| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
2. பஞ்சத்தயஸுத்தவண்ணனா
2. Pañcattayasuttavaṇṇanā
21. ஏவங் மே ஸுதந்தி பஞ்சத்தயஸுத்தங். தத்த² ஏகேதி ஏகச்சே. ஸமணப்³ராஹ்மணாதி பரிப்³ப³ஜுபக³தபா⁴வேன ஸமணா ஜாதியா ப்³ராஹ்மணா, லோகேன வா ஸமணாதி ச ப்³ராஹ்மணாதி ச ஏவங் ஸம்மதா. அபரந்தங் கப்பெத்வா விகப்பெத்வா க³ண்ஹந்தீதி அபரந்தகப்பிகா. அபரந்தகப்போ வா ஏதேஸங் அத்தீ²திபி அபரந்தகப்பிகா. எத்த² ச அந்தோதி ‘‘ஸக்காயோ கோ², ஆவுஸோ, ஏகோ அந்தோ’’திஆதீ³ஸு (அ॰ நி॰ 6.61) விய இத⁴ கொட்டா²ஸோ அதி⁴ப்பேதோ. கப்போதி தண்ஹாதி³ட்டி²யோ. வுத்தம்பி சேதங் ‘‘கப்போதி உத்³தா³னதோ த்³வே கப்பா தண்ஹாகப்போ ச தி³ட்டி²கப்போ சா’’தி. தஸ்மா தண்ஹாதி³ட்டி²வஸேன அனாக³தங் க²ந்த⁴கொட்டா²ஸங் கப்பெத்வா டி²தாதி அபரந்தகப்பிகாதி ஏவமெத்த² அத்தோ² த³ட்ட²ப்³போ³. தேஸங் ஏவங் அபரந்தங் கப்பெத்வா டி²தானங் புனப்புனங் உப்பஜ்ஜனவஸேன அபரந்தமேவ அனுக³தா தி³ட்டீ²தி அபரந்தானுதி³ட்டி²னோ. தே ஏவங்தி³ட்டி²னோ தங் அபரந்தங் ஆரப்³ப⁴ ஆக³ம்ம படிச்ச அஞ்ஞம்பி ஜனங் தி³ட்டி²க³திகங் கரொந்தா அனேகவிஹிதானி அதி⁴வுத்திபதா³னி அபி⁴வத³ந்தி. அனேகவிஹிதானீதி அனேகவிதா⁴னி. அதி⁴வுத்திபதா³னீதி அதி⁴வசனபதா³னி. அத² வா பூ⁴தமத்த²ங் அதி⁴ப⁴வித்வா யதா²ஸபா⁴வதோ அக்³க³ஹெத்வா வத்தனதோ அதி⁴வுத்தியோதி தி³ட்டி²யோ வுச்சந்தி, அதி⁴வுத்தீனங் பதா³னி அதி⁴வுத்திபதா³னி, தி³ட்டி²தீ³பகானி வசனானீதி அத்தோ².
21.Evaṃme sutanti pañcattayasuttaṃ. Tattha eketi ekacce. Samaṇabrāhmaṇāti paribbajupagatabhāvena samaṇā jātiyā brāhmaṇā, lokena vā samaṇāti ca brāhmaṇāti ca evaṃ sammatā. Aparantaṃ kappetvā vikappetvā gaṇhantīti aparantakappikā. Aparantakappo vā etesaṃ atthītipi aparantakappikā. Ettha ca antoti ‘‘sakkāyo kho, āvuso, eko anto’’tiādīsu (a. ni. 6.61) viya idha koṭṭhāso adhippeto. Kappoti taṇhādiṭṭhiyo. Vuttampi cetaṃ ‘‘kappoti uddānato dve kappā taṇhākappo ca diṭṭhikappo cā’’ti. Tasmā taṇhādiṭṭhivasena anāgataṃ khandhakoṭṭhāsaṃ kappetvā ṭhitāti aparantakappikāti evamettha attho daṭṭhabbo. Tesaṃ evaṃ aparantaṃ kappetvā ṭhitānaṃ punappunaṃ uppajjanavasena aparantameva anugatā diṭṭhīti aparantānudiṭṭhino. Te evaṃdiṭṭhino taṃ aparantaṃ ārabbha āgamma paṭicca aññampi janaṃ diṭṭhigatikaṃ karontā anekavihitāni adhivuttipadāni abhivadanti. Anekavihitānīti anekavidhāni. Adhivuttipadānīti adhivacanapadāni. Atha vā bhūtamatthaṃ adhibhavitvā yathāsabhāvato aggahetvā vattanato adhivuttiyoti diṭṭhiyo vuccanti, adhivuttīnaṃ padāni adhivuttipadāni, diṭṭhidīpakāni vacanānīti attho.
ஸஞ்ஞீதி ஸஞ்ஞாஸமங்கீ³. அரோகோ³தி நிச்சோ. இத்தே²கேதி இத்த²ங் ஏகே, ஏவமேகேதி அத்தோ². இமினா ஸோளஸ ஸஞ்ஞீவாதா³ கதி²தா, அஸஞ்ஞீதி இமினா அட்ட² அஸஞ்ஞீவாதா³, நேவஸஞ்ஞீனாஸஞ்ஞீதி இமினா அட்ட² நேவஸஞ்ஞீனாஸஞ்ஞீவாதா³, ஸதோ வா பன ஸத்தஸ்ஸாதி இமினா ஸத்த உச்சே²த³வாதா³. தத்த² ஸதோதி விஜ்ஜமானஸ்ஸ. உச்சே²த³ந்தி உபச்சே²த³ங். வினாஸந்தி அத³ஸ்ஸனங். விப⁴வந்தி ப⁴வவிக³மங். ஸப்³பா³னேதானி அஞ்ஞமஞ்ஞவேவசனானேவ. தி³ட்ட²த⁴ம்மனிப்³பா³னங் வாதி இமினா பஞ்ச தி³ட்ட²த⁴ம்மனிப்³பா³னவாதா³ கதி²தா. தத்த² தி³ட்ட²த⁴ம்மோதி பச்சக்க²த⁴ம்மோ வுச்சதி, தத்த² தத்த² படிலத்³த⁴அத்தபா⁴வஸ்ஸேதங் அதி⁴வசனங். தி³ட்ட²த⁴ம்மே நிப்³பா³னங் தி³ட்ட²த⁴ம்மனிப்³பா³னங், இமஸ்மிங்யேவ அத்தபா⁴வே து³க்க²வூபஸமந்தி அத்தோ². ஸந்தங் வாதி ஸஞ்ஞீதிஆதி³வஸேன தீஹாகாரேஹி ஸந்தங். தீணி ஹொந்தீதி ஸஞ்ஞீ அத்தாதிஆதீ³னி ஸந்தஅத்தவஸேன ஏகங், இதரானி த்³வேதி ஏவங் தீணி.
Saññīti saññāsamaṅgī. Arogoti nicco. Ittheketi itthaṃ eke, evameketi attho. Iminā soḷasa saññīvādā kathitā, asaññīti iminā aṭṭha asaññīvādā, nevasaññīnāsaññīti iminā aṭṭha nevasaññīnāsaññīvādā, sato vā pana sattassāti iminā satta ucchedavādā. Tattha satoti vijjamānassa. Ucchedanti upacchedaṃ. Vināsanti adassanaṃ. Vibhavanti bhavavigamaṃ. Sabbānetāni aññamaññavevacanāneva. Diṭṭhadhammanibbānaṃvāti iminā pañca diṭṭhadhammanibbānavādā kathitā. Tattha diṭṭhadhammoti paccakkhadhammo vuccati, tattha tattha paṭiladdhaattabhāvassetaṃ adhivacanaṃ. Diṭṭhadhamme nibbānaṃ diṭṭhadhammanibbānaṃ, imasmiṃyeva attabhāve dukkhavūpasamanti attho. Santaṃ vāti saññītiādivasena tīhākārehi santaṃ. Tīṇi hontīti saññī attātiādīni santaattavasena ekaṃ, itarāni dveti evaṃ tīṇi.
