| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. பரியேஸனாஸுத்தங்
2. Pariyesanāsuttaṃ
255. ‘‘சதஸ்ஸோ இமா, பி⁴க்க²வே, அனரியபரியேஸனா. கதமா சதஸ்ஸோ? இத⁴, பி⁴க்க²வே, ஏகச்சோ அத்தனா ஜராத⁴ம்மோ ஸமானோ ஜராத⁴ம்மங்யேவ பரியேஸதி; அத்தனா ப்³யாதி⁴த⁴ம்மோ ஸமானோ ப்³யாதி⁴த⁴ம்மங்யேவ பரியேஸதி; அத்தனா மரணத⁴ம்மோ ஸமானோ மரணத⁴ம்மங்யேவ பரியேஸதி; அத்தனா ஸங்கிலேஸத⁴ம்மோ ஸமானோ ஸங்கிலேஸத⁴ம்மங்யேவ பரியேஸதி. இமா கோ², பி⁴க்க²வே, சதஸ்ஸோ அனரியபரியேஸனா.
255. ‘‘Catasso imā, bhikkhave, anariyapariyesanā. Katamā catasso? Idha, bhikkhave, ekacco attanā jarādhammo samāno jarādhammaṃyeva pariyesati; attanā byādhidhammo samāno byādhidhammaṃyeva pariyesati; attanā maraṇadhammo samāno maraṇadhammaṃyeva pariyesati; attanā saṃkilesadhammo samāno saṃkilesadhammaṃyeva pariyesati. Imā kho, bhikkhave, catasso anariyapariyesanā.
‘‘சதஸ்ஸோ இமா, பி⁴க்க²வே, அரியபரியேஸனா. கதமா சதஸ்ஸோ? இத⁴, பி⁴க்க²வே, ஏகச்சோ அத்தனா ஜராத⁴ம்மோ ஸமானோ ஜராத⁴ம்மே ஆதீ³னவங் விதி³த்வா அஜரங் அனுத்தரங் யோக³க்கே²மங் நிப்³பா³னங் பரியேஸதி; அத்தனா ப்³யாதி⁴த⁴ம்மோ ஸமானோ ப்³யாதி⁴த⁴ம்மே ஆதீ³னவங் விதி³த்வா அப்³யாதி⁴ங் அனுத்தரங் யோக³க்கே²மங் நிப்³பா³னங் பரியேஸதி; அத்தனா மரணத⁴ம்மோ ஸமானோ மரணத⁴ம்மே ஆதீ³னவங் விதி³த்வா அமதங் அனுத்தரங் யோக³க்கே²மங் நிப்³பா³னங் பரியேஸதி; அத்தனா ஸங்கிலேஸத⁴ம்மோ ஸமானோ ஸங்கிலேஸத⁴ம்மே ஆதீ³னவங் விதி³த்வா அஸங்கிலிட்ட²ங் அனுத்தரங் யோக³க்கே²மங் நிப்³பா³னங் பரியேஸதி. இமா கோ², பி⁴க்க²வே , சதஸ்ஸோ அரியபரியேஸனா’’தி. து³தியங்.
‘‘Catasso imā, bhikkhave, ariyapariyesanā. Katamā catasso? Idha, bhikkhave, ekacco attanā jarādhammo samāno jarādhamme ādīnavaṃ viditvā ajaraṃ anuttaraṃ yogakkhemaṃ nibbānaṃ pariyesati; attanā byādhidhammo samāno byādhidhamme ādīnavaṃ viditvā abyādhiṃ anuttaraṃ yogakkhemaṃ nibbānaṃ pariyesati; attanā maraṇadhammo samāno maraṇadhamme ādīnavaṃ viditvā amataṃ anuttaraṃ yogakkhemaṃ nibbānaṃ pariyesati; attanā saṃkilesadhammo samāno saṃkilesadhamme ādīnavaṃ viditvā asaṃkiliṭṭhaṃ anuttaraṃ yogakkhemaṃ nibbānaṃ pariyesati. Imā kho, bhikkhave , catasso ariyapariyesanā’’ti. Dutiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1-3. அபி⁴ஞ்ஞாஸுத்தாதி³வண்ணனா • 1-3. Abhiññāsuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-3. அபி⁴ஞ்ஞாஸுத்தாதி³வண்ணனா • 1-3. Abhiññāsuttādivaṇṇanā
