| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
7. பபஞ்சக²யஸுத்தவண்ணனா
7. Papañcakhayasuttavaṇṇanā
67. ஸத்தமே பபஞ்சஸஞ்ஞாஸங்கா²பஹானந்தி பபஞ்செந்தி யத்த² ஸயங் உப்பன்னா, தங் ஸந்தானங் வித்தா²ரெந்தி சிரங் ட²பெந்தீதி பபஞ்சா, கிலேஸா. விஸேஸதோ ராக³தோ³ஸமோஹதண்ஹாதி³ட்டி²மானா. ததா² ஹி வுத்தங் –
67. Sattame papañcasaññāsaṅkhāpahānanti papañcenti yattha sayaṃ uppannā, taṃ santānaṃ vitthārenti ciraṃ ṭhapentīti papañcā, kilesā. Visesato rāgadosamohataṇhādiṭṭhimānā. Tathā hi vuttaṃ –
‘‘ராகோ³ பபஞ்சோ, தோ³ஸோ பபஞ்சோ, மோஹோ பபஞ்சோ, தண்ஹா பபஞ்சோ, தி³ட்டி² பபஞ்சோ, மானோ பபஞ்சோ’’தி. –
‘‘Rāgo papañco, doso papañco, moho papañco, taṇhā papañco, diṭṭhi papañco, māno papañco’’ti. –
அபிச ஸங்கிலேஸட்டோ² பபஞ்சட்டோ², கசவரட்டோ² பபஞ்சட்டோ². தத்த² ராக³பபஞ்சஸ்ஸ ஸுப⁴ஸஞ்ஞா நிமித்தங், தோ³ஸபபஞ்சஸ்ஸ ஆகா⁴தவத்து², மோஹபபஞ்சஸ்ஸ ஆஸவா, தண்ஹாபபஞ்சஸ்ஸ வேத³னா, தி³ட்டி²பபஞ்சஸ்ஸ ஸஞ்ஞா, மானபபஞ்சஸ்ஸ விதக்கோ நிமித்தங். தேஹி பபஞ்சேஹி ஸஹக³தா ஸஞ்ஞா பபஞ்சஸஞ்ஞா. பபஞ்சஸஞ்ஞானங் ஸங்கா² பா⁴கா³ கொட்டா²ஸா பபஞ்சஸஞ்ஞாஸங்கா². அத்த²தோ ஸத்³தி⁴ங் நிமித்தேஹி தங்தங்பபஞ்சஸ்ஸ பக்கி²யோ கிலேஸக³ணோ. ஸஞ்ஞாக³ஹணஞ்செத்த² தஸ்ஸ நேஸங் ஸாதா⁴ரணஹேதுபா⁴வேன. வுத்தஞ்ஹேதங் – ‘‘ஸஞ்ஞானிதா³னா ஹி பபஞ்சஸங்கா²’’தி (ஸு॰ நி॰ 880). தேஸங் பஹானங், தேன தேன மக்³கே³ன ராகா³தி³கிலேஸானங் ஸமுச்சே²த³னந்தி அத்தோ².
Apica saṃkilesaṭṭho papañcaṭṭho, kacavaraṭṭho papañcaṭṭho. Tattha rāgapapañcassa subhasaññā nimittaṃ, dosapapañcassa āghātavatthu, mohapapañcassa āsavā, taṇhāpapañcassa vedanā, diṭṭhipapañcassa saññā, mānapapañcassa vitakko nimittaṃ. Tehi papañcehi sahagatā saññā papañcasaññā. Papañcasaññānaṃ saṅkhā bhāgā koṭṭhāsā papañcasaññāsaṅkhā. Atthato saddhiṃ nimittehi taṃtaṃpapañcassa pakkhiyo kilesagaṇo. Saññāgahaṇañcettha tassa nesaṃ sādhāraṇahetubhāvena. Vuttañhetaṃ – ‘‘saññānidānā hi papañcasaṅkhā’’ti (su. ni. 880). Tesaṃ pahānaṃ, tena tena maggena rāgādikilesānaṃ samucchedananti attho.
