| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. க³ஹபதிவக்³கோ³
5. Gahapativaggo
1. பஞ்சவேரப⁴யஸுத்தவண்ணனா
1. Pañcaverabhayasuttavaṇṇanā
41. யதோதி யஸ்மிங் காலே. அயஞ்ஹி தோ-ஸத்³தோ³ தா³-ஸத்³தோ³ விய இத⁴ காலவிஸயோ. தேனாஹ ‘‘யதா³’’தி. ப⁴யவேரசேதனாயோதி பா⁴யிதப்³ப³ட்டே²ன ப⁴யங், வேரபஸவனட்டே²ன வேரந்தி ச லத்³த⁴னாமா சேதனாயோ. பாணாதிபாதாத³யோ ஹி யஸ்ஸ பவத்தந்தி, யஞ்ச உத்³தி³ஸ்ஸ பவத்தியந்தி, உப⁴யே ஸப⁴யபே⁴ரவாதி தே ஏவ பா⁴யிதப்³ப³ப⁴யவேரஜனகாவாதி. ஸோதஸ்ஸ அரியமக்³க³ஸ்ஸ ஆதி³தோ பட்டா²ய படிபத்திஅதி⁴க³மோ ஸோதாபத்தி , தத³த்தா²ய தத்த² பதிட்டி²தஸ்ஸ ச அங்கா³னி ஸோதாபத்தியங்கா³னி, தது³ப⁴யங் ஸந்தா⁴யாஹ ‘‘து³வித⁴ங் ஸோதாபத்தியா அங்க³’’ந்தி, ஸோதாபத்திஅத்த²ங் அங்க³ந்தி அத்தோ². யங் புப்³ப³பா⁴கே³தி யங் ஸயங் ஸோதாபத்திமக்³க³ப²லபடிலாப⁴தோ புப்³ப³பா⁴கே³ தத³த்தா²ய ஸங்வத்ததி. கிங் பன தந்தி ஆஹ ‘‘ஸப்புரிஸஸங்ஸேவோ’’திஆதி³. ஸப்புரிஸானங் பு³த்³தா⁴தீ³னங் அரியஞாணஸஞ்ஞாணஜாதா பயிருபாஸனா, ஸத்³த⁴ம்மஸ்ஸவனங் சதுஸச்சத⁴ம்மஸ்ஸவனங், யோனிஸோ உபாயேன அனிச்சாதி³தோ மனஸி கரணங் யோனிஸோ மனஸிகாரோ, உஸ்ஸுக்காபெந்தேன த⁴ம்மஸ்ஸ நிப்³பா³னஸ்ஸ அனுத⁴ம்மபடிபஜ்ஜனங் த⁴ம்மானுத⁴ம்மபடிபத்தீதி ஏதானி ஸோதாபத்தியா அங்கா³னி. அட்ட²கதா²யங் பன ஸோதாபத்திஅங்க³ந்தி பத³ங் அபெக்கி²த்வா ‘‘ஏவங் ஆக³த’’ந்தி வுத்தங். டி²தஸ்ஸ புக்³க³லஸ்ஸ அங்க³ங். ஸோதாபன்னோ அங்கீ³யதி ஞாயதி ஏதேனாதி ஸோதாபன்னஸ்ஸ அங்க³ந்திபி வுச்சதி. இத³ங் பச்சா² வுத்தங் அங்க³ங். தோ³ஸேஹி ஆரகாதி அரியோதி ஆஹ ‘‘நித்³தோ³ஸோ’’தி. கத²ங் அவிஜ்ஜா ஸங்கா²ரானங் பச்சயோதிஆதி³னா கேனசிபி அனுபாரம்பி⁴யத்தா நிருபாரம்போ⁴. ஞாணங் ஸந்தா⁴ய ‘‘நித்³தோ³ஸோ’’தி வுத்தங், படிச்சஸமுப்பாத³ங் ஸந்தா⁴ய ‘‘நிருபாரம்போ⁴’’தி வத³ந்தி. உப⁴யம்பி பன ஸந்தா⁴ய உப⁴யங் வுத்தந்தி அபரே. படிச்சஸமுப்பாதோ³ எத்த² அதி⁴ப்பேதோ. ததா² ஹி வுத்தங் ‘‘அபராபரங் உப்பன்னாய விபஸ்ஸனாபஞ்ஞாயா’’தி. ந ஹி மக்³க³ஞாணங் விபஸ்ஸனாபஞ்ஞாதி. ஸம்மா உபாயத்தா தஸ்ஸ படிச்சஸமுப்பன்னே யாதா²வதோ ஞாயதீதி ஞாயோ, படிச்சஸமுப்பாதோ³. ஞாணங் பன ஞாயதி ஸோ ஏதேனாதி ஞாயோ.
