| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. பரிஹானிஸுத்தங்
8. Parihānisuttaṃ
158. தத்ர கோ² ஆயஸ்மா ஸாரிபுத்தோ பி⁴க்கூ² ஆமந்தேஸி – ‘‘ஆவுஸோ பி⁴க்க²வே’’தி . ‘‘ஆவுஸோ’’தி கோ² தே பி⁴க்கூ² ஆயஸ்மதோ ஸாரிபுத்தஸ்ஸ பச்சஸ்ஸோஸுங். ஆயஸ்மா ஸாரிபுத்தோ ஏதத³வோச –
158. Tatra kho āyasmā sāriputto bhikkhū āmantesi – ‘‘āvuso bhikkhave’’ti . ‘‘Āvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –
‘‘யோ ஹி கோசி, ஆவுஸோ, பி⁴க்கு² வா பி⁴க்கு²னீ வா சத்தாரோ த⁴ம்மே அத்தனி ஸமனுபஸ்ஸதி, நிட்ட²மெத்த² க³ந்தப்³ப³ங் – ‘பரிஹாயாமி குஸலேஹி த⁴ம்மேஹி’. பரிஹானமேதங் வுத்தங் ப⁴க³வதா. கதமே சத்தாரோ? ராக³வேபுல்லத்தங் 1, தோ³ஸவேபுல்லத்தங், மோஹவேபுல்லத்தங், க³ம்பீ⁴ரேஸு கோ² பனஸ்ஸ டா²னாடா²னேஸு பஞ்ஞாசக்கு² ந கமதி. யோ ஹி கோசி, ஆவுஸோ, பி⁴க்கு² வா பி⁴க்கு²னீ வா இமே சத்தாரோ த⁴ம்மே அத்தனி ஸமனுபஸ்ஸதி, நிட்ட²மெத்த² க³ந்தப்³ப³ங் – ‘பரிஹாயாமி குஸலேஹி த⁴ம்மேஹி’. பரிஹானமேதங் வுத்தங் ப⁴க³வதா.
‘‘Yo hi koci, āvuso, bhikkhu vā bhikkhunī vā cattāro dhamme attani samanupassati, niṭṭhamettha gantabbaṃ – ‘parihāyāmi kusalehi dhammehi’. Parihānametaṃ vuttaṃ bhagavatā. Katame cattāro? Rāgavepullattaṃ 2, dosavepullattaṃ, mohavepullattaṃ, gambhīresu kho panassa ṭhānāṭhānesu paññācakkhu na kamati. Yo hi koci, āvuso, bhikkhu vā bhikkhunī vā ime cattāro dhamme attani samanupassati, niṭṭhamettha gantabbaṃ – ‘parihāyāmi kusalehi dhammehi’. Parihānametaṃ vuttaṃ bhagavatā.
‘‘யோ ஹி கோசி, ஆவுஸோ, பி⁴க்கு² வா பி⁴க்கு²னீ வா சத்தாரோ த⁴ம்மே அத்தனி ஸமனுபஸ்ஸதி, நிட்ட²மெத்த² க³ந்தப்³ப³ங் – ‘ந பரிஹாயாமி குஸலேஹி த⁴ம்மேஹி’. அபரிஹானமேதங் வுத்தங் ப⁴க³வதா. கதமே சத்தாரோ? ராக³தனுத்தங் 3, தோ³ஸதனுத்தங், மோஹதனுத்தங், க³ம்பீ⁴ரேஸு கோ² பனஸ்ஸ டா²னாடா²னேஸு பஞ்ஞாசக்கு² கமதி. யோ ஹி கோசி, ஆவுஸோ, பி⁴க்கு² வா பி⁴க்கு²னீ வா இமே சத்தாரோ த⁴ம்மே அத்தனி ஸமனுபஸ்ஸதி, நிட்ட²மெத்த² க³ந்தப்³ப³ங் – ‘ந பரிஹாயாமி குஸலேஹி த⁴ம்மேஹி’. அபரிஹானமேதங் வுத்தங் ப⁴க³வதா’’தி. அட்ட²மங்.
‘‘Yo hi koci, āvuso, bhikkhu vā bhikkhunī vā cattāro dhamme attani samanupassati, niṭṭhamettha gantabbaṃ – ‘na parihāyāmi kusalehi dhammehi’. Aparihānametaṃ vuttaṃ bhagavatā. Katame cattāro? Rāgatanuttaṃ 4, dosatanuttaṃ, mohatanuttaṃ, gambhīresu kho panassa ṭhānāṭhānesu paññācakkhu kamati. Yo hi koci, āvuso, bhikkhu vā bhikkhunī vā ime cattāro dhamme attani samanupassati, niṭṭhamettha gantabbaṃ – ‘na parihāyāmi kusalehi dhammehi’. Aparihānametaṃ vuttaṃ bhagavatā’’ti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. பரிஹானிஸுத்தவண்ணனா • 8. Parihānisuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6-8. கப்பஸுத்தாதி³வண்ணனா • 6-8. Kappasuttādivaṇṇanā
