| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૩-૧૦. પઠમઆનન્દસુત્તાદિવણ્ણના
3-10. Paṭhamaānandasuttādivaṇṇanā
૯૮૯-૯૯૬. તતિયે પવિચિનતીતિ અનિચ્ચાદિવસેન પવિચિનતિ. ઇતરં પદદ્વયં એતસ્સેવ વેવચનં. નિરામિસાતિ નિક્કિલેસા કાયિકચેતસિકદરથપટિપસ્સદ્ધિયા કાયોપિ ચિત્તમ્પિ પસ્સમ્ભતિ. સમાધિયતીતિ સમ્મા ઠપિયતિ, અપ્પનાચિત્તં વિય હોતિ. અજ્ઝુપેક્ખિતા હોતીતિ સહજાતઅજ્ઝુપેક્ખનાય અજ્ઝુપેક્ખિતા હોતિ.
989-996. Tatiye pavicinatīti aniccādivasena pavicinati. Itaraṃ padadvayaṃ etasseva vevacanaṃ. Nirāmisāti nikkilesā kāyikacetasikadarathapaṭipassaddhiyā kāyopi cittampi passambhati. Samādhiyatīti sammā ṭhapiyati, appanācittaṃ viya hoti. Ajjhupekkhitā hotīti sahajātaajjhupekkhanāya ajjhupekkhitā hoti.
એવં ચુદ્દસવિધેન કાયપરિગ્ગાહકસ્સ ભિક્ખુનો તસ્મિં કાયે સતિ સતિસમ્બોજ્ઝઙ્ગો, તાય સતિયા સમ્પયુત્તઞાણં ધમ્મવિચયસમ્બોજ્ઝઙ્ગો, તંસમ્પયુત્તમેવ કાયિકચેતસિકવીરિયં વીરિયસમ્બોજ્ઝઙ્ગો, પીતિપસ્સદ્ધિચિત્તેકગ્ગતા પીતિપસ્સદ્ધિસમાધિસમ્બોજ્ઝઙ્ગા, ઇમેસં છન્નં બોજ્ઝઙ્ગાનં અનોસક્કનઅનતિવત્તનસઙ્ખાતો મજ્ઝત્તાકારો ઉપેક્ખાસમ્બોજ્ઝઙ્ગો. યથેવ હિ સમપ્પવત્તેસુ અસ્સેસુ સારથિનો ‘‘અયં ઓલીયતી’’તિ તુદનં વા, ‘‘અયં અતિધાવતી’’તિ આકડ્ઢનં વા નત્થિ, કેવલં એવં પસ્સમાનસ્સ ઠિતાકારોવ હોતિ, એવમેવ ઇમેસં છન્નં બોજ્ઝઙ્ગાનં અનોસક્કનઅનતિવત્તનસઙ્ખાતો મજ્ઝત્તાકારો ઉપેક્ખાસમ્બોજ્ઝઙ્ગો નામ હોતિ. એત્તાવતા કિં કથિતં? એકચિત્તક્ખણિકા નાનાસરસલક્ખણા વિપસ્સનાબોજ્ઝઙ્ગા નામ કથિતા.
Evaṃ cuddasavidhena kāyapariggāhakassa bhikkhuno tasmiṃ kāye sati satisambojjhaṅgo, tāya satiyā sampayuttañāṇaṃ dhammavicayasambojjhaṅgo, taṃsampayuttameva kāyikacetasikavīriyaṃ vīriyasambojjhaṅgo, pītipassaddhicittekaggatā pītipassaddhisamādhisambojjhaṅgā, imesaṃ channaṃ bojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo. Yatheva hi samappavattesu assesu sārathino ‘‘ayaṃ olīyatī’’ti tudanaṃ vā, ‘‘ayaṃ atidhāvatī’’ti ākaḍḍhanaṃ vā natthi, kevalaṃ evaṃ passamānassa ṭhitākārova hoti, evameva imesaṃ channaṃ bojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo nāma hoti. Ettāvatā kiṃ kathitaṃ? Ekacittakkhaṇikā nānāsarasalakkhaṇā vipassanābojjhaṅgā nāma kathitā.
વિવેકનિસ્સિતન્તિઆદીનિ વુત્તત્થાનેવ. એત્થ પન સોળસક્ખત્તુકા આનાપાનસ્સતિ મિસ્સકા કથિતા, આનાપાનમૂલકા સતિપટ્ઠાના પુબ્બભાગા , તેસં મૂલભૂતા આનાપાનસ્સતિ પુબ્બભાગા. બોજ્ઝઙ્ગમૂલકા સતિપટ્ઠાના પુબ્બભાગા, તેપિ બોજ્ઝઙ્ગા પુબ્બભાગાવ. વિજ્જાવિમુત્તિપૂરકા પન બોજ્ઝઙ્ગા નિબ્બત્તિતલોકુત્તરા, વિજ્જાવિમુત્તિયો અરિયફલસમ્પયુત્તા. વિજ્જા વા ચતુત્થમગ્ગસમ્પયુત્તા, વિમુત્તિ ફલસમ્પયુત્તાતિ. ચતુત્થપઞ્ચમછટ્ઠાનિપિ ઇમિનાવ સમાનપરિચ્છેદાનિ. સેસં સબ્બત્થ ઉત્તાનમેવાતિ.
Vivekanissitantiādīni vuttatthāneva. Ettha pana soḷasakkhattukā ānāpānassati missakā kathitā, ānāpānamūlakā satipaṭṭhānā pubbabhāgā , tesaṃ mūlabhūtā ānāpānassati pubbabhāgā. Bojjhaṅgamūlakā satipaṭṭhānā pubbabhāgā, tepi bojjhaṅgā pubbabhāgāva. Vijjāvimuttipūrakā pana bojjhaṅgā nibbattitalokuttarā, vijjāvimuttiyo ariyaphalasampayuttā. Vijjā vā catutthamaggasampayuttā, vimutti phalasampayuttāti. Catutthapañcamachaṭṭhānipi imināva samānaparicchedāni. Sesaṃ sabbattha uttānamevāti.
આનાપાનસંયુત્તવણ્ણના નિટ્ઠિતા.
Ānāpānasaṃyuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya
૩. પઠમઆનન્દસુત્તં • 3. Paṭhamaānandasuttaṃ
૪. દુતિયઆનન્દસુત્તં • 4. Dutiyaānandasuttaṃ
૫. પઠમભિક્ખુસુત્તં • 5. Paṭhamabhikkhusuttaṃ
૬. દુતિયભિક્ખુસુત્તં • 6. Dutiyabhikkhusuttaṃ
૭. સંયોજનપ્પહાનસુત્તં • 7. Saṃyojanappahānasuttaṃ
૮. અનુસયસમુગ્ઘાતસુત્તં • 8. Anusayasamugghātasuttaṃ
૯. અદ્ધાનપરિઞ્ઞાસુત્તં • 9. Addhānapariññāsuttaṃ
૧૦. આસવક્ખયસુત્તં • 10. Āsavakkhayasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૩-૧૦. પઠમઆનન્દસુત્તાદિવણ્ણના • 3-10. Paṭhamaānandasuttādivaṇṇanā