41.Yatoti yasmiṃ kāle. Ayañhi to-saddo dā-saddo viya idha kālavisayo. Tenāha ‘‘yadā’’ti. Bhayaveracetanāyoti bhāyitabbaṭṭhena bhayaṃ, verapasavanaṭṭhena veranti ca laddhanāmā cetanāyo. Pāṇātipātādayo hi yassa pavattanti, yañca uddissa pavattiyanti, ubhaye sabhayabheravāti te eva bhāyitabbabhayaverajanakāvāti. Sotassa ariyamaggassa ādito paṭṭhāya paṭipattiadhigamo sotāpatti , tadatthāya tattha patiṭṭhitassa ca aṅgāni sotāpattiyaṅgāni, tadubhayaṃ sandhāyāha ‘‘duvidhaṃ sotāpattiyā aṅga’’nti, sotāpattiatthaṃ aṅganti attho. Yaṃ pubbabhāgeti yaṃ sayaṃ sotāpattimaggaphalapaṭilābhato pubbabhāge tadatthāya saṃvattati. Kiṃ pana tanti āha ‘‘sappurisasaṃsevo’’tiādi. Sappurisānaṃ buddhādīnaṃ ariyañāṇasaññāṇajātā payirupāsanā, saddhammassavanaṃ catusaccadhammassavanaṃ, yoniso upāyena aniccādito manasi karaṇaṃ yoniso manasikāro, ussukkāpentena dhammassa nibbānassa anudhammapaṭipajjanaṃ dhammānudhammapaṭipattīti etāni sotāpattiyā aṅgāni. Aṭṭhakathāyaṃ pana sotāpattiaṅganti padaṃ apekkhitvā ‘‘evaṃ āgata’’nti vuttaṃ. Ṭhitassa puggalassa aṅgaṃ. Sotāpanno aṅgīyati ñāyati etenāti sotāpannassa aṅgantipi vuccati. Idaṃ pacchā vuttaṃ aṅgaṃ. Dosehi ārakāti ariyoti āha ‘‘niddoso’’ti. Kathaṃ avijjā saṅkhārānaṃ paccayotiādinā kenacipi anupārambhiyattā nirupārambho. Ñāṇaṃ sandhāya ‘‘niddoso’’ti vuttaṃ, paṭiccasamuppādaṃ sandhāya ‘‘nirupārambho’’ti vadanti. Ubhayampi pana sandhāya ubhayaṃ vuttanti apare. Paṭiccasamuppādo ettha adhippeto. Tathā hi vuttaṃ ‘‘aparāparaṃ uppannāya vipassanāpaññāyā’’ti. Na hi maggañāṇaṃ vipassanāpaññāti. Sammā upāyattā tassa paṭiccasamuppanne yāthāvato ñāyatīti ñāyo, paṭiccasamuppādo. Ñāṇaṃ pana ñāyati so etenāti ñāyo.
தத்தா²தி நிரயே. மக்³க³ஸோதந்தி மக்³க³ஸ்ஸ ஸோதங். ஆபன்னோதி அதி⁴க³தோ. அபாயேஸு உப்பஜ்ஜனஸங்கா²தோ வினிபாதத⁴ம்மோ ஏதஸ்ஸாதி வினிபாதத⁴ம்மோ, ந வினிபாதத⁴ம்மோ அவினிபாதத⁴ம்மோ. பரங் அயனந்தி அதிவிய ஸவிஸயே அயிதப்³ப³ங் பு³ஜ்ஜி²தப்³ப³ங். யேஸஞ்ஹி தா⁴தூனங் க³திஅத்தோ², பு³த்³தி⁴பி தேஸங் அத்தோ². தேனாஹ ‘‘அவஸ்ஸங் அபி⁴ஸம்பு³ஜ்ஜ²னகோ’’தி.
Tatthāti niraye. Maggasotanti maggassa sotaṃ. Āpannoti adhigato. Apāyesu uppajjanasaṅkhāto vinipātadhammo etassāti vinipātadhammo, na vinipātadhammo avinipātadhammo. Paraṃ ayananti ativiya savisaye ayitabbaṃ bujjhitabbaṃ. Yesañhi dhātūnaṃ gatiattho, buddhipi tesaṃ attho. Tenāha ‘‘avassaṃ abhisambujjhanako’’ti.
