³பி தேஸங் ப⁴வதங் ஸமணப்³ராஹ்மணானங் உபாதா³னமக்கா²யதி. ‘தயித³ங் ஸங்க²தங் ஓளாரிகங் அத்தி² கோ² பன ஸங்கா²ரானங் நிரோதோ⁴ அத்தே²த’ந்தி – இதி விதி³த்வா தஸ்ஸ நிஸ்ஸரணத³ஸ்ஸாவீ ததா²க³தோ தது³பாதிவத்தோ.
29. ‘‘Tatra, bhikkhave, ye te samaṇabrāhmaṇā evaṃvādino evaṃdiṭṭhino – ‘asassato attā ca loko ca, idameva saccaṃ moghamañña’nti…pe… 34 sassato ca asassato ca attā ca loko ca… nevasassato nāsassato attā ca loko ca… antavā attā ca loko ca… anantavā attā ca loko ca… antavā ca anantavā ca attā ca loko ca… nevantavā nānantavā attā ca loko ca… ekattasaññī attā ca loko ca… nānattasaññī attā ca loko ca… parittasaññī attā ca loko ca… appamāṇasaññī attā ca loko ca… ekantasukhī attā ca loko ca… ekantadukkhī attā ca loko ca… sukhadukkhī attā ca loko ca… adukkhamasukhī attā ca loko ca, idameva saccaṃ moghamaññanti, tesaṃ vata aññatreva saddhāya aññatra ruciyā aññatra anussavā aññatra ākāraparivitakkā aññatra diṭṭhinijjhānakkhantiyā paccattaṃyeva ñāṇaṃ bhavissati parisuddhaṃ pariyodātanti – netaṃ ṭhānaṃ vijjati. Paccattaṃ kho pana, bhikkhave, ñāṇe asati parisuddhe pariyodāte yadapi te bhonto samaṇabrāhmaṇā tattha ñāṇabhāgamattameva pariyodapenti tadapi tesaṃ bhavataṃ samaṇabrāhmaṇānaṃ upādānamakkhāyati. ‘Tayidaṃ saṅkhataṃ oḷārikaṃ atthi kho pana saṅkhārānaṃ nirodho attheta’nti – iti viditvā tassa nissaraṇadassāvī tathāgato tadupātivatto.
30. ‘‘இத⁴ , பி⁴க்க²வே, ஏகச்சோ ஸமணோ வா ப்³ராஹ்மணோ வா புப்³ப³ந்தானுதி³ட்டீ²னஞ்ச படினிஸ்ஸக்³கா³, அபரந்தானுதி³ட்டீ²னஞ்ச படினிஸ்ஸக்³கா³, ஸப்³ப³ஸோ காமஸங்யோஜனானங் அனதி⁴ட்டா²னா, பவிவேகங் பீதிங் உபஸம்பஜ்ஜ விஹரதி – ‘ஏதங் ஸந்தங் ஏதங் பணீதங் யதி³த³ங் பவிவேகங் பீதிங் உபஸம்பஜ்ஜ விஹராமீ’தி. தஸ்ஸ ஸா பவிவேகா பீதி நிருஜ்ஜ²தி. பவிவேகாய பீதியா நிரோதா⁴ உப்பஜ்ஜதி தோ³மனஸ்ஸங், தோ³மனஸ்ஸஸ்ஸ நிரோதா⁴ உப்பஜ்ஜதி பவிவேகா பீதி. ஸெய்யதா²பி, பி⁴க்க²வே, யங் சா²யா ஜஹதி தங் ஆதபோ ப²ரதி, யங் ஆதபோ ஜஹதி தங் சா²யா ப²ரதி; ஏவமேவ கோ², பி⁴க்க²வே, பவிவேகாய பீதியா நிரோதா⁴ உப்பஜ்ஜதி தோ³மனஸ்ஸங், தோ³மனஸ்ஸஸ்ஸ நிரோதா⁴ உப்பஜ்ஜதி பவிவேகா பீதி. தயித³ங், பி⁴க்க²வே, ததா²க³தோ அபி⁴ஜானாதி. அயங் கோ² ப⁴வங் ஸமணோ வா ப்³ராஹ்மணோ வா புப்³ப³ந்தானுதி³ட்டீ²னஞ்ச படினிஸ்ஸக்³கா³ , அபரந்தானுதி³ட்டீ²னஞ்ச படினிஸ்ஸக்³கா³, ஸப்³ப³ஸோ காமஸங்யோஜனானங் அனதி⁴ட்டா²னா, பவிவேகங் பீதிங் உபஸம்பஜ்ஜ விஹரதி – ‘ஏதங் ஸந்தங் ஏதங் பணீதங் யதி³த³ங் பவிவேகங் பீதிங் உபஸம்பஜ்ஜ விஹராமீ’தி. தஸ்ஸ ஸா பவிவேகா பீதி நிருஜ்ஜ²தி. பவிவேகாய பீதியா நிரோதா⁴ உப்பஜ்ஜதி தோ³மனஸ்ஸங், தோ³மனஸ்ஸஸ்ஸ நிரோதா⁴ உப்பஜ்ஜதி பவிவேகா பீதி. ‘தயித³ங் ஸங்க²தங் ஓளாரிகங் அத்தி² கோ² பன ஸங்கா²ரானங் நிரோதோ⁴ அத்தே²த’ந்தி – இதி விதி³த்வா தஸ்ஸ நிஸ்ஸரணத³ஸ்ஸாவீ ததா²க³தோ தது³பாதிவத்தோ.
