| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. பரிஹானஸுத்தங்
5. Parihānasuttaṃ
55. தத்ர கோ² ஆயஸ்மா ஸாரிபுத்தோ பி⁴க்கூ² ஆமந்தேஸி – ‘‘ஆவுஸோ பி⁴க்க²வே’’தி 1. ‘‘ஆவுஸோ’’தி கோ² தே பி⁴க்கூ² ஆயஸ்மதோ ஸாரிபுத்தஸ்ஸ பச்சஸ்ஸோஸுங். ஆயஸ்மா ஸாரிபுத்தோ ஏதத³வோச –
55. Tatra kho āyasmā sāriputto bhikkhū āmantesi – ‘‘āvuso bhikkhave’’ti 2. ‘‘Āvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –
‘‘‘பரிஹானத⁴ம்மோ புக்³க³லோ, பரிஹானத⁴ம்மோ புக்³க³லோ’தி, ஆவுஸோ, வுச்சதி. ‘அபரிஹானத⁴ம்மோ புக்³க³லோ, அபரிஹானத⁴ம்மோ புக்³க³லோ’தி, ஆவுஸோ, வுச்சதி. கித்தாவதா நு கோ², ஆவுஸோ, பரிஹானத⁴ம்மோ புக்³க³லோ வுத்தோ ப⁴க³வதா, கித்தாவதா ச பன அபரிஹானத⁴ம்மோ புக்³க³லோ வுத்தோ ப⁴க³வதா’’தி? ‘‘தூ³ரதோபி கோ² மயங், ஆவுஸோ, ஆக³ச்சா²ம ஆயஸ்மதோ ஸாரிபுத்தஸ்ஸ ஸந்திகே ஏதஸ்ஸ பா⁴ஸிதஸ்ஸ அத்த²மஞ்ஞாதுங். ஸாது⁴ வதாயஸ்மந்தங்யேவ ஸாரிபுத்தங் படிபா⁴து ஏதஸ்ஸ பா⁴ஸிதஸ்ஸ அத்தோ² . ஆயஸ்மதோ ஸாரிபுத்தஸ்ஸ ஸுத்வா பி⁴க்கூ² தா⁴ரெஸ்ஸந்தீ’’தி.
‘‘‘Parihānadhammo puggalo, parihānadhammo puggalo’ti, āvuso, vuccati. ‘Aparihānadhammo puggalo, aparihānadhammo puggalo’ti, āvuso, vuccati. Kittāvatā nu kho, āvuso, parihānadhammo puggalo vutto bhagavatā, kittāvatā ca pana aparihānadhammo puggalo vutto bhagavatā’’ti? ‘‘Dūratopi kho mayaṃ, āvuso, āgacchāma āyasmato sāriputtassa santike etassa bhāsitassa atthamaññātuṃ. Sādhu vatāyasmantaṃyeva sāriputtaṃ paṭibhātu etassa bhāsitassa attho . Āyasmato sāriputtassa sutvā bhikkhū dhāressantī’’ti.
‘‘தேனஹாவுஸோ , ஸுணாத², ஸாது⁴கங் மனஸி கரோத²; பா⁴ஸிஸ்ஸாமீ’’தி. ‘‘ஏவமாவுஸோ’’தி கோ² தே பி⁴க்கூ² ஆயஸ்மதோ ஸாரிபுத்தஸ்ஸ பச்சஸ்ஸோஸுங். ஆயஸ்மா ஸாரிபுத்தோ ஏதத³வோச –
‘‘Tenahāvuso , suṇātha, sādhukaṃ manasi karotha; bhāsissāmī’’ti. ‘‘Evamāvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –
‘‘கித்தாவதா நு கோ², ஆவுஸோ, பரிஹானத⁴ம்மோ புக்³க³லோ வுத்தோ ப⁴க³வதா? இதா⁴வுஸோ, பி⁴க்கு² அஸ்ஸுதஞ்சேவ த⁴ம்மங் ந ஸுணாதி, ஸுதா சஸ்ஸ த⁴ம்மா ஸம்மோஸங் க³ச்ச²ந்தி, யே சஸ்ஸ த⁴ம்மா புப்³பே³ சேதஸோ அஸம்பு²ட்ட²புப்³பா³ தே சஸ்ஸ ந ஸமுதா³சரந்தி, அவிஞ்ஞாதஞ்சேவ ந விஜானாதி. எத்தாவதா கோ², ஆவுஸோ, பரிஹானத⁴ம்மோ புக்³க³லோ வுத்தோ ப⁴க³வதா.