22. ரூபிங் வாதி கரஜரூபேன வா கஸிணரூபேன வா ரூபிங். தத்த² லாபீ⁴ கஸிணரூபங் அத்தாதி க³ண்ஹாதி, தக்கீ உபோ⁴பி ரூபானி க³ண்ஹாதியேவ. அரூபிந்தி அரூபஸமாபத்தினிமித்தங் வா, ட²பெத்வா ஸஞ்ஞாக்க²ந்த⁴ங் ஸேஸஅரூபத⁴ம்மே வா அத்தாதி பஞ்ஞபெந்தா லாபி⁴னோபி தக்கிகாபி ஏவங் பஞ்ஞபெந்தி. ததியதி³ட்டி² பன மிஸ்ஸககா³ஹவஸேன பவத்தா, சதுத்தா² தக்ககா³ஹேனேவ. து³தியசதுக்கே பட²மதி³ட்டி² ஸமாபன்னகவாரேன கதி²தா, து³தியதி³ட்டி² அஸமாபன்னகவாரேன, ததியதி³ட்டி² ஸுப்பமத்தேன வா ஸராவமத்தேன வா கஸிணபரிகம்மவஸேன, சதுத்த²தி³ட்டி² விபுலகஸிணவஸேன கதி²தாதி வேதி³தப்³பா³.
22.Rūpiṃvāti karajarūpena vā kasiṇarūpena vā rūpiṃ. Tattha lābhī kasiṇarūpaṃ attāti gaṇhāti, takkī ubhopi rūpāni gaṇhātiyeva. Arūpinti arūpasamāpattinimittaṃ vā, ṭhapetvā saññākkhandhaṃ sesaarūpadhamme vā attāti paññapentā lābhinopi takkikāpi evaṃ paññapenti. Tatiyadiṭṭhi pana missakagāhavasena pavattā, catutthā takkagāheneva. Dutiyacatukke paṭhamadiṭṭhi samāpannakavārena kathitā, dutiyadiṭṭhi asamāpannakavārena, tatiyadiṭṭhi suppamattena vā sarāvamattena vā kasiṇaparikammavasena, catutthadiṭṭhi vipulakasiṇavasena kathitāti veditabbā.
ஏதங் வா பனேகேஸங் உபாதிவத்ததந்தி ஸஞ்ஞீதிபதே³ன ஸங்கே²பதோ வுத்தங் ஸஞ்ஞாஸத்தகங் அதிக்கந்தானந்தி அத்தோ². அபரே அட்ட²கந்தி வத³ந்தி. தது³ப⁴யங் பரதோ ஆவிப⁴விஸ்ஸதி. அயங் பனெத்த² ஸங்கே²பத்தோ² – கேசி ஹி ஏதா ஸத்த வா அட்ட² வா ஸஞ்ஞா ஸமதிக்கமிதுங் ஸக்கொந்தி, கேசி பன ந ஸக்கொந்தி. தத்த² யே ஸக்கொந்தி, தேவ க³ஹிதா. தேஸங் பன ஏகேஸங் உபாதிவத்ததங் அதிக்கமிதுங் ஸக்கொந்தானங் யதா²பி நாம க³ங்க³ங் உத்திண்ணேஸு மனுஸ்ஸேஸு ஏகோ தீ³க⁴வாபிங் க³ந்த்வா திட்டெ²ய்ய, ஏகோ ததோ பரங் மஹாகா³மங்; ஏவமேவ ஏகே விஞ்ஞாணஞ்சாயதனங் அப்பமாணங் ஆனேஞ்ஜந்தி வத்வா திட்ட²ந்தி, ஏகே ஆகிஞ்சஞ்ஞாயதனங். தத்த² விஞ்ஞாணஞ்சாயதனங் தாவ த³ஸ்ஸேதுங் விஞ்ஞாணகஸிணமேகேதி வுத்தங். பரதோ ‘‘ஆகிஞ்சஞ்ஞாயதனமேகே’’தி வக்க²தி. தயித³ந்தி தங் இத³ங் தி³ட்டி²க³தஞ்ச தி³ட்டி²பச்சயஞ்ச தி³ட்டா²ரம்மணஞ்ச. ததா²க³தோ அபி⁴ஜானாதீதி. இமினா பச்சயேன இத³ங் நாம த³ஸ்ஸனங் க³ஹிதந்தி அபி⁴விஸிட்டே²ன ஞாணேன ஜானாதி.
Etaṃ vā panekesaṃ upātivattatanti saññītipadena saṅkhepato vuttaṃ saññāsattakaṃ atikkantānanti attho. Apare aṭṭhakanti vadanti. Tadubhayaṃ parato āvibhavissati. Ayaṃ panettha saṅkhepattho – keci hi etā satta vā aṭṭha vā saññā samatikkamituṃ sakkonti, keci pana na sakkonti. Tattha ye sakkonti, teva gahitā. Tesaṃ pana ekesaṃ upātivattataṃ atikkamituṃ sakkontānaṃ yathāpi nāma gaṅgaṃ uttiṇṇesu manussesu eko dīghavāpiṃ gantvā tiṭṭheyya, eko tato paraṃ mahāgāmaṃ; evameva eke viññāṇañcāyatanaṃ appamāṇaṃ āneñjanti vatvā tiṭṭhanti, eke ākiñcaññāyatanaṃ. Tattha viññāṇañcāyatanaṃ tāva dassetuṃ viññāṇakasiṇameketi vuttaṃ. Parato ‘‘ākiñcaññāyatanameke’’ti vakkhati. Tayidanti taṃ idaṃ diṭṭhigatañca diṭṭhipaccayañca diṭṭhārammaṇañca. Tathāgato abhijānātīti. Iminā paccayena idaṃ nāma dassanaṃ gahitanti abhivisiṭṭhena ñāṇena jānāti.
இதா³னி ததே³வ வித்தா²ரெந்தோ யே கோ² தே பொ⁴ந்தோதிஆதி³மாஹ. யா வா பன ஏதாஸங் ஸஞ்ஞானந்தி யா வா பன ஏதாஸங் ‘‘யதி³ ரூபஸஞ்ஞான’’ந்தி ஏவங் வுத்தஸஞ்ஞானங். பரிஸுத்³தா⁴தி நிருபக்கிலேஸா. பரமாதி உத்தமா. அக்³கா³தி ஸெட்டா². அனுத்தரியா அக்கா²யதீதி அஸதி³ஸா கதீ²யதி. யதி³ ரூபஸஞ்ஞானந்தி இமினா சதஸ்ஸோ ரூபாவசரஸஞ்ஞா கதி²தா. யதி³ அரூபஸஞ்ஞானந்தி இமினா ஆகாஸானஞ்சாயதனவிஞ்ஞாணஞ்சாயதனஸஞ்ஞா. இதரேஹி பன த்³வீஹி பதே³ஹி ஸமாபன்னகவாரோ ச அஸமாபன்னகவாரோ ச கதி²தோதி ஏவமேதா கொட்டா²ஸதோ அட்ட², அத்த²தோ பன ஸத்த ஸஞ்ஞா ஹொந்தி. ஸமாபன்னகவாரோ ஹி புரிமாஹி ச²ஹிஸங்க³ஹிதோயேவ. தயித³ங் ஸங்க²தந்தி தங் இத³ங் ஸப்³ப³ம்பி ஸஞ்ஞாக³தங் ஸத்³தி⁴ங் தி³ட்டி²க³தேன ஸங்க²தங் பச்சயேஹி ஸமாக³ந்த்வா கதங். ஓளாரிகந்தி ஸங்க²தத்தாவ ஓளாரிகங். அத்தி² கோ² பன ஸங்கா²ரானங் நிரோதோ⁴தி ஏதேஸங் பன ஸங்க²தந்தி வுத்தானங் ஸங்கா²ரானங் நிரோத⁴ஸங்கா²தங் நிப்³பா³னங் நாம அத்தி². அத்தே²தந்தி இதி விதி³த்வாதி தங் கோ² பன நிப்³பா³னங் ‘‘அத்தி² ஏத’’ந்தி ஏவங் ஜானித்வா. தஸ்ஸ நிஸ்ஸரணத³ஸ்ஸாவீதி தஸ்ஸ ஸங்க²தஸ்ஸ நிஸ்ஸரணத³ஸ்ஸீ நிப்³பா³னத³ஸ்ஸீ. ததா²க³தோ தது³பாதிவத்தோதி தங் ஸங்க²தங் அதிக்கந்தோ ஸமதிக்கந்தோதி அத்தோ².