ததா³ ஹி ப⁴க³வா அதீதாஸு அனேககோடிஸதஸஹஸ்ஸஸங்கா²ஸு அத்தனோ ஜாதீஸு அனத்த²ஸ்ஸ நிமித்தபூ⁴தே கிலேஸே இமஸ்மிங் சரிமப⁴வே அரியமக்³கே³ன போ³தி⁴மண்டே³ ஸவாஸனே பஹீனே பச்சவெக்கி²த்வா ஸத்தஸந்தானஞ்ச கிலேஸசரிதங் ராகா³தி³கிலேஸஸங்கிலிட்ட²ங் கஞ்ஜியபுண்ணலாபு³ங் விய தக்கப⁴ரிதசாடிங் விய வஸாபீதபிலோதிகங் விய ச து³ப்³பி³னிமோசியங் தி³ஸ்வா ‘‘ஏவங் க³ஹனங் நாமித³ங் கிலேஸவட்டங் அனாதி³காலபா⁴விதங் மய்ஹங் அனவஸேஸங் பஹீனங், அஹோ ஸுப்பஹீன’’ந்தி உப்பன்னபீதிபாமோஜ்ஜோ உதா³னங் உதா³னேஸி. தேன வுத்தங் – ‘‘அத² கோ² ப⁴க³வா அத்தனோ பபஞ்சஸஞ்ஞாஸங்கா²பஹானங் விதி³த்வா தாயங் வேலாயங் இமங் உதா³னங் உதா³னேஸீ’’தி.
Tadā hi bhagavā atītāsu anekakoṭisatasahassasaṅkhāsu attano jātīsu anatthassa nimittabhūte kilese imasmiṃ carimabhave ariyamaggena bodhimaṇḍe savāsane pahīne paccavekkhitvā sattasantānañca kilesacaritaṃ rāgādikilesasaṃkiliṭṭhaṃ kañjiyapuṇṇalābuṃ viya takkabharitacāṭiṃ viya vasāpītapilotikaṃ viya ca dubbinimociyaṃ disvā ‘‘evaṃ gahanaṃ nāmidaṃ kilesavaṭṭaṃ anādikālabhāvitaṃ mayhaṃ anavasesaṃ pahīnaṃ, aho suppahīna’’nti uppannapītipāmojjo udānaṃ udānesi. Tena vuttaṃ – ‘‘atha kho bhagavā attano papañcasaññāsaṅkhāpahānaṃ viditvā tāyaṃ velāyaṃ imaṃ udānaṃ udānesī’’ti.
தத்த² யஸ்ஸ பபஞ்சா டி²தி ச நத்தீ²தி யஸ்மா ப⁴க³வா அத்தானமேவ பரங் விய கத்வா நித்³தி³ஸதி தஸ்மா யஸ்ஸ அக்³க³புக்³க³லஸ்ஸ வுத்தலக்க²ணா பபஞ்சா, தேஹி கதா ஸங்ஸாரே டி²தி ச நத்தி². நெத்தியங் பன ‘‘டி²தி நாம அனுஸயோ’’தி (நெத்தி॰ 27) வுத்தங். அனுஸயோ ஹி ப⁴வபவத்தியா மூலந்தி. ஸத்தே ஸங்ஸாரே பபஞ்செந்தீதி பபஞ்சா. ‘‘பபஞ்சட்டி²தீ’’தி ச பாடோ². தஸ்ஸத்தோ² – பபஞ்சானங் டி²தி விஜ்ஜமானதா மக்³கே³ன அஸமுச்சே²தோ³ பபஞ்சட்டி²தி, பபஞ்சா ஏவ வா அவஸிட்ட²குஸலாகுஸலவிபாகானங் பவத்தியா ஹேதுபா⁴வதோ வட்டஸ்ஸ டி²தி பபஞ்சட்டி²தி, ஸா யஸ்ஸ அக்³க³புக்³க³லஸ்ஸ நத்தி². ஸந்தா³னங் பலிக⁴ஞ்ச வீதிவத்தோதி யோ ப³ந்த⁴னட்டே²ன ஸந்தானஸதி³ஸத்தா ‘‘ஸந்தா³ன’’ந்தி லத்³த⁴னாமா தண்ஹாதி³ட்டி²யோ, நிப்³பா³னநக³ரபவேஸனிஸேத⁴னதோ பலிக⁴ஸதி³ஸத்தா பலிக⁴ஸங்கா²தங் அவிஜ்ஜஞ்ச வீதிவத்தோ ஸவாஸனபஹானேன விஸேஸதோ அதிக்கந்தோ. அபரே பன கோத⁴ங் ‘‘ஸந்தா³ன’’ந்தி வத³ந்தி, தங் ந க³ஹேதப்³ப³ங். ஸோ ஹி ‘‘பராபி⁴ஸஜ்ஜனீ’’தி வுத்தோதி.
