| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
10. பரிஹானஸுத்தவண்ணனா
10. Parihānasuttavaṇṇanā
79. த³ஸமே பரிஹானாய ஸங்வத்தந்தீதி அவுத்³தி⁴யா ப⁴வந்தி, மக்³கா³தி⁴க³மஸ்ஸ பரிபந்தா²ய ஹொந்தி. அதி⁴க³தஸ்ஸ பன மக்³க³ஸ்ஸ பரிஹானி நாம நத்தி². ‘‘தயோ த⁴ம்மா’’தி த⁴ம்மாதி⁴ட்டா²னவஸேன உத்³தி³ட்ட²த⁴ம்மே புக்³க³லாதி⁴ட்டா²னாய தே³ஸனாய விப⁴ஜந்தோ ‘‘இத⁴, பி⁴க்க²வே, ஸேகோ² பி⁴க்கூ²’’திஆதி³மாஹ.
79. Dasame parihānāya saṃvattantīti avuddhiyā bhavanti, maggādhigamassa paripanthāya honti. Adhigatassa pana maggassa parihāni nāma natthi. ‘‘Tayo dhammā’’ti dhammādhiṭṭhānavasena uddiṭṭhadhamme puggalādhiṭṭhānāya desanāya vibhajanto ‘‘idha, bhikkhave, sekho bhikkhū’’tiādimāha.
தத்த² கம்மங் ஆரமிதப்³ப³தோ ஆராமோ ஏதஸ்ஸாதி கம்மாராமோ. கம்மே ரதோதி கம்மரதோ. கம்மாராமதங் கம்மாபி⁴ரதிங் அனுயுத்தோ பயுத்தோதி கம்மாராமதமனுயுத்தோ. தத்த² கம்மங் நாம இதிகத்தப்³ப³ங் கம்மங், ஸெய்யதி²த³ங் – சீவரவிசாரணங், சீவரகரணங், உபத்த²ம்ப⁴னங், பத்தத்த²விகங், அங்ஸப³ந்த⁴னங், காயப³ந்த⁴னங், த⁴மகரணங், ஆதா⁴ரகங், பாத³கத²லிகங், ஸம்மஜ்ஜனீதி ஏவமாதீ³னங் உபகரணானங் கரணங், யஞ்ச விஹாரே க²ண்ட³பு²ல்லாதி³படிஸங்க²ரணங் . ஏகச்சோ ஹி ஏதானி கரொந்தோ ஸகலதி³வஸங் ஏதானேவ கரோதி. தங் ஸந்தா⁴யேதங் வுத்தங். யோ பன ஏதேஸங் கரணவேலாயமேவ ஏதானி கரோதி, உத்³தே³ஸவேலாயங் உத்³தே³ஸங் க³ண்ஹாதி, ஸஜ்ஜா²யவேலாயங் ஸஜ்ஜா²யதி, சேதியங்க³ணவத்தாதி³கரணவேலாயங் சேதியங்க³ணவத்தாதீ³னி கரோதி, மனஸிகாரவேலாயங் மனஸிகாரங் கரோதி ஸப்³ப³த்த²ககம்மட்டா²னே வா பாரிஹாரியகம்மட்டா²னே வா, ந ஸோ கம்மாராமோ நாம. தஸ்ஸ தங் –
Tattha kammaṃ āramitabbato ārāmo etassāti kammārāmo. Kamme ratoti kammarato. Kammārāmataṃ kammābhiratiṃ anuyutto payuttoti kammārāmatamanuyutto. Tattha kammaṃ nāma itikattabbaṃ kammaṃ, seyyathidaṃ – cīvaravicāraṇaṃ, cīvarakaraṇaṃ, upatthambhanaṃ, pattatthavikaṃ, aṃsabandhanaṃ, kāyabandhanaṃ, dhamakaraṇaṃ, ādhārakaṃ, pādakathalikaṃ, sammajjanīti evamādīnaṃ upakaraṇānaṃ karaṇaṃ, yañca vihāre khaṇḍaphullādipaṭisaṅkharaṇaṃ . Ekacco hi etāni karonto sakaladivasaṃ etāneva karoti. Taṃ sandhāyetaṃ vuttaṃ. Yo pana etesaṃ karaṇavelāyameva etāni karoti, uddesavelāyaṃ uddesaṃ gaṇhāti, sajjhāyavelāyaṃ sajjhāyati, cetiyaṅgaṇavattādikaraṇavelāyaṃ cetiyaṅgaṇavattādīni karoti, manasikāravelāyaṃ manasikāraṃ karoti sabbatthakakammaṭṭhāne vā pārihāriyakammaṭṭhāne vā, na so kammārāmo nāma. Tassa taṃ –
‘‘யானி கோ² பன தானி ஸப்³ரஹ்மசாரீனங் உச்சாவசானி கிங்கரணீயானி, தத்த² த³க்கோ² ஹோதி அனலஸோ, தத்ருபாயாய வீமங்ஸாய ஸமன்னாக³தோ, அலங் காதுங் அலங் ஸங்விதா⁴து’’ந்தி (தீ³॰ நி॰ 3.345; அ॰ நி॰ 10.18) –
‘‘Yāni kho pana tāni sabrahmacārīnaṃ uccāvacāni kiṃkaraṇīyāni, tattha dakkho hoti analaso, tatrupāyāya vīmaṃsāya samannāgato, alaṃ kātuṃ alaṃ saṃvidhātu’’nti (dī. ni. 3.345; a. ni. 10.18) –
ஆதி³னா ஸத்தா²ரா அனுஞ்ஞாதகரணமேவ ஹோதி.
