| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. பாதாலஸுத்தவண்ணனா
4. Pātālasuttavaṇṇanā
252. யத்த² பதிட்டா² நத்தி² ஏகந்திகாதி ஏகந்திகஸ்ஸ மஹதோ பாதஸ்ஸ அலந்தி அயமெத்த² அத்தோ² அதி⁴ப்பேதோதி ஆஹ ‘‘நத்தி² எத்த² பதிட்டா²’’தி. அஸம்பூ⁴தத்த²ந்தி ந ஸம்பூ⁴தத்த²ங், முஸாதி அத்தோ². ஸோதி அஸ்ஸுதவா புது²ஜ்ஜனோ. யங் தங் உத³கங் பததீதி யோஜனா. யஸ்மா ஸமுத்³த³பிட்டே² அந்தரந்தரா வேரம்ப⁴வாதஸதி³ஸோ மஹாவாதோ உட்ட²ஹித்வா மஹாஸமுத்³தே³ உத³கங் உக்³க³ச்சா²பேதி, தங் கதா³சி சக்கவாளாபி⁴முக²ங், கதா³சி ஸினேருபாதா³பி⁴முக²ங் க³ந்த்வா தங் பதிஹனதி, தஸ்மா வுத்தங் ‘‘ப³லவாமுக²ங் மஹாஸமுத்³த³ஸ்ஸா’’திஆதி³. வேகே³ன பக்க²ந்தி³த்வாதி மஹதா வாதவேகே³ன ஸமுத்³த⁴தங் தேனேவ வேகே³ன பக்க²ந்த³ந்தஞ்ச ஹுத்வா. மஹானரகபபாதோ வியாதி யோஜனாயாமவித்தா²ரக³ம்பீ⁴ரஸொப்³ப⁴பபாதோ விய ஹோதி. ததா²ரூபானந்தி தத்த² வஸிதுங் ஸமத்தா²னங். அஸந்தந்தி அபூ⁴தங். அத்த²வஸேன ஹி வாசா அபூ⁴தங் நாம.
252. Yattha patiṭṭhā natthi ekantikāti ekantikassa mahato pātassa alanti ayamettha attho adhippetoti āha ‘‘natthi ettha patiṭṭhā’’ti. Asambhūtatthanti na sambhūtatthaṃ, musāti attho. Soti assutavā puthujjano. Yaṃ taṃ udakaṃ patatīti yojanā. Yasmā samuddapiṭṭhe antarantarā verambhavātasadiso mahāvāto uṭṭhahitvā mahāsamudde udakaṃ uggacchāpeti, taṃ kadāci cakkavāḷābhimukhaṃ, kadāci sinerupādābhimukhaṃ gantvā taṃ patihanati, tasmā vuttaṃ ‘‘balavāmukhaṃ mahāsamuddassā’’tiādi. Vegena pakkhanditvāti mahatā vātavegena samuddhataṃ teneva vegena pakkhandantañca hutvā. Mahānarakapapāto viyāti yojanāyāmavitthāragambhīrasobbhapapāto viya hoti. Tathārūpānanti tattha vasituṃ samatthānaṃ. Asantanti abhūtaṃ. Atthavasena hi vācā abhūtaṃ nāma.
ந பதிட்டா²ஸீதி பதிட்ட²ங் ந லபி⁴. அனிப³த்³த⁴ந்தி அனிப³ந்த⁴னத்த²ங் யங்கிஞ்சி. து³ப்³ப³லஞாணோதி ஞாணப³லரஹிதோ. ‘‘அஸ்ஸுதவா புது²ஜ்ஜனோ’’தி வத்வா ‘‘ஸுதவா அரியஸாவகோ’’தி வுத்தத்தா ‘‘ஸோதாபன்னோ து⁴ர’’ந்தி வுத்தங். இதரேஸு அரியஸாவகேஸு வத்தப்³ப³மேவ நத்தி². தேஸஞ்ஹி வேத³னா ஸுபரிஞ்ஞாதா. ப³லவவிபஸ்ஸகோ…பே॰… யோகா³வசரோபி வட்டதி மத்தஸோ வேத³னானங் பரிஞ்ஞாதத்தா.
Na patiṭṭhāsīti patiṭṭhaṃ na labhi. Anibaddhanti anibandhanatthaṃ yaṃkiñci. Dubbalañāṇoti ñāṇabalarahito. ‘‘Assutavā puthujjano’’ti vatvā ‘‘sutavā ariyasāvako’’ti vuttattā ‘‘sotāpanno dhura’’nti vuttaṃ. Itaresu ariyasāvakesu vattabbameva natthi. Tesañhi vedanā supariññātā. Balavavipassako…pe… yogāvacaropi vaṭṭati mattaso vedanānaṃ pariññātattā.
பாதாலஸுத்தவண்ணனா நிட்டி²தா.
Pātālasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. பாதாலஸுத்தங் • 4. Pātālasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. பாதாலஸுத்தவண்ணனா • 4. Pātālasuttavaṇṇanā
