| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
4. பஞ்ஞாபரிஹீனஸுத்தவண்ணனா
4. Paññāparihīnasuttavaṇṇanā
41. சதுத்தே² ஸுபரிஹீனாதி ஸுட்டு² பரிஹீனா. யே அரியாய பஞ்ஞாய பரிஹீனாதி யே ஸத்தா பஞ்சன்னங் க²ந்தா⁴னங் உத³யப்³ப³யபடிவிஜ்ஜ²னேன சதுஸச்சபடிவிஜ்ஜ²னேன ச கிலேஸேஹி ஆரகா டி²தத்தா அரியாய பரிஸுத்³தா⁴ய விபஸ்ஸனாபஞ்ஞாய ச மக்³க³பஞ்ஞாய ச பரிஹீனா, தே லோகியலோகுத்தராஹி ஸம்பத்தீஹி அதிவிய பரிஹீனா மஹாஜானிகா. கே பன தேதி? யே கம்மாவரணேன ஸமன்னாக³தா. தே ஹி மிச்ச²த்தனியதபா⁴வதோ ஏகந்தேன பரிஹீனா அபரிபுண்ணா மஹாஜானிகா. தேனாஹ ‘‘து³க்³க³தி பாடிகங்கா²’’தி. விபாகாவரணஸமங்கி³னோபி பரிஹீனா. அத² வா ஸுக்கபக்கே² அபரிஹீனா நாம திவிதா⁴வரணவிரஹிதா ஸம்மாதி³ட்டி²கா கம்மஸ்ஸகதஞாணேன ச ஸமன்னாக³தா. ஸேஸங் வுத்தனயானுஸாரேன வேதி³தப்³ப³ங்.
41. Catutthe suparihīnāti suṭṭhu parihīnā. Ye ariyāya paññāya parihīnāti ye sattā pañcannaṃ khandhānaṃ udayabbayapaṭivijjhanena catusaccapaṭivijjhanena ca kilesehi ārakā ṭhitattā ariyāya parisuddhāya vipassanāpaññāya ca maggapaññāya ca parihīnā, te lokiyalokuttarāhi sampattīhi ativiya parihīnā mahājānikā. Ke pana teti? Ye kammāvaraṇena samannāgatā. Te hi micchattaniyatabhāvato ekantena parihīnā aparipuṇṇā mahājānikā. Tenāha ‘‘duggati pāṭikaṅkhā’’ti. Vipākāvaraṇasamaṅginopi parihīnā. Atha vā sukkapakkhe aparihīnā nāma tividhāvaraṇavirahitā sammādiṭṭhikā kammassakatañāṇena ca samannāgatā. Sesaṃ vuttanayānusārena veditabbaṃ.
கா³தா²ஸு பஞ்ஞாயாதி நிஸ்ஸக்கவசனங், விபஸ்ஸனாஞாணதோ மக்³க³ஞாணதோ ச பரிஹானேனாதி. ஸாமிவசனங் வா ஏதங், யதா²வுத்தஞாணஸ்ஸ பரிஹானேனாதி, உப்பாதே³தப்³ப³ஸ்ஸ அனுப்பாத³னமேவ செத்த² பரிஹானங். நிவிட்ட²ங் நாமரூபஸ்மிந்தி நாமரூபே உபாதா³னக்க²ந்த⁴பஞ்சகே ‘‘ஏதங் மமா’’திஆதி³னா தண்ஹாதி³ட்டி²வஸேன அபி⁴னிவிட்ட²ங் அஜ்ஜோ²ஸிதங், ததோ ஏவ இத³ங் ஸச்சந்தி மஞ்ஞதீதி ‘‘இத³மேவ ஸச்சங் மோக⁴மஞ்ஞ’’ந்தி மஞ்ஞதி. ‘‘ஸதே³வகே லோகே’’தி விப⁴த்தி பரிணாமேதப்³பா³.