‘‘Kittāvatā nu kho, āvuso, parihānadhammo puggalo vutto bhagavatā? Idhāvuso, bhikkhu assutañceva dhammaṃ na suṇāti, sutā cassa dhammā sammosaṃ gacchanti, ye cassa dhammā pubbe cetaso asamphuṭṭhapubbā te cassa na samudācaranti, aviññātañceva na vijānāti. Ettāvatā kho, āvuso, parihānadhammo puggalo vutto bhagavatā.
‘‘கித்தாவதா ச பனாவுஸோ, அபரிஹானத⁴ம்மோ புக்³க³லோ வுத்தோ ப⁴க³வதா? இதா⁴வுஸோ, பி⁴க்கு² அஸ்ஸுதஞ்சேவ த⁴ம்மங் ஸுணாதி, ஸுதா சஸ்ஸ த⁴ம்மா ந ஸம்மோஸங் க³ச்ச²ந்தி, யே சஸ்ஸ த⁴ம்மா புப்³பே³ சேதஸோ அஸம்பு²ட்ட²புப்³பா³ தே சஸ்ஸ ஸமுதா³சரந்தி, அவிஞ்ஞாதஞ்சேவ விஜானாதி. எத்தாவதா கோ², ஆவுஸோ, அபரிஹானத⁴ம்மோ புக்³க³லோ வுத்தோ ப⁴க³வதா.
‘‘Kittāvatā ca panāvuso, aparihānadhammo puggalo vutto bhagavatā? Idhāvuso, bhikkhu assutañceva dhammaṃ suṇāti, sutā cassa dhammā na sammosaṃ gacchanti, ye cassa dhammā pubbe cetaso asamphuṭṭhapubbā te cassa samudācaranti, aviññātañceva vijānāti. Ettāvatā kho, āvuso, aparihānadhammo puggalo vutto bhagavatā.
‘‘நோ சே, ஆவுஸோ, பி⁴க்கு² பரசித்தபரியாயகுஸலோ ஹோதி, அத² ‘ஸசித்தபரியாயகுஸலோ ப⁴விஸ்ஸாமீ’தி – ஏவஞ்ஹி வோ, ஆவுஸோ, ஸிக்கி²தப்³ப³ங்.
‘‘No ce, āvuso, bhikkhu paracittapariyāyakusalo hoti, atha ‘sacittapariyāyakusalo bhavissāmī’ti – evañhi vo, āvuso, sikkhitabbaṃ.