Idāni tadeva vitthārento ye kho te bhontotiādimāha. Yā vā pana etāsaṃ saññānanti yā vā pana etāsaṃ ‘‘yadi rūpasaññāna’’nti evaṃ vuttasaññānaṃ. Parisuddhāti nirupakkilesā. Paramāti uttamā. Aggāti seṭṭhā. Anuttariyā akkhāyatīti asadisā kathīyati. Yadi rūpasaññānanti iminā catasso rūpāvacarasaññā kathitā. Yadi arūpasaññānanti iminā ākāsānañcāyatanaviññāṇañcāyatanasaññā. Itarehi pana dvīhi padehi samāpannakavāro ca asamāpannakavāro ca kathitoti evametā koṭṭhāsato aṭṭha, atthato pana satta saññā honti. Samāpannakavāro hi purimāhi chahisaṅgahitoyeva. Tayidaṃ saṅkhatanti taṃ idaṃ sabbampi saññāgataṃ saddhiṃ diṭṭhigatena saṅkhataṃ paccayehi samāgantvā kataṃ. Oḷārikanti saṅkhatattāva oḷārikaṃ. Atthi kho pana saṅkhārānaṃ nirodhoti etesaṃ pana saṅkhatanti vuttānaṃ saṅkhārānaṃ nirodhasaṅkhātaṃ nibbānaṃ nāma atthi. Atthetanti iti viditvāti taṃ kho pana nibbānaṃ ‘‘atthi eta’’nti evaṃ jānitvā. Tassa nissaraṇadassāvīti tassa saṅkhatassa nissaraṇadassī nibbānadassī. Tathāgato tadupātivattoti taṃ saṅkhataṃ atikkanto samatikkantoti attho.
23. தத்ராதி தேஸு அட்ட²ஸு அஸஞ்ஞீவாதே³ஸு. ரூபிங் வாதிஆதீ³னி ஸஞ்ஞீவாதே³ வுத்தனயேனேவ வேதி³தப்³பா³னி. அயஞ்ச யஸ்மா அஸஞ்ஞீவாதோ³, தஸ்மா இத⁴ து³தியசதுக்கங் ந வுத்தங். படிக்கோஸந்தீதி படிபா³ஹந்தி படிஸேதெ⁴ந்தி. ஸஞ்ஞா ரோகோ³திஆதீ³ஸு ஆபா³த⁴ட்டே²ன ரோகோ³, ஸதோ³ஸட்டே²ன க³ண்டோ³, அனுபவிட்ட²ட்டே²ன ஸல்லங். ஆக³திங் வா க³திங் வாதிஆதீ³ஸு படிஸந்தி⁴வஸேன ஆக³திங், சுதிவஸேன க³திங், சவனவஸேன சுதிங், உபபஜ்ஜனவஸேன உபபத்திங், புனப்புனங் உப்பஜ்ஜித்வா அபராபரங் வட்³ட⁴னவஸேன வுட்³டி⁴ங் விரூள்ஹிங் வேபுல்லங். காமஞ்ச சதுவோகாரப⁴வே ரூபங் வினாபி விஞ்ஞாணஸ்ஸ பவத்தி அத்தி², ஸேஸே பன தயோ க²ந்தே⁴ வினா நத்தி². அயங் பன பஞ்ஹோ பஞ்சவோகாரப⁴வவஸேன கதி²தோ. பஞ்சவோகாரே ஹி எத்தகே க²ந்தே⁴ வினா விஞ்ஞாணஸ்ஸ பவத்தி நாம நத்தி². விதண்ட³வாதீ³ பனெத்த² ‘‘அஞ்ஞத்ர ரூபாதிஆதி³வசனதோ அரூபப⁴வேபி ரூபங், அஸஞ்ஞாப⁴வே ச விஞ்ஞாணங் அத்தி², ததா² நிரோத⁴ஸமாபன்னஸ்ஸா’’தி வத³தி. ஸோ வத்தப்³போ³ – ப்³யஞ்ஜனச்சா²யாய சே அத்த²ங் படிபா³ஹஸி, ஆக³திங் வாதிஆதி³வசனதோ தங் விஞ்ஞாணங் பக்கி²த்³விபத³சதுப்பதா³ விய உப்பதித்வாபி க³ச்ச²தி, பத³ஸாபி க³ச்ச²தி, கோ³விஸாணவல்லிஆதீ³னி விய ச வட்³ட⁴தீதி ஆபஜ்ஜதி. யே ச ப⁴க³வதா அனேகஸதேஸு ஸுத்தேஸு தயோ ப⁴வா வுத்தா, தே அரூபப⁴வஸ்ஸ அபா⁴வா த்³வேவ ஆபஜ்ஜந்தி. தஸ்மா மா ஏவங் அவச, யதா² வுத்தமத்த²ங் தா⁴ரேஹீதி.
23.Tatrāti tesu aṭṭhasu asaññīvādesu. Rūpiṃ vātiādīni saññīvāde vuttanayeneva veditabbāni. Ayañca yasmā asaññīvādo, tasmā idha dutiyacatukkaṃ na vuttaṃ. Paṭikkosantīti paṭibāhanti paṭisedhenti. Saññārogotiādīsu ābādhaṭṭhena rogo, sadosaṭṭhena gaṇḍo, anupaviṭṭhaṭṭhena sallaṃ. Āgatiṃ vā gatiṃ vātiādīsu paṭisandhivasena āgatiṃ, cutivasena gatiṃ, cavanavasena cutiṃ, upapajjanavasena upapattiṃ, punappunaṃ uppajjitvā aparāparaṃ vaḍḍhanavasena vuḍḍhiṃ virūḷhiṃ vepullaṃ. Kāmañca catuvokārabhave rūpaṃ vināpi viññāṇassa pavatti atthi, sese pana tayo khandhe vinā natthi. Ayaṃ pana pañho pañcavokārabhavavasena kathito. Pañcavokāre hi ettake khandhe vinā viññāṇassa pavatti nāma natthi. Vitaṇḍavādī panettha ‘‘aññatra rūpātiādivacanato arūpabhavepi rūpaṃ, asaññābhave ca viññāṇaṃ atthi, tathā nirodhasamāpannassā’’ti vadati. So vattabbo – byañjanacchāyāya ce atthaṃ paṭibāhasi, āgatiṃ vātiādivacanato taṃ viññāṇaṃ pakkhidvipadacatuppadā viya uppatitvāpi gacchati, padasāpi gacchati, govisāṇavalliādīni viya ca vaḍḍhatīti āpajjati. Ye ca bhagavatā anekasatesu suttesu tayo bhavā vuttā, te arūpabhavassa abhāvā dveva āpajjanti. Tasmā mā evaṃ avaca, yathā vuttamatthaṃ dhārehīti.
