| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
13. பாடலியஸுத்தவண்ணனா
13. Pāṭaliyasuttavaṇṇanā
365. ‘‘மாயஞ்சாஹங் பஜானாமீ’’தி வசனங் காமங் தேஸங் மாயாவீபா⁴வத³ஸ்ஸனபரங், ப⁴க³வதோ பன மாயாஸாடெ²ய்யாதி³கஸ்ஸ ஸப்³ப³ஸ்ஸ பாபத⁴ம்மஸ்ஸ போ³தி⁴மூலே ஏவ ஸேதுகா⁴தோ, தஸ்மா ஸப்³ப³ஸோ பஹீனமாயோ, ஸப்³ப³ஞ்ஞுதாய மாயங் அஞ்ஞே ச ஞெய்யே ஸப்³ப³ஸோ ஜானாதி. தேன வுத்தங் ‘‘மாயஞ்சாஹங், கா³மணி, பஜானாமீ’’திஆதி³. மாயஞ்ச பஜானாமீதி ந கேவலமஹங் மாயங் ஏவ ஜானாமி, அத² கோ² அஞ்ஞம்பி இத³ஞ்சித³ஞ்ச ஜானாமீதி.
365. ‘‘Māyañcāhaṃ pajānāmī’’ti vacanaṃ kāmaṃ tesaṃ māyāvībhāvadassanaparaṃ, bhagavato pana māyāsāṭheyyādikassa sabbassa pāpadhammassa bodhimūle eva setughāto, tasmā sabbaso pahīnamāyo, sabbaññutāya māyaṃ aññe ca ñeyye sabbaso jānāti. Tena vuttaṃ ‘‘māyañcāhaṃ, gāmaṇi, pajānāmī’’tiādi. Māyañca pajānāmīti na kevalamahaṃ māyaṃ eva jānāmi, atha kho aññampi idañcidañca jānāmīti.
இத்தி²காமேஹீதி இத்தீ²ஹி சேவ தத³ஞ்ஞகாமேஹி ச. ஏகஸ்மிங் டா²னேதி ஏகஸ்மிங் பதே³ஸே. ஏகேகஸ்ஸேவ ஆக³ந்துகஸ்ஸ க³ஹட்ட²ஸ்ஸ வா பப்³ப³ஜிதஸ்ஸ வா. ஸத்திஅனுரூபேனாதி விப⁴வஸத்திஅனுரூபேன. ப³லானுரூபேனாதி பரிவாரப³லானுரூபேன. ஸத்திஅனுரூபேனாதி வா ஸத்³தா⁴ஸத்திஅனுரூபேன. ப³லானுரூபேனாதி விப⁴வப³லானுரூபேன. த⁴ம்மேஸு ஸமாதி⁴ த³ஸகுஸலத⁴ம்மேஸு ஸமாதா⁴னங். அக்³க³ஹிதசித்ததா பரியுட்ட²காரிதா. தேன லோகியஸீலவிஸுத்³தி⁴ தி³ட்டி²விஸுத்³தி⁴ ச வுத்தா. ததா² சாஹ – ‘‘கோ சாதி³ குஸலானங் த⁴ம்மானங், ஸீலஞ்ச ஸுவிஸுத்³த⁴ங் தி³ட்டி² ச உஜுகா’’தி (ஸங்॰ நி॰ 5.369). தத்த² பதிட்டி²தஸ்ஸ உபரி கத்தப்³ப³ங் த³ஸ்ஸேதுங் ‘‘த⁴ம்மஸமாதி⁴ஸ்மிங் டி²தோ’’திஆதி³ வுத்தங். அயங் படிபதா³தி தஸ்ஸ கம்மப²லவாதி³னோ ஸத்து² வசனங் ஸப்³பே³ஸஞ்ச அயங் மய்ஹங் ஸீலஸங்வரப்³ரஹ்மவிஹாரபா⁴வனாஸங்கா²தாபடிபதா³ அனபராத⁴கதாய ஏவ ஸங்வத்ததி. ஜயக்³கா³ஹோதி உப⁴யதா²பி மய்ஹங் காசி ஜானி நத்தி².
Itthikāmehīti itthīhi ceva tadaññakāmehi ca. Ekasmiṃ ṭhāneti ekasmiṃ padese. Ekekasseva āgantukassa gahaṭṭhassa vā pabbajitassa vā. Sattianurūpenāti vibhavasattianurūpena. Balānurūpenāti parivārabalānurūpena. Sattianurūpenāti vā saddhāsattianurūpena. Balānurūpenāti vibhavabalānurūpena. Dhammesu samādhi dasakusaladhammesu samādhānaṃ. Aggahitacittatā pariyuṭṭhakāritā. Tena lokiyasīlavisuddhi diṭṭhivisuddhi ca vuttā. Tathā cāha – ‘‘ko cādi kusalānaṃ dhammānaṃ, sīlañca suvisuddhaṃ diṭṭhi ca ujukā’’ti (saṃ. ni. 5.369). Tattha patiṭṭhitassa upari kattabbaṃ dassetuṃ ‘‘dhammasamādhismiṃ ṭhito’’tiādi vuttaṃ. Ayaṃ paṭipadāti tassa kammaphalavādino satthu vacanaṃ sabbesañca ayaṃ mayhaṃ sīlasaṃvarabrahmavihārabhāvanāsaṅkhātāpaṭipadā anaparādhakatāya eva saṃvattati. Jayaggāhoti ubhayathāpi mayhaṃ kāci jāni natthi.
பஞ்ச த⁴ம்மா த⁴ம்மஸமாதி⁴ நாம, விபஸ்ஸனாமக்³க³ப²லத⁴ம்மமத்தங் வா. ததியவிகப்பே ஸீலாதி³விஸுத்³தி⁴யா ஸத்³தி⁴ங் ப்³ரஹ்மவிஹாரா யதா²வுத்ததிவித⁴த⁴ம்மாவஹத்தா ஏவ த⁴ம்மஸமாதி⁴ நாம. பூரெந்தஸ்ஸ உப்பன்னா சித்தேகக்³க³தாதி வுத்தக²ணிகசித்தேகக்³க³தா. ஸாபி சித்தஸ்ஸ ஸமாதா⁴னதோ ‘‘சித்தஸமாதீ⁴’’தி வுத்தா, தஸ்ஸ படிபக்க²ங் விக்க²ம்ப⁴ந்தீ ஸமுச்சி²ந்த³ந்தீ ச ஹுத்வா பவத்தா யதா²வுத்தஸமாதி⁴ ஏவ விஸேஸேன சித்தஸமாதி⁴ நாம.
Pañca dhammā dhammasamādhi nāma, vipassanāmaggaphaladhammamattaṃ vā. Tatiyavikappe sīlādivisuddhiyā saddhiṃ brahmavihārā yathāvuttatividhadhammāvahattā eva dhammasamādhi nāma. Pūrentassa uppannā cittekaggatāti vuttakhaṇikacittekaggatā. Sāpi cittassa samādhānato ‘‘cittasamādhī’’ti vuttā, tassa paṭipakkhaṃ vikkhambhantī samucchindantī ca hutvā pavattā yathāvuttasamādhi eva visesena cittasamādhi nāma.
பாடலியஸுத்தவண்ணனா நிட்டி²தா.
Pāṭaliyasuttavaṇṇanā niṭṭhitā.
கா³மணிஸங்யுத்தவண்ணனா நிட்டி²தா.
Gāmaṇisaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 13. பாடலியஸுத்தங் • 13. Pāṭaliyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 13. பாடலியஸுத்தவண்ணனா • 13. Pāṭaliyasuttavaṇṇanā
