| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
10. பரிப்³பா³ஜகஸுத்தங்
10. Paribbājakasuttaṃ
30. ஏகங் ஸமயங் ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே. தேன கோ² பன ஸமயேன ஸம்ப³ஹுலா அபி⁴ஞ்ஞாதா அபி⁴ஞ்ஞாதா பரிப்³பா³ஜகா ஸிப்பினிகாதீரே 1 பரிப்³பா³ஜகாராமே படிவஸந்தி, ஸெய்யதி²த³ங் அன்னபா⁴ரோ வரத⁴ரோ ஸகுலுதா³யீ ச பரிப்³பா³ஜகோ அஞ்ஞே ச அபி⁴ஞ்ஞாதா அபி⁴ஞ்ஞாதா பரிப்³பா³ஜகா. அத² கோ² ப⁴க³வா ஸாயன்ஹஸமயங் படிஸல்லானா வுட்டி²தோ யேன ஸிப்பினிகாதீரங் பரிப்³பா³ஜகாராமோ தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா தே பரிப்³பா³ஜகே ஏதத³வோச –
30. Ekaṃ samayaṃ bhagavā rājagahe viharati gijjhakūṭe pabbate. Tena kho pana samayena sambahulā abhiññātā abhiññātā paribbājakā sippinikātīre 2 paribbājakārāme paṭivasanti, seyyathidaṃ annabhāro varadharo sakuludāyī ca paribbājako aññe ca abhiññātā abhiññātā paribbājakā. Atha kho bhagavā sāyanhasamayaṃ paṭisallānā vuṭṭhito yena sippinikātīraṃ paribbājakārāmo tenupasaṅkami; upasaṅkamitvā paññatte āsane nisīdi. Nisajja kho bhagavā te paribbājake etadavoca –
‘‘சத்தாரிமானி, பரிப்³பா³ஜகா, த⁴ம்மபதா³னி அக்³க³ஞ்ஞானி ரத்தஞ்ஞானி வங்ஸஞ்ஞானி போராணானி அஸங்கிண்ணானி அஸங்கிண்ணபுப்³பா³னி, ந ஸங்கீயந்தி ந ஸங்கீயிஸ்ஸந்தி, அப்படிகுட்டா²னி ஸமணேஹி ப்³ராஹ்மணேஹி விஞ்ஞூஹி. கதமானி சத்தாரி? அனபி⁴ஜ்ஜா², பரிப்³பா³ஜகா, த⁴ம்மபத³ங் அக்³க³ஞ்ஞங் ரத்தஞ்ஞங் வங்ஸஞ்ஞங் போராணங் அஸங்கிண்ணங் அஸங்கிண்ணபுப்³ப³ங், ந ஸங்கீயதி ந ஸங்கீயிஸ்ஸதி, அப்படிகுட்ட²ங் ஸமணேஹி ப்³ராஹ்மணேஹி விஞ்ஞூஹி. அப்³யாபாதோ³, பரிப்³பா³ஜகா, த⁴ம்மபத³ங்…பே॰… ஸம்மாஸதி, பரிப்³பா³ஜகா, த⁴ம்மபத³ங்…பே॰… ஸம்மாஸமாதி⁴, பரிப்³பா³ஜகா, த⁴ம்மபத³ங் அக்³க³ஞ்ஞங் ரத்தஞ்ஞங் வங்ஸஞ்ஞங் போராணங் அஸங்கிண்ணங் அஸங்கிண்ணபுப்³ப³ங், ந ஸங்கீயதி ந ஸங்கீயிஸ்ஸதி, அப்படிகுட்ட²ங் ஸமணேஹி ப்³ராஹ்மணேஹி விஞ்ஞூஹி. இமானி கோ² , பரிப்³பா³ஜகா, சத்தாரி த⁴ம்மபதா³னி அக்³க³ஞ்ஞானி ரத்தஞ்ஞானி வங்ஸஞ்ஞானி போராணானி அஸங்கிண்ணானி அஸங்கிண்ணபுப்³பா³னி, ந ஸங்கீயந்தி ந ஸங்கீயிஸ்ஸந்தி, அப்படிகுட்டா²னி ஸமணேஹி ப்³ராஹ்மணேஹி விஞ்ஞூஹி.