‘‘கத²ஞ்சாவுஸோ, பி⁴க்கு² ஸசித்தபரியாயகுஸலோ ஹோதி? ஸெய்யதா²பி, ஆவுஸோ, இத்தீ² வா புரிஸோ வா த³ஹரோ யுவா மண்ட³னகஜாதிகோ ஆதா³ஸே வா பரிஸுத்³தே⁴ பரியோதா³தே அச்சே² வா உத³பத்தே ஸகங் முக²னிமித்தங் பச்சவெக்க²மானோ ஸசே தத்த² பஸ்ஸதி ரஜங் வா அங்க³ணங் வா, தஸ்ஸேவ ரஜஸ்ஸ வா அங்க³ணஸ்ஸ வா பஹானாய வாயமதி. நோ சே தத்த² பஸ்ஸதி ரஜங் வா அங்க³ணங் வா, தேனேவத்தமனோ ஹோதி பரிபுண்ணஸங்கப்போ – ‘லாபா⁴ வத மே, பரிஸுத்³த⁴ங் வத மே’தி. ஏவமேவ கோ², ஆவுஸோ, பி⁴க்கு²னோ பச்சவெக்க²ணா ப³ஹுகாரா ஹோதி குஸலேஸு த⁴ம்மேஸு – ‘அனபி⁴ஜ்ஜா²லு நு கோ² ப³ஹுலங் விஹராமி, ஸங்விஜ்ஜதி நு கோ² மே ஏஸோ த⁴ம்மோ உதா³ஹு நோ, அப்³யாபன்னசித்தோ நு கோ² ப³ஹுலங் விஹராமி, ஸங்விஜ்ஜதி நு கோ² மே ஏஸோ த⁴ம்மோ உதா³ஹு நோ, விக³ததி²னமித்³தோ⁴ நு கோ² ப³ஹுலங் விஹராமி, ஸங்விஜ்ஜதி நு கோ² மே ஏஸோ த⁴ம்மோ உதா³ஹு நோ, அனுத்³த⁴தோ நு கோ² ப³ஹுலங் விஹராமி, ஸங்விஜ்ஜதி நு கோ² மே ஏஸோ த⁴ம்மோ உதா³ஹு நோ, திண்ணவிசிகிச்சோ² நு கோ² ப³ஹுலங் விஹராமி, ஸங்விஜ்ஜதி நு கோ² மே ஏஸோ த⁴ம்மோ உதா³ஹு நோ, அக்கோத⁴னோ நு கோ² ப³ஹுலங் விஹராமி, ஸங்விஜ்ஜதி நு கோ² மே ஏஸோ த⁴ம்மோ உதா³ஹு நோ, அஸங்கிலிட்ட²சித்தோ நு கோ² ப³ஹுலங் விஹராமி, ஸங்விஜ்ஜதி நு கோ² மே ஏஸோ த⁴ம்மோ உதா³ஹு நோ, லாபீ⁴ நு கொ²ம்ஹி அஜ்ஜ²த்தங் த⁴ம்மபாமோஜ்ஜஸ்ஸ, ஸங்விஜ்ஜதி நு கோ² மே ஏஸோ த⁴ம்மோ உதா³ஹு நோ, லாபீ⁴ நு கொ²ம்ஹி அஜ்ஜ²த்தங் சேதோஸமத²ஸ்ஸ, ஸங்விஜ்ஜதி நு கோ² மே ஏஸோ த⁴ம்மோ உதா³ஹு நோ, லாபீ⁴ நு கொ²ம்ஹி அதி⁴பஞ்ஞாத⁴ம்மவிபஸ்ஸனாய, ஸங்விஜ்ஜதி நு கோ² மே ஏஸோ த⁴ம்மோ உதா³ஹு நோ’தி.
‘‘Kathañcāvuso, bhikkhu sacittapariyāyakusalo hoti? Seyyathāpi, āvuso, itthī vā puriso vā daharo yuvā maṇḍanakajātiko ādāse vā parisuddhe pariyodāte acche vā udapatte sakaṃ mukhanimittaṃ paccavekkhamāno sace tattha passati rajaṃ vā aṅgaṇaṃ vā, tasseva rajassa vā aṅgaṇassa vā pahānāya vāyamati. No ce tattha passati rajaṃ vā aṅgaṇaṃ vā, tenevattamano hoti paripuṇṇasaṅkappo – ‘lābhā vata me, parisuddhaṃ vata me’ti. Evameva kho, āvuso, bhikkhuno paccavekkhaṇā bahukārā hoti kusalesu dhammesu – ‘anabhijjhālu nu kho bahulaṃ viharāmi, saṃvijjati nu kho me eso dhammo udāhu no, abyāpannacitto nu kho bahulaṃ viharāmi, saṃvijjati nu kho me eso dhammo udāhu no, vigatathinamiddho nu kho bahulaṃ viharāmi, saṃvijjati nu kho me eso dhammo udāhu no, anuddhato nu kho bahulaṃ viharāmi, saṃvijjati nu kho me eso dhammo udāhu no, tiṇṇavicikiccho nu kho bahulaṃ viharāmi, saṃvijjati nu kho me eso dhammo udāhu no, akkodhano nu kho bahulaṃ viharāmi, saṃvijjati nu kho me eso dhammo udāhu no, asaṃkiliṭṭhacitto nu kho bahulaṃ viharāmi, saṃvijjati nu kho me eso dhammo udāhu no, lābhī nu khomhi ajjhattaṃ dhammapāmojjassa, saṃvijjati nu kho me eso dhammo udāhu no, lābhī nu khomhi ajjhattaṃ cetosamathassa, saṃvijjati nu kho me eso dhammo udāhu no, lābhī nu khomhi adhipaññādhammavipassanāya, saṃvijjati nu kho me eso dhammo udāhu no’ti.