24. தத்ராதி அட்ட²ஸு நேவஸஞ்ஞீனாஸஞ்ஞீவாதே³ஸு பு⁴ம்மங். இதா⁴பி ரூபிங் வாதிஆதீ³னி வுத்தனயேனேவ வேதி³தப்³பா³னி. அஸஞ்ஞா ஸம்மோஹோதி நிஸ்ஸஞ்ஞபா⁴வோ நாமேஸ ஸம்மோஹட்டா²னங். யோ ஹி கிஞ்சி ந ஜானாதி, தங் அஸஞ்ஞீ ஏஸோதி வத³ந்தி. தி³ட்ட²ஸுதமுதவிஞ்ஞாதப்³ப³ஸங்கா²ரமத்தேனாதி தி³ட்ட²விஞ்ஞாதப்³ப³மத்தேன ஸுதவிஞ்ஞாதப்³ப³மத்தேன முதவிஞ்ஞாதப்³ப³மத்தேன. எத்த² ச விஜானாதீதி விஞ்ஞாதப்³ப³ங், தி³ட்ட²ஸுதமுதவிஞ்ஞாதப்³ப³மத்தேன பஞ்சத்³வாரிகஸஞ்ஞாபவத்திமத்தேனாதி அயஞ்ஹி எத்த² அத்தோ². ஸங்கா²ரமத்தேனாதி ஓளாரிகஸங்கா²ரபவத்திமத்தேனாதி அத்தோ². ஏதஸ்ஸ ஆயதனஸ்ஸாதி ஏதஸ்ஸ நேவஸஞ்ஞானாஸஞ்ஞாயதனஸ்ஸ . உபஸம்பத³ந்தி படிலாப⁴ங். ப்³யஸனங் ஹேதந்தி வினாஸோ ஹேஸ, வுட்டா²னங் ஹேதந்தி அத்தோ². பஞ்சத்³வாரிகஸஞ்ஞாபவத்தஞ்ஹி ஓளாரிகஸங்கா²ரபவத்தங் வா அப்பவத்தங் கத்வா தங் ஸமாபஜ்ஜிதப்³ப³ங். தஸ்ஸ பன பவத்தேன ததோ வுட்டா²னங் ஹோதீதி த³ஸ்ஸேதி. ஸங்கா²ரஸமாபத்திபத்தப்³ப³மக்கா²யதீதி ஓளாரிகஸங்கா²ரபவத்தியா பத்தப்³ப³ந்தி ந அக்கா²யதி. ஸங்கா²ராவஸேஸஸமாபத்திபத்தப்³ப³ந்தி ஸங்கா²ரானங்யேவ அவஸேஸா பா⁴வனாவஸேன ஸப்³ப³ஸுகு²மபா⁴வங் பத்தா ஸங்கா²ரா, தேஸங் பவத்தியா ஏதங் பத்தப்³ப³ந்தி அத்தோ². ஏவரூபேஸு ஹி ஸங்கா²ரேஸு பவத்தேஸு ஏதங் பத்தப்³ப³ங் நாம ஹோதி. தயித³ந்தி தங் இத³ங் ஏதங் ஸுகு²மம்பி ஸமானங் ஸங்க²தங் ஸங்க²தத்தா ச ஓளாரிகங்.
24.Tatrāti aṭṭhasu nevasaññīnāsaññīvādesu bhummaṃ. Idhāpi rūpiṃ vātiādīni vuttanayeneva veditabbāni. Asaññā sammohoti nissaññabhāvo nāmesa sammohaṭṭhānaṃ. Yo hi kiñci na jānāti, taṃ asaññī esoti vadanti. Diṭṭhasutamutaviññātabbasaṅkhāramattenāti diṭṭhaviññātabbamattena sutaviññātabbamattena mutaviññātabbamattena. Ettha ca vijānātīti viññātabbaṃ, diṭṭhasutamutaviññātabbamattena pañcadvārikasaññāpavattimattenāti ayañhi ettha attho. Saṅkhāramattenāti oḷārikasaṅkhārapavattimattenāti attho. Etassaāyatanassāti etassa nevasaññānāsaññāyatanassa . Upasampadanti paṭilābhaṃ. Byasanaṃ hetanti vināso hesa, vuṭṭhānaṃ hetanti attho. Pañcadvārikasaññāpavattañhi oḷārikasaṅkhārapavattaṃ vā appavattaṃ katvā taṃ samāpajjitabbaṃ. Tassa pana pavattena tato vuṭṭhānaṃ hotīti dasseti. Saṅkhārasamāpattipattabbamakkhāyatīti oḷārikasaṅkhārapavattiyā pattabbanti na akkhāyati. Saṅkhārāvasesasamāpattipattabbanti saṅkhārānaṃyeva avasesā bhāvanāvasena sabbasukhumabhāvaṃ pattā saṅkhārā, tesaṃ pavattiyā etaṃ pattabbanti attho. Evarūpesu hi saṅkhāresu pavattesu etaṃ pattabbaṃ nāma hoti. Tayidanti taṃ idaṃ etaṃ sukhumampi samānaṃ saṅkhataṃ saṅkhatattā ca oḷārikaṃ.
25. தத்ராதி ஸத்தஸு உச்சே²த³வாதே³ஸு பு⁴ம்மங். உத்³த⁴ங் ஸரந்தி உத்³த⁴ங் வுச்சதி அனாக³தஸங்ஸாரவாதோ³, அனாக³தங் ஸங்ஸாரவாத³ங் ஸரந்தீதி அத்தோ². ஆஸத்திங்யேவ அபி⁴வத³ந்தி லக்³க³னகங்யேவ வத³ந்தி. ‘‘ஆஸத்த’’ந்திபி பாடோ², தண்ஹங்யேவ வத³ந்தீதி அத்தோ². இதி பேச்ச ப⁴விஸ்ஸாமாதி ஏவங் பேச்ச ப⁴விஸ்ஸாம. க²த்தியா ப⁴விஸ்ஸாம, ப்³ராஹ்மணா ப⁴விஸ்ஸாமாதி ஏவமெத்த² நயோ நேதப்³போ³. வாணிஜூபமா மஞ்ஞேதி வாணிஜூபமா விய வாணிஜபடிபா⁴கா³ வாணிஜஸதி³ஸா மய்ஹங் உபட்ட²ஹந்தி. ஸக்காயப⁴யாதி ஸக்காயஸ்ஸ ப⁴யா. தே ஹி யதே²வ ‘‘சத்தாரோ கோ², மஹாராஜ, அப⁴யஸ்ஸ பா⁴யந்தி. கதமே சத்தாரோ? க³ண்டு³ப்பாதோ³ கோ², மஹாராஜ, ப⁴யா பத²விங் ந கா²த³தி ‘மா பத²வீ கி²யீ’தி, கொந்தோ கோ², மஹாராஜ, ஏகபாதே³ன திட்ட²தி ‘மா பத²வீ ஓஸீதீ³’தி, கிகீ கோ², மஹாராஜ, உத்தானா ஸேதி ‘மா அம்பா⁴ உந்த்³ரியீ’தி, ப்³ராஹ்மணத⁴ம்மிகோ கோ², மஹாராஜ, ப்³ரஹ்மசரியங் ந சரதி ‘மா லோகோ உச்சி²ஜ்ஜீ’தி இமே சத்தாரோ அப⁴யஸ்ஸ பா⁴யந்தி, ஏவங் ஸக்காயஸ்ஸ பா⁴யந்தி’’. ஸக்காயபரிஜேகு³ச்சா²தி தமேவ தேபூ⁴மகஸங்கா²தங் ஸக்காயங் பரிஜிகு³ச்ச²மானா. ஸா க³த்³து³லப³த்³தோ⁴தி த³ண்ட³கே ரஜ்ஜுங் பவேஸெத்வா ப³த்³த⁴ஸுனகோ². ஏவமேவிமேதி எத்த² த³ள்ஹத்த²ம்போ⁴ விய கீ²லோ விய ச தேபூ⁴மகத⁴ம்மஸங்கா²தோ ஸக்காயோ த³ட்ட²ப்³போ³, ஸா விய தி³ட்டி²க³திகோ, த³ண்ட³கோ விய தி³ட்டி², ரஜ்ஜு விய தண்ஹா, க³த்³து³லேன ப³ந்தி⁴த்வா த²ம்பே⁴ வா கீ²லே வா உபனிப³த்³த⁴ஸுனக²ஸ்ஸ அத்தனோ த⁴ம்மதாய சி²ந்தி³த்வா க³ந்துங் அஸமத்த²ஸ்ஸ அனுபரிதா⁴வனங் விய தி³ட்டி²க³திகஸ்ஸ தி³ட்டி²த³ண்ட³கே பவேஸிதாய தண்ஹாரஜ்ஜுயா ப³ந்தி⁴த்வா ஸக்காயே உபனிப³த்³த⁴ஸ்ஸ அனுபரிதா⁴வனங் வேதி³தப்³ப³ங்.