‘‘Cattārimāni, paribbājakā, dhammapadāni aggaññāni rattaññāni vaṃsaññāni porāṇāni asaṃkiṇṇāni asaṃkiṇṇapubbāni, na saṃkīyanti na saṃkīyissanti, appaṭikuṭṭhāni samaṇehi brāhmaṇehi viññūhi. Katamāni cattāri? Anabhijjhā, paribbājakā, dhammapadaṃ aggaññaṃ rattaññaṃ vaṃsaññaṃ porāṇaṃ asaṃkiṇṇaṃ asaṃkiṇṇapubbaṃ, na saṃkīyati na saṃkīyissati, appaṭikuṭṭhaṃ samaṇehi brāhmaṇehi viññūhi. Abyāpādo, paribbājakā, dhammapadaṃ…pe… sammāsati, paribbājakā, dhammapadaṃ…pe… sammāsamādhi, paribbājakā, dhammapadaṃ aggaññaṃ rattaññaṃ vaṃsaññaṃ porāṇaṃ asaṃkiṇṇaṃ asaṃkiṇṇapubbaṃ, na saṃkīyati na saṃkīyissati, appaṭikuṭṭhaṃ samaṇehi brāhmaṇehi viññūhi. Imāni kho , paribbājakā, cattāri dhammapadāni aggaññāni rattaññāni vaṃsaññāni porāṇāni asaṃkiṇṇāni asaṃkiṇṇapubbāni, na saṃkīyanti na saṃkīyissanti, appaṭikuṭṭhāni samaṇehi brāhmaṇehi viññūhi.
‘‘யோ கோ², பரிப்³பா³ஜகா, ஏவங் வதெ³ய்ய – ‘அஹமேதங் அனபி⁴ஜ்ஜ²ங் த⁴ம்மபத³ங் பச்சக்கா²ய அபி⁴ஜ்ஜா²லுங் காமேஸு திப்³ப³ஸாராக³ங் ஸமணங் வா ப்³ராஹ்மணங் வா பஞ்ஞாபெஸ்ஸாமீ’தி, தமஹங் தத்த² ஏவங் வதெ³ய்யங் – ‘ஏது வத³து ப்³யாஹரது பஸ்ஸாமிஸ்ஸானுபா⁴வ’ந்தி. ஸோ வத, பரிப்³பா³ஜகா, அனபி⁴ஜ்ஜ²ங் த⁴ம்மபத³ங் பச்சக்கா²ய அபி⁴ஜ்ஜா²லுங் காமேஸு திப்³ப³ஸாராக³ங் ஸமணங் வா ப்³ராஹ்மணங் வா பஞ்ஞாபெஸ்ஸதீதி நேதங் டா²னங் விஜ்ஜதி.
‘‘Yo kho, paribbājakā, evaṃ vadeyya – ‘ahametaṃ anabhijjhaṃ dhammapadaṃ paccakkhāya abhijjhāluṃ kāmesu tibbasārāgaṃ samaṇaṃ vā brāhmaṇaṃ vā paññāpessāmī’ti, tamahaṃ tattha evaṃ vadeyyaṃ – ‘etu vadatu byāharatu passāmissānubhāva’nti. So vata, paribbājakā, anabhijjhaṃ dhammapadaṃ paccakkhāya abhijjhāluṃ kāmesu tibbasārāgaṃ samaṇaṃ vā brāhmaṇaṃ vā paññāpessatīti netaṃ ṭhānaṃ vijjati.