Gāthāsu paññāyāti nissakkavacanaṃ, vipassanāñāṇato maggañāṇato ca parihānenāti. Sāmivacanaṃ vā etaṃ, yathāvuttañāṇassa parihānenāti, uppādetabbassa anuppādanameva cettha parihānaṃ. Niviṭṭhaṃ nāmarūpasminti nāmarūpe upādānakkhandhapañcake ‘‘etaṃ mamā’’tiādinā taṇhādiṭṭhivasena abhiniviṭṭhaṃ ajjhositaṃ, tato eva idaṃ saccanti maññatīti ‘‘idameva saccaṃ moghamañña’’nti maññati. ‘‘Sadevake loke’’ti vibhatti pariṇāmetabbā.
ஏவங் பட²மகா³தா²ய ஸங்கிலேஸபக்க²ங் த³ஸ்ஸெத்வா இதா³னி யஸ்ஸா அனுப்பத்தியா நாமரூபஸ்மிங் மஞ்ஞனாபி⁴னிவேஸேஹி கிலேஸவட்டங் வத்ததி, தஸ்ஸா உப்பத்தியா வட்டஸ்ஸ உபச்சே²தோ³தி பஞ்ஞாய ஆனுபா⁴வங் பகாஸெந்தோ ‘‘பஞ்ஞா ஹி ஸெட்டா² லோகஸ்மி’’ந்தி கா³த²மாஹ.
Evaṃ paṭhamagāthāya saṃkilesapakkhaṃ dassetvā idāni yassā anuppattiyā nāmarūpasmiṃ maññanābhinivesehi kilesavaṭṭaṃ vattati, tassā uppattiyā vaṭṭassa upacchedoti paññāya ānubhāvaṃ pakāsento ‘‘paññā hi seṭṭhā lokasmi’’nti gāthamāha.
தத்த² லோகஸ்மிந்தி ஸங்கா²ரலோகஸ்மிங். ஸம்மாஸம்பு³த்³தோ⁴ விய ஸத்தேஸு, ஸங்கா²ரேஸு பஞ்ஞாஸதி³ஸோ த⁴ம்மோ நத்தி². பஞ்ஞுத்தரா ஹி குஸலா த⁴ம்மா, பஞ்ஞாய ச ஸித்³தா⁴ய ஸப்³பே³ அனவஜ்ஜத⁴ம்மா ஸித்³தா⁴ ஏவ ஹொந்தி. ததா² ஹி வுத்தங் ‘‘ஸம்மாதி³ட்டி²ஸ்ஸ ஸம்மாஸங்கப்போ பஹோதீ’’திஆதி³ (ம॰ நி॰ 3.141; ஸங்॰ நி॰ 5.1). யா பனெத்த² பஞ்ஞா அதி⁴ப்பேதா, ஸா ஸெட்டா²தி தோ²மிதா. யதா² ச ஸா பவத்ததி, தங் த³ஸ்ஸேதுங் ‘‘யாயங் நிப்³பே³த⁴கா³மினீ’’திஆதி³ வுத்தங். தஸ்ஸத்தோ² – யா அயங் பஞ்ஞா அனிப்³பி³த்³த⁴புப்³ப³ங் அபதா³லிதபுப்³ப³ங் லோப⁴க்க²ந்தா⁴தி³ங் நிப்³பி³ஜ்ஜ²ந்தீ பதா³லெந்தீ க³ச்ச²தி பவத்ததீதி நிப்³பே³த⁴கா³மினீ, யாய ச தஸ்மிங் தஸ்மிங் ப⁴வயோனிக³திவிஞ்ஞாணட்டி²திஸத்தாவாஸேஸு ஸத்தனிகாயேஸு க²ந்தா⁴னங் பட²மாபி⁴னிப்³ப³த்திஸங்கா²தாய ஜாதியா தங்னிமித்தஸ்ஸ ச கம்மப⁴வஸ்ஸ பரிக்க²யங் பரியோஸானங் நிப்³பா³னங் அரஹத்தஞ்ச ஸம்மா அவிபரீதங் ஜானாதி ஸச்சி²கரோதி, அயங் ஸஹவிபஸ்ஸனா மக்³க³பஞ்ஞா ஸெட்டா² லோகஸ்மிந்தி.