30. ‘‘Idha , bhikkhave, ekacco samaṇo vā brāhmaṇo vā pubbantānudiṭṭhīnañca paṭinissaggā, aparantānudiṭṭhīnañca paṭinissaggā, sabbaso kāmasaṃyojanānaṃ anadhiṭṭhānā, pavivekaṃ pītiṃ upasampajja viharati – ‘etaṃ santaṃ etaṃ paṇītaṃ yadidaṃ pavivekaṃ pītiṃ upasampajja viharāmī’ti. Tassa sā pavivekā pīti nirujjhati. Pavivekāya pītiyā nirodhā uppajjati domanassaṃ, domanassassa nirodhā uppajjati pavivekā pīti. Seyyathāpi, bhikkhave, yaṃ chāyā jahati taṃ ātapo pharati, yaṃ ātapo jahati taṃ chāyā pharati; evameva kho, bhikkhave, pavivekāya pītiyā nirodhā uppajjati domanassaṃ, domanassassa nirodhā uppajjati pavivekā pīti. Tayidaṃ, bhikkhave, tathāgato abhijānāti. Ayaṃ kho bhavaṃ samaṇo vā brāhmaṇo vā pubbantānudiṭṭhīnañca paṭinissaggā , aparantānudiṭṭhīnañca paṭinissaggā, sabbaso kāmasaṃyojanānaṃ anadhiṭṭhānā, pavivekaṃ pītiṃ upasampajja viharati – ‘etaṃ santaṃ etaṃ paṇītaṃ yadidaṃ pavivekaṃ pītiṃ upasampajja viharāmī’ti. Tassa sā pavivekā pīti nirujjhati. Pavivekāya pītiyā nirodhā uppajjati domanassaṃ, domanassassa nirodhā uppajjati pavivekā pīti. ‘Tayidaṃ saṅkhataṃ oḷārikaṃ atthi kho pana saṅkhārānaṃ nirodho attheta’nti – iti viditvā tassa nissaraṇadassāvī tathāgato tadupātivatto.