‘‘யோ கோ², பரிப்³பா³ஜகா, ஏவங் வதெ³ய்ய – ‘அஹமேதங் அப்³யாபாத³ங் த⁴ம்மபத³ங் பச்சக்கா²ய ப்³யாபன்னசித்தங் பது³ட்ட²மனஸங்கப்பங் ஸமணங் வா ப்³ராஹ்மணங் வா பஞ்ஞாபெஸ்ஸாமீ’தி, தமஹங் தத்த² ஏவங் வதெ³ய்யங் – ‘ஏது வத³து ப்³யாஹரது பஸ்ஸாமிஸ்ஸானுபா⁴வ’ந்தி. ஸோ வத, பரிப்³பா³ஜகா, அப்³யாபாத³ங் த⁴ம்மபத³ங் பச்சக்கா²ய ப்³யாபன்னசித்தங் பது³ட்ட²மனஸங்கப்பங் ஸமணங் வா ப்³ராஹ்மணங் வா பஞ்ஞாபெஸ்ஸதீதி நேதங் டா²னங் விஜ்ஜதி.
‘‘Yo kho, paribbājakā, evaṃ vadeyya – ‘ahametaṃ abyāpādaṃ dhammapadaṃ paccakkhāya byāpannacittaṃ paduṭṭhamanasaṅkappaṃ samaṇaṃ vā brāhmaṇaṃ vā paññāpessāmī’ti, tamahaṃ tattha evaṃ vadeyyaṃ – ‘etu vadatu byāharatu passāmissānubhāva’nti. So vata, paribbājakā, abyāpādaṃ dhammapadaṃ paccakkhāya byāpannacittaṃ paduṭṭhamanasaṅkappaṃ samaṇaṃ vā brāhmaṇaṃ vā paññāpessatīti netaṃ ṭhānaṃ vijjati.
‘‘யோ கோ², பரிப்³பா³ஜகா, ஏவங் வதெ³ய்ய – ‘அஹமேதங் ஸம்மாஸதிங் த⁴ம்மபத³ங் பச்சக்கா²ய முட்ட²ஸ்ஸதிங் அஸம்பஜானங் ஸமணங் வா ப்³ராஹ்மணங் வா பஞ்ஞாபெஸ்ஸாமீ’தி, தமஹங் தத்த² ஏவங் வதெ³ய்யங் – ‘ஏது வத³து ப்³யாஹரது பஸ்ஸாமிஸ்ஸானுபா⁴வ’ந்தி. ஸோ வத, பரிப்³பா³ஜகா, ஸம்மாஸதிங் த⁴ம்மபத³ங் பச்சக்கா²ய முட்ட²ஸ்ஸதிங் அஸம்பஜானங் ஸமணங் வா ப்³ராஹ்மணங் வா பஞ்ஞாபெஸ்ஸதீதி நேதங் டா²னங் விஜ்ஜதி.
‘‘Yo kho, paribbājakā, evaṃ vadeyya – ‘ahametaṃ sammāsatiṃ dhammapadaṃ paccakkhāya muṭṭhassatiṃ asampajānaṃ samaṇaṃ vā brāhmaṇaṃ vā paññāpessāmī’ti, tamahaṃ tattha evaṃ vadeyyaṃ – ‘etu vadatu byāharatu passāmissānubhāva’nti. So vata, paribbājakā, sammāsatiṃ dhammapadaṃ paccakkhāya muṭṭhassatiṃ asampajānaṃ samaṇaṃ vā brāhmaṇaṃ vā paññāpessatīti netaṃ ṭhānaṃ vijjati.