Tattha lokasminti saṅkhāralokasmiṃ. Sammāsambuddho viya sattesu, saṅkhāresu paññāsadiso dhammo natthi. Paññuttarā hi kusalā dhammā, paññāya ca siddhāya sabbe anavajjadhammā siddhā eva honti. Tathā hi vuttaṃ ‘‘sammādiṭṭhissa sammāsaṅkappo pahotī’’tiādi (ma. ni. 3.141; saṃ. ni. 5.1). Yā panettha paññā adhippetā, sā seṭṭhāti thomitā. Yathā ca sā pavattati, taṃ dassetuṃ ‘‘yāyaṃ nibbedhagāminī’’tiādi vuttaṃ. Tassattho – yā ayaṃ paññā anibbiddhapubbaṃ apadālitapubbaṃ lobhakkhandhādiṃ nibbijjhantī padālentī gacchati pavattatīti nibbedhagāminī, yāya ca tasmiṃ tasmiṃ bhavayonigativiññāṇaṭṭhitisattāvāsesu sattanikāyesu khandhānaṃ paṭhamābhinibbattisaṅkhātāya jātiyā taṃnimittassa ca kammabhavassa parikkhayaṃ pariyosānaṃ nibbānaṃ arahattañca sammā aviparītaṃ jānāti sacchikaroti, ayaṃ sahavipassanā maggapaññā seṭṭhā lokasminti.
இதா³னி யதா²வுத்தபஞ்ஞானுபா⁴வஸம்பன்னே கீ²ணாஸவே அபி⁴த்த²வந்தோ ‘‘தேஸங் தே³வா மனுஸ்ஸா சா’’தி ஓஸானகா³த²மாஹ. தஸ்ஸத்தோ² – தேஸங் சதூஸு அரியஸச்சேஸு பரிஞ்ஞாதீ³னங் ஸோளஸன்னங் கிச்சானங் நிட்டி²தத்தா சதுஸச்சஸம்போ³தே⁴ன ஸம்பு³த்³தா⁴னங், ஸதிவேபுல்லப்பத்தியா ஸதிமதங், வுத்தனயேன ஸமுக்³கா⁴திதஸம்மோஹத்தா பஞ்ஞாவேபுல்லப்பத்தியா ஹாஸபஞ்ஞானங், புப்³ப³பா⁴கே³ வா ஸீலாதி³பாரிபூரிதோ பட்டா²ய யாவ நிப்³பா³னஸச்சி²கிரியாய ஹாஸவேத³துட்டி²பாமோஜ்ஜப³ஹுலதாய ஹாஸபஞ்ஞானங், ஸப்³ப³ஸோ பரிக்கீ²ணப⁴வஸங்யோஜனத்தா அந்திமஸரீரதா⁴ரீனங் கீ²ணாஸவானங் தே³வா மனுஸ்ஸா ச பிஹயந்தி பியா ஹொந்தி, தப்³பா⁴வங் அதி⁴க³ந்துங் இச்ச²ந்தி ‘‘அஹோ பஞ்ஞானுபா⁴வோ, அஹோ வத மயம்பி ஏதி³ஸா ஏவங் நித்திண்ணஸப்³ப³து³க்கா² ப⁴வெய்யாமா’’தி.
Idāni yathāvuttapaññānubhāvasampanne khīṇāsave abhitthavanto ‘‘tesaṃ devā manussā cā’’ti osānagāthamāha. Tassattho – tesaṃ catūsu ariyasaccesu pariññādīnaṃ soḷasannaṃ kiccānaṃ niṭṭhitattā catusaccasambodhena sambuddhānaṃ, sativepullappattiyā satimataṃ, vuttanayena samugghātitasammohattā paññāvepullappattiyā hāsapaññānaṃ, pubbabhāge vā sīlādipāripūrito paṭṭhāya yāva nibbānasacchikiriyāya hāsavedatuṭṭhipāmojjabahulatāya hāsapaññānaṃ, sabbaso parikkhīṇabhavasaṃyojanattā antimasarīradhārīnaṃ khīṇāsavānaṃ devā manussā ca pihayanti piyā honti, tabbhāvaṃ adhigantuṃ icchanti ‘‘aho paññānubhāvo, aho vata mayampi edisā evaṃ nittiṇṇasabbadukkhā bhaveyyāmā’’ti.
சதுத்த²ஸுத்தவண்ணனா நிட்டி²தா.
Catutthasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 4. பஞ்ஞாபரிஹீனஸுத்தங் • 4. Paññāparihīnasuttaṃ