25.Tatrāti sattasu ucchedavādesu bhummaṃ. Uddhaṃ saranti uddhaṃ vuccati anāgatasaṃsāravādo, anāgataṃ saṃsāravādaṃ sarantīti attho. Āsattiṃyeva abhivadanti lagganakaṃyeva vadanti. ‘‘Āsatta’’ntipi pāṭho, taṇhaṃyeva vadantīti attho. Iti pecca bhavissāmāti evaṃ pecca bhavissāma. Khattiyā bhavissāma, brāhmaṇā bhavissāmāti evamettha nayo netabbo. Vāṇijūpamāmaññeti vāṇijūpamā viya vāṇijapaṭibhāgā vāṇijasadisā mayhaṃ upaṭṭhahanti. Sakkāyabhayāti sakkāyassa bhayā. Te hi yatheva ‘‘cattāro kho, mahārāja, abhayassa bhāyanti. Katame cattāro? Gaṇḍuppādo kho, mahārāja, bhayā pathaviṃ na khādati ‘mā pathavī khiyī’ti, konto kho, mahārāja, ekapādena tiṭṭhati ‘mā pathavī osīdī’ti, kikī kho, mahārāja, uttānā seti ‘mā ambhā undriyī’ti, brāhmaṇadhammiko kho, mahārāja, brahmacariyaṃ na carati ‘mā loko ucchijjī’ti ime cattāro abhayassa bhāyanti, evaṃ sakkāyassa bhāyanti’’. Sakkāyaparijegucchāti tameva tebhūmakasaṅkhātaṃ sakkāyaṃ parijigucchamānā. Sā gaddulabaddhoti daṇḍake rajjuṃ pavesetvā baddhasunakho. Evamevimeti ettha daḷhatthambho viya khīlo viya ca tebhūmakadhammasaṅkhāto sakkāyo daṭṭhabbo, sā viya diṭṭhigatiko, daṇḍako viya diṭṭhi, rajju viya taṇhā, gaddulena bandhitvā thambhe vā khīle vā upanibaddhasunakhassa attano dhammatāya chinditvā gantuṃ asamatthassa anuparidhāvanaṃ viya diṭṭhigatikassa diṭṭhidaṇḍake pavesitāya taṇhārajjuyā bandhitvā sakkāye upanibaddhassa anuparidhāvanaṃ veditabbaṃ.
26. இமானேவ பஞ்சாயதனானீதி இமானேவ பஞ்ச காரணானி. இதி மாதிகங் ட²பெந்தேனபி பஞ்சேவ ட²பிதானி, நிக³மெந்தேனபி பஞ்சேவ நிக³மிதானி, பா⁴ஜெந்தேன பன சத்தாரி பா⁴ஜிதானி. தி³ட்ட²த⁴ம்மனிப்³பா³னங் குஹிங் பவிட்ட²ந்தி. ஏகத்தனானத்தவஸேன த்³வீஸு பதே³ஸு பவிட்ட²ந்தி வேதி³தப்³ப³ங்.
26.Imāneva pañcāyatanānīti imāneva pañca kāraṇāni. Iti mātikaṃ ṭhapentenapi pañceva ṭhapitāni, nigamentenapi pañceva nigamitāni, bhājentena pana cattāri bhājitāni. Diṭṭhadhammanibbānaṃ kuhiṃ paviṭṭhanti. Ekattanānattavasena dvīsu padesu paviṭṭhanti veditabbaṃ.
27. ஏவஞ்ச சதுசத்தாலீஸ அபரந்தகப்பிகே த³ஸ்ஸெத்வா இதா³னி அட்டா²ரஸ புப்³ப³ந்தகப்பிகே த³ஸ்ஸேதுங் ஸந்தி, பி⁴க்க²வேதிஆதி³மாஹ. தத்த² அதீதகொட்டா²ஸஸங்கா²தங் புப்³ப³ந்தங் கப்பெத்வா விகப்பெத்வா க³ண்ஹந்தீதி புப்³ப³ந்தகப்பிகா. புப்³ப³ந்தகப்போ வா ஏதேஸங் அத்தீ²தி புப்³ப³ந்தகப்பிகா. ஏவங் ஸேஸம்பி புப்³பே³ வுத்தப்பகாரங் வுத்தனயேனேவ வேதி³தப்³ப³ங். ஸஸ்ஸதோ அத்தா ச லோகோ சாதி ரூபாதீ³ஸு அஞ்ஞதரங் அத்தாதி ச லோகோதி ச க³ஹெத்வா ஸஸ்ஸதோ அமரோ நிச்சோ து⁴வோதி அபி⁴வத³ந்தி. யதா²ஹ ‘‘ரூபங் அத்தா சேவ லோகோ ச ஸஸ்ஸதோ சாதி அத்தானஞ்ச லோகஞ்ச பஞ்ஞபெந்தீ’’தி வித்தா²ரோ. அஸஸ்ஸதாதீ³ஸுபி ஏஸேவ நயோ. எத்த² ச பட²மவாதே³ன சத்தாரோ ஸஸ்ஸதவாதா³ வுத்தா, து³தியவாதே³ன ஸத்த உச்சே²த³வாதா³.
27. Evañca catucattālīsa aparantakappike dassetvā idāni aṭṭhārasa pubbantakappike dassetuṃ santi, bhikkhavetiādimāha. Tattha atītakoṭṭhāsasaṅkhātaṃ pubbantaṃ kappetvā vikappetvā gaṇhantīti pubbantakappikā. Pubbantakappo vā etesaṃ atthīti pubbantakappikā. Evaṃ sesampi pubbe vuttappakāraṃ vuttanayeneva veditabbaṃ. Sassato attā ca loko cāti rūpādīsu aññataraṃ attāti ca lokoti ca gahetvā sassato amaro nicco dhuvoti abhivadanti. Yathāha ‘‘rūpaṃ attā ceva loko ca sassato cāti attānañca lokañca paññapentī’’ti vitthāro. Asassatādīsupi eseva nayo. Ettha ca paṭhamavādena cattāro sassatavādā vuttā, dutiyavādena satta ucchedavādā.