‘‘ஸசே பன, ஆவுஸோ, பி⁴க்கு² பச்சவெக்க²மானோ ஸப்³பே³பிமே குஸலே த⁴ம்மே அத்தனி ந ஸமனுபஸ்ஸதி, தேனாவுஸோ, பி⁴க்கு²னா ஸப்³பே³ஸங்யேவ இமேஸங் குஸலானங் த⁴ம்மானங் படிலாபா⁴ய அதி⁴மத்தோ ச²ந்தோ³ ச வாயாமோ ச உஸ்ஸாஹோ ச உஸ்ஸொள்ஹீ ச அப்படிவானீ ச ஸதி ச ஸம்பஜஞ்ஞஞ்ச கரணீயங். ஸெய்யதா²பி, ஆவுஸோ, ஆதி³த்தசேலோ வா ஆதி³த்தஸீஸோ வா. தஸ்ஸேவ சேலஸ்ஸ வா ஸீஸஸ்ஸ வா நிப்³பா³பனாய அதி⁴மத்தங் ச²ந்த³ஞ்ச வாயாமஞ்ச உஸ்ஸாஹஞ்ச உஸ்ஸொள்ஹிஞ்ச அப்படிவானிஞ்ச ஸதிஞ்ச ஸம்பஜஞ்ஞஞ்ச கரெய்ய. ஏவமேவங் கோ², ஆவுஸோ, தேன பி⁴க்கு²னா ஸப்³பே³ஸங்யேவ குஸலானங் த⁴ம்மானங் படிலாபா⁴ய அதி⁴மத்தோ ச²ந்தோ³ ச வாயாமோ ச உஸ்ஸாஹோ ச உஸ்ஸொள்ஹீ ச அப்படிவானீ ச ஸதி ச ஸம்பஜஞ்ஞஞ்ச கரணீயங்.
‘‘Sace pana, āvuso, bhikkhu paccavekkhamāno sabbepime kusale dhamme attani na samanupassati, tenāvuso, bhikkhunā sabbesaṃyeva imesaṃ kusalānaṃ dhammānaṃ paṭilābhāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṃ. Seyyathāpi, āvuso, ādittacelo vā ādittasīso vā. Tasseva celassa vā sīsassa vā nibbāpanāya adhimattaṃ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya. Evamevaṃ kho, āvuso, tena bhikkhunā sabbesaṃyeva kusalānaṃ dhammānaṃ paṭilābhāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṃ.
