| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. பரினிப்³பா³னஸுத்தவண்ணனா
5. Parinibbānasuttavaṇṇanā
186. ஏவங் தங் குஸினாராய ஹோதீதி யதா² அனுரோத⁴புரஸ்ஸ தூ²பாராமோ த³க்கி²ணபச்சி²மதி³ஸாயங், ஏவங் தங் உய்யானங் குஸினாராய த³க்கி²ணபச்சி²மதி³ஸாயங் ஹோதி. தஸ்மாதி யஸ்மா நக³ரங் பவிஸிதுகாமா உய்யானதோ உபேச்ச வத்தந்தி க³ச்ச²ந்தி ஏதேனாதி உபவத்தனந்தி வுச்சதி, தஸ்மா. தந்தி ஸாலபந்திபா⁴வேன டி²தங் ஸாலவனங். அந்தரேனாதி வேமஜ்ஜே². அப்பமஜ்ஜனங் அப்பமாதோ³, ஸோ பன அத்த²தோ ஞாணூபஸங்ஹிதா ஸதி. யஸ்மா தத்த² ஸதியா ப்³யாபாரோ ஸாதிஸயோ, தஸ்மா ‘‘ஸதிஅவிப்பவாஸேனா’’தி வுத்தங். அப்பமாத³பதே³யேவ பக்கி²பித்வா அபா⁴ஸி அத்த²தோ தஸ்ஸ ஸகலஸ்ஸ பு³த்³த⁴வசனஸ்ஸ ஸங்க³ண்ஹனதோ.
186.Evaṃ taṃ kusinārāya hotīti yathā anurodhapurassa thūpārāmo dakkhiṇapacchimadisāyaṃ, evaṃ taṃ uyyānaṃ kusinārāya dakkhiṇapacchimadisāyaṃ hoti. Tasmāti yasmā nagaraṃ pavisitukāmā uyyānato upecca vattanti gacchanti etenāti upavattananti vuccati, tasmā. Tanti sālapantibhāvena ṭhitaṃ sālavanaṃ. Antarenāti vemajjhe. Appamajjanaṃ appamādo, so pana atthato ñāṇūpasaṃhitā sati. Yasmā tattha satiyā byāpāro sātisayo, tasmā ‘‘satiavippavāsenā’’ti vuttaṃ. Appamādapadeyeva pakkhipitvā abhāsi atthato tassa sakalassa buddhavacanassa saṅgaṇhanato.
ஜா²னாதீ³ஸு சித்தே ச பரமுக்கங்ஸக³தவஸீபா⁴வதாய ‘‘எத்தகே காலே எத்தகா ஸமாபத்தியோ ஸமாபஜ்ஜித்வா பரினிப்³பா³யிஸ்ஸாமீ’’தி காலபரிச்சே²த³ங் கத்வா ஸமாபத்திஸமாபஜ்ஜனங் பரினிப்³பா³னபரிகம்மந்தி அதி⁴ப்பேதங். தே²ரோதி அனுருத்³த⁴த்தே²ரோ.
Jhānādīsu citte ca paramukkaṃsagatavasībhāvatāya ‘‘ettake kāle ettakā samāpattiyo samāpajjitvā parinibbāyissāmī’’ti kālaparicchedaṃ katvā samāpattisamāpajjanaṃ parinibbānaparikammanti adhippetaṃ. Theroti anuruddhatthero.
