| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
(17) 2. ஆகா⁴தவக்³கோ³
(17) 2. Āghātavaggo
1. பட²மஆகா⁴தபடிவினயஸுத்தங்
1. Paṭhamaāghātapaṭivinayasuttaṃ
161. ‘‘பஞ்சிமே , பி⁴க்க²வே, ஆகா⁴தபடிவினயா யத்த² பி⁴க்கு²னோ உப்பன்னோ ஆகா⁴தோ ஸப்³ப³ஸோ படிவினேதப்³போ³. கதமே பஞ்ச? யஸ்மிங், பி⁴க்க²வே, புக்³க³லே ஆகா⁴தோ ஜாயேத², மெத்தா தஸ்மிங் புக்³க³லே பா⁴வேதப்³பா³; ஏவங் தஸ்மிங் புக்³க³லே ஆகா⁴தோ படிவினேதப்³போ³. யஸ்மிங், பி⁴க்க²வே, புக்³க³லே ஆகா⁴தோ ஜாயேத², கருணா தஸ்மிங் புக்³க³லே பா⁴வேதப்³பா³; ஏவங் தஸ்மிங் புக்³க³லே ஆகா⁴தோ படிவினேதப்³போ³. யஸ்மிங், பி⁴க்க²வே, புக்³க³லே ஆகா⁴தோ ஜாயேத², உபெக்கா² தஸ்மிங் புக்³க³லே பா⁴வேதப்³பா³; ஏவங் தஸ்மிங் புக்³க³லே ஆகா⁴தோ படிவினேதப்³போ³. யஸ்மிங், பி⁴க்க²வே, புக்³க³லே ஆகா⁴தோ ஜாயேத², அஸதிஅமனஸிகாரோ தஸ்மிங் புக்³க³லே ஆபஜ்ஜிதப்³போ³; ஏவங் தஸ்மிங் புக்³க³லே ஆகா⁴தோ படிவினேதப்³போ³. யஸ்மிங் , பி⁴க்க²வே, புக்³க³லே ஆகா⁴தோ ஜாயேத², கம்மஸ்ஸகதா தஸ்மிங் புக்³க³லே அதி⁴ட்டா²தப்³பா³ – ‘கம்மஸ்ஸகோ அயமாயஸ்மா கம்மதா³யாதோ³ கம்மயோனி கம்மப³ந்து⁴ கம்மப்படிஸரணோ, யங் கம்மங் கரிஸ்ஸதி கல்யாணங் வா பாபகங் வா தஸ்ஸ தா³யாதோ³ ப⁴விஸ்ஸதீ’தி; ஏவங் தஸ்மிங் புக்³க³லே ஆகா⁴தோ படிவினேதப்³போ³. இமே கோ², பி⁴க்க²வே, பஞ்ச ஆகா⁴தபடிவினயா, யத்த² பி⁴க்கு²னோ உப்பன்னோ ஆகா⁴தோ ஸப்³ப³ஸோ படிவினேதப்³போ³’’தி. பட²மங்.
161. ‘‘Pañcime , bhikkhave, āghātapaṭivinayā yattha bhikkhuno uppanno āghāto sabbaso paṭivinetabbo. Katame pañca? Yasmiṃ, bhikkhave, puggale āghāto jāyetha, mettā tasmiṃ puggale bhāvetabbā; evaṃ tasmiṃ puggale āghāto paṭivinetabbo. Yasmiṃ, bhikkhave, puggale āghāto jāyetha, karuṇā tasmiṃ puggale bhāvetabbā; evaṃ tasmiṃ puggale āghāto paṭivinetabbo. Yasmiṃ, bhikkhave, puggale āghāto jāyetha, upekkhā tasmiṃ puggale bhāvetabbā; evaṃ tasmiṃ puggale āghāto paṭivinetabbo. Yasmiṃ, bhikkhave, puggale āghāto jāyetha, asatiamanasikāro tasmiṃ puggale āpajjitabbo; evaṃ tasmiṃ puggale āghāto paṭivinetabbo. Yasmiṃ , bhikkhave, puggale āghāto jāyetha, kammassakatā tasmiṃ puggale adhiṭṭhātabbā – ‘kammassako ayamāyasmā kammadāyādo kammayoni kammabandhu kammappaṭisaraṇo, yaṃ kammaṃ karissati kalyāṇaṃ vā pāpakaṃ vā tassa dāyādo bhavissatī’ti; evaṃ tasmiṃ puggale āghāto paṭivinetabbo. Ime kho, bhikkhave, pañca āghātapaṭivinayā, yattha bhikkhuno uppanno āghāto sabbaso paṭivinetabbo’’ti. Paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. பட²மஆகா⁴தபடிவினயஸுத்தவண்ணனா • 1. Paṭhamaāghātapaṭivinayasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-5. பட²மஆகா⁴தபடிவினயஸுத்தாதி³வண்ணனா • 1-5. Paṭhamaāghātapaṭivinayasuttādivaṇṇanā