‘‘யோ கோ², பரிப்³பா³ஜகா, ஏவங் வதெ³ய்ய – ‘அஹமேதங் ஸம்மாஸமாதி⁴ங் த⁴ம்மபத³ங் பச்சக்கா²ய அஸமாஹிதங் விப்³ப⁴ந்தசித்தங் ஸமணங் வா ப்³ராஹ்மணங் வா பஞ்ஞாபெஸ்ஸாமீ’தி, தமஹங் தத்த² ஏவங் வதெ³ய்யங் – ‘ஏது வத³து ப்³யாஹரது பஸ்ஸாமிஸ்ஸானுபா⁴வ’ந்தி. ஸோ வத, பரிப்³பா³ஜகா, ஸம்மாஸமாதி⁴ங் த⁴ம்மபத³ங் பச்சக்கா²ய அஸமாஹிதங் விப்³ப⁴ந்தசித்தங் ஸமணங் வா ப்³ராஹ்மணங் வா பஞ்ஞாபெஸ்ஸதீதி நேதங் டா²னங் விஜ்ஜதி.
‘‘Yo kho, paribbājakā, evaṃ vadeyya – ‘ahametaṃ sammāsamādhiṃ dhammapadaṃ paccakkhāya asamāhitaṃ vibbhantacittaṃ samaṇaṃ vā brāhmaṇaṃ vā paññāpessāmī’ti, tamahaṃ tattha evaṃ vadeyyaṃ – ‘etu vadatu byāharatu passāmissānubhāva’nti. So vata, paribbājakā, sammāsamādhiṃ dhammapadaṃ paccakkhāya asamāhitaṃ vibbhantacittaṃ samaṇaṃ vā brāhmaṇaṃ vā paññāpessatīti netaṃ ṭhānaṃ vijjati.
‘‘யோ கோ², பரிப்³பா³ஜகா, இமானி சத்தாரி த⁴ம்மபதா³னி க³ரஹிதப்³ப³ங் படிக்கோஸிதப்³ப³ங் மஞ்ஞெய்ய, தஸ்ஸ தி³ட்டே²வ த⁴ம்மே சத்தாரோ ஸஹத⁴ம்மிகா வாதா³னுபாதா கா³ரய்ஹா டா²னா 3 ஆக³ச்ச²ந்தி. கதமே சத்தாரோ? அனபி⁴ஜ்ஜ²ங் சே ப⁴வங் த⁴ம்மபத³ங் க³ரஹதி படிக்கோஸதி, யே ச ஹி 4 அபி⁴ஜ்ஜா²லூ காமேஸு திப்³ப³ஸாராகா³ ஸமணப்³ராஹ்மணா தே போ⁴தோ புஜ்ஜா தே போ⁴தோ பாஸங்ஸா. அப்³யாபாத³ங் சே ப⁴வங் த⁴ம்மபத³ங் க³ரஹதி படிக்கோஸதி, யே ச ஹி ப்³யாபன்னசித்தா பது³ட்ட²மனஸங்கப்பா ஸமணப்³ராஹ்மணா தே போ⁴தோ புஜ்ஜா தே போ⁴தோ பாஸங்ஸா. ஸம்மாஸதிங் சே ப⁴வங் த⁴ம்மபத³ங் க³ரஹதி படிக்கோஸதி, யே ச ஹி முட்ட²ஸ்ஸதீ அஸம்பஜானா ஸமணப்³ராஹ்மணா தே போ⁴தோ புஜ்ஜா தே போ⁴தோ பாஸங்ஸா. ஸம்மாஸமாதி⁴ங் சே ப⁴வங் த⁴ம்மபத³ங் க³ரஹதி படிக்கோஸதி, யே ச ஹி அஸமாஹிதா விப்³ப⁴ந்தசித்தா ஸமணப்³ராஹ்மணா தே போ⁴தோ புஜ்ஜா தே போ⁴தோ பாஸங்ஸா.