அயம்பி சாதி யதா²வுத்தபஞ்சஸட்டி²யா ஜா²னானங் ஸமாபன்னகதா²பி ஸங்கே²பகதா² ஏவ. கஸ்மா? யஸ்மா ப⁴க³வா ததா³ தே³வஸிகங் வளஞ்ஜனஸமாபத்தியோ ஸப்³பா³பி அபரிஹாபெத்வா ஸமாபஜ்ஜி ஏவாதி த³ஸ்ஸெந்தோ ‘‘நிப்³பா³னபுரங் பவிஸந்தோ’’திஆதி³மாஹ. சதுவீஸதி…பே॰… பவிஸித்வாதி எத்த² கேசி தாவ ஆஹு ‘‘ப⁴க³வா தே³வஸிகங் த்³வாத³ஸகோடிஸதஸஹஸ்ஸக்க²த்துங் மஹாகருணாஸமாபத்திங் ஸமாபஜ்ஜதி, த்³வாத³ஸகோடிஸதஸஹஸ்ஸக்க²த்துமேவ ப²லஸமாபத்திங் ஸமாபஜ்ஜதி, தஸ்மா ததா³பி சதுவீஸதிகோடிஸதஸஹஸ்ஸஸங்கா² ஸமாபத்தியோ ஸமாபஜ்ஜதி. வுத்தஞ்ஹேதங் ப⁴க³வதா ‘ததா²க³தங், பி⁴க்க²வே, அரஹந்தங் ஸம்மாஸம்பு³த்³த⁴ங் த்³வே விதக்கா ப³ஹுலங் ஸமுதா³சரந்தி கே²மோ ச விதக்கோ பவிவேகோ ச விதக்கோ’தி (இதிவு॰ 38). கே²மோ ஹி விதக்கோ ப⁴க³வதோ மஹாகருணாஸமாபத்திங் பூரெத்வா டி²தோ, பவிவேகவிதக்கோ அரஹத்தப²லஸமாபத்திங். பு³த்³தா⁴னங் ஹி ப⁴வங்க³பரிவாஸோ லஹுகோ மத்த²கப்பத்தோ ஸமாபத்தீஸு வஸீபா⁴வோ, தஸ்மா ஸமாபஜ்ஜனவுட்டா²னானி கதிபயசித்தக்க²ணேஹேவ இஜ்ஜ²ந்தி. பஞ்ச ரூபாவசரஸமாபத்தியோ சதஸ்ஸோ அரூபஸமாபத்தியோ அப்பமஞ்ஞாஸமாபத்தியா ஸத்³தி⁴ங் நிரோத⁴ஸமாபத்தி அரஹத்தப²லஸமாபத்தி சாதி த்³வாத³ஸேதா ஸமாபத்தியோ ப⁴க³வா பச்சேகங் தி³வஸே தி³வஸே கோடிஸதஸஹஸ்ஸக்க²த்துங் புரேப⁴த்தங் ஸமாபஜ்ஜதி, ததா² பச்சா²ப⁴த்தந்தி ஏவங் சதுவீஸதிகோடிஸதஸஹஸ்ஸஸங்கா² தே³வஸிகங் வளஞ்ஜனககஸிணஸமாபத்தியோ’’தி.
Ayampi cāti yathāvuttapañcasaṭṭhiyā jhānānaṃ samāpannakathāpi saṅkhepakathā eva. Kasmā? Yasmā bhagavā tadā devasikaṃ vaḷañjanasamāpattiyo sabbāpi aparihāpetvā samāpajji evāti dassento ‘‘nibbānapuraṃ pavisanto’’tiādimāha. Catuvīsati…pe… pavisitvāti ettha keci tāva āhu ‘‘bhagavā devasikaṃ dvādasakoṭisatasahassakkhattuṃ mahākaruṇāsamāpattiṃ samāpajjati, dvādasakoṭisatasahassakkhattumeva phalasamāpattiṃ samāpajjati, tasmā tadāpi catuvīsatikoṭisatasahassasaṅkhā samāpattiyo samāpajjati. Vuttañhetaṃ bhagavatā ‘tathāgataṃ, bhikkhave, arahantaṃ sammāsambuddhaṃ dve vitakkā bahulaṃ samudācaranti khemo ca vitakko paviveko ca vitakko’ti (itivu. 38). Khemo hi vitakko bhagavato mahākaruṇāsamāpattiṃ pūretvā ṭhito, pavivekavitakko arahattaphalasamāpattiṃ. Buddhānaṃ hi bhavaṅgaparivāso lahuko matthakappatto samāpattīsu vasībhāvo, tasmā samāpajjanavuṭṭhānāni katipayacittakkhaṇeheva ijjhanti. Pañca rūpāvacarasamāpattiyo catasso arūpasamāpattiyo appamaññāsamāpattiyā saddhiṃ nirodhasamāpatti arahattaphalasamāpatti cāti dvādasetā samāpattiyo bhagavā paccekaṃ divase divase koṭisatasahassakkhattuṃ purebhattaṃ samāpajjati, tathā pacchābhattanti evaṃ catuvīsatikoṭisatasahassasaṅkhā devasikaṃ vaḷañjanakakasiṇasamāpattiyo’’ti.