‘‘ஸசே பனாவுஸோ, பி⁴க்கு² பச்சவெக்க²மானோ ஏகச்சே குஸலே த⁴ம்மே அத்தனி ஸமனுபஸ்ஸதி, ஏகச்சே குஸலே த⁴ம்மே அத்தனி ந ஸமனுபஸ்ஸதி, தேனாவுஸோ, பி⁴க்கு²னா யே குஸலே த⁴ம்மே அத்தனி ஸமனுபஸ்ஸதி தேஸு குஸலேஸு த⁴ம்மேஸு பதிட்டா²ய, யே குஸலே த⁴ம்மே அத்தனி ந ஸமனுபஸ்ஸதி தேஸங் குஸலானங் த⁴ம்மானங் படிலாபா⁴ய அதி⁴மத்தோ ச²ந்தோ³ ச வாயாமோ ச உஸ்ஸாஹோ ச உஸ்ஸொள்ஹீ ச அப்படிவானீ ச ஸதி ச ஸம்பஜஞ்ஞஞ்ச கரணீயங். ஸெய்யதா²பி, ஆவுஸோ, ஆதி³த்தசேலோ வா ஆதி³த்தஸீஸோ வா. தஸ்ஸேவ சேலஸ்ஸ வா ஸீஸஸ்ஸ வா நிப்³பா³பனாய அதி⁴மத்தங் ச²ந்த³ஞ்ச வாயாமஞ்ச உஸ்ஸாஹஞ்ச உஸ்ஸொள்ஹிஞ்ச அப்படிவானிஞ்ச ஸதிஞ்ச ஸம்பஜஞ்ஞஞ்ச கரெய்ய. ஏவமேவங் கோ², ஆவுஸோ, தேன பி⁴க்கு²னா யே குஸலே த⁴ம்மே அத்தனி ஸமனுபஸ்ஸதி தேஸு குஸலேஸு த⁴ம்மேஸு பதிட்டா²ய, யே குஸலே த⁴ம்மே அத்தனி ந ஸமனுபஸ்ஸதி தேஸங் குஸலானங் த⁴ம்மானங் படிலாபா⁴ய அதி⁴மத்தோ ச²ந்தோ³ ச வாயாமோ ச உஸ்ஸாஹோ ச உஸ்ஸொள்ஹீ ச அப்படிவானீ ச ஸதி ச ஸம்பஜஞ்ஞஞ்ச கரணீயங்.
‘‘Sace panāvuso, bhikkhu paccavekkhamāno ekacce kusale dhamme attani samanupassati, ekacce kusale dhamme attani na samanupassati, tenāvuso, bhikkhunā ye kusale dhamme attani samanupassati tesu kusalesu dhammesu patiṭṭhāya, ye kusale dhamme attani na samanupassati tesaṃ kusalānaṃ dhammānaṃ paṭilābhāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṃ. Seyyathāpi, āvuso, ādittacelo vā ādittasīso vā. Tasseva celassa vā sīsassa vā nibbāpanāya adhimattaṃ chandañca vāyāmañca ussāhañca ussoḷhiñca appaṭivāniñca satiñca sampajaññañca kareyya. Evamevaṃ kho, āvuso, tena bhikkhunā ye kusale dhamme attani samanupassati tesu kusalesu dhammesu patiṭṭhāya, ye kusale dhamme attani na samanupassati tesaṃ kusalānaṃ dhammānaṃ paṭilābhāya adhimatto chando ca vāyāmo ca ussāho ca ussoḷhī ca appaṭivānī ca sati ca sampajaññañca karaṇīyaṃ.
‘‘ஸசே பனாவுஸோ, பி⁴க்கு² பச்சவெக்க²மானோ ஸப்³பே³பிமே குஸலே த⁴ம்மே அத்தனி ஸமனுபஸ்ஸதி, தேனாவுஸோ, பி⁴க்கு²னா ஸப்³பெ³ஸ்வேவ இமேஸு குஸலேஸு த⁴ம்மேஸு பதிட்டா²ய உத்தரி ஆஸவானங் க²யாய யோகோ³ கரணீயோ’’தி. பஞ்சமங்.
‘‘Sace panāvuso, bhikkhu paccavekkhamāno sabbepime kusale dhamme attani samanupassati, tenāvuso, bhikkhunā sabbesveva imesu kusalesu dhammesu patiṭṭhāya uttari āsavānaṃ khayāya yogo karaṇīyo’’ti. Pañcamaṃ.
Footnotes:
Related texts:
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-10. ஸசித்தஸுத்தாதி³வண்ணனா • 1-10. Sacittasuttādivaṇṇanā