நனு சேதே ஹெட்டா² ஆக³தா, இத⁴ கஸ்மா புன க³ஹிதாதி. ஹெட்டா² தத்த² தத்த² மதோ தத்த² தத்தே²வ உச்சி²ஜ்ஜதீதி த³ஸ்ஸனத்த²ங் ஆக³தா. இத⁴ பன புப்³பே³னிவாஸலாபீ⁴ தி³ட்டி²க³திகோ அதீதங் பஸ்ஸதி, ந அனாக³தங், தஸ்ஸ ஏவங் ஹோதி ‘‘புப்³ப³ந்ததோ ஆக³தோ அத்தா இதே⁴வ உச்சி²ஜ்ஜதி, இதோ பரங் ந க³ச்ச²தீ’’தி இமஸ்ஸத்த²ஸ்ஸ த³ஸ்ஸனத்த²ங் க³ஹிதா. ததியவாதே³ன சத்தாரோ ஏகச்சஸஸ்ஸதவாதா³ வுத்தா, சதுத்த²வாதே³ன சத்தாரோ அமராவிக்கே²பிகா வுத்தா. அந்தவாதி ஸபரியந்தோ பரிச்சி²ன்னோ பரிவடுமோ. அவட்³டி⁴தகஸிணஸ்ஸ தங் கஸிணங் அத்தாதி ச லோகோதி ச க³ஹெத்வா ஏவங் ஹோதி. து³தியவாதோ³ வட்³டி⁴தகஸிணஸ்ஸ வஸேன வுத்தோ, ததியவாதோ³ திரியங் வட்³டெ⁴த்வா உத்³த⁴மதோ⁴ அவட்³டி⁴தகஸிணஸ்ஸ, சதுத்த²வாதோ³ தக்கிவஸேன வுத்தோ. அனந்தரசதுக்கங் ஹெட்டா² வுத்தனயமேவ.
Nanu cete heṭṭhā āgatā, idha kasmā puna gahitāti. Heṭṭhā tattha tattha mato tattha tattheva ucchijjatīti dassanatthaṃ āgatā. Idha pana pubbenivāsalābhī diṭṭhigatiko atītaṃ passati, na anāgataṃ, tassa evaṃ hoti ‘‘pubbantato āgato attā idheva ucchijjati, ito paraṃ na gacchatī’’ti imassatthassa dassanatthaṃ gahitā. Tatiyavādena cattāro ekaccasassatavādā vuttā, catutthavādena cattāro amarāvikkhepikā vuttā. Antavāti sapariyanto paricchinno parivaṭumo. Avaḍḍhitakasiṇassa taṃ kasiṇaṃ attāti ca lokoti ca gahetvā evaṃ hoti. Dutiyavādo vaḍḍhitakasiṇassa vasena vutto, tatiyavādo tiriyaṃ vaḍḍhetvā uddhamadho avaḍḍhitakasiṇassa, catutthavādo takkivasena vutto. Anantaracatukkaṃ heṭṭhā vuttanayameva.
ஏகந்தஸுகீ²தி நிரந்தரஸுகீ². அயங் தி³ட்டி² லாபீ⁴ஜாதிஸ்ஸரதக்கீனங் வஸேன உப்பஜ்ஜதி. லாபி⁴னோ ஹி புப்³பே³னிவாஸஞாணேன க²த்தியாதி³குலே ஏகந்தஸுக²மேவ அத்தனோ ஜாதிங் அனுஸ்ஸரந்தஸ்ஸ ஏவங் தி³ட்டி² உப்பஜ்ஜதி. ததா² ஜாதிஸ்ஸரஸ்ஸ பச்சுப்பன்னங் ஸுக²மனுப⁴வதோ அதீதாஸு ஸத்தஸு ஜாதீஸு தாதி³ஸமேவ அத்தபா⁴வங் அனுஸ்ஸரந்தஸ்ஸ. தக்கிஸ்ஸ பன இத⁴ ஸுக²ஸமங்கி³னோ ‘‘அதீதேபாஹங் ஏவமேவ அஹோஸி’’ந்தி தக்கேனேவ உப்பஜ்ஜதி.
Ekantasukhīti nirantarasukhī. Ayaṃ diṭṭhi lābhījātissaratakkīnaṃ vasena uppajjati. Lābhino hi pubbenivāsañāṇena khattiyādikule ekantasukhameva attano jātiṃ anussarantassa evaṃ diṭṭhi uppajjati. Tathā jātissarassa paccuppannaṃ sukhamanubhavato atītāsu sattasu jātīsu tādisameva attabhāvaṃ anussarantassa. Takkissa pana idha sukhasamaṅgino ‘‘atītepāhaṃ evameva ahosi’’nti takkeneva uppajjati.
ஏகந்தது³க்கீ²தி அயங் தி³ட்டி² லாபி⁴னோ நுப்பஜ்ஜதி. ஸோ ஹி ஏகந்தேனேவ இத⁴ ஜா²னஸுகே²ன ஸுகீ² ஹோதி. இத⁴ து³க்கே²ன பு²ட்ட²ஸ்ஸ பன ஜாதிஸ்ஸரஸ்ஸ தக்கிஸ்ஸேவ ச ஸா உப்பஜ்ஜதி. ததியா இத⁴ வோகிண்ணஸுக²து³க்கா²னங் ஸப்³பே³ஸம்பி தேஸங் உப்பஜ்ஜதி, ததா² சதுத்தா² தி³ட்டி². லாபி⁴னோ ஹி இதா³னி சதுத்த²ஜ்ஜா²னவஸேன அது³க்க²மஸுக²ஸ்ஸ, புப்³பே³ சதுத்த²ஜ்ஜா²னிகமேவ ப்³ரஹ்மலோகங் அனுஸ்ஸரந்தஸ்ஸ . ஜாதிஸ்ஸரஸ்ஸாபி பச்சுப்பன்னே மஜ்ஜ²த்தஸ்ஸ, அனுஸ்ஸரந்தஸ்ஸாபி மஜ்ஜ²த்தபூ⁴தட்டா²னமேவ அனுஸ்ஸரந்தஸ்ஸ, தக்கினோபி பச்சுப்பன்னே மஜ்ஜ²த்தஸ்ஸ, அதீதேபி ஏவங் ப⁴விஸ்ஸதீதி தக்கேனேவ க³ண்ஹந்தஸ்ஸ ஏஸா தி³ட்டி² உப்பஜ்ஜதி. எத்தாவதா சத்தாரோ ஸஸ்ஸதவாதா³, சத்தாரோ ஏகச்சஸஸ்ஸதிகா, சத்தாரோ அந்தானந்திகா, சத்தாரோ அமராவிக்கே²பிகா , த்³வே அதி⁴ச்ச-ஸமுப்பன்னிகாதி அட்டா²ரஸபி புப்³ப³ந்தகப்பிகா கதி²தா ஹொந்தி.
Ekantadukkhīti ayaṃ diṭṭhi lābhino nuppajjati. So hi ekanteneva idha jhānasukhena sukhī hoti. Idha dukkhena phuṭṭhassa pana jātissarassa takkisseva ca sā uppajjati. Tatiyā idha vokiṇṇasukhadukkhānaṃ sabbesampi tesaṃ uppajjati, tathā catutthā diṭṭhi. Lābhino hi idāni catutthajjhānavasena adukkhamasukhassa, pubbe catutthajjhānikameva brahmalokaṃ anussarantassa . Jātissarassāpi paccuppanne majjhattassa, anussarantassāpi majjhattabhūtaṭṭhānameva anussarantassa, takkinopi paccuppanne majjhattassa, atītepi evaṃ bhavissatīti takkeneva gaṇhantassa esā diṭṭhi uppajjati. Ettāvatā cattāro sassatavādā, cattāro ekaccasassatikā, cattāro antānantikā, cattāro amarāvikkhepikā , dve adhicca-samuppannikāti aṭṭhārasapi pubbantakappikā kathitā honti.
