| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૪. પાતાલસુત્તવણ્ણના
4. Pātālasuttavaṇṇanā
૨૫૨. ચતુત્થે પાતાલોતિ પાતસ્સ અલં પરિયત્તો, નત્થિ એત્થ પતિટ્ઠાતિ પાતાલો. અસન્તં અવિજ્જમાનન્તિ અસમ્ભૂતત્તં અપઞ્ઞાયમાનત્તં. એવં વાચં ભાસતીતિ અત્થિ મહાસમુદ્દે પાતાલોતિ એવં વાચં. સો હિ યં તં બલવામુખં મહાસમુદ્દસ્સ ઉદકં વેગેન પક્ખન્દિત્વા ચક્કવાળં વા સિનેરું વા આહચ્ચ યોજનદ્વિયોજનદસયોજનપ્પમાણમ્પિ ઉગ્ગન્ત્વા પુન મહાસમુદ્દે પતતિ, યસ્સ પતિતટ્ઠાને મહાનરકપપાતો વિય હોતિ, યં લોકે બલવામુખન્તિ વુચ્ચતિ. તં સન્ધાય એવં વદતિ.
252. Catutthe pātāloti pātassa alaṃ pariyatto, natthi ettha patiṭṭhāti pātālo. Asantaṃ avijjamānanti asambhūtattaṃ apaññāyamānattaṃ. Evaṃ vācaṃ bhāsatīti atthi mahāsamudde pātāloti evaṃ vācaṃ. So hi yaṃ taṃ balavāmukhaṃ mahāsamuddassa udakaṃ vegena pakkhanditvā cakkavāḷaṃ vā sineruṃ vā āhacca yojanadviyojanadasayojanappamāṇampi uggantvā puna mahāsamudde patati, yassa patitaṭṭhāne mahānarakapapāto viya hoti, yaṃ loke balavāmukhanti vuccati. Taṃ sandhāya evaṃ vadati.
યસ્મા પન તત્થ તથારૂપાનં મચ્છકચ્છપદેવદાનવાનં પતિટ્ઠાપિ હોતિ સુખનિવાસોપિ, તસ્મા અસન્તં અસંવિજ્જમાનં તં તં વાચં ભાસતિ નામ. યસ્મા પન સબ્બપુથુજ્જના સારીરિકાય દુક્ખવેદનાય પતિટ્ઠાતું ન સક્કોન્તિ, તસ્મા પાતસ્સ અલન્તિ અત્થેન અયમેવ પાતાલોતિ દસ્સેન્તો સારીરિકાનં ખો એતં ભિક્ખવેતિઆદિમાહ.
Yasmā pana tattha tathārūpānaṃ macchakacchapadevadānavānaṃ patiṭṭhāpi hoti sukhanivāsopi, tasmā asantaṃ asaṃvijjamānaṃ taṃ taṃ vācaṃ bhāsati nāma. Yasmā pana sabbaputhujjanā sārīrikāya dukkhavedanāya patiṭṭhātuṃ na sakkonti, tasmā pātassa alanti atthena ayameva pātāloti dassento sārīrikānaṃ kho etaṃ bhikkhavetiādimāha.
પાતાલે ન પચ્ચુટ્ઠાસીતિ પાતાલસ્મિં ન પતિટ્ઠાસિ. ગાધન્તિ પતિટ્ઠં. અક્કન્દતીતિ અનિબદ્ધં વિપ્પલાપં વિલપન્તો કન્દતિ. દુબ્બલોતિ દુબ્બલઞાણો. અપ્પથામકોતિ ઞાણથામસ્સ પરિત્તતાય પરિત્તથામકો. ઇમસ્મિં સુત્તે અરિયસાવકોતિ સોતાપન્નો. સોતાપન્નો હિ એત્થ ધુરં, બલવવિપસ્સકો ન તિક્ખબુદ્ધિ ઉપ્પન્નં વેદનં અનનુવત્તિત્વા પતિટ્ઠાતું સમત્થો યોગાવચરોપિ વટ્ટતિ.
Pātālena paccuṭṭhāsīti pātālasmiṃ na patiṭṭhāsi. Gādhanti patiṭṭhaṃ. Akkandatīti anibaddhaṃ vippalāpaṃ vilapanto kandati. Dubbaloti dubbalañāṇo. Appathāmakoti ñāṇathāmassa parittatāya parittathāmako. Imasmiṃ sutte ariyasāvakoti sotāpanno. Sotāpanno hi ettha dhuraṃ, balavavipassako na tikkhabuddhi uppannaṃ vedanaṃ ananuvattitvā patiṭṭhātuṃ samattho yogāvacaropi vaṭṭati.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૪. પાતાલસુત્તં • 4. Pātālasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૪. પાતાલસુત્તવણ્ણના • 4. Pātālasuttavaṇṇanā