Ādinā satthārā anuññātakaraṇameva hoti.
ப⁴ஸ்ஸாராமோதி யோ ப⁴க³வதா படிக்கி²த்தராஜகதா²தி³வஸேன ரத்திந்தி³வங் வீதினாமேதி, அயங் ப⁴ஸ்ஸே பரியந்தகாரீ ந ஹோதீதி ப⁴ஸ்ஸாராமோ நாம. யோ பன ரத்திம்பி தி³வாபி த⁴ம்மங் கதே²தி, பஞ்ஹங் விஸ்ஸஜ்ஜேதி, அயங் அப்பப⁴ஸ்ஸோ ப⁴ஸ்ஸே பரியந்தகாரீயேவ. கஸ்மா? ‘‘ஸன்னிபதிதானங் வோ, பி⁴க்க²வே, த்³வயங் கரணீயங் – த⁴ம்மீ வா கதா², அரியோ வா துண்ஹீபா⁴வோ’’தி (ம॰ நி॰ 1.273) வுத்தவிதி⁴ங்யேவ படிபன்னோதி.
Bhassārāmoti yo bhagavatā paṭikkhittarājakathādivasena rattindivaṃ vītināmeti, ayaṃ bhasse pariyantakārī na hotīti bhassārāmo nāma. Yo pana rattimpi divāpi dhammaṃ katheti, pañhaṃ vissajjeti, ayaṃ appabhasso bhasse pariyantakārīyeva. Kasmā? ‘‘Sannipatitānaṃ vo, bhikkhave, dvayaṃ karaṇīyaṃ – dhammī vā kathā, ariyo vā tuṇhībhāvo’’ti (ma. ni. 1.273) vuttavidhiṃyeva paṭipannoti.
நித்³தா³ராமோதி யோ யாவத³த்த²ங் உத³ராவதே³ஹகங் பு⁴ஞ்ஜித்வா ஸெய்யஸுக²ங், பஸ்ஸஸுக²ங், மித்³த⁴ஸுக²ங் அனுயுஞ்ஜதி, யோ ச க³ச்ச²ந்தோபி நிஸின்னோபி டி²தோபி தி²னமித்³தா⁴பி⁴பூ⁴தோ நித்³தா³யதி, அயங் நித்³தா³ராமோ நாம. யஸ்ஸ பன கரஜகாயகே³லஞ்ஞேன சித்தங் ப⁴வங்க³ங் ஓதரதி, நாயங் நித்³தா³ராமோ, தேனேவாஹ –
Niddārāmoti yo yāvadatthaṃ udarāvadehakaṃ bhuñjitvā seyyasukhaṃ, passasukhaṃ, middhasukhaṃ anuyuñjati, yo ca gacchantopi nisinnopi ṭhitopi thinamiddhābhibhūto niddāyati, ayaṃ niddārāmo nāma. Yassa pana karajakāyagelaññena cittaṃ bhavaṅgaṃ otarati, nāyaṃ niddārāmo, tenevāha –
‘‘அபி⁴ஜானாமி கோ² பனாஹங், அக்³கி³வெஸ்ஸன, கி³ம்ஹானங் பச்சி²மே மாஸே பச்சா²ப⁴த்தங் பிண்ட³பாதப்படிக்கந்தோ சதுக்³கு³ணங் ஸங்கா⁴டிங் பஞ்ஞாபெத்வா த³க்கி²ணேன பஸ்ஸேன ஸதோ ஸம்பஜானோ நித்³த³ங் ஓக்கமிதா’’தி (ம॰ நி॰ 1.387).