பாணாதிபாதகம்மகாரணாதி பாணாதிபாதஸங்கா²தஸ்ஸ பாபகம்மஸ்ஸ கரணஹேது. வேரங் வுச்சதி விரோதோ⁴, ததே³வ பா⁴யிதப்³ப³தோ ப⁴யந்தி ஆஹ ‘‘ப⁴யங் வேரந்தி அத்த²தோ ஏக’’ந்தி. இத³ங் பா³ஹிரங் வேரங் நாம தஸ்ஸ வேரஸ்ஸ மூலபூ⁴ததோ வேரகாரபுக்³க³லதோ ப³ஹிபா⁴வத்தா. தேனேவ ஹி தஸ்ஸ வேரகாரபுக்³க³லஸ்ஸ உப்பன்னங் வேரங் ஸந்தா⁴ய ‘‘இத³ங் அஜ்ஜ²த்திகவேரங் நாமா’’தி வுத்தங், தன்னிஸ்ஸிதஸ்ஸ வேரஸ்ஸ மூலபூ⁴தா வேரகாரபுக்³க³லசேதனா உப்பஜ்ஜதி பஹரிதுங் அஸமத்த²ஸ்ஸபீதி அதி⁴ப்பாயோ. ந ஹி நேரயிகா நிரயபாலேஸு படிபஹரிதுங் ஸக்கொந்தி. நிரயபாலஸ்ஸ சேதனா உப்பஜ்ஜதீதி ஏதேன ‘‘அத்தி² நிரயே நிரயபாலா’’தி த³ஸ்ஸேதி. யங் பனேதங் பா³ஹிரவேரந்தி யமித³ங் தி³ட்ட²த⁴ம்மிகங் ஸம்பராயிகஞ்ச பா³ஹிரங் வேரங். புக்³க³லவேரந்தி வுத்தங் அத்தகிச்சங் ஸாதே⁴துங் அஸக்கொந்தோ கேவலங் பரபுக்³க³லே உப்பன்னமத்தங் வேரந்தி கத்வா. அத்த²தோ ஏகமேவ ‘‘சேதஸிக’’ந்தி விஸேஸெத்வா வுத்தத்தா. ஸேஸபதே³ஸூதி ‘‘அதி³ன்னாதா³னபச்சயா’’திஆதி³னா ஆக³தேஸு ஸேஸகொட்டா²ஸேஸு. அத்தோ² ப⁴க்³கோ³தி அத்தோ² த⁴ங்ஸிதோ . அதி⁴க³தேனாதி மக்³கே³ன அதி⁴க³தேன. ‘‘அபி⁴க³தேனா’’திபி பாடோ², அதி⁴வுத்தேனாதி அத்தோ². தேனாஹ ‘‘அசலப்பஸாதே³னா’’தி.
Pāṇātipātakammakāraṇāti pāṇātipātasaṅkhātassa pāpakammassa karaṇahetu. Veraṃ vuccati virodho, tadeva bhāyitabbato bhayanti āha ‘‘bhayaṃ veranti atthato eka’’nti. Idaṃ bāhiraṃ veraṃ nāma tassa verassa mūlabhūtato verakārapuggalato bahibhāvattā. Teneva hi tassa verakārapuggalassa uppannaṃ veraṃ sandhāya ‘‘idaṃ ajjhattikaveraṃ nāmā’’ti vuttaṃ, tannissitassa verassa mūlabhūtā verakārapuggalacetanā uppajjati paharituṃ asamatthassapīti adhippāyo. Na hi nerayikā nirayapālesu paṭipaharituṃ sakkonti. Nirayapālassa cetanā uppajjatīti etena ‘‘atthi niraye nirayapālā’’ti dasseti. Yaṃ panetaṃ bāhiraveranti yamidaṃ diṭṭhadhammikaṃ samparāyikañca bāhiraṃ veraṃ. Puggalaveranti vuttaṃ attakiccaṃ sādhetuṃ asakkonto kevalaṃ parapuggale uppannamattaṃ veranti katvā. Atthato ekameva ‘‘cetasika’’nti visesetvā vuttattā. Sesapadesūti ‘‘adinnādānapaccayā’’tiādinā āgatesu sesakoṭṭhāsesu. Attho bhaggoti attho dhaṃsito . Adhigatenāti maggena adhigatena. ‘‘Abhigatenā’’tipi pāṭho, adhivuttenāti attho. Tenāha ‘‘acalappasādenā’’ti.
பஞ்சவேரப⁴யஸுத்தவண்ணனா நிட்டி²தா.
Pañcaverabhayasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. பஞ்சவேரப⁴யஸுத்தங் • 1. Pañcaverabhayasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. பஞ்சவேரப⁴யஸுத்தவண்ணனா • 1. Pañcaverabhayasuttavaṇṇanā
