| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૩૩. પરાયનસુત્તં
33. Parāyanasuttaṃ
૪૦૯. ‘‘પરાયનઞ્ચ 1 વો, ભિક્ખવે, દેસેસ્સામિ પરાયનગામિઞ્ચ મગ્ગં. તં સુણાથ. કતમઞ્ચ, ભિક્ખવે, પરાયનં? યો, ભિક્ખવે, રાગક્ખયો દોસક્ખયો મોહક્ખયો – ઇદં વુચ્ચતિ, ભિક્ખવે, પરાયનં. કતમો ચ, ભિક્ખવે, પરાયનગામી મગ્ગો? કાયગતાસતિ. અયં વુચ્ચતિ, ભિક્ખવે, પરાયનગામિમગ્ગો. ઇતિ ખો, ભિક્ખવે, દેસિતં વો મયા પરાયનં, દેસિતો પરાયનગામિમગ્ગો. યં, ભિક્ખવે, સત્થારા કરણીયં સાવકાનં હિતેસિના અનુકમ્પકેન અનુકમ્પં ઉપાદાય, કતં વો તં મયા. એતાનિ, ભિક્ખવે, રુક્ખમૂલાનિ, એતાનિ સુઞ્ઞાગારાનિ. ઝાયથ, ભિક્ખવે, મા પમાદત્થ; મા પચ્છા વિપ્પટિસારિનો અહુવત્થ. અયં વો અમ્હાકં અનુસાસની’’તિ. (યથા અસઙ્ખતં તથા વિત્થારેતબ્બં). તેત્તિંસતિમં.
409. ‘‘Parāyanañca 2 vo, bhikkhave, desessāmi parāyanagāmiñca maggaṃ. Taṃ suṇātha. Katamañca, bhikkhave, parāyanaṃ? Yo, bhikkhave, rāgakkhayo dosakkhayo mohakkhayo – idaṃ vuccati, bhikkhave, parāyanaṃ. Katamo ca, bhikkhave, parāyanagāmī maggo? Kāyagatāsati. Ayaṃ vuccati, bhikkhave, parāyanagāmimaggo. Iti kho, bhikkhave, desitaṃ vo mayā parāyanaṃ, desito parāyanagāmimaggo. Yaṃ, bhikkhave, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. Etāni, bhikkhave, rukkhamūlāni, etāni suññāgārāni. Jhāyatha, bhikkhave, mā pamādattha; mā pacchā vippaṭisārino ahuvattha. Ayaṃ vo amhākaṃ anusāsanī’’ti. (Yathā asaṅkhataṃ tathā vitthāretabbaṃ). Tettiṃsatimaṃ.
દુતિયો વગ્ગો.
Dutiyo vaggo.
તસ્સુદ્દાનં –
Tassuddānaṃ –
અસઙ્ખતં અનતં અનાસવં, સચ્ચઞ્ચ પારં નિપુણં સુદુદ્દસં;
Asaṅkhataṃ anataṃ anāsavaṃ, saccañca pāraṃ nipuṇaṃ sududdasaṃ;
અજજ્જરં ધુવં અપલોકિતં, અનિદસ્સનં નિપ્પપઞ્ચ સન્તં.
Ajajjaraṃ dhuvaṃ apalokitaṃ, anidassanaṃ nippapañca santaṃ.
અમતં પણીતઞ્ચ સિવઞ્ચ ખેમં, તણ્હાક્ખયો અચ્છરિયઞ્ચ અબ્ભુતં;
Amataṃ paṇītañca sivañca khemaṃ, taṇhākkhayo acchariyañca abbhutaṃ;
અનીતિકં અનીતિકધમ્મં, નિબ્બાનમેતં સુગતેન દેસિતં.
Anītikaṃ anītikadhammaṃ, nibbānametaṃ sugatena desitaṃ.
અબ્યાપજ્ઝો વિરાગો ચ, સુદ્ધિ મુત્તિ અનાલયો;
Abyāpajjho virāgo ca, suddhi mutti anālayo;
દીપો લેણઞ્ચ તાણઞ્ચ, સરણઞ્ચ પરાયનન્તિ.
Dīpo leṇañca tāṇañca, saraṇañca parāyananti.
અસઙ્ખતસંયુત્તં સમત્તં.
Asaṅkhatasaṃyuttaṃ samattaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૧-૩૩. અસઙ્ખતસુત્તાદિવણ્ણના • 1-33. Asaṅkhatasuttādivaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૨૩-૩૩. અસઙ્ખતસુત્તાદિવણ્ણના • 23-33. Asaṅkhatasuttādivaṇṇanā
