| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. பரோஸஹஸ்ஸஸுத்தவண்ணனா
8. Parosahassasuttavaṇṇanā
216. ஸஹஸ்ஸதோ பரங் அட்³ட⁴தெய்யபி⁴க்கு²ஸதங் ததா³ ப⁴க³வந்தங் பயிருபாஸதீதி ஆஹ ‘‘பரோஸஹஸ்ஸந்தி அதிரேகஸஹஸ்ஸ’’ந்தி. நிப்³பா³னே குதோசி ப⁴யங் நத்தீ²தி குதோசிபி காரணதோ நிப்³பா³னே ப⁴யங் நத்தி² அஸங்க²தபா⁴வேன ஸப்³ப³ஸோ கே²மத்தா. தேனாஹ ப⁴க³வா – ‘‘கே²மஞ்ச வோ, பி⁴க்க²வே, த⁴ம்மங் தே³ஸெஸ்ஸாமி கே²மகா³மினிஞ்ச படிபத³’’ந்திஆதி³ (ஸங்॰ நி॰ 4.379-408). ந குதோசி ப⁴யங் ஏதஸ்மிங் அதி⁴க³தேதி அகுதோப⁴யங், நிப்³பா³னங். தேனாஹ ‘‘நிப்³பா³னப்பத்தஸ்ஸா’’திஆதி³. விபஸ்ஸிதோ பட்டா²யாதி அம்ஹாகங் ப⁴க³வதோ நாமவஸேன இஸீனங் ஸத்தமபா⁴வத³ஸ்ஸனத்த²ங் வுத்தங். தே ஹி தத்த² தத்த² ஸுத்தே ப³ஹுஸோ கித்திதா. இஸீனந்தி வா பச்சேகபு³த்³த⁴ஸாவகபா³ஹிரகஇஸீனங் ஸத்தமோ உத்தரோ ஸெட்டோ²தி அத்தோ².
216. Sahassato paraṃ aḍḍhateyyabhikkhusataṃ tadā bhagavantaṃ payirupāsatīti āha ‘‘parosahassanti atirekasahassa’’nti. Nibbāne kutoci bhayaṃ natthīti kutocipi kāraṇato nibbāne bhayaṃ natthi asaṅkhatabhāvena sabbaso khemattā. Tenāha bhagavā – ‘‘khemañca vo, bhikkhave, dhammaṃ desessāmi khemagāminiñca paṭipada’’ntiādi (saṃ. ni. 4.379-408). Na kutoci bhayaṃ etasmiṃ adhigateti akutobhayaṃ, nibbānaṃ. Tenāha ‘‘nibbānappattassā’’tiādi. Vipassito paṭṭhāyāti amhākaṃ bhagavato nāmavasena isīnaṃ sattamabhāvadassanatthaṃ vuttaṃ. Te hi tattha tattha sutte bahuso kittitā. Isīnanti vā paccekabuddhasāvakabāhirakaisīnaṃ sattamo uttaro seṭṭhoti attho.
அட்டு²ப்பத்திவஸேனாதி காரணஸமுட்டா²னவஸேன. தத³ஸ்ஸ அட்டு²ப்பத்திங் விபா⁴வேதுங் ‘‘ஸங்க⁴மஜ்ஜே²’’திஆதி³ வுத்தங். படிபா⁴னஸம்பன்னவாசாய அஞ்ஞே ஈஸதி அபி⁴ப⁴வதீதி வங்கீ³ஸோ. தேனாஹ ‘‘படிபா⁴னஸம்பத்தி’’ந்திஆதி³.
Aṭṭhuppattivasenāti kāraṇasamuṭṭhānavasena. Tadassa aṭṭhuppattiṃ vibhāvetuṃ ‘‘saṅghamajjhe’’tiādi vuttaṃ. Paṭibhānasampannavācāya aññe īsati abhibhavatīti vaṅgīso. Tenāha ‘‘paṭibhānasampatti’’ntiādi.
கிலேஸும்முஜ்ஜனஸதானீதி ராகா³தி³கிலேஸானங் ரஜ்ஜனது³ஸ்ஸனாதி³னயேஹி ஸவிஸயே அயோனிஸோ உட்டா²னானி. யதி³ அனேகானி ஸதானி, அத² கஸ்மா ‘‘உம்மக்³க³பத²’’ந்தி? வுத்தந்தி ஆஹ ‘‘வட்டபத²த்தா பன பத²’’ந்தி. ராக³தோ³ஸமோஹமானதி³ட்டி²வஸேன ராக³கி²லாதீ³னி பஞ்சகி²லானி. விப⁴ஜந்தந்தி விப⁴ஜனவஸேன கதெ²ந்தங். விப⁴ஜித்வாதி ஞாணேன விவேசெத்வா.
Kilesummujjanasatānīti rāgādikilesānaṃ rajjanadussanādinayehi savisaye ayoniso uṭṭhānāni. Yadi anekāni satāni, atha kasmā ‘‘ummaggapatha’’nti? Vuttanti āha ‘‘vaṭṭapathattā pana patha’’nti. Rāgadosamohamānadiṭṭhivasena rāgakhilādīni pañcakhilāni. Vibhajantanti vibhajanavasena kathentaṃ. Vibhajitvāti ñāṇena vivecetvā.
அமதே அக்கா²தேதி அமதாவஹே த⁴ம்மே தே³ஸிதே. த⁴ம்மஸ்ஸ பஸ்ஸிதாரோ ஸச்சஸம்படிவேதே⁴ன. அஸங்ஹீரா தி³ட்டி²வாதேஹி.
Amateakkhāteti amatāvahe dhamme desite. Dhammassa passitāro saccasampaṭivedhena. Asaṃhīrā diṭṭhivātehi.
அதிவிஜ்ஜி²த்வாதி படிவிஜ்ஜி²த்வா. அதிக்கமபூ⁴தந்தி அதிக்கமனட்டே²ன பூ⁴தங். த³ஸத்³தா⁴னந்தி த³ஸன்னங் உபட்³டா⁴னங். தேனாஹ ‘‘பஞ்சன்ன’’ந்தி. ஜானந்தேனாதி த⁴ம்மஸ்ஸ ஸுது³ல்லப⁴தங் ஜானந்தேன.
Ativijjhitvāti paṭivijjhitvā. Atikkamabhūtanti atikkamanaṭṭhena bhūtaṃ. Dasaddhānanti dasannaṃ upaḍḍhānaṃ. Tenāha ‘‘pañcanna’’nti. Jānantenāti dhammassa sudullabhataṃ jānantena.
பரோஸஹஸ்ஸஸுத்தவண்ணனா நிட்டி²தா.
Parosahassasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. பரோஸஹஸ்ஸஸுத்தங் • 8. Parosahassasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. பரோஸஹஸ்ஸஸுத்தவண்ணனா • 8. Parosahassasuttavaṇṇanā