31. ‘‘இத⁴ பன, பி⁴க்க²வே, ஏகச்சோ ஸமணோ வா ப்³ராஹ்மணோ வா புப்³ப³ந்தானுதி³ட்டீ²னஞ்ச படினிஸ்ஸக்³கா³, அபரந்தானுதி³ட்டீ²னஞ்ச படினிஸ்ஸக்³கா³, ஸப்³ப³ஸோ காமஸங்யோஜனானங் அனதி⁴ட்டா²னா, பவிவேகாய பீதியா ஸமதிக்கமா நிராமிஸங் ஸுக²ங் உபஸம்பஜ்ஜ விஹரதி – ‘ஏதங் ஸந்தங் ஏதங் பணீதங் யதி³த³ங் நிராமிஸங் ஸுக²ங் உபஸம்பஜ்ஜ விஹராமீ’தி. தஸ்ஸ தங் நிராமிஸங் ஸுக²ங் நிருஜ்ஜ²தி. நிராமிஸஸ்ஸ ஸுக²ஸ்ஸ நிரோதா⁴ உப்பஜ்ஜதி பவிவேகா பீதி, பவிவேகாய பீதியா நிரோதா⁴ உப்பஜ்ஜதி நிராமிஸங் ஸுக²ங் . ஸெய்யதா²பி, பி⁴க்க²வே, யங் சா²யா ஜஹதி தங் ஆதபோ ப²ரதி, யங் ஆதபோ ஜஹதி தங் சா²யா ப²ரதி; ஏவமேவ கோ², பி⁴க்க²வே, நிராமிஸஸ்ஸ ஸுக²ஸ்ஸ நிரோதா⁴ உப்பஜ்ஜதி பவிவேகா பீதி, பவிவேகாய பீதியா நிரோதா⁴ உப்பஜ்ஜதி நிராமிஸங் ஸுக²ங். தயித³ங், பி⁴க்க²வே, ததா²க³தோ அபி⁴ஜானாதி. அயங் கோ² ப⁴வங் ஸமணோ வா ப்³ராஹ்மணோ வா புப்³ப³ந்தானுதி³ட்டீ²னஞ்ச படினிஸ்ஸக்³கா³, அபரந்தானுதி³ட்டீ²னஞ்ச படினிஸ்ஸக்³கா³, ஸப்³ப³ஸோ காமஸங்யோஜனானங் அனதி⁴ட்டா²னா , பவிவேகாய பீதியா ஸமதிக்கமா, நிராமிஸங் ஸுக²ங் உபஸம்பஜ்ஜ விஹரதி – ‘ஏதங் ஸந்தங் ஏதங் பணீதங் யதி³த³ங் நிராமிஸங் ஸுக²ங் உபஸம்பஜ்ஜ விஹராமீ’தி. தஸ்ஸ தங் நிராமிஸங் ஸுக²ங் நிருஜ்ஜ²தி. நிராமிஸஸ்ஸ ஸுக²ஸ்ஸ நிரோதா⁴ உப்பஜ்ஜதி பவிவேகா பீதி, பவிவேகாய பீதியா நிரோதா⁴ உப்பஜ்ஜதி நிராமிஸங் ஸுக²ங். ‘தயித³ங் ஸங்க²தங் ஓளாரிகங் அத்தி² கோ² பன ஸங்கா²ரானங் நிரோதோ⁴ அத்தே²த’ந்தி – இதி விதி³த்வா தஸ்ஸ நிஸ்ஸரணத³ஸ்ஸாவீ ததா²க³தோ தது³பாதிவத்தோ.
31. ‘‘Idha pana, bhikkhave, ekacco samaṇo vā brāhmaṇo vā pubbantānudiṭṭhīnañca paṭinissaggā, aparantānudiṭṭhīnañca paṭinissaggā, sabbaso kāmasaṃyojanānaṃ anadhiṭṭhānā, pavivekāya pītiyā samatikkamā nirāmisaṃ sukhaṃ upasampajja viharati – ‘etaṃ santaṃ etaṃ paṇītaṃ yadidaṃ nirāmisaṃ sukhaṃ upasampajja viharāmī’ti. Tassa taṃ nirāmisaṃ sukhaṃ nirujjhati. Nirāmisassa sukhassa nirodhā uppajjati pavivekā pīti, pavivekāya pītiyā nirodhā uppajjati nirāmisaṃ sukhaṃ . Seyyathāpi, bhikkhave, yaṃ chāyā jahati taṃ ātapo pharati, yaṃ ātapo jahati taṃ chāyā pharati; evameva kho, bhikkhave, nirāmisassa sukhassa nirodhā uppajjati pavivekā pīti, pavivekāya pītiyā nirodhā uppajjati nirāmisaṃ sukhaṃ. Tayidaṃ, bhikkhave, tathāgato abhijānāti. Ayaṃ kho bhavaṃ samaṇo vā brāhmaṇo vā pubbantānudiṭṭhīnañca paṭinissaggā, aparantānudiṭṭhīnañca paṭinissaggā, sabbaso kāmasaṃyojanānaṃ anadhiṭṭhānā , pavivekāya pītiyā samatikkamā, nirāmisaṃ sukhaṃ upasampajja viharati – ‘etaṃ santaṃ etaṃ paṇītaṃ yadidaṃ nirāmisaṃ sukhaṃ upasampajja viharāmī’ti. Tassa taṃ nirāmisaṃ sukhaṃ nirujjhati. Nirāmisassa sukhassa nirodhā uppajjati pavivekā pīti, pavivekāya pītiyā nirodhā uppajjati nirāmisaṃ sukhaṃ. ‘Tayidaṃ saṅkhataṃ oḷārikaṃ atthi kho pana saṅkhārānaṃ nirodho attheta’nti – iti viditvā tassa nissaraṇadassāvī tathāgato tadupātivatto.