28. இதா³னி தி³ட்டு²த்³தா⁴ரங் உத்³த⁴ரந்தோ தத்ர, பி⁴க்க²வேதிஆதி³மாஹ. தத்த² பச்சத்தங்யேவ ஞாணந்தி பச்சக்க²ஞாணங். பரிஸுத்³த⁴ந்தி நிருபக்கிலேஸங். பரியோதா³தந்தி பப⁴ஸ்ஸரங். ஸப்³ப³பதே³ஹி விபஸ்ஸனாஞாணங்யேவ கதி²தங். ஸத்³தா⁴த³யோ ஹி பஞ்ச த⁴ம்மா பா³ஹிரஸமயஸ்மிம்பி ஹொந்தி, விபஸ்ஸனாஞாணங் ஸாஸனஸ்மிங்யேவ. தத்த² ஞாணபா⁴க³மத்தமேவ பரியோத³பெந்தீதி மயமித³ங் ஜானாமாதி ஏவங் தத்த² ஞாணகொட்டா²ஸங் ஓதாரெந்தியேவ. உபாதா³னமக்கா²யதீதி ந தங் ஞாணங், மிச்சா²த³ஸ்ஸனங் நாமேதங், தஸ்மா தத³பி தேஸங் ப⁴வந்தானங் தி³ட்டு²பாதா³னங் அக்கா²யதீதி அத்தோ². அதா²பி தங் ஜானநமத்தலக்க²ணத்தா ஞாணபா⁴க³மத்தமேவ, ததா²பி தஸ்ஸ த³ஸ்ஸனஸ்ஸ அனுபாதிவத்தனதோ உபாதா³னபச்சயதோ ச உபாதா³னமேவ. தது³பாதிவத்தோதி தங் தி³ட்டி²ங் அதிக்கந்தோ. எத்தாவதா சத்தாரோ ஸஸ்ஸதவாதா³, சத்தாரோ ஏகச்சஸஸ்ஸதிகா, சத்தாரோ அந்தானந்திகா, சத்தாரோ அமராவிக்கே²பிகா, த்³வே அதி⁴ச்சஸமுப்பன்னிகா, ஸோளஸ ஸஞ்ஞீவாதா³, அட்ட² அஸஞ்ஞீவாதா³, அட்ட² நேவஸஞ்ஞீனாஸஞ்ஞீவாதா³, ஸத்த உச்சே²த³வாதா³, பஞ்ச தி³ட்ட²த⁴ம்மனிப்³பா³னவாதா³தி ப்³ரஹ்மஜாலே ஆக³தா த்³வாஸட்டி²பி தி³ட்டி²யோ கதி²தா ஹொந்தி. ப்³ரஹ்மஜாலே பன கதி²தே இத³ங் ஸுத்தங் அகதி²தமேவ ஹோதி. கஸ்மா? இத⁴ ததோ அதிரேகாய ஸக்காயதி³ட்டி²யா ஆக³தத்தா. இமஸ்மிங் பன கதி²தே ப்³ரஹ்மஜாலங் கதி²தமேவ ஹோதி.
28. Idāni diṭṭhuddhāraṃ uddharanto tatra, bhikkhavetiādimāha. Tattha paccattaṃyeva ñāṇanti paccakkhañāṇaṃ. Parisuddhanti nirupakkilesaṃ. Pariyodātanti pabhassaraṃ. Sabbapadehi vipassanāñāṇaṃyeva kathitaṃ. Saddhādayo hi pañca dhammā bāhirasamayasmimpi honti, vipassanāñāṇaṃ sāsanasmiṃyeva. Tattha ñāṇabhāgamattameva pariyodapentīti mayamidaṃ jānāmāti evaṃ tattha ñāṇakoṭṭhāsaṃ otārentiyeva. Upādānamakkhāyatīti na taṃ ñāṇaṃ, micchādassanaṃ nāmetaṃ, tasmā tadapi tesaṃ bhavantānaṃ diṭṭhupādānaṃ akkhāyatīti attho. Athāpi taṃ jānanamattalakkhaṇattā ñāṇabhāgamattameva, tathāpi tassa dassanassa anupātivattanato upādānapaccayato ca upādānameva. Tadupātivattoti taṃ diṭṭhiṃ atikkanto. Ettāvatā cattāro sassatavādā, cattāro ekaccasassatikā, cattāro antānantikā, cattāro amarāvikkhepikā, dve adhiccasamuppannikā, soḷasa saññīvādā, aṭṭha asaññīvādā, aṭṭha nevasaññīnāsaññīvādā, satta ucchedavādā, pañca diṭṭhadhammanibbānavādāti brahmajāle āgatā dvāsaṭṭhipi diṭṭhiyo kathitā honti. Brahmajāle pana kathite idaṃ suttaṃ akathitameva hoti. Kasmā? Idha tato atirekāya sakkāyadiṭṭhiyā āgatattā. Imasmiṃ pana kathite brahmajālaṃ kathitameva hoti.
30. இதா³னி இமா த்³வாஸட்டி² தி³ட்டி²யோ உப்பஜ்ஜமானா ஸக்காயதி³ட்டி²பமுகே²னேவ உப்பஜ்ஜந்தீதி த³ஸ்ஸேதுங் இத⁴, பி⁴க்க²வே, ஏகச்சோதிஆதி³மாஹ. தத்த² படினிஸ்ஸக்³கா³தி பரிச்சாகே³ன. காமஸங்யோஜனானங் அனதி⁴ட்டா²னாதி பஞ்சகாமகு³ணதண்ஹானங் நிஸ்ஸட்ட²த்தா. பவிவேகங் பீதிந்தி ஸப்பீதிகஜ்ஜா²னத்³வயபீதிங். நிருஜ்ஜ²தீதி ஜா²னநிரோதே⁴ன நிருஜ்ஜ²தி. ஸமாபத்திதோ பன வுட்டி²தஸ்ஸ நிருத்³தா⁴ நாம ஹோதி. யதே²வ ஹி ‘‘அது³க்க²மஸுகா²ய வேத³னாய நிரோதா⁴ உப்பஜ்ஜதி நிராமிஸங் ஸுக²ங், நிராமிஸஸுக²ஸ்ஸ நிரோதா⁴ உப்பஜ்ஜதி அது³க்க²மஸுகா² வேத³னா’’தி எத்த² ந அயமத்தோ² ஹோதி – சதுத்த²ஜ்ஜா²னநிரோதா⁴ ததியஜ்ஜா²னங் உபஸம்பஜ்ஜ விஹரதீதி. அயங் பனெத்த² அத்தோ² – சதுத்த²ஜ்ஜா²னா வுட்டா²ய ததியங் ஜா²னங் ஸமாபஜ்ஜதி, ததியஜ்ஜா²னா வுட்டா²ய சதுத்த²ங் ஜா²னங் ஸமாபஜ்ஜதீதி, ஏவங்ஸம்பத³மித³ங் வேதி³தப்³ப³ங். உப்பஜ்ஜதி தோ³மனஸ்ஸந்தி ஹீனஜ்ஜா²னபரியாதா³னகதோ³மனஸ்ஸங். ஸமாபத்திதோ வுட்டி²தசித்தஸ்ஸ பன கம்மனீயபா⁴வோ கதி²தோ.
30. Idāni imā dvāsaṭṭhi diṭṭhiyo uppajjamānā sakkāyadiṭṭhipamukheneva uppajjantīti dassetuṃ idha, bhikkhave, ekaccotiādimāha. Tattha paṭinissaggāti pariccāgena. Kāmasaṃyojanānaṃanadhiṭṭhānāti pañcakāmaguṇataṇhānaṃ nissaṭṭhattā. Pavivekaṃ pītinti sappītikajjhānadvayapītiṃ. Nirujjhatīti jhānanirodhena nirujjhati. Samāpattito pana vuṭṭhitassa niruddhā nāma hoti. Yatheva hi ‘‘adukkhamasukhāya vedanāya nirodhā uppajjati nirāmisaṃ sukhaṃ, nirāmisasukhassa nirodhā uppajjati adukkhamasukhā vedanā’’ti ettha na ayamattho hoti – catutthajjhānanirodhā tatiyajjhānaṃ upasampajja viharatīti. Ayaṃ panettha attho – catutthajjhānā vuṭṭhāya tatiyaṃ jhānaṃ samāpajjati, tatiyajjhānā vuṭṭhāya catutthaṃ jhānaṃ samāpajjatīti, evaṃsampadamidaṃ veditabbaṃ. Uppajjati domanassanti hīnajjhānapariyādānakadomanassaṃ. Samāpattito vuṭṭhitacittassa pana kammanīyabhāvo kathito.