‘‘Yo kho, paribbājakā, imāni cattāri dhammapadāni garahitabbaṃ paṭikkositabbaṃ maññeyya, tassa diṭṭheva dhamme cattāro sahadhammikā vādānupātā gārayhā ṭhānā 5 āgacchanti. Katame cattāro? Anabhijjhaṃ ce bhavaṃ dhammapadaṃ garahati paṭikkosati, ye ca hi 6 abhijjhālū kāmesu tibbasārāgā samaṇabrāhmaṇā te bhoto pujjā te bhoto pāsaṃsā. Abyāpādaṃ ce bhavaṃ dhammapadaṃ garahati paṭikkosati, ye ca hi byāpannacittā paduṭṭhamanasaṅkappā samaṇabrāhmaṇā te bhoto pujjā te bhoto pāsaṃsā. Sammāsatiṃ ce bhavaṃ dhammapadaṃ garahati paṭikkosati, ye ca hi muṭṭhassatī asampajānā samaṇabrāhmaṇā te bhoto pujjā te bhoto pāsaṃsā. Sammāsamādhiṃ ce bhavaṃ dhammapadaṃ garahati paṭikkosati, ye ca hi asamāhitā vibbhantacittā samaṇabrāhmaṇā te bhoto pujjā te bhoto pāsaṃsā.
‘‘யோ கோ², பரிப்³பா³ஜகா, இமானி சத்தாரி த⁴ம்மபதா³னி க³ரஹிதப்³ப³ங் படிக்கோஸிதப்³ப³ங் மஞ்ஞெய்ய, தஸ்ஸ தி³ட்டே²வ த⁴ம்மே இமே சத்தாரோ ஸஹத⁴ம்மிகா வாதா³னுபாதா கா³ரய்ஹா டா²னா ஆக³ச்ச²ந்தி . யேபி தே பரிப்³பா³ஜகா அஹேஸுங் உக்கலா வஸ்ஸப⁴ஞ்ஞா 7 அஹேதுகவாதா³ அகிரியவாதா³ நத்தி²கவாதா³, தேபி இமானி சத்தாரி த⁴ம்மபதா³னி ந க³ரஹிதப்³ப³ங் ந படிக்கோஸிதப்³ப³ங் அமஞ்ஞிங்ஸு. தங் கிஸ்ஸ ஹேது? நிந்தா³ப்³யாரோஸனஉபாரம்ப⁴ப⁴யா’’தி 8.
‘‘Yo kho, paribbājakā, imāni cattāri dhammapadāni garahitabbaṃ paṭikkositabbaṃ maññeyya, tassa diṭṭheva dhamme ime cattāro sahadhammikā vādānupātā gārayhā ṭhānā āgacchanti . Yepi te paribbājakā ahesuṃ ukkalā vassabhaññā 9 ahetukavādā akiriyavādā natthikavādā, tepi imāni cattāri dhammapadāni na garahitabbaṃ na paṭikkositabbaṃ amaññiṃsu. Taṃ kissa hetu? Nindābyārosanaupārambhabhayā’’ti 10.
‘‘அப்³யாபன்னோ ஸதா³ ஸதோ, அஜ்ஜ²த்தங் ஸுஸமாஹிதோ;
‘‘Abyāpanno sadā sato, ajjhattaṃ susamāhito;
அபி⁴ஜ்ஜா²வினயே ஸிக்க²ங், அப்பமத்தோதி வுச்சதீ’’தி. த³ஸமங்;
Abhijjhāvinaye sikkhaṃ, appamattoti vuccatī’’ti. dasamaṃ;
உருவேலவக்³கோ³ ததியோ.
Uruvelavaggo tatiyo.
தஸ்ஸுத்³தா³னங் –
Tassuddānaṃ –
த்³வே உருவேலா லோகோ காளகோ 11, ப்³ரஹ்மசரியேன பஞ்சமங்;
Dve uruvelā loko kāḷako 12, brahmacariyena pañcamaṃ;
குஹங் ஸந்துட்டி² வங்ஸோ ச, த⁴ம்மபத³ங் பரிப்³பா³ஜகேன சாதி.
Kuhaṃ santuṭṭhi vaṃso ca, dhammapadaṃ paribbājakena cāti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. பரிப்³பா³ஜகஸுத்தவண்ணனா • 10. Paribbājakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. பரிப்³பா³ஜகஸுத்தவண்ணனா • 10. Paribbājakasuttavaṇṇanā