32. ‘‘இத⁴ பன, பி⁴க்க²வே, ஏகச்சோ ஸமணோ வா ப்³ராஹ்மணோ வா புப்³ப³ந்தானுதி³ட்டீ²னஞ்ச படினிஸ்ஸக்³கா³, அபரந்தானுதி³ட்டீ²னஞ்ச படினிஸ்ஸக்³கா³, ஸப்³ப³ஸோ காமஸங்யோஜனானங் அனதி⁴ட்டா²னா, பவிவேகாய பீதியா ஸமதிக்கமா, நிராமிஸஸ்ஸ ஸுக²ஸ்ஸ ஸமதிக்கமா, அது³க்க²மஸுக²ங் வேத³னங் உபஸம்பஜ்ஜ விஹரதி – ‘ஏதங் ஸந்தங் ஏதங் பணீதங் யதி³த³ங் அது³க்க²மஸுக²ங் வேத³னங் உபஸம்பஜ்ஜ விஹராமீ’தி. தஸ்ஸ ஸா அது³க்க²மஸுகா² வேத³னா நிருஜ்ஜ²தி. அது³க்க²மஸுகா²ய வேத³னாய நிரோதா⁴ உப்பஜ்ஜதி நிராமிஸங் ஸுக²ங், நிராமிஸஸ்ஸ ஸுக²ஸ்ஸ நிரோதா⁴ உப்பஜ்ஜதி அது³க்க²மஸுகா² வேத³னா. ஸெய்யதா²பி, பி⁴க்க²வே, யங் சா²யா ஜஹதி தங் ஆதபோ ப²ரதி, யங் ஆதபோ ஜஹதி தங் சா²யா ப²ரதி; ஏவமேவ கோ², பி⁴க்க²வே, அது³க்க²மஸுகா²ய வேத³னாய நிரோதா⁴ உப்பஜ்ஜதி நிராமிஸங் ஸுக²ங், நிராமிஸஸ்ஸ ஸுக²ஸ்ஸ நிரோதா⁴ உப்பஜ்ஜதி அது³க்க²மஸுகா² வேத³னா. தயித³ங், பி⁴க்க²வே, ததா²க³தோ அபி⁴ஜானாதி. அயங் கோ² ப⁴வங் ஸமணோ வா ப்³ராஹ்மணோ வா புப்³ப³ந்தானுதி³ட்டீ²னஞ்ச படினிஸ்ஸக்³கா³ , அபரந்தானுதி³ட்டீ²னஞ்ச படினிஸ்ஸக்³கா³, ஸப்³ப³ஸோ காமஸங்யோஜனானங் அனதி⁴ட்டா²னா, பவிவேகாய பீதியா ஸமதிக்கமா, நிராமிஸஸ்ஸ ஸுக²ஸ்ஸ ஸமதிக்கமா, அது³க்க²மஸுக²ங் வேத³னங் உபஸம்பஜ்ஜ விஹரதி – ‘ஏதங் ஸந்தங் ஏதங் பணீதங் யதி³த³ங் அது³க்க²மஸுக²ங் வேத³னங் உபஸம்பஜ்ஜ விஹராமீ’தி. தஸ்ஸ ஸா அது³க்க²மஸுகா² வேத³னா நிருஜ்ஜ²தி. அது³க்க²மஸுகா²ய வேத³னாய நிரோதா⁴ உப்பஜ்ஜதி நிராமிஸங் ஸுக²ங், நிராமிஸஸ்ஸ ஸுக²ஸ்ஸ நிரோதா⁴ உப்பஜ்ஜதி அது³க்க²மஸுகா² வேத³னா. ‘தயித³ங் ஸங்க²தங் ஓளாரிகங் அத்தி² கோ² பன ஸங்கா²ரானங் நிரோதோ⁴ அத்தே²த’ந்தி – இதி விதி³த்வா தஸ்ஸ நிஸ்ஸரணத³ஸ்ஸாவீ ததா²க³தோ தது³பாதிவத்தோ.