பவிவேகா பீதீதி ஸா ஏவ ஜா²னத்³வயபீதி. யங் சா²யா ஜஹதீதி யங் டா²னங் சா²யா ஜஹதி. கிங் வுத்தங் ஹோதி? யஸ்மிங் டா²னே சா²யா அத்தி², தஸ்மிங் ஆதபோ நத்தி². யஸ்மிங் ஆதபோ அத்தி², தஸ்மிங் சா²யா நத்தீ²தி.
Pavivekā pītīti sā eva jhānadvayapīti. Yaṃ chāyā jahatīti yaṃ ṭhānaṃ chāyā jahati. Kiṃ vuttaṃ hoti? Yasmiṃ ṭhāne chāyā atthi, tasmiṃ ātapo natthi. Yasmiṃ ātapo atthi, tasmiṃ chāyā natthīti.
31. நிராமிஸங் ஸுக²ந்தி ததியஜ்ஜா²னஸுக²ங்.
31.Nirāmisaṃ sukhanti tatiyajjhānasukhaṃ.
32. அது³க்க²மஸுக²ந்தி சதுத்த²ஜ்ஜா²னவேத³னங்.
32.Adukkhamasukhanti catutthajjhānavedanaṃ.
33. அனுபாதா³னோஹமஸ்மீதி நிக்³க³ஹணோ அஹமஸ்மி. நிப்³பா³னஸப்பாயந்தி நிப்³பா³னஸ்ஸ ஸப்பாயங் உபகாரபூ⁴தங் . நனு ச மக்³க³த³ஸ்ஸனங் நாம ஸப்³ப³த்த² நிகந்தியா ஸுக்கா²பிதாய உப்பஜ்ஜதி, கத²மேதங் நிப்³பா³னஸ்ஸ உபகாரபடிபதா³ நாம ஜாதந்தி, ஸப்³ப³த்த² அனுபாதி³யனவஸேன அக்³க³ண்ஹனவஸேன உபகாரபடிபதா³ நாம ஜாதங். அபி⁴வத³தீதி அபி⁴மானேன உபவத³தி. புப்³ப³ந்தானுதி³ட்டி²ந்தி அட்டா²ரஸவித⁴ம்பி புப்³ப³ந்தானுதி³ட்டி²ங். அபரந்தானுதி³ட்டி²ந்தி சதுசத்தாரீஸவித⁴ம்பி அபரந்தானுதி³ட்டி²ங். உபாதா³னமக்கா²யதீதி அஹமஸ்மீதி க³ஹணஸ்ஸ ஸக்காயதி³ட்டி²பரியாபன்னத்தா தி³ட்டு²பாதா³னங் அக்கா²யதி.
33.Anupādānohamasmīti niggahaṇo ahamasmi. Nibbānasappāyanti nibbānassa sappāyaṃ upakārabhūtaṃ . Nanu ca maggadassanaṃ nāma sabbattha nikantiyā sukkhāpitāya uppajjati, kathametaṃ nibbānassa upakārapaṭipadā nāma jātanti, sabbattha anupādiyanavasena aggaṇhanavasena upakārapaṭipadā nāma jātaṃ. Abhivadatīti abhimānena upavadati. Pubbantānudiṭṭhinti aṭṭhārasavidhampi pubbantānudiṭṭhiṃ. Aparantānudiṭṭhinti catucattārīsavidhampi aparantānudiṭṭhiṃ. Upādānamakkhāyatīti ahamasmīti gahaṇassa sakkāyadiṭṭhipariyāpannattā diṭṭhupādānaṃ akkhāyati.
ஸந்திவரபத³ந்தி வூபஸந்தகிலேஸத்தா ஸந்தங் உத்தமபத³ங். ச²ன்னங் ப²ஸ்ஸாயதனானந்தி ப⁴க³வதா ‘‘யத்த² சக்கு² ச நிருஜ்ஜ²தி ரூபஸஞ்ஞா ச நிருஜ்ஜ²தி ஸோ ஆயதனோ வேதி³தப்³போ³’’தி எத்த² த்³வின்னங் ஆயதனானங் படிக்கே²பேன நிப்³பா³னங் த³ஸ்ஸிதங்.
Santivarapadanti vūpasantakilesattā santaṃ uttamapadaṃ. Channaṃ phassāyatanānanti bhagavatā ‘‘yattha cakkhu ca nirujjhati rūpasaññā ca nirujjhati so āyatano veditabbo’’ti ettha dvinnaṃ āyatanānaṃ paṭikkhepena nibbānaṃ dassitaṃ.
‘‘யத்த² ஆபோ ச பத²வீ, தேஜோ வாயோ ந கா³த⁴தி;
‘‘Yattha āpo ca pathavī, tejo vāyo na gādhati;
அதோ ஸரா நிவத்தந்தி, எத்த² வட்டங் ந வத்ததி;
Ato sarā nivattanti, ettha vaṭṭaṃ na vattati;
எத்த² நாமஞ்ச ரூபஞ்ச, அஸேஸங் உபருஜ்ஜ²தீ’’தி. (ஸங்॰ நி॰ 1.27) –
Ettha nāmañca rūpañca, asesaṃ uparujjhatī’’ti. (saṃ. ni. 1.27) –
எத்த² பன ஸங்கா²ரபடிக்கே²பேன நிப்³பா³னங் த³ஸ்ஸிதங்.
Ettha pana saṅkhārapaṭikkhepena nibbānaṃ dassitaṃ.
‘‘கத்த² ஆபோ ச பத²வீ, தேஜோ வாயோ ந கா³த⁴தி;
‘‘Kattha āpo ca pathavī, tejo vāyo na gādhati;
கத்த² தீ³க⁴ஞ்ச ரஸ்ஸஞ்ச, அணுங் தூ²லங் ஸுபா⁴ஸுப⁴ங்;
Kattha dīghañca rassañca, aṇuṃ thūlaṃ subhāsubhaṃ;
கத்த² நாமஞ்ச ரூபஞ்ச, அஸேஸங் உபருஜ்ஜ²தீ’’தி. (தீ³॰ நி॰ 1.498);
Kattha nāmañca rūpañca, asesaṃ uparujjhatī’’ti. (dī. ni. 1.498);
தத்ர வெய்யாகரணங் ப⁴வதி –
Tatra veyyākaraṇaṃ bhavati –
‘‘விஞ்ஞாணங் அனித³ஸ்ஸனங், அனந்தங் ஸப்³ப³தோ பப⁴’’ந்தி –
‘‘Viññāṇaṃ anidassanaṃ, anantaṃ sabbato pabha’’nti –
எத்த² ஸங்கா²ரபடிக்கே²பேன நிப்³பா³னங் த³ஸ்ஸிதங். இமஸ்மிங் பன ஸுத்தே ச²ஆயதனபடிக்கே²பேன த³ஸ்ஸிதங். அஞ்ஞத்த² ச அனுபாதா³விமொக்கோ²தி நிப்³பா³னமேவ த³ஸ்ஸிதங், இத⁴ பன அரஹத்தப²லஸமாபத்தி. ஸேஸங் ஸப்³ப³த்த² உத்தானமேவாதி.
Ettha saṅkhārapaṭikkhepena nibbānaṃ dassitaṃ. Imasmiṃ pana sutte chaāyatanapaṭikkhepena dassitaṃ. Aññattha ca anupādāvimokkhoti nibbānameva dassitaṃ, idha pana arahattaphalasamāpatti. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
பஞ்சத்தயஸுத்தவண்ணனா நிட்டி²தா.
Pañcattayasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 2. பஞ்சத்தயஸுத்தங் • 2. Pañcattayasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 2. பஞ்சத்தயஸுத்தவண்ணனா • 2. Pañcattayasuttavaṇṇanā