‘‘Abhijānāmi kho panāhaṃ, aggivessana, gimhānaṃ pacchime māse pacchābhattaṃ piṇḍapātappaṭikkanto catugguṇaṃ saṅghāṭiṃ paññāpetvā dakkhiṇena passena sato sampajāno niddaṃ okkamitā’’ti (ma. ni. 1.387).
எத்த² ச புது²ஜ்ஜனகல்யாணகோபி ஸேகொ²த்வேவ வேதி³தப்³போ³. தஸ்மா தஸ்ஸ ஸப்³ப³ஸ்ஸபி விஸேஸாதி⁴க³மஸ்ஸ இதரேஸங் உபரி விஸேஸாதி⁴க³மஸ்ஸ ச பரிஹானாய வத்தந்தீதி வேதி³தப்³ப³ங். ஸுக்கபக்க²ஸ்ஸ வுத்தவிபரியாயேன அத்த²விபா⁴வனா வேதி³தப்³பா³.
Ettha ca puthujjanakalyāṇakopi sekhotveva veditabbo. Tasmā tassa sabbassapi visesādhigamassa itaresaṃ upari visesādhigamassa ca parihānāya vattantīti veditabbaṃ. Sukkapakkhassa vuttavipariyāyena atthavibhāvanā veditabbā.
கா³தா²ஸு உத்³த⁴தோதி சித்தவிக்கே²பகரேன உத்³த⁴ச்சேன உத்³த⁴தோ அவூபஸந்தோ. அப்பகிச்சஸ்ஸாதி அனுஞ்ஞாதஸ்ஸபி வுத்தப்பகாரஸ்ஸ கிச்சஸ்ஸ யுத்தப்பயுத்தகாலேயேவ கரணதோ அப்பகிச்சோ அஸ்ஸ ப⁴வெய்ய. அப்பமித்³தோ⁴தி ‘‘தி³வஸங் சங்கமேன நிஸஜ்ஜாயா’’திஆதி³னா வுத்தஜாக³ரியானுயோகே³ன நித்³தா³ரஹிதோ அஸ்ஸ. அனுத்³த⁴தோதி ப⁴ஸ்ஸாராமதாய உப்பஜ்ஜனகசித்தவிக்கே²பஸ்ஸ அப⁴ஸ்ஸாராமோ ஹுத்வா பரிவஜ்ஜனேன ந உத்³த⁴தோ வூபஸந்தசித்தோ, ஸமாஹிதோதி அத்தோ². ஸேஸங் புப்³பே³ வுத்தனயத்தா ஸுவிஞ்ஞெய்யமேவ. இதி இமஸ்மிங் வக்³கே³ பட²மது³தியபஞ்சமச²ட்ட²ஸத்தமஅட்ட²மனவமேஸு ஸுத்தேஸு வட்டங் கதி²தங், இதரேஸு வட்டவிவட்டங்.
Gāthāsu uddhatoti cittavikkhepakarena uddhaccena uddhato avūpasanto. Appakiccassāti anuññātassapi vuttappakārassa kiccassa yuttappayuttakāleyeva karaṇato appakicco assa bhaveyya. Appamiddhoti ‘‘divasaṃ caṅkamena nisajjāyā’’tiādinā vuttajāgariyānuyogena niddārahito assa. Anuddhatoti bhassārāmatāya uppajjanakacittavikkhepassa abhassārāmo hutvā parivajjanena na uddhato vūpasantacitto, samāhitoti attho. Sesaṃ pubbe vuttanayattā suviññeyyameva. Iti imasmiṃ vagge paṭhamadutiyapañcamachaṭṭhasattamaaṭṭhamanavamesu suttesu vaṭṭaṃ kathitaṃ, itaresu vaṭṭavivaṭṭaṃ.
த³ஸமஸுத்தவண்ணனா நிட்டி²தா.
Dasamasuttavaṇṇanā niṭṭhitā.
ததியவக்³க³வண்ணனா நிட்டி²தா.
Tatiyavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 10. பரிஹானஸுத்தங் • 10. Parihānasuttaṃ