32. ‘‘Idha pana, bhikkhave, ekacco samaṇo vā brāhmaṇo vā pubbantānudiṭṭhīnañca paṭinissaggā, aparantānudiṭṭhīnañca paṭinissaggā, sabbaso kāmasaṃyojanānaṃ anadhiṭṭhānā, pavivekāya pītiyā samatikkamā, nirāmisassa sukhassa samatikkamā, adukkhamasukhaṃ vedanaṃ upasampajja viharati – ‘etaṃ santaṃ etaṃ paṇītaṃ yadidaṃ adukkhamasukhaṃ vedanaṃ upasampajja viharāmī’ti. Tassa sā adukkhamasukhā vedanā nirujjhati. Adukkhamasukhāya vedanāya nirodhā uppajjati nirāmisaṃ sukhaṃ, nirāmisassa sukhassa nirodhā uppajjati adukkhamasukhā vedanā. Seyyathāpi, bhikkhave, yaṃ chāyā jahati taṃ ātapo pharati, yaṃ ātapo jahati taṃ chāyā pharati; evameva kho, bhikkhave, adukkhamasukhāya vedanāya nirodhā uppajjati nirāmisaṃ sukhaṃ, nirāmisassa sukhassa nirodhā uppajjati adukkhamasukhā vedanā. Tayidaṃ, bhikkhave, tathāgato abhijānāti. Ayaṃ kho bhavaṃ samaṇo vā brāhmaṇo vā pubbantānudiṭṭhīnañca paṭinissaggā , aparantānudiṭṭhīnañca paṭinissaggā, sabbaso kāmasaṃyojanānaṃ anadhiṭṭhānā, pavivekāya pītiyā samatikkamā, nirāmisassa sukhassa samatikkamā, adukkhamasukhaṃ vedanaṃ upasampajja viharati – ‘etaṃ santaṃ etaṃ paṇītaṃ yadidaṃ adukkhamasukhaṃ vedanaṃ upasampajja viharāmī’ti. Tassa sā adukkhamasukhā vedanā nirujjhati. Adukkhamasukhāya vedanāya nirodhā uppajjati nirāmisaṃ sukhaṃ, nirāmisassa sukhassa nirodhā uppajjati adukkhamasukhā vedanā. ‘Tayidaṃ saṅkhataṃ oḷārikaṃ atthi kho pana saṅkhārānaṃ nirodho attheta’nti – iti viditvā tassa nissaraṇadassāvī tathāgato tadupātivatto.
33. ‘‘இத⁴ பன, பி⁴க்க²வே, ஏகச்சோ ஸமணோ வா ப்³ராஹ்மணோ வா புப்³ப³ந்தானுதி³ட்டீ²னஞ்ச படினிஸ்ஸக்³கா³, அபரந்தானுதி³ட்டீ²னஞ்ச படினிஸ்ஸக்³கா³, ஸப்³ப³ஸோ காமஸங்யோஜனானங் அனதி⁴ட்டா²னா, பவிவேகாய பீதியா ஸமதிக்கமா, நிராமிஸஸ்ஸ ஸுக²ஸ்ஸ ஸமதிக்கமா, அது³க்க²மஸுகா²ய வேத³னாய ஸமதிக்கமா – ‘ஸந்தோஹமஸ்மி, நிப்³பு³தோஹமஸ்மி, அனுபாதா³னோஹமஸ்மீ’தி ஸமனுபஸ்ஸதி. தயித³ங், பி⁴க்க²வே, ததா²க³தோ அபி⁴ஜானாதி. அயங் கோ² ப⁴வங் ஸமணோ வா ப்³ராஹ்மணோ வா புப்³ப³ந்தானுதி³ட்டீ²னஞ்ச படினிஸ்ஸக்³கா³, அபரந்தானுதி³ட்டீ²னஞ்ச படினிஸ்ஸக்³கா³, ஸப்³ப³ஸோ காமஸங்யோஜனானங் அனதி⁴ட்டா²னா, பவிவேகாய பீதியா ஸமதிக்கமா, நிராமிஸஸ்ஸ ஸுக²ஸ்ஸ ஸமதிக்கமா, அது³க்க²மஸுகா²ய வேத³னாய ஸமதிக்கமா – ‘ஸந்தோஹமஸ்மி, நிப்³பு³தோஹமஸ்மி, அனுபாதா³னோஹமஸ்மீ’தி ஸமனுபஸ்ஸதி; அத்³தா⁴ அயமாயஸ்மா நிப்³பா³னஸப்பாயங்யேவ படிபத³ங் அபி⁴வத³தி. அத² ச பனாயங் ப⁴வங் ஸமணோ வா ப்³ராஹ்மணோ வா புப்³ப³ந்தானுதி³ட்டி²ங் வா