அபரே பனாஹு ‘‘யங் தங் ப⁴க³வதா அபி⁴ஸம்போ³தி⁴தி³வஸே பச்சி²மயாமே படிச்சஸமுப்பாத³ங்க³முகே²ன படிலோமனயேன ஜராமரணதோ பட்டா²ய ஞாணங் ஓதாரெத்வா அனுபத³த⁴ம்மவிபஸ்ஸனங் ஆரப⁴ந்தேன யதா² நாம புரிஸோ ஸுவிது³க்³க³ங் மஹாக³ஹனங் மஹாவனங் சி²ந்த³ந்தோ அந்தரந்தரா நிஸானஸிலாயங் ப²ரஸுங் நிஸிதங் கரோதி, ஏவமேவங் நிஸானஸிலாஸதி³ஸியோ ஸமாபத்தியோ அந்தரந்தரா ஸமாபஜ்ஜித்வா ஞாணஸ்ஸ திக்க²விஸத³பா⁴வங் ஸம்பாதே³துங் அனுலோமபடிலோமதோ பச்சேகங் படிச்சஸமுப்பாத³ங்கே³ஸு லக்க²கோடிஸமாபத்திஸமாபஜ்ஜனவஸேன ஸம்மஸனஞாணங் பவத்தேதி, தத³னுஸாரேன ப⁴க³வா பு³த்³த⁴பூ⁴தோபி அனுலோமபடிலோமதோ படிச்சஸமுப்பாத³ங்க³முகே²ன விபஸ்ஸனாவஸேன தி³வஸே தி³வஸே லக்க²கோடிப²லஸமாபத்தியோ ஸமாபஜ்ஜதி, தங் ஸந்தா⁴ய வுத்தங், ‘சதுவீஸதிகோடிஸதஸஹஸ்ஸஸங்கா² ஸமாபத்தியோ பவிஸித்வா’’’தி.
Apare panāhu ‘‘yaṃ taṃ bhagavatā abhisambodhidivase pacchimayāme paṭiccasamuppādaṅgamukhena paṭilomanayena jarāmaraṇato paṭṭhāya ñāṇaṃ otāretvā anupadadhammavipassanaṃ ārabhantena yathā nāma puriso suviduggaṃ mahāgahanaṃ mahāvanaṃ chindanto antarantarā nisānasilāyaṃ pharasuṃ nisitaṃ karoti, evamevaṃ nisānasilāsadisiyo samāpattiyo antarantarā samāpajjitvā ñāṇassa tikkhavisadabhāvaṃ sampādetuṃ anulomapaṭilomato paccekaṃ paṭiccasamuppādaṅgesu lakkhakoṭisamāpattisamāpajjanavasena sammasanañāṇaṃ pavatteti, tadanusārena bhagavā buddhabhūtopi anulomapaṭilomato paṭiccasamuppādaṅgamukhena vipassanāvasena divase divase lakkhakoṭiphalasamāpattiyo samāpajjati, taṃ sandhāya vuttaṃ, ‘catuvīsatikoṭisatasahassasaṅkhā samāpattiyo pavisitvā’’’ti.
இமானி த்³வேபி ஸமனந்தரானேவ பச்சவெக்க²ணாயபி யேபு⁴ய்யேன நானந்தரியகதாய ஜா²னபக்கி²கபா⁴வதோ. யஸ்மா ஸப்³ப³பச்சி²மங் ப⁴வங்க³சித்தங் ததோ ததோ சவனதோ ‘‘சுதீ’’தி வுச்சதி , தஸ்மா ந கேவலங் அயமேவ ப⁴க³வா, அத² கோ² ஸப்³பே³பி ஸத்தா ப⁴வங்க³சித்தேனேவ சவந்தீதி த³ஸ்ஸேதுங் ‘‘யே ஹி கேசீ’’திஆதி³ வுத்தங். து³க்க²ஸச்சேனாதி து³க்க²ஸச்சபரியாபன்னேன சுதிசித்தேன காலங் காலகிரியங் கரொந்தி பாபுணந்தி, காலக³மனதோ வா கரொந்தி பேச்சாதி.