Tattha yassa papañcā ṭhiti ca natthīti yasmā bhagavā attānameva paraṃ viya katvā niddisati tasmā yassa aggapuggalassa vuttalakkhaṇā papañcā, tehi katā saṃsāre ṭhiti ca natthi. Nettiyaṃ pana ‘‘ṭhiti nāma anusayo’’ti (netti. 27) vuttaṃ. Anusayo hi bhavapavattiyā mūlanti. Satte saṃsāre papañcentīti papañcā. ‘‘Papañcaṭṭhitī’’ti ca pāṭho. Tassattho – papañcānaṃ ṭhiti vijjamānatā maggena asamucchedo papañcaṭṭhiti, papañcā eva vā avasiṭṭhakusalākusalavipākānaṃ pavattiyā hetubhāvato vaṭṭassa ṭhiti papañcaṭṭhiti, sā yassa aggapuggalassa natthi. Sandānaṃ palighañca vītivattoti yo bandhanaṭṭhena santānasadisattā ‘‘sandāna’’nti laddhanāmā taṇhādiṭṭhiyo, nibbānanagarapavesanisedhanato palighasadisattā palighasaṅkhātaṃ avijjañca vītivatto savāsanapahānena visesato atikkanto. Apare pana kodhaṃ ‘‘sandāna’’nti vadanti, taṃ na gahetabbaṃ. So hi ‘‘parābhisajjanī’’ti vuttoti.
தங் நித்தண்ஹங் முனிங் சரந்தந்தி தங் ஸப்³ப³தா²பி தண்ஹாபா⁴வேன நித்தண்ஹங், உப⁴யலோகமுனநதோ அத்தஹிதபரஹிதமுனநதோ ச முனிங், ஏகந்தேனேவ ஸப்³ப³ஸத்தஹிதத்த²ங் சதூஹி இரியாபதே²ஹி நானாஸமாபத்திசாரேஹி அனஞ்ஞஸாதா⁴ரணேன ஞாணசாரேன ச சரந்தங். நாவஜானாதி ஸதே³வகோபி லோகோதி ஸப்³போ³ ஸபஞ்ஞஜாதிகோ ஸத்தலோகோ ஸதே³வகோபி ஸப்³ரஹ்மகோபி ந கதா³சிபி அவஜானாதி ந பரிபோ⁴தி, அத² கோ² அயமேவ லோகே அக்³கோ³ ஸெட்டோ² உத்தமோ பவரோதி க³ருங் கரொந்தோ ஸக்கச்சங் பூஜாஸக்காரனிரதோ ஹோதீதி.
Taṃ nittaṇhaṃ muniṃ carantanti taṃ sabbathāpi taṇhābhāvena nittaṇhaṃ, ubhayalokamunanato attahitaparahitamunanato ca muniṃ, ekanteneva sabbasattahitatthaṃ catūhi iriyāpathehi nānāsamāpatticārehi anaññasādhāraṇena ñāṇacārena ca carantaṃ. Nāvajānāti sadevakopi lokoti sabbo sapaññajātiko sattaloko sadevakopi sabrahmakopi na kadācipi avajānāti na paribhoti, atha kho ayameva loke aggo seṭṭho uttamo pavaroti garuṃ karonto sakkaccaṃ pūjāsakkāranirato hotīti.
ஸத்தமஸுத்தவண்ணனா நிட்டி²தா.
Sattamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 7. பபஞ்சக²யஸுத்தங் • 7. Papañcakhayasuttaṃ