உபாதி³யமானோ உபாதி³யதி, அபரந்தானுதி³ட்டி²ங் வா உபாதி³யமானோ உபாதி³யதி, காமஸங்யோஜனங் வா உபாதி³யமானோ உபாதி³யதி, பவிவேகங் வா பீதிங் உபாதி³யமானோ உபாதி³யதி, நிராமிஸங் வா ஸுக²ங் உபாதி³யமானோ உபாதி³யதி, அது³க்க²மஸுக²ங் வா வேத³னங் உபாதி³யமானோ உபாதி³யதி. யஞ்ச கோ² அயமாயஸ்மா – ‘ஸந்தோஹமஸ்மி, நிப்³பு³தோஹமஸ்மி, அனுபாதா³னோஹமஸ்மீ’தி ஸமனுபஸ்ஸதி தத³பி இமஸ்ஸ போ⁴தோ ஸமணஸ்ஸ ப்³ராஹ்மணஸ்ஸ உபாதா³னமக்கா²யதி. ‘தயித³ங் ஸங்க²தங் ஓளாரிகங் அத்தி² கோ² பன ஸங்கா²ரானங் நிரோதோ⁴ அத்தே²த’ந்தி – இதி விதி³த்வா தஸ்ஸ நிஸ்ஸரணத³ஸ்ஸாவீ ததா²க³தோ தது³பாதிவத்தோ.
33. ‘‘Idha pana, bhikkhave, ekacco samaṇo vā brāhmaṇo vā pubbantānudiṭṭhīnañca paṭinissaggā, aparantānudiṭṭhīnañca paṭinissaggā, sabbaso kāmasaṃyojanānaṃ anadhiṭṭhānā, pavivekāya pītiyā samatikkamā, nirāmisassa sukhassa samatikkamā, adukkhamasukhāya vedanāya samatikkamā – ‘santohamasmi, nibbutohamasmi, anupādānohamasmī’ti samanupassati. Tayidaṃ, bhikkhave, tathāgato abhijānāti. Ayaṃ kho bhavaṃ samaṇo vā brāhmaṇo vā pubbantānudiṭṭhīnañca paṭinissaggā, aparantānudiṭṭhīnañca paṭinissaggā, sabbaso kāmasaṃyojanānaṃ anadhiṭṭhānā, pavivekāya pītiyā samatikkamā, nirāmisassa sukhassa samatikkamā, adukkhamasukhāya vedanāya samatikkamā – ‘santohamasmi, nibbutohamasmi, anupādānohamasmī’ti samanupassati; addhā ayamāyasmā nibbānasappāyaṃyeva paṭipadaṃ abhivadati. Atha ca panāyaṃ bhavaṃ samaṇo vā brāhmaṇo vā pubbantānudiṭṭhiṃ vā upādiyamāno upādiyati, aparantānudiṭṭhiṃ vā upādiyamāno upādiyati, kāmasaṃyojanaṃ vā upādiyamāno upādiyati, pavivekaṃ vā pītiṃ upādiyamāno upādiyati, nirāmisaṃ vā sukhaṃ upādiyamāno upādiyati, adukkhamasukhaṃ vā vedanaṃ upādiyamāno upādiyati. Yañca kho ayamāyasmā – ‘santohamasmi, nibbutohamasmi, anupādānohamasmī’ti samanupassati tadapi imassa bhoto samaṇassa brāhmaṇassa upādānamakkhāyati. ‘Tayidaṃ saṅkhataṃ oḷārikaṃ atthi kho pana saṅkhārānaṃ nirodho attheta’nti – iti viditvā tassa nissaraṇadassāvī tathāgato tadupātivatto.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
Idamavoca bhagavā. Attamanā te bhikkhū bhagavato bhāsitaṃ abhinandunti.
பஞ்சத்தயஸுத்தங் நிட்டி²தங் து³தியங்.
Pañcattayasuttaṃ niṭṭhitaṃ dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 2. பஞ்சத்தயஸுத்தவண்ணனா • 2. Pañcattayasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 2. பஞ்சத்தயஸுத்தவண்ணனா • 2. Pañcattayasuttavaṇṇanā