Imāni dvepi samanantarāneva paccavekkhaṇāyapi yebhuyyena nānantariyakatāya jhānapakkhikabhāvato. Yasmā sabbapacchimaṃ bhavaṅgacittaṃ tato tato cavanato ‘‘cutī’’ti vuccati , tasmā na kevalaṃ ayameva bhagavā, atha kho sabbepi sattā bhavaṅgacitteneva cavantīti dassetuṃ ‘‘ye hi kecī’’tiādi vuttaṃ. Dukkhasaccenāti dukkhasaccapariyāpannena cuticittena kālaṃ kālakiriyaṃ karonti pāpuṇanti, kālagamanato vā karonti peccāti.
படிபா⁴க³புக்³க³லவிரஹிதோ ஸீலாதி³கு³ணேஹி அஸதி³ஸதாய ஸதி³ஸபுக்³க³லரஹிதோ. ஸங்கா²ரா வூபஸம்மந்தி எத்தா²தி வூபஸமோதி ஏவங் ஸங்கா²தங் ஞாதங் கதி²தங் நிப்³பா³னமேவ ஸுக²ந்தி. லோமஹங்ஸனகோதி லோமானங் ஹட்ட²பா⁴வாபாத³னோ. பி⁴ங்ஸனகோதி அவீதராகா³னங் ப⁴யஜனகோ ஆஸி அஹோஸி. ஸப்³பா³காரவரகு³ணூபேதேதி ஸப்³பே³ஹி ஆகாரவரேஹி உத்தமகாரணேஹி ஸீலாதி³கு³ணேஹி ஸமன்னாக³தே. அஸங்குடிதேனாதி அகுடிதேன விப்பா²ரிகாபா⁴வதோ. ஸுவிகஸிதேனேவாதி பீதிஸோமனஸ்ஸயோக³தோ ஸுட்டு² விகஸிதேன. வேத³னங் அதி⁴வாஸேஸி ஸபா⁴வஸமுத³யாதி³தோ ஸுட்டு² பஞ்ஞாதத்தா. அனாவரணவிமொக்கோ² ஸப்³ப³ஸோ நிப்³பி³த³பா⁴வோ. தேனாஹ ‘‘அபஞ்ஞத்திபா⁴வூபக³மோ’’தி. பஜ்ஜோதனிப்³பா³னஸதி³ஸோதி பதீ³பஸ்ஸ நிப்³பா³னஸதி³ஸோ தத்த² விலீயித்வா அவட்டா²னாபா⁴வதோ.
Paṭibhāgapuggalavirahito sīlādiguṇehi asadisatāya sadisapuggalarahito. Saṅkhārā vūpasammanti etthāti vūpasamoti evaṃ saṅkhātaṃ ñātaṃ kathitaṃ nibbānameva sukhanti. Lomahaṃsanakoti lomānaṃ haṭṭhabhāvāpādano. Bhiṃsanakoti avītarāgānaṃ bhayajanako āsi ahosi. Sabbākāravaraguṇūpeteti sabbehi ākāravarehi uttamakāraṇehi sīlādiguṇehi samannāgate. Asaṅkuṭitenāti akuṭitena vipphārikābhāvato. Suvikasitenevāti pītisomanassayogato suṭṭhu vikasitena. Vedanaṃ adhivāsesi sabhāvasamudayādito suṭṭhu paññātattā. Anāvaraṇavimokkho sabbaso nibbidabhāvo. Tenāha ‘‘apaññattibhāvūpagamo’’ti. Pajjotanibbānasadisoti padīpassa nibbānasadiso tattha vilīyitvā avaṭṭhānābhāvato.
பரினிப்³பா³னஸுத்தவண்ணனா நிட்டி²தா.
Parinibbānasuttavaṇṇanā niṭṭhitā.
து³தியவக்³க³வண்ணனா நிட்டி²தா.
Dutiyavaggavaṇṇanā niṭṭhitā.
ஸாரத்த²ப்பகாஸினியா ஸங்யுத்தனிகாய-அட்ட²கதா²ய
Sāratthappakāsiniyā saṃyuttanikāya-aṭṭhakathāya
ப்³ரஹ்மஸங்யுத்தவண்ணனாய லீனத்த²ப்பகாஸனா ஸமத்தா.
Brahmasaṃyuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. பரினிப்³பா³னஸுத்தங் • 5. Parinibbānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. பரினிப்³பா³னஸுத்தவண்ணனா • 5. Parinibbānasuttavaṇṇanā
